السلام عليكم ورحمة الله وبركاته
عندي مشكله واحس هي الي بتهدم حياتي حاولت اكثر من مره احلها بس عجزت
اولا بعطيكم مختصر عن حياتي انا وزوجي
تزوجت وعمري 18 وكان عمر زوجي 27 صار لنا خمس سنوات متزوجين
عندي ولدين ربي يحفظهم ويهديهم وخلصت جامعتي عند زوجي الحمد لله
زوجي ماشالله لاقوة الابالله انسان جميل شكل وقامه فيه الصفات الي تتمناها اي بنت
من تزوجته طلباتي اومر انسان حنون عاطفي رومنسي على الرغم انه هذا تعامله معي فقط
يعني شخصيته برى البيت تختلف تماما حتى خواته يخافون منه
مشاكلنا عمرها ماتعدت عن اختلاف راي بسيط ولا تتجاوز دقايق بفضل الله عمره ماجرحني بكلمه او حركه مافيه شي تمنيته ماجابه لي حتى لو اتصل عليه وهو باخر الدنيا بيجيني على طول اصحابه معاد يروح معهم الا اذا كنت انا
مشغوله واذا كنت فاضيه لو يحترقون مايروح لهم صار بيتوتي بعد الزواج على انه كان قبل
الزواج مايجلس بالبيت من كلام اهله
لدرجه اذا وحده من خواته طلبته شي ورفض وقالوله علشان خاطر ام نايف يفز ينفذ طلباتهم >>> هذا من كلام اخته الي بالثانوي
من ناحيتي عمري ماقصرت معه وهذى الشي بشهادته اني مو مقصره بحقه ولا عمري جرحته لاهو ولا اهله
طبعا انا وزوجي ساكنين برياض واهلي واهله بمنطقه ثانيه بس كلهم بنفس المدينه
نجي للمشكله
كانت بصيف العام وكانت المشكله بين اخته الكبيره وزوجة اخوه
مشكله حريم كلها قال وقيل
طبعا انا كان عندي علم بالمشكله لان اخته لما كنى نروح انا وزجي نسمر معها كانت تشكي لي انا وزوجي
وكان كلامي لها حاولي تطنشين ومن هالكلام
في هذيك الايام عرفت اني حامل بولدي الثاني وصراحه كانت نفسيتي زفت لاني ماكنت ابي احمل
اخر يوم في الاجازه الي كان فيه سفرنا كنت بغرفتي ارتب اغراضي لانحن بنسافر وكان وقت العصر دخل علي زوجي وكان معصب وزعلان وقالي اذا تبيني نمر اهلك تسلمين عليهم قبل نمشي بسرعه
انا قلتله ايوه ولا سالته وش فيك لاني قلت يمكنه زعلان علشانه بيفارق اهله
ركبت السياره وكان زعلان ولا سالته دخلنا عند اهلي قرب اذان المغرب جلسنا شوي قال زوجي بروح اصلي وارجع اخذك قلت طيب
لما خرجت شفت زوجي ماسك جواله ويكلم ركبت السياره ورجعنى عند اهله علشان نتعشى وبعدها نسافر
قبل سفرنا بسااعه دخلت خالتي ام زوجي وكنت بالمجلس انا وسلفتي واخوات زوجي طبعا
وقامت تبكي وتقول كلام صراحه انا انصدمت فيه >>> طلعت بنتها الكبيره دا قه على امها وحطت الموضوع الي كان بينهم علي انا انا صراحه قمت اصارخ عليها وقلت لها تجيبن بنتك الحين ولا والله لاروح لبيتها وادخل اعلمها شغلها قدام زوجها وعيالها
قامت خالتي دقت عليها وجت وقامت تتهمني باشياء انا ماسويتها وقالت كلمه هي الي خلت شياطيني تقوم
قالت حتى فلان >>>>>>>> الي هو زوجي شاهد على كلامي لاتخليني ادعيه الحين واعلمه >>>> قصدها تهددني به
انا هنا رفعت صوتي باعلى شي وقلت لها انتي تهدديني وقربت منها لدرجه الي بيشوفني بيقول هذي بتخنقها وجلست اردد كلمة انتي تهدديني باعلى صوتي واروح افتح الباب باقوى شي وكان زوجي واخوانه جالسين
بمجلس الرجال وادعي زوجي وخالتي كانت تحاول تهديني وسالته انت تعرف بالموضوع هذا قال ايوه قال ومخططين عليه
قلت يعني كنت زعلان اليوم علشان هالموضوع قال ايه سالته اليو م كنت تكلمها مع المغرب لما خرجت من بيت ابوي قالي ايوه >>>>> للمعلوميه زوجي كان متفق ان امه تصار ح سلفتي قدامي علشان يحرجونها
