السلام عليكم .. بداية محتاجة احد يسمعني ويفهمني , أبغى الصراحة بأقصى درجاااتها ..
همي ثقيييييل , ومصيبتي عظيمة ,, وسري اللي له اربع سنوات مكتوم تعبني , بقول حكايتي مع :
حبيب قلبي وروحي وكل شيء بحياتي ..
ماضاع عمري معك لوضاع ... ماضيــــــــه وإلاّ مقابيله
.. .. ..

في يوم طلعت من الجامعة , كلمت أخوي عبدالله عشان يوصلني البيت , رد علي كالعادة : تعبااان كلمي عبد

الهادي , وادق على عبد الهادي ويرد علي : مو كل شيء علي أنا خلي عبدالله يجيك , وأرجع أدق على عبد

الله ويرد علي : قلت لكِ تعبان قولي للحيوان اللي جالس زي قلته يجيك ..

وتمر ساعة , ساعتين , وكل واحد فيهم يحولني على الثاني ..

(سيناريو يتكرر كل يوم كل يوم .!)

- صرت معروووفة بالجامعة أجلس بعد كل محاضرة ساعتين ثلاث زيادة بسبب أخواني , كم بنت عرضت علي

خدماتها بتوصلني , لكني كنت أرفض رفض قاطع .! لا يمكن أروح مع أي حد غريب ابدا ..

وبيوم من أيام رمضان , خلصت محاضرتي الساعة 1 ظهراً , وكلمت أخواني أكثر من مرة , وكل واحد فيهم

يعاااند الثاني على حسابي , إلى ما جت الساعة 4 ونص العصر , ما بقى على المغرب شيء .! وتمر

جنبي خلود بنت جارنا , وتقولي : أنتِ إلى متى جالسة يالله معي أنا رايحة , وفعلاً ما كان عندي خيار ثاني ,

رحت معاها ..

( وكانت هذى المرة الأولى اللي أروح فيها مع أحد غريب بس ما كنت المرة الأخيرة)

توااالت روحاتي معهم , بشكل شبه يومي وقويت علاقتي بخلود وصرت ازورها ببيتهم مع إني من قبل ما كنت

أزورها ابدا , كانوا غييييير عنا في كل شيء , المستوى المادي , والإجتماعي , والأهم من هذا كله ترابطهم

كاسرة واحدة ..

كل مرة اروح فيها معهم كانت خلود تتكلم مع أخوها حكتله كل شيء صار معها في الجامعة , وهو حكي لها

وش صار بدوامه , وتكلموا بأشياء كثيرة , بتفاعل وإهتمام , شيء غرريب جداً بالنسبة لي , أنا واخواني مابينا

أي حوار إلا هواش ما بينا أي تفاهم واي عاطفة ابد ..

- عرفت عنهم اشياء كثيرة , وخاصة أخوهم وحيد , كله يتكلمون عنه , وحيد راح وحيد جاب وحيد سوى , وحيد

وحيد, صار أسم وحيد مألوووف عندي , عرفت اسمه قبل أعرف أوصافه , إلى ما يوم سألتهم : وحيد هذا

ماعنده شغل ؟

ضحكت خلود وقالت : إلا عنده بس وقت فراغه يوصلنا ويشوف طلباتنا ويكون معنا ..

وحيد ما عرفتيه اللي يوصلنا الجامعة , معقول ما شفتيه ؟ قلت لها لا والله ما شفته ولا مرة طالعت فيه ابداً

ابداً ..

وبيوم طلعت بدري من الجامعة كلمت خلود عشان اروح معها قالت لي : انا برا هيا تعالي بسرعة , طلعت من
الجامعة وركبت معهم , قالت لي خلود : أنا توي جاية من البيت , روحي مع وحيد يوصلك , نزلت وخلتني لحالي مع أخوها وقالت له وصلها ..!!

خجلت كثير ولا طالعت فيه , والشهادة لله إنه هو بعد ما طالعني ابدا , ولا كلمني نهائيا , كان يسمع الإذاعة , وصلت البيت وقلتله مشكور , رد علي العفو أختى وراح بيتهم ..

دخلت بيتنا لقيت أخواني جالسين قالوا لي غريبة صايرة تروحين وترجعين بدون إزعااج رديت عليهم : الله

يخليلنا وحيد ماني محتاجة لكم ..

