السلام عليكم ورحمة الله

أنا مو عضوة جديده انا كنت هنا من اربع سنوات وسبق كتبت موضوع عن مشاكلي مع زوجي وخلال الاربع سنوات الماضيه كنت بحال مايعلمه الا الله

اكيد رح تسالون وش سبب وصولنا للطلاق مع ان زوجي مو راعي بنات ولاشراب ولايضرب بس لسانه متبري منه انسان كذاب اناني مايهمه الا نفسه فقط وانا ولاشي شديد الانتقاد بكل الامور حتى لو كانت تخص علاقتي مع الناس ولاتمسه لامن قريب ولامن بعيد

يعني زوجي يعاملني معامله السفيه وكانه يحاول يربيني!! كل شي اسويه غلط من وجهة نظره كلامي افعالي حتى تفكيري يعتبره مريض ومنحط!! بس لانه ماصار على هواه انا متزوجة من سبع سنوات ونصف اكذب عليكم لو قلت حسيت بالامان معه او حتى ان زواجنا راح يستمر لانه عند اتفه مشكله يهددني بالطلاق واني رح اندم انا مو قادره ارتب الكلام لاني مقهوره وربي انا انسانه اخاف الله ومن عايله محافظه الحمدلله ربيت بناتي احسن تربية الكل يتكلم عن اهتمامي فيهم ىتربيتهم وادبهم ونظافتهم حتى بيتي كل من شافه يمدح بنظافته الحمدلله قلبي طيب واسامح بسرعه لكن انجرح بسرعه خاصه من زوجي ومااقدر انسى

ليش؟؟ لانه ولامره فكر انا وش ابي وش محتاجه وش اتمنى او وش هي حقوقي تعامله معي اخذ فقط وعطائه لي اكل وشرب ولبس!! مشاعري وكرامتي ولاشي عنده انا خريجة من تسع سنوات وخلال سنوات زواجي رفض اي وظيفه اتوظف فيها رغم ان ابوي شرط عليه قبل الزواج انه مايمنعني من الوظيفه لكنه رفض انا انسانه مالي علاقات كثير اغلب الوقت ببيتي ومااطلع الا لاهلي اخر الاسبوع لكني بدوامه مشاكل معه طوووول الوقت وربي تعبت انهرت واتعبني القولون من الضغط اللي احس فيه دايما ضغطي نازل يحب يقهرني حتى بابسط الامور اكثر شي كرهني فيه ووصلني اني اطلب الطلاق انه يتمشكل معي حتى بالاراء الخاصه فيني ويسبني ويدعي علي بس عشاني ماتفقت معه بالراي ويتحسب علي طول الوقت لدرجه بناتي يبكون ويهاوشونه مايدعي علي وربي حطم نفسياتنا كلنا بكثره مشاكله لما يكون يهاوش ويتلفظ ويغلط علي اطنشه وامشي عنه عشان ماتزيد المشكله يقوم يلحقني ويزيد النار حطب حتى تجيني حاله هستيريه وابكي واهاوش بعدها يقعد يدعي علي ويهددني بالطلاق ويحلف اني مااقعد عنده ويروح مع اصحابه لين يطيح اللي براسه وانا اكون بالبيت مضغوطه وابكي بعد كم ساعه يجي وبدون مايراضيني يناظرني كني عدوته ويقول قومي ابي حقي الشرعي وانا بصراحه مااقدر لاني اكون ابكي ومجروحه منه اقول له عالاقل راضني سمعني كلام طيب حسسني انك تحبني وانك ماتقصد الكلام اللي قلته لي قبل تطلع يقوم يرفع صوته ويهاوش ويقول انتي فيك بلا ماتسمعين الكلام عاصيه عليك لعنة الله وملائكته ليوم الدين حسبي الله عليك اقسم بالله ان قلبي يحترق ليش يسوي معي كذا وربي ماطلبت الا حقي اني اعيش بكرامه مو اهانات وقهر وصياح كل يوم وهو بكل برود ولعانه يطلبني هالشي وربي نفسيتي تحطمت وتدمرت منه حسبي الله ونعم الوكيل ماادري ليش يسوي معي كذا حاولت اخفف من عصبيته وقلتله ع الاقل ابي اتوظف لو كان بدار تحفيظ ساعتين العصر اغير عن هالجو الكئيب اللي عايشه فيه يقول لا اقعدي بالبيت من يطبخ ويسوي القهوه وينظف البيت!! والله انه تملكني كني قطعه اثاث لاكلمه ولاراي ولاحقوق غير الاكل والشرب مشاعري مو مهم ولارغبتي وفوق هذا كله اهله يتطاولون علي وانا ماجيتهم يعني اذا زاروهم بناتي يغثونهم ويقهرونهم بتصرفات ماتطلع الا من ناس حاقده ويتطاولون علي بالكلام عند بناتي ولما قلته خل خواتك ينتبهون لكلامهم انا ببيتي كافيه خيري وشري لايتطاولون ويغلطون علي عند بناتي دايم يعلقون على بناتي ويتطنزون عليهن ويبينون لهم انهم مايحبونهن حتى بناتي كرهو الروحه لهم مع اني يعلم الله دايم اشجعهم انهم ياصلون جدتهم بالذات بس بناتي كرههوهم من جد ويقولون همرمايحبونا راح لهم زوجي ويسولف عليهم كان الموضوع عادي!! وجاني قال يمزحون مع البنات ليش انتي حقوده قلت انا لو اقصر معهم بشي كرهتني بحياتي وهم يغلطون علي ماحفظتلي كرامتي قال ذولا اهلي وانتي مابيني وبينك الا ورقه بسس

