بداية موضوعي ما اقول إلا الحمد لله على كل حال ..

وحسبي الله ونعم الوكيل ...

كل ما قلت بتنفرج تعقدت أكثــــــر , وكل ما نتهينا من مشكلة بدينا بغيرها ... !

ملييييت ماروم أتحمل بعد , خاااطري ارتاح نفسيا باي ثمن .. استغفر الله من ذنبي اللي إبتليت بسببه ..

فكري مشغووول طول الوقت لاارتاح لا برقده ولا بنشه ما عاد عندي غيره افكر فيه .. !

تجنن وجنني وياه , تعبنا من النقااش اللي دوم ينتهي بزعل , حتى العلاج النفسي إستخدمناه وبدون نتيجة

الحياة تتأزم أكثر وأكثر ..

كل مرة أستخير عشان ننفصل بس أحسني أتمسك فيه أكثر خاصة يوم أشوفه متمسك فيني , ودي حل وسط

يرضيه ويرضيني .. وبنفس التايم أخاف أندم بعدين في حال إستمراري معه.. !!

تعلقه في تعلق مررضي مو طبيعي , ما يبغي شيء يشغلني عنه ولوثانية , لا طلعة

لا جيه لا أهل لا صديقات لا نت لا تي في , كله يبغاني جنبه وأطالعه وقريبة منه ..

بنكمل سنتين وهذا الحال كل مرة أقول يتغير ويمل لكن الحالة تزززيد .. في البداية كانت غيرة تطورت لسيطرة

وحب تملك تطورت لشك <<< وهذى اللي مو رايمه أتحمله ..!!

كنت أتضااايق من تصرفاته الحين اشفق عليه اكثر من زعلي منه ,, ابويا يقول مو متحمله إنفصلوا لكن

مو هاين عليه والله مو هااين <<< إبتلى فيه زي ما ابتليت فيه والحمد لله على قضاءه ..

شاف رساله بالإيميل كاتبتها للأخصائي كان يسالني إذا ابغى الطلاق وليش .. فيها كلام قاسي عليه وكبير ..


وأمور أنا عارفتها بس مسويه مو فاهمة .. ؟!

كنت بحالة إنفعااال يوم عصب علي وكسر البي بي وهو جديد توى شاريته .. كله لأن جاني مسج

وسرحت بعده شوي كلمني وماسمعته قام رماه على الأرض بعصبيه وإنكسر ..!

رحت كتبت الرسالة وأرسلتها وأنا عاااارفة إنه يفتح إيميلاتي ويشوفها بعدي بس ندمت بعدين والله ندمممت ..

يوم شافها تغيير هدي وجاب لي اليوم الثاني بي بي جديد وكله سااكت طلع لشغله بدون مايدق على

إخته اللي ما يطلع عادة إلا وهو داق عليها وجاييه عندي يوم عرف إني عارفة إنه يجيبها لأنه مو واثق في

وبيت أهلى موصي البشكارة عليه ويعطيها فلوس , إعتذرت له وقلت له إني ما أقصد

قالي : لا عادي أنا صراحة الغلطان ..

مادري إش النهاية ؟ الطلاق بيكون بداية مشكلة جديدة وأنا خااطري ارتااح بدون هم ..!

رسالتي اللي شافها :


( بطلق ومو ندماانه على شيء , كل إنسان يأخذ نصيبه , ومو عيب إني غلطت وتمسكت بهالشخص

وعاندت نصايح أبوي ,, كلنا نغلط , لكن العيب إني استمر بالغلط ..!

هالشخص غلطة إنكتبت بعمري ولاااازم اصححها وما أخليها غلطة للأبد ..

عندي مبادئ امشي عليها , ما أحتاج مبادئ قديمة تضيع لي حقي ,, البنت لازم تصبر على زوجها ..

عيب البنت تتطلق .. وموكل يوم عندها زوج ..