صرت أروح معاه وارجع معاه , اسمع كلامه ونقاشاته مع اخته خلود , شخص راااقي جداً , مثقف جداً , رزين فيه شهامة ورجولة ناادر مانلقى مثلها , وتوج هذا كله بوسامه فااائقة ..!
كنت أتمنى وانا معهم إن الشارع يزدحم أكثر وأكثر والساعات تطول وتطول .. كل هذا وهو ماطالعني بعد , ولا درى عني ..؟!!

بدا قلبي يخفق له , ويسعدني مجرد إني اسمع اسمه , كل يوم اسولف لأختي عنه وتقولي :

يا مي أحلمي على قدك ..! شخص مثل وحيد مركز إجتماعي , وظيفة مرموقة , دين أخلاق , وسامه , فيه

مليوون بنت تحلم فيه , وش اللي يخليه يطالعك أنتِ ..؟!

أرد عليها : يكفيني جمالي , لا يا مي الجمال ما يكفي لازم مركز لازم حسب لازم .. خلاص خلاص أنا أعرف

وحيد أرقى من كذا بكثير أعرف تفكيره زين ..

- جت أمي بيوم وقالت : يا مي عمك وولده بكره جايين يخطبونك رسمي , قلت لها : يمه أنا ما أبغى أحمد ,

مليون مرة قلت ما ابغاه , ما يناسبني , فكره غير عني , وبصراحة مايستاهلني ابد , ردت أمي علي : أبوك

معطيهم كلمه , قلت لها لو أموت نفسي ما تزوجت أحمد , وصار اللي بغيت أبوي زوج أحمد لأختي بعد

هواش ومشاكل ..

وبقيت أنا لحالي , أحلم بوحيد كل يوم ..!

(مرت الأيام وحب وحيد يكبر معي , وتخرجت وصرت ما أقدر أشوف وحيد إلا من شباك غرفتي , أطل عليه وهو رايح دوامه وراجع , صرت اعرف الساعة كم يطلع ؟ والساعة كم يرجع ؟ وصار هو شغلي الشاغل ..
عشمت نفسي كثير , وعشت باحلام مدري عن صحتها ؟ لكن ما كان فيه أي تباشير باي شيء , تجيني احيانا لحظات يأس وتسود الدنيا بوجهي ..)

- إنقطعت عني خلود فترة , كلمتها قالت لي أنا آسفة إنشغلنا بخطبة وحيد ؟!!

صدمة صدمة كبيرة لي , وحيد بيخطب , وأنا وإنتظاري كل هالمدة وأحلامي راحت أدراج الرياااح .. قفلت

الخط وما سألتها مين البنت للي بيخطبونها ؟ بكيييييييت بحرقة حراام اللي يصير , رجعت خلود وكلمتني

وقالت لي إنهم بيزرونا بعد يومين ...

( صراحة هم ما غلطوا معي , ما وعدوني بشيء أنا اللي أوهمت نفسي وصدقت )

- زارونا زي ما قالت مع أخوهم وحيد وكانت مفاجأتي . أنا اللي بيخطبونها له .. أبوي اللي مايعجبه العجب تمدح

بوحيد وأخواني بعد إنعجبوا فيه .. الكل يعرفه بالحي بأخلاقه ..

جاء عبدالله وقالي : يا مي وحيد يخطبك وش رأيك موافقة ؟

قلت له : هذا سؤال تسألني إياه ؟ أكيييد موافقة , وما دريت إن أبوي وراه , قالي : يا مي إستخيري , سكت وما

رديت , أبوي ما يدري إني سنين وأنا أدعي الله يجمعني فيه ويقولي الحين إستخيري ..!

ملك علي وحيد , أخييييييييراً صرت له وصار لي " ما ظنت كان فيه بنت أسعد مني يومها " , جلست معه لحالنا , قلبي يخفق بقوووة وإيديني ترررجف , ما قدرت أطالعه قالي : رفعي راسك , أنا خلاص الحين زوجك , مو سواق عشان ما طالعيني " يقصد يوم كان يوصلني " ..

( ما كنت مستوعبه إنه خلاص ما عد فيه حرج يمنعنا من بعض , وأني أقدر اروح معاه لحالنا ما نحتاج وجود خلود , وأني ممكن أجلس جنبه مو وراء , أطالعه من قريب أشاركه نقاشاته مو مستمعه زي أول )

وأروووع شيء يوم عرفت إنه كان يحمل نفس شعوري يحبني , يفكر فيني , يحلم فيني زي ما أحلم فيه , أعني له شيء مهم ..

قال : أعجبت بأدبك خجلك إجتهادك رغم كل الظروف , كنت اسأل خلود عنك وعن نتائجك , واليوم زاد إعجابي بحلاك..!

