السلام عليكم ورحمة الله وبركاته. ..
كل عام وانتم بخير. . ومبروك عليكم الشهر الفضيل. .
انا سبق وعرضت مشكلتي. .
http://www.66n.com/forums/showthread.php?t=266887
ولازلت في بيت اهلي طبعاً ورفضت الرجوع لزوجي الى ان اولد واقوم بالسلامة انشاالله. . ويصير خير .. هذا ماقلت لأهلي ..
طبعاً اهلي سكتو عن الموضوع وخلوني براحتي ..
بعدها بفتره كلمني اخوي الكبير وقال انه زوجك متصل ويقول انا ابي الامور تتصلح وانا ماسويت شي و انا ابي بناتي ومستعد اتنازل عشان بناتي ..
اخوي قالي خلاص فكي الحصار الي مسويته واتصلي بزوجك ..
قلت ليش انا الي اتصل وهو مايتصل ويسأل عن بناته !!!
قال انه يقول اتصل عليها وماترد .. قلت لاخوي ويكذب بعد حسبي الله ونعم الوكيل .. الى متى هالكذب وهالتصرفات البايخه.. وتبيني اصدقه بعد وكل مرة نفس الشي .. قلت لاخوي لو سمحت انا وحده تعبانه اذا ولدت يصير خير انشاالله. .
طبعاً اخوي قالة هي ماتبي احد يفاتحها بالموضوع لين تولد ..
وعاتبة اخوي ليش ماتتصل على زوجتك وتسأل عن بناتك .. تشوف هم محتاجين شي والا لا ..
تخيلو بعد 20 يوم يطق الباب وياخذ بناته المغرب ويرجعهم بالليل واحيانا بالشهر مرة ياخذ بناته ..
ولا مصرووف ولا شي ماغير حليب وحفايظ للبنت الصغيره .. !
طبعا ابوي عنده مصروف خواتي وخواتي 6 ماشاالله. .
وماحبيت ازيد عليه مع انه مو مقصر يعطيني بقدرته ويسألني عن حاجتي ويجيب لبناتي الي يبونه والي يحبون..
انا بعت طقم ذهب عندي وجاب لي سبع الاف وحطيته في حسابي وصرت اصرف على نفسي منه وعلى بناتي و وقت الحاجه آخذ منه ..
يعني طلعة استراحات و صديقات اخذ من حسابي بنتي انكسرت رجلها و و ديتها المستشفى حكومي و طلع الجبس غلط وبعدها وديتها مستشفى خاص على حسابي وعالجتها عندهم والله ماكلف نفسه ابوها او قال انا اوديها ... وانا وابوي تبهذلنا من مستشفى الى مستشفى ...
صار عندي نزول بالمشيمة و دم واظطريت اروح مستشفي خاص اكشف على نفسي واتطمن ..
والله يعلم اني احاول قد ما اقدر ما اصرف الا للازم ..
بناتي يطلبون من مطاعم او بقالة وقت الاجتماعات طبعاً ما احرمهم اعطيهم ..
وقبلها بكم يوم كنت نايمه واشوف بنتي الكبيره جالسه على سريرها والنور طافي واقولها نيمي نيمي وماترد وتركتها براحتها فجأه اسمعها تبكي وتشهق من البكاء ناديتها وحضنتها سألتها وشبك قالت انا احب بابا ابي بابا خلاص لا تزاعلين بابا انا اقول لبابا دلع ماما ونروح للشقة كلنا ..
انا انفجرت بالبكاء قدامها ما قدرت امسك نفسي وهي تمسح دموعي وتقولي خلاص ماما لا تصيحين خلاص وتحضني بقوه وتقول بنام جنبك على السرير ..
تعبت نفسيتي كثيييبر عشان بناتي وبنتي الصغير تقولي ماما قوه الشقه..