اهلي اهم ماعندي ولو يامرون علي يبون بيتي طلعتك منه ودخلتهم!! الان زوجي يبني بيت العمر لكن الظاهر انه مهب من نصيبي لكن والله مايهمني شي ناحيه هالشخص الا بناتي باخر مره تهاوشنا قال والله ماعاد تقعدين عندي وقمت اصيح من القهر ليش يبيعني قال انتي قاعده معي عشان بناتك وانتي ماتسمعين كلامي اذا قاعده عشانهن لاتقعدين روحي لاهلك وخذي بناتك وانا بشوف حياتي !! وربي محطمه لي ثلاث اسابيع عند اهلي الحين مايسال عني ابد يكلم اخوي ويقول تبي ترجع كيفها بس لاتشرط ولاشرط تبي ترجع زي قبل وزي ما انا ابي والا برسل ورقتها؟؟

وش رايكم بالله

اولا انا استخرت لي فتره بموضوع الطلاق لان حياتي معه صارت انتحار بالنسبه لي

ثانيا مريت بضغوط نفسيه منه وسامحته وقلتله ماابي منك شي الا معاملتي باحترام فقط والباقي يهون

ثالثا انا وصلت مرحله كره لهالشخص يستخيل معه اني اؤدي واحباتي الزوجيه

رابعا وهذا اهم شي ان اصراري ع الطلاق اني احس اني ضيعت اكثر من سبع سنوات من عمري مع شخص ماعنيتله شي ولا بناتي يعنون له شي وكان واضح من البدايه ان همه نفسه وزوجة تمشي ع كيفه بكل شي حتى بافكارها تكون تابعه له وتكون امعه تمشي وراه وبس ولاتطلب شي غير الاكل والملبس لان الاشياء الثانيه هي تكرم منه وتفضل علي لو وافق او سواهالي ويحل علي الغضب واللعن لو خالفته حتى بشي يخصني ولايضره ولو خالفته باحترام وبينتله وجهة نظري واني حقي يكون لي راي ع الاقل باموري الخاصه ومستقبلي وعلاقاتي مع الناس


مواقفه السيئه معي مثير لامجال اني اقولها كلها هنا لكن الحياه معه مستحيله لان مافيها موده كلها مشاكل وكره يعلم الله اني حاولت اضغط ع نفسي واتحمل عشان بناتي مايتشتتون لكن هو ماهموه البنات وانا لحالي مااقدر امشي حياتنا وهو بايعني قلتله شروطي بسيطه اصلا مو شروط هي حقوق لكنه رفض حتى يعرف وش الشروط رفض مبدا اني اشرط وقال لاخوي برسل ورقتها

موضوعي شبه منتهي لكنها فضفضه احس صدري بينفجر من كثر مافيه فيه كلام كثير عندي وهذا نقطه من بحر بس تعبت واحس كلامي مو مرتب اتمنى دعواتكم لي وارجوكم الرد بدون غلط لان ماحد يعلم كيف كان يومي يمر معه لكن الله يعوضني ببناتي ويحفظهن لي يارب