قلبي يعورني سااااااعدوووني

كارهه حياتي ومن انخطبت ولغاية الان مالكة ( معقود قراني ) وكل يوم مشاكل في حياتي ما تخلص

ما اعرف من وين ابدأ بالضبط

بس انا وافقت على ولد عمتي عشان خاطر اهلي

وانخطبت لمدة سنتين والحين صارلي 6 شهور مالجه

بس لين الحين موقادره اتأقلم معاه

على الرغم اني اطلع معاه بروحنا ويزورني في البيت احيانا

بس اكره انه يلمسني اويتقرب صوبي ..

تعامله جاف ودفش وانا انسانه حساسه ورومانسية واشيل في قلبي وايد

وما اقدر اعطيه اهتمام ولا حب ولا كلام حلوو

واهلي ما يتقبلون زوجي بالمره بس غاصبيني اخذه

عندي وايد كلام اقوله بس نفسيتي تعبانه ومصدومة من كل شي حوالي وموقادره ارتب افكاري وكلامي

وان شاءالله برجع اخبركم ببعض الأمور

ينقل الموضوع إلى عالم المقبلين على الزواج

ليجد التفاعل المناسب هناك إن شاء الله

كان الله في عونك أختي الكريمة ... وإن شاء الله لكل مشكلة حل فلا تخافي ؛؛؛

__________________
... ( بالحب نعيش أجمل حياة ) ...

[SIZE="4"]

السلام عليكم ؟

اختي برأي .. اسمحيلي ..
ما كان من المفروض توافقين ، عشان تجاملين الاهل ، هذا زواااااااااااااااج .. ومب ثوب يختاره لي حد واوافق عليه ، مجاملة ً له !!! بما ان الموضوع كان بإيدج ، ومب غصبٍ عليج !

بس ما مشكلة نحاول نتعاون ونحل الوضع هذا مع بعظ ... لا باس ان شاء الله ...

حطي اسبابج لهذا الشي .. وبالتأكيد بنساعدج بذن الله وما بنقصر .. صار ؟

[/SIZE]

اختي قولي " اللهم اني اعوذ بك من الهم والحزن " ..
هدي بالك .. ولا تخافي .. وثقي بالله .. واذا كان الله اراد تفريج كربتك فسيحصل ذلك .. اهم شي علقي قلبك بالله .. فهو قادر عللى كل شيء ..

ولي عودة ان شاء الله ..

شكرا على تفاعلكم اخواني واخواتي

" اللهم اني اعوذ بك من الهم والحزن "


في البداية اول ما تقدم لي زوجي .. كنت امر في ظروف دراسية صعبه

واهلي ما عطوني الحق اني اتخذ قرار فكانت الموافقه في غضون 3 ايام فقط + الظرف الصعب اللي كنت فيه

أهلي كانوا على علم اني مومرتاحه معاه في بداية الخطبة.. بس الوالده الله يهديها كانت تقول انتي الحين فترة خطبة وتقدرين تنفصلين في اي وقت

مرت الايام وانا في مشاكل والوالد سمح لنا بالمكالمات في هالفترة ومرات تصير مشاكل ويمنعني الوالد .. يعني كل يوم راي وانا ضايعه وزوجي متضايق ومعصب من التغيرات الفجائية

وللعلم احنا واهل الوالد علاقتنا جدا ضعيفه ودايما مشاكل .. بس مادري ليش اهلي ما فكروا فيني وكيف هذا بيأثر على حياتي مستقبلا.. وللعلم انا راح اعيش مع اهل زوجي لأنه ولد وحيد بين اربع بنات

يعني عائلته كله بنات وماعنده عذر انه ما يعرف يتعامل مع الجنس الناعم

اي مشكله تصير بين الاهل كانوا اهلي يضايقوني ويشكون لي وكأني انا المسؤولة عنهم وعن مشاكلهم وتصرفاتهم.. وانا مالي ذنب

مرت فترة سنتين خطبة وانا اعاني اشد والذ انواع العذاب من كلام اهلي وتصرفات زوجي

وصح اول ما تقدم لي زوجي اتفقنا انه ما يصير زواج لين ما انهي دراستي الجامعية يعني تقريبا 4 سنوات

وبعد ما مرت سنتين فاجئونا زوجي واهله يبغون (الملكه) وانا ابد مومستعده ولاهذا كان الاتفاق وكنت ايام دراسيه وانا دراستي جدا صعبه واعاني منها ... طبعا انا رفضت لأن الزواج ما راح يصير الا لما نخلص وماكان ودي في فترة (ملكه) طويله بس اهلي وقفوا ضدي للأسف
وهذا اللي صار فترة ملكه تقريبا سنة ونصف والآن مرت نص السنه والزواج بعد سنة

طبعا انا مومهتمه ابدا في العرس ولا قادره افرح صدقوووني ولا اهلي حتى يحاولون يفرحوني

