السلام عليكم ورحمة الله
صباحكم /مسآؤكم كما تتمنون وأجمل ...

ما تحسوا أني جننتكم بالعرسان.. والاستشارات ؟!
أصلا حياتي كلها عبارة عن حكاية عجزت أنا صاحبة الحكاية أن أفقه فصولها ..

ما علينا ...
الفشل بعلاقة الزواج علّمني التنبله والتبلد .. الحمدلله على كل حال ..
طبعا مافي اكثر من التنازلات اللي صرت اقدمها فالحياة تجبرك أوقات انك ترضى بالقليل ..

الان اكتب لكم وأمي حبيبتي رافعه صوت التلفزيون ع الأخبار..
فالتشوش موجود ولكن بإذن الله يوصلكم اللي ابغى أستشيركم فيه ..


خطبني
عمره 43
وظيفته مرموقة
رياضي مع شهادات واتحفظ ع نوع رياضته
اكبر ابنائه بنت تصغرني ب 8 سنوات
لا يدخن أبدا

اللي صار الأيام اللي فاتت انه :
خلال أسبوعين خطبني وتمت الشوفه وسويت تحليل الزواج .

غداً
راح يطلع التحليل وراح يجي يتفاهم مع اخويا ع موعد الملكه والمهر والزواج وكذا ..


أنا أكلمه بعلم أمي

المشكلة:

طبعا مكالمتي معاه للأهمية وللتفاهم وانا اللي طلبت هالشي
هو كان بيقلبها رومنسيات لكن بأسلوب فهمته انه كل شي بوقته حلو

الشي الحلو اللي لاحظته:
يقول انه مستحيل يطلق أنثى
انه طيب
اهتمامه لوجودي بحياته
فرحان جداً بعد الشوفه ويتمنى انه الزواج يكون قريب
وعدني انه راح يسعدني وقالي انه بعد التحليل ما يطلع راح يخبر زوجته ومتوقع منها تزعل لانه هي عندها خبر انه بيتزوج بس ما تدري متى الوقت او مين ..
طلب مني اسكن مع زوجته بملحق والمجلس مشترك ورفضت رفض تام
وقال لانه مستعجل نسكن بالملحق بعمارته طبعا غير عن سكن زوجته وأولاده وأمه الين يطلع المستأجر اللي بالدور الثاني وبعدين اسكن الدور الثاني وهالشي مؤقت ..

للان ما كلم أهلي ع السكن
بس أمي لما شرطت عليه الوظيفه قال أنا ودي انها تدرس وتكمل ماستر وما عندي مشكله بالوظيفة

الشي اللي زعلني منه :
جلس يسألني كم المهر عندكم لانه هو من قبائل الجنوب وانا من الحجاز
قلت له احنا ما بين 30 و40
قال والثيب ؟؟؟
صراحه حز بخاطري أسلوبه ومساومته ليا ..
قلت له ترى زواجي كان فتره بسيطه وانا ما طلبت منك مهر وقدره وأهلي ما يتشرطوا يعني ادفع اللي تقدر عليه
وقلت له انه الفلوس تروح وتجي << كذابه لانها مُسرفة وتحب الفلوس
بس قال أنا سألت كم مهر المطلقه بقبيلتكم وقالوا لي بحدود 15 بس أنا بدفع عشرين
طبعا هذا اختصار النقاش بس حز بخاطري صراحه
يعني يكلمني يقول بشتري بوت قيمته فوق الخمسين الف وانا تساوم عليا ؟؟

كمان ما قال لأهلي ع سالفة الملحق بس هو قال بقولهم انه مؤقت..

ربطت بين هالسوالف وبين انه قبيلته معروفه بالبخل ..

قلت الفاصل أني بطلب منه زواج بقاعه رخيصه وصغيره يعني ممكن تكلفة الزواج اللي اطلبه ما توصل 30 الف
ان رفض بعرف انه بخيل وبرفض الزواج كله ..
لانه خير شر سالفة سكني بملحق مو مرا داخله مزاجي
كمان خايفه يضحك عليا ويوعدني وتمر السنوات وانا بالملحق


ايش رأيكم الان
هو بيجي لأهلي بكرا يتفاهم معاهم
أتناقش معاه بمسألة الزواج والحفلة ولا اخليها ع أهلي
مع العلم أني بقول لأهلي مهما دفع مهر لا تتكلموا وبتجاوز عن المهر ..
بس احس طلبي للزواج هو الفاصل ..
صح ولا لا ؟

ابغى ارآء حكيمة الله يسعدكم وياليت كبار المستشارين هنا يردوا عليا لانه رغم بساطة الموضوع الا انه مهم بالنسبة ليا ..

