أهل المشورة والرأي ولا يهونوا الباقين..زوجي سافر قبل فجر العيد بساعتين ؟؟ اختكم enjil
سافر ليلة العيد ( قبل طلوع فجرالعيد بساعتين )
أعزائي أعضاء هذا المنتدى الراقي ...
مارح أبدأ كلامي بالشكوى والتهويل بس يمكن أطيل عليكم اعذروني ..
الحكاية بدأت من عطلة الصيف حين سافرت مع أهلى أنا وزوجي ولكن لكل مسكنه المستقل . في هذه العطلة انقلب زوجي أصبح كثير السهر مع اخواني الشباب وغير المتزوجين أصبح متمرداً علي بشكل كبير حيث أنه لا يأبه لزعلي وأصبح يطنشني كثيراً (كان مايحب السهر إلا معي والطلعة مايتهنى فيها إلا وياي وفجأة انقلب يحبني ويعاملني زين ولكن يقولي خليني براحتي أطلع وأروح وأجي وأنت بعد روحي لازم وياي محد ماسكك.. وهالشي مالاحظته إلا لما اندمج مع اخواني.. كأنه جاه غسيل مخ ماأدري أيش اللي صار له) رجعنا للبلد وأنا ماطلعت أنا وياه طلعة خاصة ولا جلسنا مع بعض قلتله أبيك تمشيني تمشية خاصة لوحدي قالي أبشري ولا يهمك وعد مني زوجي قلبة طيب وحنون واحنا متزوجين عن قصة حب طويلة ولنا متزوجين10سنوات من عمري18مافي يوم خف حبي له أو تغير وهوكذلك لما نكون مع بعض يحبني ويدللني ما كأنه اللي سافر معي بالعطلة تغير فجأة مو حبه لأ .. تصرفاته وشغفة بالطلعة والسهرمع اخواني ...
اللي صار وكان صدمة بالنسبة لي ...........
لما انتهت الدوامات في رمضان هذا وعطلنا جابني عند أهلي على طول لأن ماعندي خادمة ويقولي يكفيك تعب أبيك ترتاحين حتى وقت رمضان رغم معارضتي كان يجيب السحور من برا غصب عني بس علشان ما أتعب بالمطبخ كان يقولي أي جهاز تحسينه يريحك أجيبه بس لاتتعبين هذازوجي وهذي حياتنا موشي جديد علينا وأنا أبادلة نفسس الدلال و أعطيه كل ماأملك من حب(حب متبادل بيني وبينه )
لا أطول اللي حصل إنه جلس معي إلى يوم العيد الحمد لله مبسوط مع اخواني وأصحابهم ووناسة كم مرة يحاول يمشي لأهلة علشان يعيد عندهم(منطقة أهله وبيتنا تبعد عن أهلي 400كيلوا)بس يقولي والله مكسل مالي خلق وفجأة ليلة العيد قالي مورايح لأهلي أعيد عندكم وأمشي.. رحت شريت أجمل اللبس غير اللي عندي كيف حبيبي يبي يعيد عندنا ؟طرت من الفرحة . أول مرة يكون عندنا صبح العيد !(بالعادة يعيد عتد أهله أول يوم ويمشي الظهر يجينا علشان نجلس يومين بعدها وياخذناونرجع لبيتنا )
اللي حصل جاني بالليل وقالي بسافر للأردن مع أخوك ( اخوي هذا له تأثير قوي على زوجي وغير كذا أفكارة رجعية مايعترف بالحب بين الإثنين يقول المرة مرة والرجال رجال ولازم يحكمها )
انجنيت وطار عقلي شلون ؟ لراح زوجي للرياض يقولي تعالي معي لراح يشتري أغراض البيت ما يقدر يقولي ما أعرف لحالي.. والله وأنا برمضان يطلعني من المطبخ وهومابقى إلا ساعة ويأذن يقولى تعالي نجيب أغراض أبيك معي ...شلون بيروح لحاله ؟ أول مرة
مشيت الأمر على مضض وهو عارف إني زعلانة موراضية بس ماسأل ولا على باله سكت وأنا أحس إني بنفجر أول مرة يسافر بدوني وبدون العيال؟؟ من الزعل رحت نمت وأنا منغثة..
جو عيالي صحوني الساعة ثلاث ونص من نص الليل وقالولي بابا يبيك رحتله وسمعت كلام أوجع قلبي مرة (أبي أسافر ألحين .. طالعته بنظرات قلت داخلي شلون ؟ والله من الصدمة ماتكلمت . تألمت أشد ألم بالعادة لاراح أبوسه وأدعيله هالمرة رحت بدون كلام ناداني وقالي خذي مصروف للعيال ..وبس بدون مايسأل شفيك ) تساءلت الناس تسافر مسافات علشان تعيد مع أهلها وهويسافر يروح عننا ليش؟
تعودت إنه لاسافرأكون معاه طول الطريق بالجوال حتى هو يتصل ويقولي باقي مسافة كذا وكذا ..
هالمرة قفلت جوالي لما قمت فتحته إلا هو يتصل يبي يعايدني كأنه ما سوى شي مارديت عتبانة عليه وشرهانة على تصرفة .. بس أرسلتله رسالة عتب .. ومارد علي !
شلون يطاوع شباب صغار مو بعمره ويتركنا أنا والعيال بدون مايستنى يعايد علينا على أيش مستعجل أفكر الناس ليلة العيدتقضي سهرات رومانسية تهدي بعض أجمل الهدايا وهوأهداني سفرة جات منه فجأة بدون سابق إنذار ! طيب ليش وهومعي زين ويحبني ؟؟
حسيت إن مالي قيمة عنده ؟
التجأت لله وقعدت أصلي وأدعي وأستغفر لعل الله يزيل هالغمامة والحمدلله الله كريم هدت نفسيتي ألحين وصرت أحسن ولكن سؤالي إيش اللي صاير وياه ؟ كيف رايحة أتعامل معاه لما يجي ؟.
أهل المشورة والرأي ..أعطوني حل للي صاير أيش أسوي ؟؟ أخاف زوجي يروح مني خاصة هو من النوع الي يتأثر وينجرف بسرعة وراء أي تيار ؟ أخاف يصير له السفر عادة بعد لمتنا مع بعض ؟
وبعد هالسنين يتغير ؟
أحبه ويحبني . بس ماأبيه يقلل من قيمتي ومقداري ويخليني هامش بحياته ؟
اختكم enjil