"]السلام عليكم ورحمه الله وبركااته


انا متزوجه وبعد شهرين تقريبا بكمل سنتين عندي ولد وحاامل

بيني وبين زوجي 30 سنه تقريبا او اكثر بشوي

طبيعي زوجي متزوج وعنده عيال وبنات ومتزوجين وعندهم اطفااال


ايجابيته:

حليم جدااا وصبوور حكيم وهاادي متعلم ومثقف رجل اعماال وموظف في المرتبه الثالثه عشر

سلبيااته:
كذااااااااااااااااااب مماااطل من الدرجه الاولى ممسك لدرجه بينه وبين البخل شعره
يعني احسه بخيل بس يستحي يبين هالشي يكره النقااش ويتهرب منه


ايجاابياتي:
طيبه وسلبيه في الغالب اتنازل عن حقي متساامحه جداااا جداااااااا

سلبيااتي:
عصبيه حسااسه وكثيره البكااء اكتم في نفسي وانفجر في وجهه واخرب كل شي


الموضوع اللي بتكلم عنه جداا محوري وماثر علي كثير في حيااتي

تزوجته وكل همي ماايقول انها تبي فلوسي لانها اهانه لي احس لو طلبته بيقول باايعه نفسها او بيحس انه اشتراني
فقررت من اول الزواج مااطلب ولو نقص علي شي اخذ من اهلي وهو مايدري واذا عطاني كويس وان ماعطاني ازعل واسكت


بعد فتره حسيت الرجال استهتر فيني ماايعطيني فلوس مع ان دخله المادي فوق الممتاز ماشاء الله ولا مديون ولا عنده التزامات تهد حيله بس ليش كذاا مااعرف

بديت احس واستنتج ان الرجال خاايف اني طمعانه بعد فتره حسيت انه يبي يدوسني ولايعطيني شي بعد فتره حسيته بخل!!!


بقوول لكم موواقف

اول زوااجي ليله الزواج اخذني ورجعني الشقه ولافندق ولاشي طبعا انصدمت قاالي اول مادخلت الشقه اني تراني ماوديتك فندق لان الفنادق فيها تصوير وبالذات لغرف العرساان برر موقفه لانه حاس انه غلط عليه يحطني بالشقه على طوول انا ماسالته ومشيت الوضع

جلست بالشقه يمكن اسبوعين وهو يصلي ويجي ولانطلع ولاشي ولاساافرت وبرر موقفه ان الدنيا حر وان امه تعباانه وانه ماايمدي نساافر مقبلين على رمضاان بعد العيد اسفرك وبرضوه كذب علي

بعدها جااء العيد واعطااني 3000 ريال للعيد طبعا مااطلبت منه بس هو جااب من نفسه
بغيت انجلط من الفرحه قلت كويس طلع كريم ويبي يعوضني عن موضوع السفر وكذا

طبعا صرفتها وشريت لي وجبت له هديه قاال من ربي خلقني مااحد اب لي هديه حتى زوجتي وعيالي اعطيهم فلوس وهدايا ولااحد يذكرني

ماانسى فرحته فيهااا !!!


عدى العيد وجت الجامعه ومصروفي لليوم 50 ريال بس يعطينيها بدون نفس او يحااول يطلع بدري من البيت عشان كاانه نااسي وكنت اطنش مرات اروح بمصروف ومرات ببوكي 10 رياال

جااء عيد الاضحى وطلع الوجه الثااني قاال لي قبل العيد بااسبوعين كيف العيد عندكم

قلت احنا العيد استراحات وجمعه ووناسه ورقص ونشتري لبس وانواع الكشخه انا احسبه يسولف معي

قاال لا احنا العيد عندنا عيد لحم تعيدين لو ببجاامتك ولا لبس قديم مااعندنا نزله للسوق ابد

علمت امي وجلست تهاوشني قالت مالك دخل بعيدهم قولي انا ماتعودت على كذا وخليه يعطيك فلوس للبس
طبعا جلست اتغصب عشان اطلبه حتى اطلبه ووجهي بالارض مستحيه احس بنفس شعور الشحااذ احس كااني عند مسجد ولا اشاره احس اني مكسووره ومهاانه يعني لبس عيد وهو مقتدر مو محتاج اسااسا اطلب

المهم رفض رحت لاخته وبكيت عندها قاالت انا اعطااني 2500 وخليه يعطيك غصب
يووم جااء وجلس قالت اخته ترى بنطلع للسوق نتقضى عطها مصروف العيد
نزلنا للسوق وعطاني 500 ريال

والله كنت امشي ومااشووف دمووعي على خدي مااعرفت اشتري
السوق غالي واتوقع البنات يعرفون وش معنى مااركه؟
الشنطه بكم والجزمه(اكرمكم الله) والفستان والاكسسواار
يعني اقل طقم وبيكون كشخه ويليق بمستواه ماايقل عن 800 ريال

