السلام عليكم ورحمة الله وبركاته
في هذا الموضوع راح اقولكم كل شي عني وعن شخصيتي وحياتي بشكل عام بين اسرتي وبين المجتمع
لاني حابه اتعالج من كل عقدي ومشاكلي النفسيه اللي تعبتني ونفرت الناس من حولي
اول شي انا فتاه عمري 24 سنه
اعاني من عدة مشاكل نفسيه
مثل الغيره القلق الخوف من الظلام خجل مبالغ فيه او نقدر نقول رهاب اجتماعي الخوف من المستقبل توقع الامور السيئه الحساسية المفرطه من اقل كلمه تنزل دموعي فقدان كلي للثقه بالنفس
وهذي المشاكل تراكمت وسببت ممارستي لعادات خاطئه سويتها ومازلت اسوي بعضها الى الان
اولها مص اصبع الابهام
نتف شعر راسي < مازلت الى الان مستمره على هذي العاده
الاكل بشراهه <مستمره
طبعا اول شي حابه ابدا فيه ثقتي بنفسي المنهدمه وحساسيتي البايخه
انا حساسه بشكل مو طبيعي لدرجه والله لو احد رفع صوته علي من باب المزح ابكي
او انكسر شي من يدي بدون قصد ابكي
ولكم ان تتخيلو اسخف المواقف راح اقولكم انا ابكي فيها كلها
اما ثقتي بنفسي فهي منعدمه نهائيا
ماعندي ثقه بشكلي ولا بجسمي ولا بتفوقي ولا بكلامي ولا بعلاقاتي الاجتماعيه والا في اي شي بالحياه يخصني
كل الناس يقولون يمدحوني ويحلفون انه مو من باب المجامله وانا اعرف ناس ماتجامل نهائيا لكن تمدحني بكل شي اسويه مثل طبخه او لبس او كلام
بس انا ما اصدقهم واقول اكيد انهم يجاملوني عشان مايكسرةن خاطري واتحطم
امس صارت بيني وبين امي مشكله كبيره كله بسبب الثقه بالنفس
بدايتها اختي اللي اصغر مني انخطبت ربي يتمم لها على خير والحقها ان شالله
اول ماسمعت الخبر بكيت بشكل هستيري عزت علي نفسي انو ليش يعني انا ايش ناقصني
اكيد فيني كذا وكذا وكذا
طبعا شافتني امي حلفت لو اني ابكي عشان اختي ببتزوج قبلي انها تكنسل كل شي وماحد يتزوج قبلي انا
انا رفضت وبشده مو من باب المجامله بس عشان لا اقطع بنصيب احد وما احب اسوي بالناس اللي ماارضاه على نفسي ان احد يقطع نصيبي
فاستغليت الفرصه اني ابوح لامي بكل شي كبته بقلبي من سنين
علمتها اني انسانه كبرت على ابواب ال25
وفرصي بالزواج بدات تقل والله اعلم
عشان كذا حابه اطور من نفسي واغير من شكلي عشان ابدا حياه جديده
سالتني امي ليش ؟
قلتلها خايفه من كلام الناس
بكره بالزواج لو شافوني دبه بيقولون اكيد ياحرام ماتزوجت عشان جسمها مو حلو
ياحرام ضاع عليها بس لو انها تنحف شوي ومن هالكلام
بدات عاد امي تعصب وترمي علي كلام من كل الجهات
انتي مهزوزه انتي غبيه انتي مو واثقه من نفسك
كلام الناس تحت رجولك
لا تسمعين لاحد ولا يهمك احد
لازم تكونين واثقه
رديت عليها انو احنا مولحالنا في هالعالم مادام رضينا نختلط بالناس لازم انا نراعي كلامهم ونتحمله
ومانخليلهم مجال يتكلمون علينا
طبعا استمرت المشكله الى ساعات
بس انتهت على لا شي وصلنا الى طريق مسدود
ومازلت انا انسانه غير واثقه من نفسي وخايفه من كلام الناس عني مو بس عن جسمي
عن تاخري وليش الصغيره راحت قبلي
وخايفه موت من نظرات الشفه في عيونهم
مو عارفه كيف اواجه هاد الشي وكيف اتحمل
والله كل ما اتذكر الموضوع احس سكاكين بصدري
ربي العالم انه مو حسد لا والله
بس خوف من كلام الناس
كثير اتخيل ان لو احد سالني ليش ماتزوجتي اضحك في وجههم واقول لسه ماجا اللي ببالي
او ماحد طابق مواصفاتي او اي شي من بابا المزح
بس ما اقدر
اتخيل هالشي واجلس ابكي بحرقه والم
وادعي ربي دايما اني ما ابكي وان دموعي توقف عن النزول على هالاسباب التافهه وان يقسى قلبي وما اهتم لمثل هذي الاشياء
عارفه ان دعائي غلط بس وش اسوي ما اقدر اتحمل
طبعا من هذا الموقف تقدرون تستكشفون عدة عقد نفسيه غير عدم الثقه بالنفس واللي هي
الغيره نظرتي السوداويه للحياه تشاؤمي من المستقبل وخوفي منه
وهذي اول مشكله اتمنى حلها
انو كيف ابني ثقتي بنفسي وما اشيل هم المستقبل وكلام الناس
واوقف بوجه الكل وانا كلي ثقه
اسفه ع الكلام الطويل والملخبط
اتمنى منكم بعد الله مساعدتي
وجزاكم الله خير