انا اليوم جاية اطرح عليكم مشكلتي الي اتمنى تفيدني وتنصحوني
الى اصحاب الخبرة والخيرة من اهل المنتدى وهم كثار الله يجزاهم الخير
عمري 22 سنة وانا من دولة خليجية وزوجي عمره 27 سنة من دولة خليجية ثانية
مشكلته ادا جاني بلدي مايصلي .... وادا قمت انصحه واحاول معاه في الصلاة بعد مايطلع قلبي يصلي
ليش هو يسوي هالشي ؟؟؟
اقولكم السبب:
هو كان في مراهقته عنده سوالف مو زينة مع البنات في ديرته اعترف لي بكل الي يسويه من سوالف وخرابيط
والله هداه بعد هالفترة لما صار عمره 20 وتم يصلي ويحافظ حتى على صلاة الليل ويختم القرآن كل شهر مرة ابتعد عن كل منكر وفاحشة
وماشاء الله عليه الى هالحين عنده تحليل منطقي وعقائدي للامور مامدح فيه بس احسن حتى من المتعلمين والدارسين لامور الفقة والعقائد
جاته شغله في منطقة من مناطق دولته وانتقل عليها ورجع شوي شوي مايدرس قرآن
صار يأخر الصلاة بس يقضيها
قام يتعرف على بنات وارقام ويكلمهم الين رجع مثل قبل يمارس الزنا والعياذ بالله وصار يجي بلدي بما انه انفتاح كل شهر مرة تقريبا علشان بنات الهوى وكان في فترة جيته مايصلي
لما سألته تدرون وش يقول؟
شلون اقابل ربي بالصلاة وانا مسوي منكر
واخدها عادة اذا يجي بلدي مايصلي
ويعترف انا لما يقضي وطره يستحقر نفسه ويعظم جرمه يعني بذرة التوبة بداخله بس يبي من يشجعه ويحثه على ترك المعاصي وهو بطبعه وحيد يعني اكثرية الي يعرفهم زملاء عمل فقط ماعنده صديق مقرب منه
ولكن ادا رجع بلده يرجع يلتزم بالصلاة بكل فريضة
الحين صار حتى لما يجيني مايصلي الا لما يطفشني ويخليني اعصب
مع اني اجيه بالهداوة اذكر بآيات الله واحيانا احزم شوي وارجع اناقشه ويسمع لي وبعدين يتراجع
واحيانا اعصب عليه يقهرني على الصلاة
يقول لي امي وابوي ماجبروني على الصلاة مايصير انتي تجبريني
هذا شي بيني وبين ربي
بس انا اقول له هذا واجبي وربي راح يحاسبني عليه ادا مانصحتك
والمشكلة انه يعرف عقوبة تارك الصلاة ويعرف كل شي صدقوني انسان مثقف ومتعلم وشهادة
وادا جى يتكلم في امور الدين انسان لا يعلى عليه
مو عقوبة الشخص العارف والعالم تكون اكبر ؟؟؟ من الشخص الجاهل بعقوبة الذنب؟؟؟!!
طبعا لما تزوجني انا كنت عارفه بكل هالشي وهو اعترف لي لانه تعرف عليه قبل زواجنا بفترة بسيطة
وبعد الزواج
وحاولت احفظه واغنيه بالحلال عن الحرام والحمدلله ابعدته عن الحرام بتوفيق من رب العالمين
وصرت له كل شي حبيبه زوجه صديقة اخت عطيته كل حنان الكون حاولت ولازت احاول اعوضه عن حرمانه العاطفي وهو مثل الشي يبادلني اللهم صلي على نبينا
واعلن توبته عن المعاصي مع بنات الهوى والزنا وحاولت اسمعه مع هالشي يغيضني لما يتكلم
بس تحملت علشان ينصلح امره
والحمدلله على توبته
((((((((((((ولكن بقت مشكلة الصلااااااااة)))))))))))
الي ذكرته مشكلته الوحيده فقط بالنسبة لي
اما عن ايجابياته علشان لا اظلمه
- يصلي ادا رجع بلده ويخاف ربه فيني كثيررررر (وهنا في بلدي مايصلي الا بطلعة الروح)
- كريم وحنون جدا ويحبني حب جنون اللهم صلي على النبي
-متعلم وهادئ في مناقشة الامور وكثيرا مانتوصل لحل ادا قعدنا نتناقش في بعض الامور
- انا عصبية جدا بينما هو يتحمل هالشي ويحاول يحد من عصبيتي ويرشدني للطريق الصواب ويقول الحقيقة ولو هي تزعل علي او على نفسه
-بار بوالديه ويقدس الام والابو الحمدلله
- محاور جيد
صح كلامك واتفق معاك ان تارك الصلاة له عقوبة وكافر
وربنا سبحانه غفور رحيم
بس انا ابي نصح وارشاد مو اتركه
ابي اخد اجره في رجوعه لرب العالمين
ودام انه في داخله صراع بين المعاصي والرجوع لرب العالمين والتوبة
يعني الامل ان شاء الله موجود في اصلاح امره
فهو احيانا اكلمه بالهدوء واوصيه بصلاته يقوم ويتوضى ويصلي او اقول له دخل وقت الصلاة يقول يلا نصلي
واحيانا يطلع قلبي