ع فكرة !
هذا كله كوم وخوفي من الفشل كوووووم ثاني
ما ابغى استعجل وأندم

قبل التفكير بحفلة الزواج والقاعة
لا أحبذ لك السكن بالملحق
وحطي تحته مية خط طالبي بسكن منفصل
و حتى المهر طلبي اللي بخاطرك فيه
ما تمشي ع كلامه
الله يكتب لك اللي فيه الخير

__________________

اهله ساكنين بإيجار فله دور واحد وفيها ملحق
انا رفضت هذا الملحق نهائي ..
هو يقصد اني اسكن بالملحق اللي بعمارته الين ينتهي عقد المستأجر
بس مترددة انا .. وما قلت لاهلي هو بكرا يجي ويقولهم ..
بس المهر اديته كلمة كيف أتراجع ؟!
كلمتي انه ادفع اللي تدفعه ..
رغم انه أسلوب المساومة ما حبيته ..
والله العظيم النوم طار من عيوني..
مدري انا موسوسة زيادة عن اللزوم ولا هو اللي ماله داعي يفاتحني بموضوع المهر..
حتى السكن يوم الشوفه امي قالت له خليها تسكن بالعمارة بعيد عن اهلك
قال على راسي بس اخرج منها المستأجر
وما قال لها ع الملحق..
لما رسل لي صور الملحق قلت له لو سمحت الأثاث كله يكون جديد ما ادخل ع اي شي قديم قال أبشري

ع فكرة ..
انا من الخوف ممكن افركش كل شي والله
تجننت من التفكير
اوقات اقول كل هالشكليات تروح وتجي
تزوجي وانشغلي بحياتك واطفالك بالمستقبل واوقات اقول لا انشدي الكمال لو بثلاثة أرباع الشي
شسوي !

وعليكم السلام
لاتتنازلي على حقوقك
الشقه يقدر يستأجر لك بقيمه اجار شقته شقه ثانيه
والمهر انتي الي تحدديه
ولاتنسين تستخيري
والله يكتب لك الخيره

بالمنتدى شفت اكتر من حالة متزوجة معدد ووعدها بالاول شقة مفروشة مؤقتا و لازالو عمبعانو ديري بالك

لا تسكني بملحق وطبعا مساومته بالمهر مو حلوه ابدا وينظر لك كانك ماصدقتي وافقتي عليه
بعضهم مايبي يتعب بزواجه الثاني ابد
من جد تضايقت لما قال سالت عن مهر المطلقه
استخيري منفرده وهذا رواج مو لعبه
المساله مو مساله مهر وحفله وغيره
المساله اهو وش شايفك
كثير زوجات ثانيات يصرخون انهم على الهامش
وهو يبغى يحطك بملحق
اطلبي طلباتك كلها عن طريق اهلك
مهر وشبكه وبيت وحفله
هذي شكليات لما يكون اول زواج له
لكن في وضعك دليل ان لك وجود بحياته

ليش قلتي له ان فترة زواجك كانت بسيطة !


وصلتي له معنى عن نفسك بااااااايخ يا منفرده

__________________

‏
الوعي هو الملاذ ..

أستغفر الله العظيم ؛
( الفردوس غايتي )

ام خالد

تكلمي عن أساس استشارتي هذا مو موضوعنا ..

ايش الشي البايخ اللي وصلته عن نفسي تفضلي ؟

الحمدلله طلاقي كان بعزة نفس وفخر وما كان فيه شي بايخ بسبب طلاقي
وزي ما قلت انا مو هذا موضوعي ولا هذا هدفي من الطرح
بس ردك غريب

وانا كمان ما هان عليه كلامه عن المهر
السكن يقصد انه نسكن بملحق عمارته مؤقت الين يخرج المستأجر
بس اخاف انه يضحك عليا مدري انا شوي وأشك حتى بنفسي

ادعي لي

شسوي طيب!
ارفض الزواج كله ؟!
ولا اسهلها واسكن بملحق مؤقت ؟
ولا انتظر خروج المستأجر واتزوج ؟!

التفكير تعبني