( مرت أيام من أروع أيام حياتي شيء خرااافي أحلى من الخياال )

جاء يوم الزواج , حسيت الموضوع جد , خفت مادري لييش ؟ كيف بكون معاه ببيت لحالي ما معي أحد إلا

هو ؟ وش أقوله ؟ وش يقولي ؟ كيف أنام معاه بفراش واحد ؟

وحيد شيء كبييييير أحسني قدامه أضييع ..!

وليلة الزواج بوسط الخوف والخجل والفرح , كانت صدمتي ؟؟ وحيد ما جاء العرس..

أبوه يدق عليه وأخوه ولا يرد , أبوي وأخواني وأمي وخواته , المعازيم راحوا ووحيد ماجاء ..

رجعت بيت أهلي أتعس عروس وأنا اللي قبل ساعات طلعت منه أسعد عروس ..

- جانا خبر إن وحيد سوا حادث وبالمستشفى وحالته حرررجه , دخل غيبوبة طووويلة دامت ثلاث أشهر وهو ما

يدري عن اللي حوله ..؟! كنت يومياً أزوره مرتين , عندي أمل كبير إنه بيصحى ودي أكون جنبه , ومنعوني

أجلس معاه ..

قالي الدكتور اللي مللته بأسئلتي : يا بنتي كل شيء بيد الله , لكن حالة زوجك ميؤس منها , جلستك ما منها فائدة , أدعيله بالرحمة , كان دائم يكرر علي هالكلمات ويروح , حسيت فيه شيء ما قاله لي , فيه شيء بكلامه ناقص , مجرد مايوصل عنده يسكت ويروح ..!

بس ما هتميت كثير كنت واااثقة إن الله بشافيه , مرت الأيام والأسابيع والأشهر أثقل من الجبال علي .. أحس بأمل أحياناً ويجيني يأس أحياناً .

- أمي قالت لي : لا تروحين عنده خلاص , وإن طول بالغيبوبة اكثر , بنطلقك منه .. وشلون طلقوني منه وأنا

ما بعد عشت معاه , وشلون حلم عمري يروح بلحظة بعد ماصار حقيقة ..؟!! والله لو أبقى طول عمري كذا ما

تطلقت منه ..

الكل كان ينتظر وحيد يموت , وانا الوحيده اللي كنت أنتظره يصحى ويطلع ..!

الله بخاطري وصحى وحيد من غيبوبته وتشافى وطلع من المستشفى ورحنا بيتنا, فرحتي ما تنوصف لكنها ما

كملت ابد , وكان الوقت الظهر اول يوم نجتمع فيه ببيتنا , سألني سؤال غريب : قالي الدكتور وش قالك فيني

؟ رديت مافيك إلا العافيه , قالي لا جد وش قال ؟ قلت له ما قالي شيء ..! ناظرني نظرات حزينة جدا جدا

وسكت ما تكلم

والعصر قالي : يا مي أنا حبيتك بصدق , ولا بيوم فكرت بغيرك , ووقفتك معي ما أنساها , وووو إلخ
الأوصاف اللي عرفت إن بعدها بيكون شيء كبير , قالي : انا ما نفع لكِ والله يوفقك مع غيري وما بيننا نصيب ..!

حرااااام عليك ياوحيد , بعد كل هالإنتظار بعد كل هالعشق بكل سهولة تقول ما بيننا نصيب

رجعت بيت أهلي مطلقة بدون لا عرف السبب ؟؟! سألتني أمي وش فيه وأبوي وأخواني ؟ ما كان عندي أي جواب .. بكييييت بألم بإحساس مظلومة مخدوعة ..!
جتني أمي سألتني : وحيد دخل ؟! قلت لها لا .. راحت من عندي .. كان إحساس فضييع الله لا يعديه على أى بنت ..!

أمي قامت تدعي عليه , قلت لها يمه دخيلك لادعين عليه ..

- مر إسبوع وكلمني قال إنه جمع أغراضي وبيجيبها قلت له ما ابغى شيء تصرف فيها إرمها بالزبالة , قالي :

مي لا تظنين فيني ظن سيء , أنت تعرفيني ماني نذل وحبان ولا بكون بيوم حقير , إفهميني أنتِ دايم

تفهميني بدون لا تكلم أفهميني هالمرة بعد ..! واقسم لك ما تزوج بعدك ...

أعرف كل هذا أعرف إن المرجله والشهامة كلها فيك , ودي أشوفك دقااائق بس , رحت له بيته , يقودني

عشقي المجنوووون له ..! سألته بالله يعطيني عذره عشان أبرر لنفسي فيه , وارتاااح ..

