ياجماعة الخير قولوا لي من الغلطان أنا والأ هي

29-09-2010, 12:38 PM

عضو جديد

تاريخ التسجيل: Sep 2010

المشاركات: 4

ياجماعة الخير قولوا لي من الغلطان أنا والأ هي

السلام عليكم ورحمة الله
في البداية أنا عضو جديد معكم آمل الصبر على وعلى مشاكلي الى كل شوي أبستشيركم فيها...
أنا يا أخوان وأخوات لي تقريبا ثلاث سنين متزوج ومن ذيك الساعة وأن وزوجتي من مشكلة إلى مشكلة وعلى أشياء تافهه بس تتطور وتكبر ولا أدري وش السبب.
والحين أبعطيكم بعض صفاتي وبعض صفات زوجتي ثم أبعرض عليكم مثال حدث بينا وهو آخر شي صار.
صفاتي على قولها :
1ـ ما أقولها كلام رومنسي.
2ـ عنيد.
3ـ واثق من نفسك.
4ـ ما أعطيها حقوقها.
هذي أهم ما تصفني به....
طبعاً أنا راح أكون صادق لأني أبي الحل وأبي أشتري السعادة بأي ثمن.
الصفة الأولى (مانيب رومنسي) إفتراء لأنها تشوفني أحسن منها وعودتها على أني دائما ما أبادرها بالرومنسية ثم توقفت وقلت لها ليش ماتسوين مثلي ترا أنا لي أحاسيس مثلك أبي مثل ما تبين .. بعد ذلك صارت تتهمني بها الشي.
ـ الصفة الأولى (عنيد) ربما أكون عنيد في حاجة وحدةإذا طلبت منها شي ولا نفذته عاندت عليه .[
ـ الصفة الثالثة (واثق من نفسي) الحمد الله واثق من نفسي لأني نجحت ولله الحمد في كل شي الا معها فسبحان الله في عملي نجت حيث إني تسلسلت في العمل من رئيس قسم منذ أن كان عمري (25) سنة إلى مدير وأنا توني صغير في السن وعمري الأن (27) سنة وما أدري ليش حارقه رزها المفروض تفرح وتستانس وتفتخر بي لأني زوجها والي يحصل لي يعتبر لها بس ما أدري ليش ما تقتنع بهذا مع إني سبق وأنقلت لها ها لشي.
ـالصفة الثالثة (ماتعطيني حقوقي) هذه إفتراء وكذب عيني عينك وكل ما سألتها طيب وش هالحقوق تقول أنسى ما أذكر .
أما الصفات الي أشوفها فيها ومن أهمها :
1ـ العناد.
2ـ عدم الوضوح.
3ـالكذب.
4ـ عدم إظهار الإحترام بتاتاً.
5ـ رفع الصوت والصراخ.
6ـ العصبية الزائدة والمزاج المتعكر.
7 ـ الشك وعدم الثقة.
طبعا راح أشرح هذي الصفات بشكل موجز..
زوجتي وحبيبتي وإم ولدي في عناد بشكل غير عادي وملحوض بس هي تقول لا أنا ماني عنيدة ما أدري صادقة والا تستهبل .. وبعدين ما هي وضحه معي في مقاصدها ولا طلباتها فأحيانا تسألني عن أشياء وأقول ليش تسألين تقول عشان كذا وفي النهاية أكتشف إنها تسأل عشان حاجة ثانية ... الكذب وهذا بعترافها تقول أنا كذابه بعدين تراجعت وقالت ماقلتها ... أما عدم الإحترام فحدث ولا حرج فمثلا أدخل البيت ومعي أغراض ما تقوم تقابلني وتاخذها مني وبعد ماكلمتها وفاهمتها صارت تقوم وإذا زعلت صارت تقوم ببطء وأحيانا تعرف إن مقعدي في البيت معروف وألقها جالس فيه وتعرف إني أبي أجلس فيه ماتقوم تضل جالسه ولا كنها شايفتني طبعا أنا أروح أقعد في مان ثاني وأسكت وأحيانا أدخل البيت وألقاها منسدحة والا رافعه رجولها ما تقوم تتعدل تنتظر لين أمر من جنبها ثم لين شافت ملامح وجهي تغيرت بدأت تتعدل.. أما رفع الصوت فمجرد ما يكون بينا خلاف خلاص تنقلب (مايك) إزعاج وصراخ حتي تتهزأ بي وبكلامي وأسلوبي وتسكر أبواب البيت في وجهي بكل قوة .... العصبية مثل ماقلت بس أزيد عليها بأنها دايم تتلفض بألفاض مشينه ولا يجوز نطقها شرعا مثل أنا أكرهك أبزين في أكلك (سم) طلقني بين وبينك المحاكم وأنا أدري إنه منغير شعور بس ولو المفروض تثبت وما فيه شي يستاهل هذا كله.... إلى أن وصل الأمر ومدت يدها علي وضربتني آآآآآآآآه ماقول إلا الله يهديك يام عبدالله.. أما بخصوص الشك وعدم الثقة فكل شي أسويه دائما ما يتبادر لذهنها أني أقصد من وراه شي سيئ لها وأن أقولها يا حبيتي تراك زوجتي وقريبتي ولا يمكن أرضي عليك بشي إنت نصف الثاني إنت شريكت حياتي وعمري ومع ذلك عجزت أقنعها وعلي سبيل المثال لما أقول وأصف خواتي إلي ماتزوجن (بالبنيات) تقول ليش تقول لهن بنيات يعني أنا عجوز !!!!!!
