السلام عليكم

يا عزيزاتي ارجوكم اسمعوا القصه بالكامل واحكموا من الغلطان وماذا افعل ساعدوني




زوجي سافر للعمل وقال لي يومين وارجع وكان حجزه على يومين فقط

بعدها اتصل علي وهو هناك وقال اني سوف امدد لان عندي اجتماع مهم بمدد يومين معليش والله ااسفه .......... ( من هل الكلام)


المهم بعد ما رجع من السفر انا كان عندي احساس انه لمن قال بمدد ما عنده اجتماع عنده شي ثاني
اكتشفت لمن رجع لمن قرات بعض الرسائل في جواله انه كان مواعد اصدقاءه في السفر وارسلهم مسج يسالهم هم وين باي مكان علشان يروح لهم المهم بالرسائل فهمت كل شي لمن جت وسالته مين شفت بسفرك قال ما شفت احد بس عمل واجتماعات ولمن واجههت هو ارتبك وقال كيف عرفتي ؟


المهم اعترف وقال انا مددتت علشان ابغ ارتاح شوي وفرصه اصدقائي كانوا بنفس البلد اللي انا فيه قلت ابي اجلس معهم واشوفهم
لمن قلت له ليش ما قلت لي علمتني لو بالمكالمه مو تكذب علي؟؟

قال خفت تتضايقييين انا بضيق صدري اذا زعلتي ولا ابيك تزعليني لاني عارف انك ما تبغيين اسافر مع اصدقائي

قلت له الحين ضاق صدري اكثر لانك كذبت علي والفت لك قصه قلت بتممد علشان عمل واجتماع وانت مدد علشان وناسه واصدقاءك



طبعا انا زعلت وضاق صدري مررره وانقهرت ليه انا دايم معه صادقه وهو كذب علي

صدق انا ما احب انه يسافر مع اصدقاءه وسبق قال لي انه وده يروح مع اصدقاءه ويسافر معهم بس انا ما احب مو عدم ثقه لا بس خوف ما ادري منهم اصدقاءه مدري وش يسوون هناك

يااااااانااااااااااس قووولوولي هل لي حق اخاف على زوجي؟؟

هل لي حق احافظ عليه وعلى بيتي؟؟


بعد ما قريتوا هل المشكله وش اسوي معه قولولي ؟؟

دايم يقولي صديقي سافر مدري مين سافر شوفي حريهم ما يقولون شي

رغم اني متحمله سفر عمله طبيعة عمل زوجي يسافر كثير ومو دايم اروح معه لان عندي اطفال وبيت


المهم هو اعترف انه كذب علي بس السوال انا خايفه يكذب علي بكرا بشي اكبر ومممكن يقول انا بسافر عمل وهو بيسافر وناسه


أرجو منكم الافاده

وجزاكم الله خيرا

لو لم يكن يحبك لما كذب عليك.. من رأيي ان تخبريه ان يصارحك بكل شيء وتعطيه عهد انك لن تتضايقي

بذلك تضمني صراحته

ولاتكبري الأمر..هو في الحقيقة سافر لعمل ولم يطل مع اصدقائه كثيرا يومين فقط..كوني اعقل منه وتعاهدي معه على

الصراحة

ربي يسعدك

حائزة

__________________

شوفي ياعمري

اذا انك واثقة من زوجك ومن أخلاقه فانتي غلطانة

أما إذا ماعندك ثقة فيه فانتي مو غلطانة

ياعمري الوحدة ماتشك في زوجها الا اذا شافت عليه شي

وطالما انه ماشي في السليم وماشي بمايرضي الله عز وجل فأكبر غلط انه الحرمة تتحكم في زوجها وفي تحركاته

بكذا راح تحسيه انه مقيد ويظل يبحث عن أي فرصة عشان يهرب من القيود

شوفي ياقلبي

زوجك كذب عليكي صح .. بس انتي السبب

انتي اللي اضطريتيه للكذب

لو كان زوجك انسان مستقيم يخاف الله وانتي واثقة فيه

فالمفروض تعطيه الامان .. وتكسبيه .. وتخليه يرتاح في الكلام معاكي .. ويصارحك بكل حاجة

زوجك لو كان عارف انك ماراح تعارضيه .. وانك حتكوني اول وحدة تبحث عن سعادته ماكان اضطر انه يكذب عليكي

