السلام عليكم

حاسة بضيقة وصدري مكتوم

قبل اسبوع تقريبا كان يوم زواجنا وطلعنا انا معه على مطعم وكانت طلعة حلوة

بس قبلها كنا متهاوشين وبنفس اليوم الصبح هم تهاوشنا على موضوع سخيف - اني ما اغلقت المنبه وخليته غفوة-

المهم وبنهاية الطلعة صار بينا حوار انتهى بمشكلة كبيرة جدا

انا اعترف اني كان لي يد بالمشكلة لاني عندت وما مشيت الموضوع

طبعا انتهت الليلة بسب وشتم وصراخ وراح عند بناته

وقالي انا ما اقدر اسعدج ولا اقدر اتحملج

قلت له اساسا الزواج الثاني مشاكله كثيرة فما بالك بانسان مو راغب بالزواج اصلا

قلت له انا ابي زوج يحترمني ويحترم اهلي - لان هو غلط على اهلي جم مرة - ويحبني واحبه

قالي انا مو هالانسان

وااتفقنا على الطلاق - بصورة شكلية كل واحد يكذب على الثاني ان وده بالطلاق وهو في حقيقة الامر ما وده-

قالي الحين ما اقدر اطلقج لاني جامعتج والطلاق الصحيح ان يكون في طهر بدون جماع

ادري ان بس كلام وبس حجي ومرده لي


بس زوجي ما يعدل في امور التفصيلية الدقيقة اللي احس انها تؤثر على مشاعري تجاهه

اعطيكم مثالين هادين حيلي

المرة الاولى كنت زايرة زوجة اخوه اللي ساكنة في بيتهم بس لهم مدخل خاص فيهم

فجاة اتصل علي وقالي عطيني مفتاحج لان مرتي باتيي وما ابيها تشوف انج موجودة - لانج من الاسباب المنفرة لها-

،،، وبالمقابل مرة كان ماخذني من بيت اهلي وراح على بيتهم وهي كانت موجودة ولا قالها حركي سيارتج لان موهبة باتيي ولا شي

لا تقولون لي يداري مشاعرها عشان البنات لا في اشياء وايد البنات مالهم خص بس هو يداري مشاعرها عشانها وانا ماهميته لو احترق


المثال الثاني ذكرته من قبل لما قعد يتغزل فيها بالمسجات جدامي وهو ماعمره سواها معاي ابدا ويقولي انا هذا طبعي جاف - طبعا كذب -


ماني قادرة اتحمل هالامور الحساسة والدقيقة اللي فيه


وهو مو متقبل اي نقاش معاي ولا اي مشكلة تحدث في بيتي


الحين هو يتواصل معاي عشان بنتنا ومع موضوع جدي - الله يرحمه ويغفر له - صار يتصل كل ساعة او ساعة ونص يتطمن

بس انا من داخل قلبي كارهته

ابي احبه بس ماني قادرة بسبب عدم عدله وميله لها

تعبت وانا اغير من نفسي عشان بيتي تعبت وانا اتنازل واسامح واطوف

حالتي النفسية سيئة جدا ومع اتصاله تسوء اكثر والمشكلة هو حنّان يتصل مرة ومرتين وعشر عادي القى بالتلفون 6-10 مكالمات لم يرد عليها وهذا الشي ينرفزني

حاليا اللي بيني وبينه كلمه ورد غطاها مالي خلقه ولا لي خلق صوته وتصرفاته السيئة معاي


نسيت اذكر نقطة مهمة الموضوع اللي كنا متهاوشين عليه قبل يوم زواجنا ان كنا نتكلم بموضوع مالي
فجاة قالي انتي نذلة بس تبين تخسريني هذيج اهي تدفع اكثر منج وهي دايما تحط بالبيت شغلات اتفاجأ فيها وهذا طبعها من زمان ويقولي انا مو عشان هالشي احبها اكثر منج - اعتراف صريح ووقح-

طبعا تضايقت وتهاوشنا وعقب صار يوم زواجنا



ودي ان يداريني ويحس فيني ويحبني ويعجب فيني واحس اني لي قيمة عنده مو كل ساعة ذاكرلي الطلاق


تعبت وانا اغير من نفسي واتنازل واسامح

((تم التعديل ليتناسب مع المضمون))

__________________
لا اله الا انت سبحانك اني كنت من الظالمين

احذري تتمادين بطلب الطلاق وتظنين ان بس مجرد كلام ومن ورى قلبه

ترى مع الوقت يطلقك ولا يهتم يقول هذي رغبتها وحققتها لها

ما طلبت يا اخوي

وكل ما ينفتح هالموضوع اقوله مثل ما انت بايع حتى انا بايعة

او مثل ما انت ما يهمك بنتك تتشتت حتى انا مو هامني


احس سوالف مراهقة

__________________
لا اله الا انت سبحانك اني كنت من الظالمين

صاج بدوي لاتثقين انه مايطلق
ليت تفتحين موضوع وتطلبين المتفائله بالله

لو هو صدق يحبها اكثر منك.. ليه يتزوج عليها؟؟؟
شي غير مقنع ابدا ابدا..
وزوجته الاولى اكيد فيها نقص.. يلقاه عندك انتي..

بعدين اذكر مره قرأت ان الرجل المعدد
مايحب لازوجته الاولى ولا زوجته الثانيه..
هو مايحب اي وحده من زوجاته.. يحب نفسه وبس..