والله ابكي لين اتقطع من البكاء. .
بعده ارسل لي رسالة بالواتس .. دعاء للرسول صلى الله عليه وسلم. . عن المتخاصمين في شعبان ..
مارديت ولا شي ..
بعدها يمكن ب 15 يوم ارسل رسالة نصيه وكاتب ..
السلام عليكم ورحمة الله
شلونك؟عساك طيبه؟
شلون البنات؟
اليوم ان شاءالله ابي امر البنات قبل المغرب..واي شي ينقصكم او تحتاجينه انتي وياهن بلغينن.وشكرا.
طبعاً هاذي رسالته نسختها لكم ..
وانا مارديت عليه ابد ... وجاء و اخذ البنات ورجعهن ..
طبعأ هذا يمكن قبل 25 يوم ...
اليوم ارسل رسالة
السلام عليكم
انا ابي امر البنات اليوم العصر
وطبعا ماجاء ولا اخذهن الا العشاء وراحن معاه يمكن ساعتين وجن و فتحت اختي الصغيره وجايبه معاها ظرف. .
مكتوب عليه .. كل عام وانتي بخير .. يصل إلى ام غاليه.
وفتحته لقيت فيه مبلغ ثلاث الاف ريال ..
والله العظيم ما اشوف انه شي يسوى ولا همني المبلغ عند بناتي واهماله لهن . . خمس شهور عند اهلي مافكر يدفع لهن ريال واحد او يسأل عن حاجتهن .. او رغبتهن .. انا ما ابي منه شي .. وبعد عشرين يوم ياخذ بناته ساعه ساعتين ويجيبهن ..
اي اب هذا .. اذا انا خلال هالخمس شهور اصرفت خمس الاف وكلة مستوصفات وامور ضروريه .. وهو جايب ثلاث الاف كنه مليون ... نفسي ارميها بوجهه واقوله شكرآ وصح النوم ..
كنت عارفه انه مسافر و دايم اقول اكيد مسافر وقالت امي ايه انه مسافر بأمه . قلت ادري بأمه واخواته مو شي جديد قالت ايه عندها مراجعه ... ما ادري الى مته هالمرجعات ويتعذر بعد بمراجعات امه لو هي مريضة بسرطان من كثر المرجعات الي كل اسبوع كان تشافت ..
طبعاً امي من اخوي قايل لها ..
انا كل الي يهمني بناتي. . حتى لما كنت عنده بالشقه. . ينام ويقوم يطلع من البيت والبنات يبكون يبونه واقوله حرام عليك .. اجلس شوي معهن ويرفض ويطلع .. يادوووب من زمان الى زمان يوديهن مطعم والى الحديقه الي جنب البيت ..
وكنت اقول لهلي هالشي ومايصدقوني ..
واسمع امي وابوي يقولون الى هالدرجة شلون يصبر عن بناته كل هالمده مايشتاق لهن ...
والله لو تشوفون الحاله الي هن فيها لما نقول بابا جاء يختبصن ويركضن ركض والبكاء خايفه ابوها يروح ويخليها ..
كيف ممكن يهتم لبناته ..
واذا رجعت ماني حابه ارجع الا بشرووط ..
ماهو رائيكم ؟؟ بقراري عدم الرجوع الا بعد الولاده .. انا الان بالشهر الاخير من السابع يعني باقي شهرين ونص تقريبا على الولاده ..
لا يعني لي شي ابد واحمل الكرهه بداخلي له ..
لاكن بناتي والي بطني هم حياتي وسعادتي. . مابي احرمهم ابوهم مع انه مايستاهل يكون اب ..
انا لا اطيقة وان حصل الطلاق لا يهمني بالعكس يمكن يكون هم وانزاح عني ..
ولاكن بناتي ونفسيتهن .. اتعبتني ..

