أخواني وأخواتي أعضاء المنتدى الرائع من كان بإستطاعته نصحي فليتفضل وجزاكم الله خيرا..
حبيت أكتب وأقول إلي بداخلي لإني أنا في الواقع من النوع الكتوم لاأشكي ولا أبكي
وضعي بحاول أختصره في سطور ....
عمري 30 سنه متزوجه لي 13 سنه تقريبا إنخطبت من عمري 15 لقريبي وكان عمره 22 وكان من تخطيط الأهل إستمرت خطوبتي سنتين بداخلي ماكنت راضيه لا بالشخص نفسه ولا بفكرة الخطوبه والزواج بس كنت صغيره في السن وهاديه ولا اقدر أعبر عن رائي رغم إن أهلي ماضغطو علي بشي ..
في فترة الخطوبه كان دائما يرسلي رسائل كلها حب وشوق واتصالات من فتره لفترة وانا ماكان في اي مشاعر بالعكس نفور دائما منه لا افرح برسائله ولا اتصالاته وبعد سنتين تم الزواج وانا على نفس الوضع
وكان هو يحاول يتقرب مني بكل الأساليب بدون ضغوط او عصبيه أو زعل كنت أحس إنه يحبني جدا
بعد ليلة الزفاف باسبوعين بدأت شوي ألين له وبدأت أتقبله ومر شهر وسبحان مغير الأحوال صرت أحبه مره
وعشت أول سنه من أروع مايكون وبحكم عمله في مدينه بعيده عن اهلي عشت فيها كنت أحن للأهل وأشتاق بس في نفس الوقت مرتاحه مع زوجي واحنا قرايب كنا نروح في الأعياد والاجازات عندهم ..
بعد مرور سنه صار حمل وتعبت بس عادي تعب طبيعي يعني ماكرهت زوجي أو تغيرت عليه بس تعب الشهور الأولى بعدها بدأ زوجي يتغير علي مافي حب مافي إشتياق صار رسمي شويه معي الكلام في الضروري بس اذا محتاجه شي او أبغى اروح مشوار او غدا أو عشا وبس حتى النوم صار ينام في غرفه وانا في غرفه وإستمر وضعنا هذا تسع سنوات عانيت فيها كل ماأحاول أتناقش معه بدون فايده أحيانا أناقشه وابكي وأحيانا بهدوء وأحيانا اكتب له في رساله وأضع له في مكان حتى يقراها ولكن من غير فايده وطبعا ماحبيت أشكي لأحد من أهلي بالعكس كل ماأزورهم أحسسهم إني مستأنسه ومبسوطه ومابينا شي
في خلال التسع سنوات ربي رزقنا أولاد إنشغلت بتربيتهم وفي نفس الوقت كنت أحس بضيق وحزن من وضعي وعدم التفاهم والأنسجام ألي بيني وبينه يلبي كل أحتياجات البيت والأطفال لكن أحتياجي له ماكن يلبيه
أغلب وقته في العمل أو الأصدقاء او النت أو الأنعزال في غرفه يعني يكون موجود في البيت ومش موجود
أنا ماأشك في أخلاقه بس ماكنت فاهمه ليش تصرفاته كذا وهذا الوضع سبب جفوة كبيره بينا بعدها أنا إستسلمت للأمر الواقع وعشت حياتي عشان أطفالي رجعت مشاعري للصفر مايفرق عندي موجود أو مش موجود
أقوم بواجباتي وهو يقوم بواجباته وبس ..
صارت ظروف ماديه له وإضطرينا أنه نسكن عند أهله أقمنا عندهم 3 سنوات في خلالها كان كثير السفر مانلتقي الا مره في الشهر وأحيانا في الشهرين بصراحه طول السنوات هذه أحس بحزن بداخلي ولكن أحاول ماأظهره ماديا ماكان ناقصني شي الحمدلله الضروريات متوفره لي
لكن بعدها مريت بظروف صعبه نفسيه ورحت عند أهلي وإرتحت كثير عندهم وعرفو تقريبا بوضعي بس ماأخبرتهم بالتفاصيل ولي الأن سنه ماعندي رغبه أبدا بالعودة نفسيتي صارت أحسن الحزن والخنقه ألي كنت أحس فيها راحت حاول بالبدايه كثير إني ارجع بس مالي رغبه أبدا وصليت إستخاره ومالي رغبه في الرجوع
وأحس لو رجعت بظلم نفسي وبظلمه ..
سته شهور حاول بكل الوسائل إني أرجع وبعد كذا خلاص أنتهت المحاولات والأن أنا لا مطلقه ولا متزوجه
أحيانا لما يسألوني متزوجه ماأعرف إيش أرد متزوجه ولا منفصله ماطلبت الأنفصال ولا أريد الرجوع
محتاره في أمري والحمدلله على كل حال ...