لكن لانه عارف انه الشي هذا راح يضايقك كذب عليكي حفاظاً على مشاعرك

يعني بالله لو انه قالك الحقيقة حيقدر يسوي اللي يبغاه ويسافر مع اصحابه ؟ ولا حيلاقي منك اعتراض ومشاكل وووو الخ

الرجل يبغى يرفه عن نفسه ماطلب شي حرام .. لكنه اضطر يكذب عليكي حفاظ على مشاعرك وعشان يتقي شر المشاكل

لكن لو انكم من البداية اصدقاء متصارحين كل واحد يدور على راحة الثاني وسعادته ماكان اضطر يكذب عليك

الله يآلف بينكم يارب

,
,

والله مسكين زوجك !!

من الخوف منك يكذب عشان يدور راحته !!

أنتي إيش عامله فيه ( فلم رعب )

أعتقد أنه أنتِ من جعله يكذب وهو لم يكذب إلا لأنه لايريدك أنت تتضايقي أو أن تزعلي منه ..


كفاية إرعاب لأزواجكم يا نساء .. لاتكونوا كوابيس عليهم ..!!

,
,

أنا صراحة ودي اقول كلمة من زمان في هذا المنتدى

ولعل موضوع أختنا ام حمد هو الأفضل من بعد إذنها .

ليش أنتم الحريم (الزوجات) ماتعاملون أزواجكم بأنهم هم جنتكم أو ناركم ؟ لماذا تعاملوه وكأنه طفل من اطفالكم (أخاف يعمل حاجة اكبر - مين الغلطان أنا ولَ هو ؟ - اللي عندي (تقصد زوجها) - لما اتزوجته (بينما الصحيح - لما اتزوجني) !!!!!

ياريت ترجعون إلى جادة الصواب يازوجاتنا (بعضكم) .

وسلامتكم .

يا اختي ما فيها شي صراحة لو زوجك سافر عشان يستانس مع ربعه

الله يهديكِ خليتيه يضطر انه يكذب عليكِ عشان ما تحصل بينكم مشاكل

نصيحة لك لا تضيقي عليه

تراه بيصبر وبعدين راح يمل الصبر

وبهذي الطريقة انتي تخربي على نفسك وزوجك وبيتك

الزوج ما يحب الزوجة المتحكمة ولا اللي تفرض رأيها عليه

الله يوفقك في حياتك

اختي اسمحي لي انت غلطانه ..

شكلك عامله شرطي على زوجك ما يقدر يلتفت قبل ما ياخذ الاذن منك ..

وشكل زوجك ضعيف شخصيه معك .. واااضح انك مسيطره عليه بدليل انه يخاف منك ويخاف من زعلك .. و يعمل زي الطفل

اللي يسرق الشي وبعدين يكذب لانه خايف من العقااااب ..

اختي الرجال ما يحب ان زوجته تحاصره .. اعطيه مساحه من الحريه خاصه اذا كنت واثقه فيه ..

طيب خليه يسافر من اجل الراحه مع اصدقائه .. مو لازم سفراته فقط للعمل وانت ترافقينه للمراقبه على تحركاته ..

واذا اختي مره ثانيه كذب عليك ترى ما الومه انت عامله له فلم رعب ..

فكي عن الرجال شوي واعطيه الثقه لا يطير من يدك ..

كلام سليم 100% لا فض فوك اوفقك بكل ما قلت

كونى له صديقة حتى لا يكذب
لا تجعليه يخاف يحكى لك
خيرا لك ان تكونى في الموضوع احسن من ان تكونى على الهامش
انتى عزيزتى تجعلين نفسك على الهامش
وعندما يكبر اطفالك سيفعلون مثل ابيهم ولن تعرفى عنهم شىء
الحل هو الصداقة ثم الصداقة ثم الصداقة
ساعديه ان لا يخاف حتى من ان يحكى لك هفواته واخطاؤه حتى تكونى ملمه بمن معكى وفي حالة احتواء له
انتى استطعت اكتشاف هذا الموقف لكن اعلمى ان الانسان بطبيعته ذكى ويستطيع تفادى اكتشافك له المرة القادمة
اذا ليس هناك حل حقيقى سوى الصداقة لانها سبيل حقيقى للصدق

__________________

والله اختي لك حق تزعلين بس مو لدرجه هذي وبعدين على حسب زوجك اذا كان راعي سوالف وخرابيط لك حق اما اذا كانت سياحه وتغيير جو فما لك حق تزعلين