أما آخر شي صار وأبي ياخوان وأخوات حكم منصف والله إن صرت غلطان لأعتذرلها أعشيها في المطعم إلي تبي وأهدها حاجه حلوة ..... بس قولوا لي الحق وعلى فكره ترا راح أخليها تقرأ الموضوع .. لأني ما أبي أظلمها في شي..
السالفة هي سلمكم الله ولله الحمد إنها قصيرة عشان ما أتعبكم ... وحنا جالسين على الكنبه في الصالة طالعت إيديها إلا وأشوف أضافر أصابعها طوال بشكل أنا ما أحبه وهي تعرف الشي هذا بعدين قلت لها وش تبين بها الأضافر قصيهن الله يهديك ثم سكتت وسكت جا اليوم الثاني ولا سوت شي ونبهتها ولا ردت علي وقالت عندي موعد في المستوصف وأبيك توديني قلت سمي أبشري بعد المغرب رحنا المستوصف ورجعنا ثم قلت لها ورا ما قصيت هالأضافر ثم قالت أنا مانيب طالعه عند رجاجيل وبعدين هي أضافري وش دخلك قلت وشلون وش دخلني كل شي فيك لي دخل في الا مايغضب الله عزوجل قالت أصلا إنت فاهمها غلط تقصد (القوامة) المهم سكتنا وجا اليوم الثالث والله الأضافر ما أنقصت ورجعت ونبهتها بكل هدوء وترجع تقول نفس الكلام وزادت شفتني صلحت لك عجين بأضافري بعدين أن حره طيب أنا أبيك تخفف شاربك ليش ماتخففه لا تقول لي هذا شاربي مالك دخل!!!! ومن هالكلام عاندت وأنا صراحة مارضيت بأنها تسفهني كذا المهم خليتها حتى جانا الليل حوالي الساعة (12.30) وقلت ليش تسهرين لحالك يالله خلينا ننام سوا وهي طبعا تحب السهر ولو لوحدها حتي الفجر وهذي عاده أكرها فيها قالت (إن شاء الله)صراحة أنبسطة واستانست من كلمتها وأثرها تسكتني مادريت جلست أنتظرها ولا جاني نوم حتي جلست تقريبا حول الساعة ورحت لها قلت وليش ماجيتي قالت مافيني نوم قلت مايخالف اليوم حاولي بكره راح تتأقلمين جلست لها شوي في الصالة وجت ثم قعدة على السرير نص ساعة وقامت رحت وراها وقلت ليش قالت ما أبي أنوم قلت وأنا ما أبيك تسهرين لوحدك ومن هالكلام حتي رجعت على نفس الموال وجلست بس أكثر من نص ساعة وقامت ولحقتها وقلت ليش إنتي كذا تبين أعاملك مثل الطفل أطفي الأنوار وأنا أقدر ولا راح تقدرين تسوين شي قلت ليش ماتسمعين كلامي من البداية وتجين بعدين ليش ما قصيتي أضافرك مال كلامي عندك إحترام ولا قيمة وكنت وقتها صراحة بديت أتنرفز بعد الهدوء المهم قالت لي والله إنت العنيد قلت وشلون أنا العنيد وأنا من ثلاث أيام أقول لك قصيهن بكل هدوء ومطنشتيني المهم قلت يالله الحين روحي قصي أضافرك وتعالي نامي الي صار إنها دخلت ونامت ولا قصت أضافرها بصراحة كنت عاد نويت بشي ثاني غير اليمين ولا الضرب بس تعوذت من الشيطان وقلت أبقول لها آخر كلمه إن سمعت وإلا الله يدلني على الي فيه خير وقلت لها ليش إنتي تبين تهينين كرامتي وأخيرا قامت وقصت أضافرها ورجعت ونامت....... وهذي كل السالفة وأنا الحين صراحة ما أخذ عليها في خاطر كثثثثثثثثثثثثير.
قبل لا تجاوبون وتقولون أرائكم تذكروا إني أحبهااااااااا وأموت في ولدها وهي نفس الشي ... بس ماأدري ليش حنا كذا..