والمشكله انه محد فيهم حاس فيني.. اما في المجتمع الخارجي معظم الناس اللي حوالي يقولون لي انتي شكلك مومرتاحه بالملكه صح؟

تخيلوا شوموقفي وانا ما احب اشكي لحد ولا افتح قلبي لأحد

المهم بعد ما الكل اتفق على الملكه وصارت مشاكل كثيرة وانا كنت خلاص قريب انهار وقلت الولد ما ابغيه .. وفسخنا الخطبه لمدة يوم واحد فقط .. زوجي قال يا اما نملك الحين او ننفصل وانا اخترت الخيار الثاني

ارتحت والله ارتحت .. بس يافرحة ما تمت


ادخلت خالتي وحاولت يا امي ليش اتردون الولد والبنت صغيره وما تعرف مصلحتها .. طبعا عمري 20 وداخله في 21 وزوجي اكبر عني ب5 سنوات.. بس صدقوني عقله صغير


ودبروا امي وخالتي خطه .. وذيك الليله موقادره انساها امي سبتني سب بعد ما قالت لي افتكيتي من الولد جلبت علي وقالت فشلتيني وفشلتي اخوانج جدام الناس خليتينا نكرهج سودتي ويهنا وغيره من الكلام المر وانا خلاص منهااااااااره وقتها ..

طبعا وقتها خالتي تحاول فيني ارجع للولد واقنعتني انه فترة الملكه غير وبتكون حلوه وبتعرف على الولد اكثر وراح نتقرب من بعض

اقتنعت بكلامها نوعا ما بس كلام امي هد حيلي وصدمني واخر شي رضخت للواقع وقلت لهم اللي تشوفون فيه خير لي سوه..

واليوم الثاني اتصلوا لزوجي وقالوله البنت وافقت على موعد الملكه وهي كانت تمر بظروف صعبة ويا الدراسه وموكانت قادره تفكر صح والحين هي موافقه

طبعا رجع لي الريال بعد ما فسخنا الخطبه وملكنا



ادري طولت عليكم بس هذا بشكل مختصر جدا وللحديث بقية

انا عارفه انكم راح تلوموني وتقولون لي لازم تتحملين القرار اللي اتخذتيه اني وافقت عقب ما انتهى كل شي..

بس صدقوووني انا وافقت تحت ضغوطات وعلى امل اني ارضي امي ونرتاح من المشكله

وحاولت ومازلت احاول بس تعبت

الكلام اللي فوق تقريبا عن اهلي

بالنسبة لزوجي عمره 26 سنة وكان فاشل دراسيا ومخلص بس الثانوية لدرجة انه انا وهو خلصنا ثانوية عامه بنفس السنه ولاحظوا فرق العمر .. وانا ان شاءالله راح اتخرج هالسنه من الجامعه

معنى ادري في وايد ناس مومخلصين دراستهم بس ماشاءالله تفكيرهم جدا كبير


احس بفرق كبير في طريقة التفكير والاسلوب والمعامله هو يحب يفرض نفسه بكل شي ..


ودي يوم اضايق يخفف عني بس ما يعرف كيف يكلمني

في فترة الخطوبة كنت احاول انا ابدأ واقول كلام حلو كنت اقول ما يعرف لأنه ما عنده تجارب

وانا الحمدلله ماكانت عندي تجارب قبل بس سبحان الله عندي طريقة في التعامل

ماكان يهديني في المناسبات ولا في الاعياد .. اللهم في ذكرى ميلادي بس

وانا كنت احاول اقدم له الهدايا اقول يمكن ما يعرف كيف يتصرف

يعني حتى يوم يكلمني يعلق علي وينتقد وانا كنت اسكت لأني وايد على نياتي

ملجنا وعرفت طبعه اكثر

حسيت فيه بخيل قلبه يعوره اذا عطاني فلوس.. حتى لوعطاني اليوم ايني باجر يطلب منهم

كنت لازم انا اطلب منه اما هو ما يعطيني من نفسه..

للأسف كنت اضطر اني اطلب منه لأن اهلي نظرتهم اني مسؤولة عن زوجي ولازم هو يصرف علي

صحيح اني تضايقت في البداية من هالتغير.. بس هالشي خلاني اقيس مدى بخل زوجي

تصوروا في العيد اقوله ابي اشتري لبس.. يقولي لازم احنا ما نصرف وايد عشان نجمع حق العرس

وهو ماعليه قاصر وولد وحيد ودلوع وكل شي يبيه يصير.. عيل الواحد كيف بيعيش هالفترة الحلوه مثل ما يقولون اذا بنقول ما بنصرف ودايما بنجمع

اما هو يشتري اشياء فوق حاجته ماعليه .. مثلا عنده جهاز كمبيوتر وما يستخدم الكمبيوتر الا نادرا وشاف اخوي اشترى لاب توب وسار اشترى
اخوي شرى سيارة جديده هو بعد ناوي يشتري.. يعني غيووور بشكل

مر علينا اول عيد وشريت له هدية.. شوفوا وضعي انا ادرس وماعندي مصدر دخل اهلي ما يعطوني معتمده على اللي يعطيني اياه وحاولت اجمع من مصروفي عشان اهديه شي يوم العيد

تفاجأ بالهدية وما توقع مني .. وصار عيد ميلاده ونفس الشي ضغطت على نفسي وشريت له هدية محترمه ..