مالي الا ادعي لك..
الله يوفقك ويسخر لك زوجك

انا ما طلبت بس قالي انا ماراح اسعدج ولا تطلعين من بيتج الا لما تنتهين من العدة وهذي اول مرة يقولها كان دايما يقول شيلي اغراضج

وموضوع الطلاق يتكرر دايما لين شبعت منه امي تقولي لو بيطلق ماراح ينتظر شي ولا راح يرد على احد

انا مو موضوعي الطلاق

المهم في موضوعي اني ماني قادرة اتأقلم مع عدم عدله ولا هو راضي يسايسني + مو حاب اي مشكلة معاي

وطبيعي في كل بيت بتكون مشاكل

__________________
لا اله الا انت سبحانك اني كنت من الظالمين

موهبة ماردي شقولج
بس تغيرتي كثير عن اول بعد ما يبتي البنت
كنتي والله بالنسبة لي قدوة بخطواتج المحسوبة ب سنتمتر

بكل امانة
احاول اوقف على مشكلة حقيقية في حياتج
القاها أغلبها مواقف عابرة ما توقف عليها أساسيات الحياة

موهبة تعتقدين لو كنتي في حياتج أهدأ مع ريلج
وكل ماياج لقى الهدوء والسناعة والكلمة الطيبة والزوجة المحبة
راح تكون حياتج بهالشكل؟!
احسج وصلتي لمرحلة انت مب عارفة شو تبين
يعني اذا اتصل وداراج تنزعجين !
واذا خلى المكالمات لها والرسايل بعد تنزعجين !

المشكلة يا موهبة ان هالمشاكل كلها ادور في بيتج
وانتي مع الاسف للحين تقولين ماقدرت أحبه ؟!
اذا ليش كل هالمشاكل ؟!
اذا انت ما تحبينه ليش تغارين وتعصبين وتتشادين معاه بالكلام ومشحونة ضده لانه يتبادل الحب مع زوجته ؟!
هل المعركة أصبحت رغبة بالانتصار وبس !

موهبة انا اغليج واحبج وصدقيني ما تفرق معاي اولى ولا ثانية
بس راقبي نفسج أرجوج وشوفي انت شو تبين
وليش كل هذا يصير في حياتج

ريلج يوم يقول ماقدر اسعدج ولا اقدر اتحمل مشاكلج
دليل وصوله لمرحلة العجز من وضعكم


ليش ما تكونين له الصدر المحب اللي يرتاح عنده؟؟!!
اللي فهمته انه ريلج اييج دوم ومايقصر بالمبيت
ومتحمل مسؤوليات بيته ماديا وماعنده مشكلة
وهم يعطيج حقج كزوجة
ومعترف فيج ومعلن زواجه منج

يعني انت مو مظلومة ووضعج احسن من كثيرات
فوين حمد وشكر النعمة يا موهبة ؟!

انتي بس لو تكونين اهدأ
صدقيني حتى لو ماعشقتيه وهمتي فيه
ولكن راح تحبينه حب العشرة
راح تشتاقين له لانه عشيرج وسيد بيتج
وتحبين ريحته وحسه في البيت لانه ابو بنتج
ولكن انت كأنج قاعدة تعاقبينه على شي انت وافقتي عليه من يوم خطبج !
الا وهو زواجه ،،

وبعدين تعالي هنيه
لا تستغربين توصلين لهالمرحلة
وانت تفتشين رسايله اول بأول
أكيد بتنغثين وينحرق دمج
سبحان الله لو قلتي بس انا راح اوقف تفتيش والتجسس حرام
جان ارتحتي وايد من عوار الراس

موهبة اتمنى ماكون قسيت عليج
بس اتمنى تفكرين في كلامي وتراجعين نفسج
انت قاعدة تخربين كل لحظة حلوة بينكم بدون سبب

انا هم كنت مثلج
وتغيرت وصرت اهدأ بوايد الحمدلله
صرت اتفهم مشاعر زوجي اكثر ومواقفه
بدال لا كنت شغالة اتهامات له بدون ماسمعه
بدا حبه يتسلل لقلبي شوي شوي
مع ان المشاكل واعتراضاتي عليه لازالت قائمة
ولكن الهدوء يخليج تشوفين جوانب اخرى حلوة

الحل بيدج فديتج
فاعزمي النية

__________________
الحمدلله الذي بنعمته تتم الصالحات

الله يرزقني الحمد والشكر

وعيزت وانا اكون له الصدر الرحب

ما لقيت النتيجة نفس مستوى جهدي

النتيجة تروح هناك....


الحين انا باروح العزا ولي عودة ان شاء الله

__________________
لا اله الا انت سبحانك اني كنت من الظالمين

المعذرة أختي مشكلة الاساسية إنك حاطة زوجتة الثانية في رأسك من قبل الزواج اختي انسي انه متزوج وعيش حياتك بمعنى إذا جاء عندك كوني عروس كانها في ليلة زفافيها وإذا ذهب عندها عدي نفسك (مطلقة أو ارملة) لا سمح الله عيش لبنتك فقط ولنفسك بهذا تهدا حياتك ولا تقولين ما اقدر؟

موهبة شو هي مشاكلج الرئيسية معاه اللي نقدر نقول انها مشكلة ؟!

__________________
الحمدلله الذي بنعمته تتم الصالحات