التعديل الأخير تم بواسطة ماريا ; 30-09-2010 الساعة 03:29 PM السبب: لفظ المشيئة

29-09-2010, 12:56 PM

وليد99

قلم وفي

تاريخ التسجيل: Nov 2006

المشاركات: 159

مدري ليه حسيت انك تحب تدقق على ابسط الامور مع زوجتك ؟؟

السهر انت بنفسك عودتها عالسهر لحالها وماتنام الا لحالك وهي تسهر

(ضربتك) مادري وش السبب بس اشف مهما كان ماتضرب

اللي اشوفه انت مدلعها مرره عشان كذا تحب تمشي كلمتها شوي وتعرف انك بتسوي اللي تبيه

الجلوس بالمجلس ياخوي عادي مايحتاج تقوم المجلس كبير اجلس بأي مكان

ومن ناحية اخر سالفه ترى ماشوف شي يضايق وتقوم السالفه عشان هالشي لو مثلا طلبت هالشي بالوقت المناسب يمكن يكون عادي عندها

29-09-2010, 01:11 PM

حلا الاياام

عضو دائم

تاريخ التسجيل: Jun 2010

المشاركات: 69

انتو تتخاصم على اشياءه تافه من جد يعني وكلام اخوي وليد صحيح ممكن

عشان انتا مدلعه زيااده عن اللزوم لازم هيا تحترمك مهما كاان

وعلى مشكلة السهر عاادي ممكن تصحيها بدري عشان تتعب وتنام بدري من شغل البيت

وبكذاء تتعود على النوم بدري ومشكلة الاظافر المفروض انها تسوي الشي الي يعجبك لانك بتاكل من يدها وممكن الجراثيم تدخل فيها وانتا عندك حق حاول تعودها على الشياءه الي تحبها