ويادبونها بس الحيوانه اخته قلبت الموضوع وحطته علي
المهم قلت لزوجي مايشرفني اقعد مع واحد مثلك ينزل نفسه ويدخل في مواضيع حريم رجعني بيت ابوي وقامت خالتي تترجاني حتى اخوانه طلبوني >>>> قلت مارجع الا بحق جا اخوه الكبير ودخل زوجي وامه واخته وانا بمجلس وقالي فهموني الموضوع
قلتله كذا كذا وكذا قام زوجي قال وش هالسالفه الموضوع مو كذا قلت امك واختك يقلون كذا قال لا اختي قالت كذا وكذا >>>> قلتله لا ياشيخ وانت صدقت اختك وسالتها انا متى سويت هالشي قالت كلام يفشل حتى اخوانها وامها استحو من كلامها يعني الحمد لله ربي فضحها
الزبده انها قالت لزوجي كلام عني كبير وزوجي اتفق معها انها تقول هالكلام لما اكون انا وهو جالسين
علشان يحرجني لانها قالت كلام كبير مقدر اقوله >>>> طبعا اتهمتني بشي انا ماقلته ولا سويته
الي قهرني ولا قدرت انساه ان زوجي اولا صدق كلام اخته ثانيا يتفق معها ضدي
وسافرنا انا وزجي وجلست تقريبا اسبوعين ماكلم زوجي على انه حاول بشتى الطرق انه يراضيني
>>>
للمعلوميه زوجي اخذ جوالي مدة اسبوع خاف اعلم اهلي
بعدها بسبوع دقت علي خالتي وقالت لي والله العظيم ان يرجع الخاتم قلت لها نعم قالت الخاتم قلت وش الخاتم
قالت الي ارسلتيه لي زوجي غمزلي بعينه ويأشرلي بيده اني احاول اقنعها تاخذه وانا مدري وش السالفه
قلت خلاص يصير خير وقالت عادي يابنتي انتي بنتي وانا امك ومن هالكلام لما خلصت المكالمه سالت زوجي وشو الخاتم قالي انا اشتريت خاتم الماس باربعه الاف وارسلته لامي وقلت انه هديه منك قلت له وش المناسبه قال مابي يصير بينك انتي وامي خلاف
انا زعلت وبكيت وقلتله انت كذا حطيت الحق علي وبتقول امك اني فعلا غلطانه وانهارت اعصابي لدرجه لما
جا اخوه وجاب الخاتم قمت انا واخذته وكسرته وزوجي كان واقف ورميته بزباله من القهر
حاول زوجي انه يراضيني بسفرات وهدايا وجابلي خدامه وسواق
هو متندم كثير على السالفه
بس انا مقدرت انسى بين فتره والثانيه ارجع اذكره بالموضوع حتى لما خرجت من غرفة العمليات قالتلي الدكتوره
من فلانه وفلانه الي جلستي فتره البنج كلها تتحسبي عليهم قلتلها ام زوجي واخته وسالتها زوجي سمع قالت
ايوه وكان يحاول يخليك تستغفرين وانتي تزيدين في التحسب عليهم
للمعلوميه اخته دقت واعتذرت وامه نفس الشي بس خلاص احس اني اكرهم لدرجه طول جلستي معهم اجرحهم بالكلام
انا احاول اني ماخسر زوجي لانه طيب معي طيبته زادت عن اول باشيا كثيره
بس العله الحين فيني ليه ماقدرت اغفر له غلطته
اخرتها قبل شوي قالي خططي وين تبين نروح في اليوم الوطني وانا بكون البنك حقك والسواق في نفس الوقت
قلت له ان شالله مايلحق اليوم الوطني السنه الي راحت
لان المشكله صارت قبل اليوم الوطني بيومين
قالي كلمه انتي ليه مو راضيه تنسين الموضوع قلت له ولا بنساه لين اموت
قالي سبحان الله هذا وانا طيب معك ولا قدرتي تغفرين لي لو انا شين معك كان قد خلعتيني من زمان
طبعا زعل وخرج
وانا اتندم اني ازعله لا نه مايستاهل بس لما اتذكر الموضوع اعصب ولا ادري وش اقول
اتمنى اني انسى هالموضوع ولا عاد اذكر زوجي فيه
حاولت بس مقدرت
انصحوني قبل اخرب بيتي
حسبي الله ونعم الوكيل في الي كان السبب
اسفه طولت عليكم بس حبيت اعطيكم السالفه كامله علشان يوضح لكم الموضوع