لا ما بصبر العمر يمشي , و لا بد بيوم القي شخص يفهمني , ويستاهل يشاركني حياتي ..!

ولو ما حصلته الوحدة أفضل مليووون مرة من شريك اناني ..!


أكبر خسااااااارة .. إنك تشترى شخص بكل شيء حلو بحياتك , وفجاة يطلع مغشووش ..

وتلقى نفسك خسران كل شيء وما عندك إلا هالشخص بسوء أخلاقه يذيقك أنواع الالم .. !!


حبييييييته من صميم قلبي ..!

أهديته أيامي , وشاركته عمري , وتركت قصــــــــر أبوي , وفضلت بيته البسيط ..

ومازال يشك بحبي ,, ويبغى دليل ؟؟

أي دليل أكبر من الميثاااق الغليظ اللي بينا وهو زواجي منه ..

زوجي العزيز ..

على باله إني يوم تزوجته بعته نفسي ..؟ ووكلته على حياتي ؟ أنا زوجة مو جاارية ..!

أغرقني باشياء مو محتااجتها .. فحرمني من أشاء أنا محتاجتها ...

" ماعرف إن الجوعان ما يبغى ماي يبغى أكل وأن العطشان ما يبغى أكل يبغى ماي "

أغرقني هدايا , رومانسيات , فلووس ...

قلت له مليوون مرة ,, حبيبي أنا محتاجة الحرية ؟ ودي أطلع ؟ محتاجة الثقة الإحترام, محتاجة الترفيه..

أنا مكتفيه ماادياً , ومتشبعة حد الثمالة من كل هالرومانسيات ...

فك عني شوي خلني أتنفس أتنفس أتنفس .......

محتااااااااااااجة نفسي نفسي وبسسسسسسس ..!

زوجي حبيبي ..

سمحلي أطلع ساعات محددة , لكن بشششرط :

بصحبة سكيورتي خااص أمه أو أخته , و زرع جواسيس في الأماكن اللي أروحها ..

منعني من نفسي , حتى وقت دوامه يجيب من ينيب عنه في المراقبة أخته العزيزة ..

ممنووووووع أجلس وحدي ولو ساعة ممنووووووووووع ..!!

زوجي حبيبي متأثر كثيير بوظيفته كضابط لاااازم كل شغله أسويها يفتح لها تحقيييق طوويل ..

وماشي وراي بالتحري ..!

انا بنت ناس ومو أي ناس

لكن توى أدري ؟ إش معنى هالكلام ..!

انا متربية وخايفة الله قبل خوفي من أحد , وما يمنعني عن شيء إلا خوفي من الله وبسس !!

أرخصت نفسي كثير كثير كثير ..

وسمحت بالإهانة وتقبلتها بدون أي حااجة للأسف ..!

مالوم أحد يوم يحتقرني لأني انا اللي ماعرفت قدر نفسي ..

تحملت عصبيته وصرااخه علي , وأنا اللي ما كان حد يرفع عينه في ..!

تركت جنة ابوي ورحت جحيم زوجي بإسم الحب ..! قمة السذااااااجة ..

( الحب جنة كيف صار جحيييم ).. أي بلاهة كنت أعيشها ..

طوول عمري أغلط بالحساب .. لكن ظنيت إني يوم كبرت صرت أعرف الحساب ..

وإكتشفت اليوم إن كل حساباتي غلط في غلط ..

شفت خواتي عايشين بنعيم المادة والحرية والإحترام والأبناء ..

وأنا مافي يدي إلا الحب الممزوج بشك ... !

دائماً أنا الأقل بينهم لأني دائماً أقيس بمقياس العاطفة وما أملك مقيااس العقل ..!

والراااحة زي ما يقول ابوي ما تعرف العاطفة ..

( عرفت الحين ليييه أبوي يهتم فيه أكثر من كل خواتي ولييه دائم يخليني قريبة منه ,

ولييه يحفظ حسابي بنفسه .. مو لأنه يحبني أكثر منهم زي ما كنت أظن لالالالا ..