( عرفت سره , اللي يفرق أي زوجين ما بينهم عشق مثلنا , واللي ما يتحمله أي رجال بالدنيا , إنصدمت فترة

مو عارفة وش أقول ؟ لكن كل الله كنت متأكدة منه إني لا يمكن ابعد عن وحيد ابدا ابدا , مصيري هو

مصيره , لأن ببساطة روحي هي اللي عشقت وحيد , وحيد من عرفته وهو يخاطب روحي ماهو

جسدي ..رجيته يرجعني ودي أكون معاه ويكفيني )

فرح فيني أكثر من فرحتي فيه , حضني بقووة وهو يقبلني قبلات مشتااق , رجعنا لبعض ومرت سنة وسنتين , وحياتي أروع ما يكون عشقته عشق يفوق العشق نفسه وكانت هذى مصيبتي ..؟!
كل ليلة أنام بحضنه , ياااااااه ياما حلمت بهالشيء ويوم صار , صار نااقص كثييير , بس ماعليه يكفيني قربه ماني طماااعة ابد ..


رضيت لكن كانت تعذبني نظرة الإنكسار بعينه والحزن الكبير اللي كان يقاومها بشدة ويحاول يخفيها عني لكن

تجيه لحظات يضعف بشدة ويبكي على صدري بحرررررقة

أكره هذى اللحظات اللي تعذبني زي ما تعذبه بالضبط ..! أكرها حييييييل ..

حياتنا قدام الناس كانت مثاااالية جداً جداً , الكل يحسدنا عليها , ويحسدوني انا خاصة علي وحيد , ياما

سمعت تعليقات من صديقاتي يقولولي عيالك بيطلعون حلوووين زي أبوهم آآآآه على ابوهم ..

الكل معجب بوحيد وبشخصيته وحياته ما حد داري إن وحيد يعاني أشد المعاااناة وأقساها

- أمي أقلقها تأخر حملي ومصرة إلا تعرضني على طبيب , مسكينة أمي ما تدري إني إلى الآن بكر , لو درت

ما تركتني لحظة مع وحيد ..

أختي زوجة أحمد اللي رفضته من قبل , صار عندها ولدين , وأمي يوم تشوفها تدعيلي وتقول عقبالك يا

مي ..
( ما تدرين يمه عن سر مي , أحس بغصة كبيرة على وحيد وعلى نفسي )

وحيد ما قدر يتحمل أكثر , خاصة يوم يشوفني قدام المرآية يقول : حراام عمرك يضيع معي , حرررام كل

هالحلا يروح هدر , وش ذبك تنحرمين بسببي ..؟!

أنا نااقص عايش معك كأني صديق مو زوج .. أنتِ حياتك ممكن تكون أحلى من كذا ويصيرلك عيال إلى

متى بتصبرين ..! أنا جالس أظلمك وهذا حراااام ..

عمرك ياوحيد ماكنت بعيني نااقص ابد أنت فوق الكل وما حد يساويك عندي ..

قلت له الف مرة إني راضيه فيه كصديق واغلى صديق , وراضيه كذا .. ما قتنع وقالي :

أنتِ طالق ..! رجعت لأهلي وعندي أمل ارجعله , أدري فيه يكابر وهو بعد ما يستغني عني , الكل يستغرب

ليش تطلقنا وإحنا ينضرب بحياتنا المثل ..!

أمي قالت طبعاً طلقك عشان يتزوج ويجيله عيال , لا يمه طلقني عشان أنا تزوج ويجيلي عيال , كرررهت

الرجال بعده وعافتهم نفسي , كرهت العيال وما أبيهم ..

مررت ايام العده وما بقي إلا إسبوع , طحت مريضة وكله أهذى فيه وما على لساني إلا : رجعولي إياه ,

رجعولي إياه , أمي عندي تبكي وخالاتي وابوي ,, فقدت وعي وما عدت حاسه بشيء ,, لكن حسيت بلمسه أعرفها ززين ’ لمسة وحيد وهو يمسك ايدي ,

ريحة عطره , قربه مني , وهو ينادي علي بصوته المبوح :

مي مي , رجعت أحس بس مو شايفة شيء , قالي مي موافقه ترجعيلي .؟! هذا املي بالدنيا ياوحيد هذى كل أمنيتي واحلامي ومطلبي ..

رجعنا لبعض وعايشين رغم كل الظروف ..!