__________________
استغفر الله

سبحان الله غلاتي

ماعرفتي الدنيا ولا لاعتك عشان كذا وصلتي هالدرجة من الحقد
مابي اخوفك واقول لك : النعم زوالة ولا تغير زوجك ذيك الحزة بتعرفين وشلون
تغيرين نفسك وتصيرين احسن .. لكن بقول الله ينور بصيرتك

تذكري النعم زوالة وما تدوم الا بالشكر .. لذلك اذكري ربك كثير
وقولي : الحمد لله ملئ السموات وملء الارض وملئ مابينهما
اللهم اجعلني من عبادك الشاكرين ولا تجعلني من الجاحدين

تدرين ان الدعاء يغير الي بالقلوب وحتى ماتحققت امانيك ؟؟
ادعي بهالدعاء وادعي لزوجك بالصلاح والثبات على الطاعة
وبترتاح نفسيتك

__________________
شتان .. بين من تسيره مبادئه ، ومن تسيره مصالحه

مدري لية تالمممت ..ودمعت عيني..
عاقبة الظلم كبيرة والبشر تتساهل فيها..
يكفي منك حسبي الله ونعم الوكيل بوقت ولادتك وربي قويييييية علي كل ظالم
وبرددها معاك حزنا عليك وعلى نفسي
حسبي الله ونعم الوكيل فيمن ظلمنا وربي ياخذ بحقنا لو لنا حق ولم نفتري عليهم

حسبي ربي وكفى,

__________________
[ ]

هلا حبيبي

الحمدلله اللى انتهت المشكله على خير وربي نصرك عليهم

الحين لمشكلتك انتي
تذكرى ان الدنيا دواره وحطي نفسك بموقف زوجك
اكيد بيجي يوم وبتغلطين وش بيكون موقفك ساعتها لما زوجك ما يقدر يسامحك ويجلس طول الوقت مقاطعك وماله نفس للكلام
حبيبتي احمدي ربك الله عطاك نعمه لازم تتعلمين شلون تصينيها مو ترفسينها برجلك
وبعدين الزواج مبني على المسامحه واعذرني واعذرك وسامحنى واسامحك
واسألى نفسك وش ذنب زوجك بكل السالفه يعني هو من حقه ان يوضح الأمور ويتأكد من الصادق والكذاب وبلاخير هو طلع مظلوم ومايدري بالسالفه كلها
فكري يالغلا بطيبه قلب زوجك وحبه لك قبل لا تخسرينه

اسأل الله ان يرزقك راحه القلب والبال
وانسي ترى الله عطانا نعمه النسيان
وفقك الله

نفس كلام اختي لي
وهذا الي انا خايفه منه ان النعمه الي انا فيها تزول
حاااولت وكل مره اقول خلاص لاكن بسرعه ارجع اتذكر واعصب
خايفه اخسر زوجي والله مالاقي مثله
اللهم اجعلني من عبادك الشاكرين ولا تجعلني من عبادك الجاحدين
تسلمين يالغلا على مرورك

