السلام عليكم ،،
ترددت كثير قبل أكتب مشكلتي لكنها تتلخص في عدم الاستقرار
متزوجة من ثلاث سنين وماشيه بالرابعة، من حوالي سنتين انتقلنا للسكن مع اهل زوجي عى أساس انها فترة مؤقتة ثلاث شهور ويرجع لدوامه، قضيت هذي الفترة مابين التنقل بين بيت أهلي وأهله وكنت موافقة ومقتنعه لانها مؤقته وقصيرة .
كانت يصير مشاكل وتقصير بسبب الوضع لكن اتفقنا انا وزوجي ان هذي فترة مؤقته ما نحكم على بعض فيها، وكنت أمشي أموري حسب الوضع ، وكل ما أسأله متى نسافر ونستقر يقول شهر أو شهرين بالكثير ، واستمر هذا الوضع سنه. وضعي في بيت أهله كان كالتالي : ننام بغرفة في وسط البيت غير مأثثه ، حمام مشترك
عند أي مشكله وخلاف يحصل زوجي يذكرني بتقصيري (مع العلم أني احاول ما اقصر + أنا نبهته في أول مره قال هالكلام أن طالما الوضع كذا طبيعي بيصدر مني ومنك تقصير ولما كررها قلت له أنا مجهودي ضايع في هذا البيت خصوصا في الاجازات اذا اجتمعوا اخوانك واخواتك ).
من فترة قريبة صارت مشكله وطبيعي دام عيشين مع أهله تدخلوا ( ماراح أتكلم فيها الآن )
ما يزعجني الآن رضا زوجي الغريب العجيب عن الوضع اللي احنا فيه بنكمل سنتين وهو كل شهر يقول لي الشهر الجاي ،
الوضع هذا يترتب عليه أضرار كثير أهمها مصروفي مهما اطلب هو يماطل ، ينضغط من مشاكل تحصل عند اهله يحط حرته فيني ، أكثر شي يضايقني انه ما يقدّر صبري معاه في هذي الظروف .
يعني بدل ما يداريني ويعوضني ألاقيه يلومني ويحسسني بالتقصير .
أيام كثير أكون معاه ببيت أهله وأظهر له أهتمامي فيه من كل النواحي ، مع ذلك أي طلب أطلبه يكون في طي التأجيل،
هل تصرّفه معقول أو أنا بالغ ، من تزوجنا عمري ما تركت بيتي فترة طويلة بالعكس ماكان يسمح لي أسافر لأهلي بحكم غربتنا ، لكن من جينا بلدنا عادي عنده وضعنا هذا ! ما اشتاق لخصوصيتنا ! ما اشتاق لنظامنا وحياتنا ! صرّحت بهدا الكلام قبل سنه من الآن ان انا اشتقت نعيش حياتنا لوحدنا وناخذ راحتنا
أمور كثيرة ترتبت على هذا الوضع أقلها واللي إلى الآن حاز بخاطري تدخل أهله في مشكلتنا الأخيرة مو قادرة اتجاوز وندمت إني رجعت له . واللي قاهرني اني لما اوضح له اني ماعد صرت مرتاحة عند اهله ما يسأل عن السبب أو يتفهم لا يتكلم معي وكأن الحق معه ما يراعي أني عند أهله محبوسه مو لسوء فيهم لكن لأني أمور كثير ما أقدر انجزها عندهم ، الرايح والجاي شايف حياتنا عندهم خصوصية مافي .
كمان موضوع الحمل مو مزعجني كثر ما ازعجني أنه يحملني المسؤولية ،هذا الشي لاحظته بعدما انتقلنا هنا عند أهله .
تفاصيل بسيطة متأثرة بموضوع الاستقرار تأثر على نفسيتي و استقراري
تكلمتتتت معاه اكثر من مره أني خلاااااص طفشت مرات يسوي نفسه متفهم لما يكون الكلام وجهاً لوجه، لكن اذا كنت بعيده عنه يلومني ويحسسني اني انا المقصرة وصراحة هذا الشي يخليني اشك ان اهله ينتقدون وضعي قدامه بالتالي يجي مشحون علي،
وجملته الشهيرة دامك تتذمرين هذا مو صبر يا جماعه أنا ما تذمرت من ثاني شهر ولا سادس شهر بالعكس ماعمري أزعجته بالسؤال ابدا إلا بعد المشكلة ، أنا صرت ابدي انزعاجي بعدما طول الموضوع حتى يفهم وياخذ قرار نطلع نستقل أو يعجل بأمور السفر.
هذا غير المواقف الي تحصل وتضايقني لكن امشيها واسكت واطنش وكذا مشكله تحصل بسبب وجودنا ببيت أهله
موضوع أن نستأجر شقه مرفوض بالنسبة له لأن كالعاده الشهر الجاي بنسافر !
أنا بدأ يصير في نفسي شي منه ( بمعنى هل هو زوج جحود ما يقدر زوجته )
أنا شااااايله كثير بقلبي لانه ما يقدّر ولما تصير مشكله ماعنده استعداد يتفهم بالعكس يلقي اللوم علي
حجته الحاليه أمه مين يجلس معاها بما أن أخوه سافر ، مع العلم أخته موجودة
الموضوع بدأ يضايقني وأحتاج حل ، مشورة ، حيله ، توجيه أي شي،،،،
31-07-2022, 05:49 PM
ضوابط المشاركة
العرض العادي