طبعا مشيتها وجبت تيور وبلوزه وجزمه واكسسوار كلفتني يمكن 480 وفواتيري معي
يووم جاء قبل العيد بيوم قلت عطني 150 بصلح شعري وحواجبي بغى يااكلني
وال 500 وين راحت واوريه الفواتير قاال وليه تشترين غالي

روحي الهرم السدحاان ومحل عندنا زي ابو ريالين وش اللي مطيرك للماركه
قاال والله انا عطيتك 500 ودبري انتي نفسك

جلست ابكي ارسلت لي امي فلوس المشغل ورحت حسبته بيزعل لاجيت بطلع للمشغل وبالعكس ماقال شي ولاقال من وين جبتي الفلوس

يعني يمكن لو يصير في بوكي 20 الف ومن شبااب مايهمه اهم شي مايصرف

داايم على لسااانه دبري نفسك


موقف 2

دخلت بيتي وعندي 6 ملاعق 6 اكواب 6 فناجيل طبعا يقول ان حرمته اللي قضت لي وكل شي اقل كميه واردى نوعيه

قلت ودني السوق بجيب مواعين مااعندي شي ماافيه صواني كيك ماافيه اكواب حلوه مافيه بياله للحريم كل شي باايخ وبسيط

ورفض رفض نهاائي وبرضوه من غبائي رحت وشريت من فلوس امي واعجبته ولاسالني من جابها صار يقول لاجو اخويااي قدمي لنا فيها

طيب دامك تحب الزين ليه كذاا

المواقف كثيره حتى لو رحنا العثيم وبغيت شووكلاته يرفض يقول متزوج بزر ولا حرمه وهو يجيب لي شوكلاته بس من ارخص نوع بس سنكرس وعيال عمه لو اموت ماجابها


عمري ماطلبته فلوس الا نشف دمي لبس عيد زواج حفله ملكه والمشغل نهاائي ماايعطيني له ولاريال
وداايم ادبر نفسي


كذبه زاايد عن حده يعني يقول بروح اجيب لك مثلا اشتهيت حلاو بتمور الصالحيه وقال بجيبه ورجع لي قال المحل مقفل عندهم صياانه ودقيت ع المحل لقيته مفتووح

يقول انه يموووت فيني واني مميزه عنده عن الغير وانا احس بحبه لي بس العائق بيني وبينه الماده

قبل 3 شهوور جلست وقعدت اناقشه قلت شوف انت مليون شغله في بيتي اجيبها من فلوس اهلي ولو كنت ابي اهلي يصرفون علي ماتزوجتك كاان تزوجت مسيار

انا ماابي فلوس بدون سبب ولا ابي رفاهيه ابي الاساسيات وابي مصروف

قال كم تبين؟

الله يقص لسااني على المبلغ الغبي اللي طلبته
قلت 1500 من غباائي

قال ابشري وفرحت وبغيت اتشقق من الوناسه

اعطانياه قاال هذا فيه كل شي بقاله مصروف ولدك حليب حفاضات رضاعات ملابس
وهدايا للحريم زواج ولاده ملكه احد مريض مااعاد اسمعك تقولين ابي ريال واحد

قلت اوكي

يووم جربت الوضع طلع الموضوع دماار و1500 مااتسوي شي

البقاله 300 بالشهر
ولدي 800 ريال حليب وحفاضات ورضااعه
المشغل 200 حلاوه وشمع وهالحركاات
بقى معاي 200 هذي مصروف لو بغيت حاجه مطعم اهدي اسوي اي شي

رجعت كلمته قلت شيل مصروف ولدك حق الحليب والحفاضات عشان اعرف اتصرف
كذا ماافيه مجال اجيب لبس للولد او انت جيب له لبس
قاال عاجبك ولا الغي المصروف وانا اجيب كل شي

قلت لا مو مشكله عااجبني

يوم جاء الشهر اللي بعده ماعطاني المصروف قال والله كنسلت انتي لاعبه ولاعندك حسن تصرف

صار يجيب اغراض ولده بس بدون لبس والعاب حتى الجلاسه المشايه كلها هدايا من امي العربيه ماايجيب لين مااهلي يرحموني ويجيبون

كل شي خرااابيط

قبل فتره صااير كل يومين يجيب معاه 4000 او 5000 الاف ريال

انا من كثر الضيقه قررت اخذ من دون ماايدري

وحاااااااااااااولت مليون مره ولاقدرت والله عمري مامديت يدي في جيبه من تزوجنا الا اذا علمته
عجزت استصيغ فكره اني اكون حراميه مع العلم الاغلب يقولون لي خذي بدون مايدري لانه ظالمك بالمصرووف