لأني أغبي وحده فيهم للأسف .. وما عرفت إلى الأن كيف الحياة تمشي ) ...

الحسنة الوحييييييييدة من زواجي هي :

إن زوجي صحاني من غفلتي .! وعرفني كيف يكون الحب !!

وددددي اطلق ..

حتى لو زوجي يحبني ومتمسك فيني ما أبغاااااااه ...

الحب لا يسسساوي الحرية ..

الشك عدو الحب .. !

وما أبغى أحصر حياتي برجل , الحياة موزعة على كل شيء بالتساوي ..!

هذا إحساسي مخنوووقة زوجي كسر البي بي وإنكسرت معاه أشياء كثيييرة بنفسي ..)

كيف كانت ظروف خطبتكم وزواجكم ؟
وماهي اسباب غيرته المرضيه عليك ؟
هل فيه سبب معين ام وهم ؟


دائما الزواج الغيرمتكافئ وغير متوافق يولد غالبا كل ما ذكرتي 00

يمكن تحتاجون لوقت اطول لكي تفهموا بعض وترتاحوا لبعض اكثر

__________________

رسالتك قووووويه جدا بس يمكن انها تكون الصفعه اللي تصحيه من سباته وتخليه يرجع يذكر انك انسانه مو اله ولا طفل عمره 7 سنوات اعتقد هذا الكلام اللي كان لازم يسمعه من زمان عشان يفوق لنفسه لاتندمي وتمسكي برائيك وبكلامك وصدق معاك حق بالكلام اللي كتبتيه والوضع اللي انتي فيه محد يتحمله ابد فلا تعتذري ولا تتنازلي عشان مايفكر انك خايفه من شي وانه هو صح وانتي غلطانه خليك على موقفك يايتعدل ويتعالج والا اتركيه الوضع تطور بشكل مخيف بدايه حب ثم غيره ثم سيطره ثم شك ثم تملك خافي على نفسك اخاف بكره يشوهك والا يقتلك والا يسجنك بسبب مرضه وضعه جدا مو طبيعي دام ان ربي منعم عليك عالجي زوجي عند طارق الحبيب ولا اي دكتور نفسي كبيييير ومشهوووووووور حطي تحتها الف خط لاتروحو لاي طبيب لازم دكتور كبير وكلميه اول وفهميه على حالة زوجك وخليه يكلم زوجك عشان يقنعه يتعالج

__________________
ربي اجعلني مقيما الصلاة و ذريتي ربنا وتقبل دعاء
يارب ارزقني واختي الاولاد الصالحين تامين الخلق والخلقه يااااااارب
اتمنى كل من يشوف توقيعي يدعيلي ويدعي لاختي

كلماتك قويه جدآ صدقيني لو ما كان متمسك فيك ما كان انتظر دقيقه وحده يمكن جرحتيه لكن تصرفه بعدها يدل على انه بدأ يعيد التفكير في بعض الامور وانا اتفق معك في ان عمله له تأثير على معاملته لك
لفت انتباهي بعض المور في رسالتك:
اولا اغلقي باب المقارنه بينك وبين خواتك اواي احد ثاني انتي مثل ما تختلفين عن خواتك زوجك يختلف عن ازواجهم صدقيني لا يخلو بيت من المشاكل مهما كنتي تري عكس ذلك
ثانيا لا تذكريه بانك ابنت الرجل الغني وتنازلتي لتعيشي مع زوج لا يملك ما كنتي تملكين واكتفي بانك بنت ناس ربوك احسن تربيه بغض النظر عن الماده
اخيرآ الشك من بداية زواجكم ملازمكم ام شيئ جديد استجد لموقف محدد ؟

__________________
يارب فرج همي ويسر امري واصلح شأني

لا تتندمي ... كلام كان لازم يعرفه وكان لازم يسمعه ... البديل كان انك تطلبي الطلاق لما توصلي لمرحلة الانفجار ووقتها بيكون محتار بطلبك لانه مو عارف غلطته ... يمكن هذا تييسير من رب العالمين حتى ينصلح حالكم من بعد استخارتك .