في الفترة اللي راحت لما احتجتي مستشفى ومصروف ليه ماطلبتي منه مباشرة بمسج أو خليتي أمك أز أخوك يكلمونه ؟

انا ما اعرف مشكلتك السابقه
بس بقول لك شي
قبل 3 سنين صارت مشكله كبيره بيني وبين زوجي
وجلست شهر ونص ببيت اهلي
وكان معي بنت عمرها سنه
والله ماعطاني ريال واحد طول هالمده
رغم انه كان هو الغلطان من ساسه لراسه
وكان يدق ولا ارد عليه
وطول هالفتره ماشاف بنته الا مره وحده
واصلا ماكان حريص يشوفها
بس جدتها طلبتها اشتاقت لها
اخذها لامه ساعتين ورجعها

اتوقع اغلب الرجال كذا وقت الزعل
على اعتبار انتي عند اهلك خلاص هم يتكفلون فيك
مايطري على بالهم اللي تقولين
ان بنتك اشتهت مطعم والا طاحت وانكسرت
يقولون لانفسهم: ماكلين شاربين نايمين الخ

يعني الحين زوجك لما عطاك 3000 بظرف
وانتي قلتي يحسبها مليون
ترى صح كلامك هو يشوفها شي عظيم
يحسب انه مصرف دلع وكذا
وعدم شكرك بيعتبره قل تقدير
وانو ما يبين بعينك شي ومايرضيك شي
ويالله هاتك من هالتفسيرات الغبية
والشيطان يرقص بينك وبينه


انا ما اقول لك ارجعي بيتك
خلي رجعتك بعد الولاده
انتي مافيك حيل كرف رمضان وباخر شهر
لكن افتحي باب الود
لا تسكرينه.. عشان بناتك عالاقل
اشكريه عالمبلغ وباركي له بالشهر
خليه يزوركم ببيت اهلك كل فتره
واجلسي معه هو والبنات
سولفوا عادي
واعتبري هالشهر الفضيل فرصه لتهدئة النفوس
واذا احتجتي شي علميه
وبرضو مصروف العيد اطلبيه
خذي حقوقك كلها بهدوء
غلط تبيعي ذهبك
غلط ترهقي اهلك
غلط تحملي نفسك فوق طاقتها
وبالنهايه تشيلي بخاطرك اكثر
والله الدنيا ما تسوى يا الغالية
الله يقومك بالسلامة

اشكرك على ردك. .
لم تتطلعي على مشاكلي السابقة معه ..
اولا كيف اطلب منه وهو الي طردني من بيته وقالي انقلعي بيت اهلك ..
ثانيا هو لم يلبي احتياجات وانا عنده تبينه يوديني وانا عند اهلي ..
انا لا اريد منه شي ولاكن كنت اقول المفروض يلبي احتياجات بناته بس

اشكرك على ردك ..
اختي كلامك صحيح. . الدنياء ماتسوى ولاكن للمعلومية هذي المرة المليون الي يرميني عند اهلي ويفتعل مشاكل بدون سبب.. انا رايحة راجعه من بيتي لبيت اهلي ..
وكل مره اقول اخر مره لاكن لاحياة لمن تنادي. .
اعتقد ان هناك مرض نفسي عند زوجي ...
انا ماحبيت اصلح الوضع بيني وبين زوجي حتى لا يفعل مشكلة معي .. مع العلم انه حتى ايام النفاس الي اكون فيها جالسة عند اهلي يتمشكل معي في امور سخيفه وكأنه يبحث عن الزله علي ..
للذلك انا ماحبيت اصلح الوضع ولعل وعسى يتعدل ويتغير ..
ياختي انا بعت ذهبي لجل اعالج بنتي صحة بنتي تسوى عندي الدنيا ومافيها وايش يعني لي الذهب...
لانه العظمه كانت مجبره ولو مامكنتها احتمال تتأثر اذا كبرت وتصير فيها عرجة شوي ..
بس الحمدلله .. وانا سويت كذا ماحبيت إضغط على ابوي او اي احد .. مع انه كان هو راغب يدفع لنا ولاكن رفضت ..

بالنسبة لشكره على المبلغ يما كنت اشكرة على مية ريال وميتين ..
ولاكن الان ومن اليوم لازم يعرف انه هذا واجب عليه ولبناته ..

اختي مجروحه اصبري وصابري من اجل بناتك البنت من غير ابوها تعيش مكسوره احرص على بيتك ولاتفرطي واحتويه وعيشي حياتك علشان يتربن البنات في بيت ابوهم وكلنا الرجال مقصرين ولو حرصنا ودايم نبي زوجه مثل امنا مهما سوينا تحملنا دمت بود والله اسئل ان يرد اليك زوجك ويهديه وترى مع الوقت بيصير تمام بس اعطيه فرصه واصبري عليه

سكرا لك اخي شبية الريح . .
ولاكن للصبر حدود. . و لو هي مشاكل عاديه تحملت لاكنلا احتمل كل يوم والثاني موديني بيت اهلي على مشاكل يبحث فيها الزله علي ..
اشكرك على دعوتك والف شكر لك..
وان صبرت ورجعت راح احط شروط هذه المره..