المصيبه لو على فرض تجرات واخذت اكيد بيعرف ولو عرف كيف يكون شكلي عنده


تكفوون ابي حل احسه بااسلوبه بيحدني ع الحرام اسرق اتعرف على شخص يصرف علي


قهرررني من تزوجته وانا اقل وحده في البناات

راااتب زوجي الاسااسي 20 الف وراتب زوج اختي 8000 الاف هي عندها 6 اطفاال وانا عندي طفل واحد
وماشاء الله كل شي تبيه عندها

من تزوجت وداني المطعم مرتين والسبب الفلوس من تزوجت رحت معاه اتمشى للمنتزه مره وحده
من تزوجت سفرني لمكه بعد سنه زواج و3 ايام بس


وكل المصيبه الفلوس

احس لو اجيب فلوس واقول تعال نساافر لندن بيواافق


ماادري هو بخيل هو ممسك هو خاايف اني العب بفلوسه هو مسحوور

امه خواته زوجته كلهم بينهم مشااكل وكلا يتحدى الثااني بالسحر

يعطيهم كلهم الا انااااااااااا

عنده بنته متزوجه اذا عطاني 500 عطاها بدون ماتطلبه وهي مستغلته داايم تاخذ منه واذا قلت ليه تعطيها وهي متزوجه وانا في ذمتك ماتعطيني

يقول والله رجاله مو بزين وانا ماابيها تتطلق واغريها بالفلوس عشان ماتحس بنقص

طيب انااا


طلبته ايفون لمده سنه وطلعت بولدي من الا ربعين ولاجاابه وحلفت امي تشتريه واني اقول للناس هو اللي جابه

وبعد ماشريته بشهر راح واشترى لنفسه ايفون بكيت من كل قلبي قال انا ماقصدي بس عجبني يوم شفته معك


يااناس تعبت ابي حل منطقي مااودي ادخل اهلي ابوي واخوي مايعرفون انه مقصر بس امي وخواتي
مابي ابوي يندم انه زوجني له ويحس بالذنب انه زوجني رجال كبير


انا احبه ولا ابي ابعد عنه ولااحب المشااكل بس على كثرمشااكلنا الا اني امررها بس هالمشكله مااتعدي نهاائي

يعني الا انه احد ماايعطيك وهو معاه

تدرون وش نكتت الموسم يوم جيت اطلب لبس الشتااء قاال البسو لبس العااام
خخخخخخخخخخخ طيب ولدي مااكان فيه العام والله مادري من وين يفكر
عااد يوم قلت البس انا حق العام وولدك

قاال انا اجيب له راح جاب له يمكن 10 بدلان اغلى وحده 27 رياال

يعني يومه رخيص كاان جاب 50 بدله ع الاقل مو كذاا

ولدي كل شهر يتغير جسمه ولبسه يضيق عليه او يقصر ولا قلت بجيب له يجلس يهزئ فيني ويعايرني اني بنت فقر وان بنات الفقر مااقد شافو نعمه ويحطون فلوسهم بالخلاقين



ادري طووووووووولت بس والله المواقف اكثر من كذا

انا لازعلت جلست اتناقش مايعطيني وجه وعقب اجلس اعصب واسب وعقب ابكي وانام واصحى والاقيه زعلانه واجلس ضاايق خلقي وارضخ واساامحه


انا مااحب اقابله وانا زعلانه اتنازل عن حقي لانه مو كل الوقت لي ولا احب الوقت يعدي بنكد استغل وجوده عندي عشان اسعده بس هو مااينفع معه


حتى اغراض البيت يجيبها بالحبه ولاخلصت يحقق معي وين راحت احسه مشكك اني اودي لاهلي


والله يحقق مع الريال لحد مايوصل مؤسسه النقد ويرجعون يصرفونه


اااااااااااااااااااااااااااااهـــــــــــــ بس

الحين ابي حل عاجل

لان وراي لبس العيد
و زواج بنت خالتي طبعا يقول البسي فسااتينك القديمه مع العلم اني حاامل الحين وفساتين الاولى ماهي
حقت حمل يقوول عادي وسعيهاا بالله وين اوديه هالرجال؟

وراي ولاده بولدي اعطاني مصروف الولاده 1500 فيها لبس البيبي ولبسي وسرير لي وللبيبي واغراض النفاس ولبسي لاطلعت من النفاس وزعل يوم قلت مااتكفي

هالحين ماابي اللي راح يتكرر ابي يحترم ان لي اشياء ولبس ولي طلباات لازم يلبيها طالما ماهي اساف ولاحرااام


كم مره قلت له لاتحط لي بيدي فلوس انزل معي واشتر لي اللي ابيه بس رااافض الفكره نهاائي


تكفوون ابي رايكم او احد قد جرب الاسلوب المناسب مع الرجاال

ولو ابي اطلبه مصروف كم اطلب؟

شاااكره لكم[/COLOR]