الله يوفقكم وبيسعدكم ويهديكم

لك مني خالص تحياتي

التعديل الأخير تم بواسطة حلا الاياام ; 29-09-2010 الساعة 01:13 PM

29-09-2010, 02:32 PM

بنوته نآآآيس

عضو نشيط جدا

تاريخ التسجيل: Jun 2010

المشاركات: 204

ماشدء الله لاقوة الابالله

يا ام عبدالله وااااضح ان ابو عبدالله يحبك ويموت فيك

ولا مالجئ لهطريقه

وبحث عن السعاده معك

وانت يابو عبدالله ماله داعي تدقق جالسه بمكاني ومااخذت الاغراض من يدي وما ادري شو

ترى غصب زوجتك تعصب وتعاند صراحه حاسه فيها

وانتي ياام عبدالله الوضوح والصراحه وحسن الظن مافي احلا منهم

في الحياة الزوجيه وبعدين ماله داعي تطولي اضافرك

اانا عن نفسي اتقزز منها ولايمكن ومستحيل اكل من يد وحده اضافرها طويله......

اوصييييكم بالحوااار الهادي وايجاد حل عن كل شي يضايقكم باسلوب راقي

لاتراكمون في انفسكم الين يحصل العناد والعصبيه والشكوك والخصام على اتفه الامور

اسعدكم الله واصلح ذات بينكم

29-09-2010, 02:40 PM

اة ياروحى انا

عضو مميز

تاريخ التسجيل: May 2010

المشاركات: 314

يتضح لى انها ماتبيك تحكمها وانت ماتبيها تحكمك عشان كذا كل هالمشاكل والعناد بس الامر ابسط من كذا وطبعا وجهه نظرى انا انو الزواج مو معناته تملك وسيطرة لابد فيه استقلال وجو خاص لكل شخص يتنفس من خلاله ويلقا حاله فيه ليش الاحتكار هذا نامى معى ولاتسهرين ووووو!!!

بالنسبه لى احسه قتل للحريه تمام نشترك باشياء ونتفاهم لكن مو معناته ان كل واحد لازم يسيطر عالثانى ويتدخل بابسط امورة مهما كان الاستقلال مطلب نفسى

يعنى انا مثلا لو اتزوج واحد يلاحقنى من الصاله للمطبخ للمجلس ليش ماتنامين ليش تسهرين من جد توتر!!!!مدرسه داخليه لازم فيه حريه

بس ولاتتحسس من كل شى وهذاى وجهه نظرى الشخصيه واحتمال صح او خطا والله يفرج للجميع

__________________
اللهم اغفرلى ولوالدى ولاهلى ولزوجى والمسلمين والمسلمات الاحياء منهم والاموات

29-09-2010, 03:17 PM

ام هتان الشهري

عضو نشيط

تاريخ التسجيل: Jun 2010

المشاركات: 193

معليش مع احترامي لك مشاكل تافهه مولدرجه الضرب او اليمين وانت مره متحكم في تصرفاتها ليش التقيد وليش لازم تاخذ الاغراض منك اذا جيت اذا ما سوتها من نفسها مالك حق تجبرها ماعندك بساطه الحياه نظامك نظام عسكري مع احترامي لك اطلب منها الشغلات بكل حب مش بتامر وبعدين يوم تقول ولدها تراه ولدك كمان الله يصلح الحال

__________________

29-09-2010, 03:35 PM

][ لمني بشوق ][

كبار شخصيات المنتدى

تاريخ التسجيل: Aug 2006

المشاركات: 2,856

اخي الكريم .. احس ان تعاملكم مع بعض وكأنكم في حرب .. كل واحد منكم يعاند الثاني ويدور الزلة على الثاني

صفتين هم اللي مخربين حياتكم وعلاقتكم مع بعض

قلة الاحترام من طرف زوجتك ..

والعناد من طرفك ..