حاسه فيك والله
الله يعينك ويفرج همك
اكبر قهر انك تصرفين عليهم وتاركته بدون م يتحمل المسؤليه
يوم البنت تعبت ليه مااتصلتوا عليه وغصب جاها ولو رفض يجمع والدك رجال ويشهد الرجال ع افعاله بيطيح وجهه وغصب بيهتم فيهم الين يتعود
اب عيالي كان كذا وكنت اقول هو قاسي
الين تزوج وشوفيه مع عياله غيييير اب بمعنى وحقيقي ...
انا تركيزي بموضوعك عن حقوق بناتك
لاتضيعينها وتتحملينها لوحدك
اتركي البنات يتصلون عليه
خليهم يحنون قلبه ويبكون عنده ويضغطون عليه هو ان شالله انو فيه خير لهم بس شكلو عارف اهتمامك لهم وانهم بإمان عشان كذا متراخي عن دوره كأب..
الله يصلح مابينكم ويسخره لكم
استغلي هالاوقات بالدعاء وبإذن لله ربي ماراح يردك خائبه..

__________________
(سيدة الموقف)
لم ننساك ونسأل الله ان تكوني أنتي وأولادك بخير

فعلا اختي كلامك صحيح هو معتمد علىي وعلى والدي كثييير ولما اقوله شي قبل واعاتبه على تقصيره كان يقول .. انا متأكد ان خالي مايقصر ويسوي لكم احسن مني طيب ابوي عنده مسؤليات ليش تزيد عليه ليش ماتخجل ... !!!
هذا غير ان ابوي معاه مرض بالقلب ويجهد نفسه كثير .. انا وابوي الي دبرنا اورقها وسجلنها بالروضه .. بنتي الصغيره اذكر صار معها خراج في المنطقة الحساسة وهو ولا علا باله يقول عادي شي بسيط ليش تكبرين الامور .. تخيلي سوو لها فتحه عشان بطلعون الخراج ..
الحمدلله على كل حال. .
ولاكن متى بيفهم ويهتم .. قلت لأهلي هو يعتمد على ابوي بكل شي حتى لمى اقوله وديني يقول خلي اهلك يودونك اتصلي بأخوانك وهو بالاستراحات يضحك ويلعب (بليس تيشن)..
...
اليوم اخوي جاء عندي يبشرني انه نقل الى المدينه الي ساكنين فيها لانه مدرس وهم بالقريه ويقول انه زوجي بعد نقل...
انا عارفة انه يبي يلقى له عذر ويقول ليش ما باركت لي ...
وهو اصلا كل همه الناس انا ماهميته ..
اهم شي بالنسبه له علاقته مع اهلي ماتخرب ..
وكان يقولي دايم .. حتى لو تطلقنا انا اهلك بزورهم واخوك بروح واجي معاه ماتقدرين تمنعيني عن اي شي .. قلت له سو الي تبي ..
ويرسل لأمي رسالة تهنئه برمضان. .ويقول لأخوي خالتي ليش ماترد علي ...
وانا لايتصل علي ولا يسأل فقط اذا يبي يأخذ بناته يرسل رسالة انا بمر اخذ البنات اليوم .. بس .
اعتذر عن الاطالة ولاكن احس اني مكتومه محتاجة افضفض ..
محتاجة مشوره محتاجه احد يقولي سوي كذا ولاتسوين كذا ..
لاني اشعر بنفسي مثل التايهه الضايعة الي ماتعرف شي ..

انتي ماشاءالله ام مثالية وانسانة مكافحة وقوية واتضح لي هالشيء من مواضيعك .. وتهمك كثير مصلحة بناتك ماشاءالله عليك ..

انتي ياقلبي وش مرتاحة عليه اكثر ؟ شيلي من بالك اهلك وهو والناس .. فكري بمصلحتك وش تحسين افضل ؟

فكرتي قبل ببناتك ورجع طردك .. الحين فكري بمصلحتك ومصلحة بيتك بايش تتوقعين ؟

- تردين على رسايله وترجعين لبيتك ؟
- تأجلين التفكير تماما حتى ولادتك ؟
- تحطين شروط ترضيك وتشترطين الرجعة بعد الولادة ؟

ايش اللي بببالك الحين

__________________
سبحان الله وبحمده ، سبحان الله العظيم