__________________
استغفر الله

الي قاهرني ماعمري غلطت بحق احد منهم
وظلموني فجاه يعني في ساعه قلبو الدنيا علي
والله اني اتمنى اني انسى لاكن ماقدرت
حسبي الله على كل ظالم
تسلمين يالغاليه على المرور

__________________
استغفر الله

عزيزتي .. أم نايف

مع انك ماوضحتني بالمرة .. ايش مشكلتك الأساسية الي خلت علاقتك بأهل زوجك وزوجك سيئة..
إلا اني الي فهمته ..
أنه زوجك يحاول يراضيكي بشتى الطرق وانتِ مو قادرة تسامحيه..

ياقلبي المسامح كريم.. ورينا يغفر ويرحم .. كيف البشر؟؟!!

قولي الحمدلله انه ربنا سخرلك زوج بالمواصفات هادي ماشاء الله تبارك الله..
يعني من الكلام الي قلتيه .. لو واحد غيره كان بهدلك على موضوع رمي الخاتم!!

مهما كان هذه نعمة.. وإذا كنت في نعمة فارعاها

الله يهديكِ ويهدي سرك ويصلح أحوالك يارب

__________________

>> لا إله إلا أنت سبحانك إني كنت من الظالمين <<

أحمدي الله علي النعمه والنعمه تدوم بالشكر وشوفي مشاكل الخوات
وقارني نفسك بهم تعرفين أنتي في نعمه

وكلام روعة المعني صح
طهري قلبك من الحقد والجنه ضمنها الرسول للرجل وقال هو من اهل الجنه عشانه مافي قلبه حقد علي أحد
تعاملي بطيبه وخلق حسن وبلا تتهاوشين مع حرمه كبيره في السن كبر أمك وعليها حق
لو أهي الغلطانه روحي وحبي راسها أهي أم زوجك وفي مكان أمك زوجك يستاهل
وبعدين الاخلاق والتعامل مايروح وأهم شي الإنسان يوصل للجنه بخلقه وتعامله

أختي نصيحه لوجه الله غيري من نفسك
لاتتوقعين شي يستمر علي حاله مو نخوفك لكن الدنيا تدور

سبحان الله الإنسان عجيب يعني وش تبين يسون لك

أسمحيلي اقول لك أنتي ملاء قلبك الحقد علي خلق الله زوجك خربك بدلعه
مشكلتك ماعرفتي الدنيا صح ولا عرفتي وشلون تدور ولا عرفتي أنه مابين غمضه عين وانتباهتها يغير الله من حالٍ الى حال

أحسني معاملتك طهري قلبك من الحقد
بيتك بيخربه قلبك
أنا أعرف كلامي قاسي معك لكن هذا الصح أنتي ماعرفتي الحرمان عشان تعرفين وشلون فرحت النعمه إلي أنتي فيها
تشوفين وين النكد فيه والحقد وتروحين له

أصلا حتي تصرفك غلط وحتي زوجك أنه طيب سامحك لما قلتي ليه أهديت لها الخاتم
كل شي ولا الأم الله يخلي لنا أمهاتنا


الله يهديك لنفسك ويديم عليك النعمه
الإنسان سبحان الله في بعض الأحيان يكون عدو نفسه
وأدعي دائما اللهم ألهمني رشدي وقني شر نفسي

__________________

تسلمين يالغاليه كلامك ريحني كثير

__________________
استغفر الله

والله العظيم ماعرف وش السبب انا متفاجئه للحين وش
السبب الي فهمته من كلام زوجي اخته تغار طبعا ماقال انها تغار علني لمح لي
ومن ناحية مسامحة زوجي هذا الي قاهرني ابغى انسى ابغى ارتاح واريح زوجي
يارب رحمتك
تسلمين يالغاليه على المرور

__________________
استغفر الله