__________________

شهزدا

قلبي انتي ...
مدري ماعندي اي رد .. او بالاصح خايفة اعطيك رائي واكون غلطانة ..
بس بقولك شي ..
الحياة الي ماتريحني وتضايقني وتنكد علي وتمرضني وبيدي اصلحها اصلحها ...
لكن لو عجزززززززززززززززت ومافي تجاوب وكل مالها تزيد...
اتركها والله يبدلني بغيرها الافضل ..
ياقلبي مو بس حياتك الزوجية تتدمر كذا .
الموضوع قلب فية صحتك ونفسيتك وعافيتك ..
دائما اقول الله لايبارك في رجل يسبب المرض لقلب امراءة .. بسبب مسمى الحب او الغيرة ..

استخيييييييييييييييييييييييييييييييييييييييييييييي يييييييييييييييييري وربك يدلك عالصواب ..
دمعت عيوني لحالك وربي ..

__________________
[ ]

نصيحتي يا اختي خلي قلبج بارد
يعني لا تتاثرين بشكه وغيرته الزايدة هو اللي راح يتعب مو انتي
واذا على الجواسيس خليهم هم صديقاتج
وحسسيهم باضطهاد زوجج بطريقة غير مباشرة
انا معاج في ان طريقته ماهي طريقة حلوة كانج قاعدة بسجن بس لابد ان يكون فيه حل
انتي روقي
ومثل ما قالوا الاعضاء يمكن هالرسالة هو اللي بتصحيه من غفلته



موفقة يا عمري

__________________
لا اله الا انت سبحانك اني كنت من الظالمين

لاتكبريها من عندك وتلومي حالك كتير..
كل هالامور كان لازم يعرفها، ولو انها كانت بوقت انت كنت معصبة فيه لكن بهالرسالة انت قلت كل يلي مدايقك منه
وبهيك بتكوني انت نفسك ارتحت نفسيا (فضفضت يلي بقلبك) وبنفس الوقت هو كمان عرف شو يلي بقلبك
وانك اذا طلبت الطلاق فبسببه هو وبسبب شغلات مضايقتك منه.. وانت بالرساله اكدتي انك بتحبيه..
هلا الدور عليه هو.. دوره يحسن النقاط يلي ذكرتيها اذا كان فعلا بدو ياك ومهتم لرضاك وحاس فيك..
اعطيه مجال يحاول يصلح من اخطاءه، يمكن هو من كثر حبه مو عارف كيف يعبر، وهاي هي طريقة تعبيره
وفجأة لقي حاله بدل ما يحسسك بحبه عم يخنقك ويخليك تهربي منه، وتطلبي الطلاق وانك ماعدت قادرة تتحملي اكتر..
هلا انت ماعليك الا انك تطولي بالك شوي، وتحكمي عقلك قبل قلبك، واعطيه فرصة يحسن من نفسه ويغير تعامله معك..
لاتبرري ولا تدافعي ولا تعلقي اي شي على الرسالة، ولاحتى تعتذري لانك ماغلطت..
والله يوفقك ويهنيك يارب

اظن انه راح يتحسن والدليل انه جاب لك بي بي
الله يسخره لك ويسخرك له اميييييييين يارب العالمين

اختي الغاليه ومن الحب ما قتل هو يحبك وخايف انك تتركينه لان من الواضح انه مو ناقصك شي من جهة اهلك وهو يحس بالنقص فحاولي تكوني قويه وما تضعفي رسالتك وصلت له واثرت به والدليل عدم حضور اخته ربي يهديه وينزع من قلبه الشك ويصلح احوالكم .