( وحيد هو نصيبي اللي رضيت فيه , هو صديقي وكل شيء بدنيتي , بس وحيد ما يبغي يظلمني على قولته , بيطلقني , عشقي لوحيد أشقاني وبهذلني , لو تطلقت وتزوجت بعده , وش بيكون ردة فعل زوجي لو لقاني بكر بعد زواج أربع سنواات ؟! وش بيقول على وحيد ؟! بيسكت ولا بينشر سرنا للناس ؟! وانا اصلاً ممكن اقدر اتزوج ؟!!)

خلني بحماك وأرحم لا تجور .... غيبتك لحظات تهلكني هــــــــلاك
من يقول إني على بعدك صبور .... والله اللي ولع القلب برضــــــاك
الكلام اللي جرح منك الشعور .... زاد حبك وأرخص في قلبي سواك

__________________
السعادة هي :
الإحساس بالأمان والمشاركة مع الشخص الذي يخاطب
" الروح قبل الجسد "

دموعي كالنهر

هل هذه حقيقتك أم أنني أقرأ

قصص من قصص الخيال

وخالقي تأثرت وبقوة

لا إله إلا الله.
فعلاً! هذه الأحداث تقترب للخيال.
هل هي قصة حقيقية أو خيالية؟!.
لست أدري ولماذا لست أدري؟...لست أدري!
:::
الحلول هنا ليس لها مكان خصوصاً إن وصل العشق إلى حالى التلبّس الكلي.
لا قول عندي هنا لكنه القلب وأحكامه.
إن كانت قصتك حقيقية فاسأل الله لك الثبات، وأن يربط على قلبك.
:::
عذراً لهذا الاقتراح الممجوج لكن ما رأيك أن تشغلي ذهنك ووقتك لإخراج هذه القصة في رواية عملاقة وتحفة ادبية مزخرفة يقرأها الآلاف من الناس؟
أرجوكِ فكري في هذا الأمر؛ لأني أتوقع النجاح لها مسبقاً بسبب خروجها من القلب وأعماقه.

استحلفك بالله حقيقة ام خيال ولا تنسي ما يلفظ من قول إلا لديه رقيب عتيد بعد ردك ان شاء الله راح ندعيلك علي صراحتك التامة وراح تجدي الحل ان كانت القصة حقيقية باذن الله
تحياتي

__________________
اللهم اني اعوذ بك من درك الشقاء وسوء القضاء
اللهم اني اعوذ بك من زوال نعمتك وتحول عافيتك و فجأة نقمتك ومن جميع سخطك امين رحمتك يارب ان لله وان اليه راجعون

وينها صاحبة الموضوع

فهمينا اختي
هل قصتك حقيقية ام انها من نسج خيالك

__________________

[QUOTE=عشقك جنون;2585573]السلام عليكم .. بداية محتاجة احد يسمعني ويفهمني , [SIZE="5"]أبغى الصراحة بأقصى درجاااتها ..
همي ثقيييييل , ومصيبتي عظيمة ,, وسري اللي له اربع سنوات مكتوم تعبني , بقول حكايتي :

وعليكم السلام ورحمة الله وبركاته

يا أخوان شوفو صاحبة الموضوع وش كاتبه فوق

بقولكم حكايتي

والله يا اخت عشقك جنون إن كانت هذي القصه حقيقة فأنا لم أسمع ان في انسانه تحب بهذا القدر

الا في قصص عتر وعبله وقيس وليلى

بعدين أحس ان قصتك ينقصها كثير تفاصيل

ماظن في ناس بها الطريقه

احس ان القصه مادري كيف

لكن الله يعين وحيد خليه يتعالج في دكاتره كثير هذا تخصصهم وإن شاء الله يكتب له الشفاء على يد

اي طبيب منهم

لايهمل نفسه لكل مرض علاج

والله يعينك ويوفقك انتي و وحيد

__________________

قصة حزينه واسلوب رائع واحلى عشق بالدنيا عشق مجرد من الانانية

__________________

السلام عليكم ورحمة الله وبركاته يااااااه الله يكون في عونك حبيبتي وربنا يعوض صبرك خيررر إنت إنسانة عظيمة إن شاء الله أعطيك حل حبيبتي من ناحية البكارة اذهبي للدكتور عميلية بسيطة جدا جدا وانت تفضيها طبعا هذا سر بينك وبين زوجك أشوف تقولين إيش في هالحل بعدين أعطيك الحل الثاني

انتظر ردك على القصة حقيقة ام خيال

والحمد لله انك وصلتي لهذا المنتدى

يوجد هنا أعضاء وعضوات آرائهم سديدة

وإن شاء الله يوصلون معك لحل

ننتظر ردك