اخوي لن اقول هنا ان الخطأ منها او منك ... فكلاكما مخطئ .. وقبل ان تحاسب زوجتك .. حاسب نفسك .. تعاملك

معها .. هل تتشاركان في كل شيء ؟؟ هل تخصص لها وقت معين وتجلس معها ؟؟ هل حاولت ان تعرف ما بخاطرها

ولماذا تعاملك بهذه الطريقه ؟؟ عندما تصفك بالواثق من نفسك .. اظن انها لا تغار من ثقتك ولكنها تقصد شيئا آخر

حاول ان تستوضح منها القصد ...تقول انك رومانسي وهي تراك العكس .. لماذا ؟ احيانا الانسان يغفل عن بعض الامور

فعودها انت على استقبالك ... وحمل الاغراض يعني قولي لها : حبيبتي ممكن تساعديني ... مع الايام ان شاء الله

بتتعود ..

بالنسبة لصفة الكذب فهي مو بسيطه ..فممكن بالحوار الجاد والتذكير بالله ومعاقبتها تحلون المشكلة ان شاء الله...

وان كانت زوجتك الغاليه ستتطلع على الموضوع ... فاريد ان اوجهه كلامي لها .. وهو ان العلاقة الزوجية لا تقوى بدون

احترام ... فاذا احببتي زوجك دون ان تحترميه ... فهذا ليس حب ... ولكل شخص حدود في الصبر ...

زوجك يحبك ويحاول ان يحل المشاكل بينكم بهدوء وتفاهم ... ولكن لابد ان تتعاوني انتي ايضا ... لا تفهمي اي طلب

او رغبة من زوجك على انه أمر او عناد .. اتركي الشك اذا ما كان له مبرر ... فإن بعض الظن اثم ... حاولي ان تتحكمي

باعصابك لانك اذا قلتي كلام جارح ما تقدرين ترجعينه حتى لو من غير قصد ... رفع الصوت من الامور التي تقتل الانوثه في

المرأة فانتبهي لهذه النقطة ...

اخي الكريم ... محتاجين لجلسة هادية خاليه من العتاب واللوم والتجريح ... جلسه هدفها معرفة ما بقلب كل منكما

اعرف ما تريده زوجتك ... وقل لها ما تريده انت ...

ونصيحتي لا تدقق في الامور الصغيره كثيرا ... لان محد بيتعب غيرك ..السعاده الزوجية اهم من هذي الامور التافهه ..

والله يحفظكم ويسعدكم ويوفقكم دنيا وآخره ..

__________________

للاطلاع والاستفاده : 1 ، 2

29-09-2010, 03:47 PM

احلاهم واتحداكم

عضو متألق

تاريخ التسجيل: Feb 2008

المشاركات: 1,152

مشاكلكم عااااااااادية..

بس يبي شوية حكمة.. قضية الأظافر.. بما اانه مانفع اسلوب التصريح ..ممكن تقول لها باسلوب التلميح..

مثلا: بصرااااحة انا اقرف ما علي اشوف الاضافر الطويلة!!

حتى الاكل ما اشتهيه.. وإذا طبخت شي لا تاكل من اللي تطبخه..

طبعا هي راح تلقاها فرصة انها تفتك من الطبخ ولا راح تطبخ!!!

عااااادي انت خلك ذكي وقولها انا اليوم معزوم .. وشف لك أحد أخوياك وتغدو سوا.. أو عند أهلك ..

أو إذا عندكم ديوانية أو أستراحة خذ غداك ورح هناك مدة اسبوعين ثلاث..

طبعا هي راح تغلي غلي.. وإذا قالت لك وشفيك متغير!!

قول لها والله لا متغير ولا شي.. بس كل الموظوع أني أقرف من الأظافر وانت ولا همك.. وش تبين أسوي أموت جوع!!

ـــــــــــــــــــــــــــــــــــــــــــ

وبالنسبة لقضية السهر..

طيب ليش ما تسهر معاها!!!

يعني انت تبيها تسايرك وتتغصب النوم وانت ماتبي تسايرها وتسهر معاها..