ومر العيد الاضحى كنت مشغوله ويا الدراسه وماعندي فلوس وما شريت له هديه.. ولاحتى هو فكر يهديني

يعني مناسبات ولا غير مناسبات ما اشوف شي منه خير شر

مره كنت مضايقه ومقهورة منه وقلت له انت حتى ورده ب5 دراهم فحياتك ما قدمتها لي

بعدها بكم يوم سار اشترى لي باقه وكانت اول مره

يعني لازم انا اقوله بصريح العبارة حتى لو ابين بطريقة غير مباشرة ما يفهم

وموحلوه اني اطلب منه .. وانا الحمدلله مومحتاجه منه بس شكثر بفرح يوم احس انه بيقدرني

والله حتى بوسة على الراس ماشي.. فالعيد عاد اخر الليل بعد ما طلعت الناس واستانست بالعيد قلت له حتى بوسه على راسي ما حصلت اليوم .. قال شوي شوي علي تبيني اتغير مره وحده


والحين احيانا يوم يفكر يبوسني على راسي ينزل لي راسه يقول ما استاهل بوسه!!!

يعني ابسط الاشياء الهدية والبوسه على راس تقدير للحرمه عالاقل


واسلوبه وايد فيه لف ودوران

وانا بعدني ما اشتغلت حاط عينه على معاشي ويبيني اساعده في المصاريف

طيب هو مومن كثر مصاريفه ترى بنعيش ويا اهله يعني ما بيشيل مسؤولية بيت




والله حتى مدح ما احصل منه معنى والحمدلله انا حلوه والكل يشهد بجمالي

بس يعرف يقول ريلج حلو صح .. يقصد نفسه

واخواته وايد يغارون مني ومن لبسي ولأني اكمل دراستي وهم انطردوااا من الدراسه

حتى عقب ما خذت رخصة السياقه هم فكروا يتعلمون سياقه





وعلى طاري خواته .. ماعندهم احترام في التعامل معاي

اذا هو كان يحترمني الكل راح يحترمني

ومره اخته فشلتني يوم العيد وانا تضايقت وايد .. ويوم خبرته بالموقف

قال ماعليج منها وسكت.. ولا حاول يطيب خاطري

ليش مطنشيني ما تردوووون علي ؟!؟!

اختى اعتقد انك ان الحياه هيك ما راح تنفع انا طبعا بنصحك اول شىء الاستخاره وبعدين فكرى بعقلك علشان ما تخسرى شىء لو شايفة انك مش قادرة تتأقلمى معاه افضل لكى ان تتركيه ليش تغصبى على حالك والمفروض ان فى هذه الفتره انه يعاملك احسن معامله ويهاديكى ويمدحك اختى الحياه مشاركة وبناء اسره هل هذا هو الشخص اللى ينفع انك تكملى حياتك معاه ؟هل هذا الشخص هو الذى سيسعدك؟هل هذا الشخص هو الذى ستعتمدى عليه فى كل امور حياتك؟ صدقينى اختى لو جاوبتى على تلك الاسئله بعد الاستخاره طبعا والتفكير بعقلك صدقينى بترتاحى وربنا ان شاء الله يوفقك فيما فيه الخير

مرحبا أختي بنت حيرانه

صحيح انه فترة الخطوبة كنت وايد متردده ومب عارفه استقر على رأي

بس صدقيني عقب الملكه خلاص فكرت كثير ومرارا وتكرارا وانا بنفسي اشوف انه هالزواج فاااااااااااشل من قلب

ادري اني ما راح اقدر استمر وراح اظلم نفسي واظلم زوجي معاي

بس شوالحل؟؟

كيف اقدر انفصل؟ زوجي متمسك فيني بس ادري من داخله انه متضااااايق مني كثير

قبل فترة صارحته قلت له انا موقادره احبك ولا اتأقلم معاك

قال : ليش وافقتي علي عيل؟

هو يبني احبه من اولها واتأقلم عليه .. رديت عليه تصرفاااتك تخليني ما اقدر اتقرب منك

والحين صايره لي مشكله جديده مع اهلي بسبة زوجي

وخبرت الوالد اني مب مرتاحه وشرحت له بعض المواقف

قال عيل بزقر زوجج وبقوله جدامج رايج فيه؟؟

طبعا انا ما اشوف في هدف ولا راح يكون الحل بهالطريقة

يعني اهلي مايساااعدوني خير شر

وكيف انا اقدر اقنعه بالانفصال ؟!

وشكرا