محاولاته لإرجاعك خلال ال6 شهور كانت مبنية على شو ؟
يعني هل فهم مشكلتك وتفهمها ؟؟
هل اعترف بتقصيره ؟
هل شرح سبب تغيره وسبب إعراضه عنك كل هالسنين ؟
هل عرض أن يصلح وضعه ؟

وإن كان عرض أن يتغير ويصلح وضعه لماذا رفضتِ ؟؟

__________________

إعترف بتقصيره وإعتذر وعرض يصلح الوضع
ورفضت لإني أولا إرتحت نفسيا وخف الضغط علي ولأني ماحسيت برغبه بالرجوع
لا إحساس داخلي ولا مشاعر
وبالنسبه للأسباب إعراضه كلها أسباب ماأقنعتني
مره ضغوط عمل ومره إني أنا كنت صغيره وماعندي خبره وأخطائي كثير وهكذا..

وأولاددك مرتاحين بدون أب يا ألماسه ؟؟؟؟

فكري لقدام شوي لما يبروا ويصيروا مراهقين

حتى لو كان متوفر لك مصدر رزق مريح فالتربية وووجود الأب بحياة الولد والبنت غييييير مهما كان

ما يستحقوا تجربي مرة ثانية يا ألماس ؟؟؟

من رأيي تجلسي مع والدك أو وليك الحالي اللي متحمل مسؤوليتك وعيالك وتشرحي له الوضع كله وتاخذي رأيه ..

قوليله أفكر أعطيه فرصة ثانية عشان الأولاد وأشوف ... لو زانت حياتنا وصدق بوعوده يكون خير ونعمة ولو ما صدق ورجع لأسلوبه الأول برجع عندك ..شو رأيك ؟؟

__________________

+1
مع هذا الرأي قلبا وقالبا
نصحية خالتو كلامها صحيح اسمعيه
وشوفي انتي ما استشرتي الا وانتي مو مقتنعة لوضعك
ربي يهدي سركم ويهديكم

غاليتي الغالية ...
لما الحيرة وقد شرعت لنا اﻻستشارة واﻻستخارة ..
في استشارة الحبيبة *بيتا* الرأي المعقول والتوجيه الصائب ..
فاستخيري الله وتوكلي عليه فهو نعم الوكيل ..
وفقك الله واسعدك في الدنيا واﻻخرة

الأخوات الغاليات أشركم من الأعماق ..
بالنسبه لحيرتي مش في الرجوع أنا قررت إني ماأرجع ولي سنه على هالحال
ماأفكر في الرجوع أبدا
سنين راحت كلها في صد وهجران وحساب وعقاب وتتطنيش ماحسيت بالحياه الزوجيه
أما بالنسبه لأولادي عندي بنت وولد 12 سنه و10 سنين ومن البدايه رفض يكونو معي
موجودين عنده أهله أخواته ثنتين وأخوه وأمه وأبوه وعلاقتي باأهله طيبه متواصله معهم
وأتتطمن على الأولاد ويجون عندي كل نهاية إسبوع ..
أحيانا يعاقبني ومايسمح لهم يجوني يشغلهم بشي ثاني طلعات أو سفر
أنا مش راجعه بس مو عاجبني وضعي معلقه .. أما رجوع ماأفكر فيه