وبعدين هذي حرية شخصية مو نونو تبيها تنام نامت تبيها تقوم قامت..

__________________
سئلت اي الرجال تحبين؟؟
قلت : من اختلط عنده الحب والخوف علي..
عذرا- ليس هناك حب كحب ((أبــــــي))

29-09-2010, 04:09 PM

متزوجة ولكن

عضو نشيط جدا

تاريخ التسجيل: Jul 2005

المشاركات: 216

ياااااا حسستني يقيمة زوجي ما يرضة اشيل كيس لو هو شايل 10 يقول ما اتحمل اشوفك شايلة حاجة بيدك لاني رجال

وانا الي اشيل حمولة البيت اما حكاية الكرسي فبصراحة قمة الانانية والتملك شنو يعني تجلس في مكاني انتو في بيتكم

يعني ما في كرسيي وكرسيك اذا ماعندك استعداد تتنازل عن كرسيك لها ليش تتوقع هي بيكون لها استعداد تتنازلك

عن اي شيء !!!! وما تتعدل لما تدخل شنو يعنيييييييييييييييييييييييييييييييي هذا بيتها تجلس زي ما تحب انت مو شخص

غريب حتى تتعدل وتجلسلك سيدة كلما دخلت هذا ما طلع بيت صار سجن وانت سجانها .. والله بصراحة الله يعين ام عبد

الله طباعك صعبة و معقدة جدا ويبدو ان هي من النوع المنفتحح بينما انت من جماعة سي السيد

هو صح ما فيها شي لما تدخل تقوم مو علشان عيب تبقة رافعة ريولها بس علشان تستقبلك بالاحضان والمفروض منك

كزوج تعاملها على انها زوجتك مو بنتك او .......

اما موضوع الاضافر فانا لي نفس المشكله مع زوجي لذالك اتفقن اني ما اطولها زيادة و بنفس الوقت ما اقصرها مرة وكل فترة اروح للصالون وهناك اسويها لان انا لي كيان و نضرة وما ارضة ابد ان اي احد حتى لو زوجي يجبرني على شيء والشرع بيني وبينه لما يلاكيني اسوي شيء حرام عاد ذاك الوقت ما افتح فمي بشي.

29-09-2010, 04:21 PM

#10

خاله بيتا

عضو المنتدى الفخري

تاريخ التسجيل: Jun 2010

المشاركات: 9,516

تحط صفاتك لانك تبي تكون حيادي ومنصف مثل ما تقول وبعدها تنفي كل الصفات

تقول انك كنت تبادر بالرومانسية .... كيف يعني ؟؟؟ الانسان يصير رومانسي نص ساعة وبعدها تنتهي المبادرة ؟؟؟؟؟؟؟؟؟ تكون رومانسي يعني انك تودها .. تعاملها بود وحنان ولما تطلب شي ما يكون بصيغة الامر وكأنك ضابط كتيبة ..انت فاهم معنى الزواج وحقوق الزوج غلط .. الزواج شراكة بين اثنين بالغين وتتم الامور بالتفاهم والمودة .

والظاهر انه أم عبدالله مو عارفه حقوق الزوج ... حتى لو ما شفتي منه مودة بتعامله معاكي لازم تطيعيه حتى تكسبي رضى رب العالمين ... مافيها شي لو قصيتي أظافرك لما يطلب منك ..ما اعتدى على حريتك الشخصية لما طلب تقصيهم لانه أظافرك اللي راح تطبخ له ... ادري انه طريقته كانت فيها استفزاز لانها بصيغة الامر لكن كان لازم تطيعيه وخلي عنك العناد ... العناد صفة تأذي صاحبها قبل ما تاذي اللي حواليه خاصة العناد مع الزوج .

يلزمكم مثل ما قالت اختنا لمني بشوق جلسة حوار هادية يكون الاحترام من الطرفين هو سيد الموقف وكل واحد يشرح للثاني اللي مضايقه ..

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه