السلام عليكم ورحمة الله وبركاته
اخواني وخواتي مثل ما تلاحضون هذي اول مشاركه لي بهالمنتدى
صارلي فتره ابي احكي لاحد الي بداخلي تعبت مو لاقيه
لا صديقه اثق فيها ثقه تامه
ولا امي الي اهي اطيب مني واغلب هالصفات الي فيني كسبتها منها
ولا اخواتي الي يمكن يغيرون من شخصيتي و حياتي
> واهي عاجبتني لكن اريد بعض التغيير فيها والي راح احكيه لكم ان شاءالله
وبالصدفه اكتب كلمه بقوقل ومنها ادخل على هالمنتدى
قرأت فيه بعض المواضيع والردود واعجبتني كثير
وحبيت اطرح لكم المشكله الي بحياتي يمكن تقدرون تساعدوني
الحمدلله والشكره له مشكلتي بسيطه مع المشاكل الي نسمعها لكن نطمح لحياة اكثر سعاده


اسمحو لي اكتب شوية وصف عني
انا عمري 25 سنه ما احب الاطفال تحت سن ال 1 سنه او حتى 2 سنه لان ما اعرف اتعامل معهم
طبعا كنت حالي حال الناس ازعل واكره واحب واضن ويا تصيب ضنوني او تخيب
لكن قدرت اغير من نفسي ولله الحمد

- صرت مؤمنه بقضاء الله وقدره 100% وان كل حدث بحياتي هو خيره من الله
دخلت غرفة العمليات وانا مبتسمه وعارفه انه خيره لي

- احسن الضن بالله بشكل كبيييير من باب انا عند حسن ضن عبدي بي .. الخ
تاخرت علي بعض امور الحياة عارفه انها خيره وان ربي راح يكتبها لي بالوقت المناسب لي

- دائما تفكيري بالناس ايجابي واعطيهم اعذار من باب التمس لاخيك 70 عذرا
والله لو مالقيت له عذر اقول يمكن اهو يملك عذر انا ما اعرفه

- احب لغير مثل ما احب لنفسي

يعني لو وش ما صارلي اكون بهالاربع صفات وربي سعيده ولا ينغص علي شي

تزوجت بعمر ال 24
تعرفون ضروف المتزوجين ببدايت حياتهم كيف تكون صعبه شوي
اكيد عذرته وصبرت وحاولت قد ما اقدر ما اكلف عليه واذا نفسي بشي او احتجت شي
قلت انتظر للراتب
ويضلون اهله يتصلون يطلبون فلوس بشكل مبالغ فيه ولا يراعون انو عنده بيت يحتاج مصرف يحتاج اجار
عنده ديون وقروض واقساط
قلت ماعليه عادي اهله ويحتاجون وياما صرفوا عليه ووالله ما ارضى لهم غير الي ارضاه لاهلي ولا انقصهم عن اهلي
مرات يستحي منهم واهو ماعنده ويروح يتسلف عشانهم وهذا ياثر اخر الشهر وتطير الاغراض الي كنت ابيها
واقول ماعليه اصبري ربك يعوض صبرك خير واشجعه على حبه لاهله و احثه على التعامل الصحيح مع خواته
بما اني بنت وافهم عليهن
طلبت زوجي نأجل الحمل شوي سالني ليه
قلتله اسبابي + اني بدري علي ابغى اعيش معاه فتره بدون الاطفال وتعبهم وازعاجهم
ننبسط ونروح ونجي براحتنا
اهو ما عجبه وجلس يحط اعذار وانو بس ولد واحد وبعدها راح نوقف فتره عن الخلفه
اعذاره عاديه لكن احتراماً له وافقت رغم عدم درايتي بتربيت الاطفال بتاتاً
قالي انا اساعدك انا اتحمل كل شي انا وانا وانا
وانا عارفه انه كلام وراح يطير مع الريح
حملت وسكنت ببيت على البلاطه والله ما ابالغ اذا قلتلكم انه على البلاطه يعني لا اهلي ولا صاحباتي اقدر اخليهم يزوروني ببيتي
صبرت وقلت الحين ما نملكها متى ما قدرنا ناخذ قرض راح ناثث واشتري الي خاطري فيه
يسالوني كيف راضيه تعيشين ببيت زي كدا ولا تاثرت بكلامهم
كنت مبسوطه بداخلي للاسباب الي ذكرتها قبل
وعزاي ان الله رزقني بزوج طيب وكريم وخلوق وحالي معه افضل من كثيير بنات
كنت احترمه احترام كبير اهو نفسه مستغربه > على قولته وضحى زوجت نمر بن عدوان
عمري مارفعت صوتي عليه ولا عمره صوتي كان اعلى من صوته لو بنقاش
ما امد يدي على الاكل لحد ما اشوفه يحط اللقمه بفمه
ما امشي قدامه الا اذا اهو اصر واجبرني على هالشي
ولا عمري زنيت عليه بشي ولا طولت وانا اطلب حاجه واهو رافضها الا اذا شفت انو ماله عذر ابد
وبالنهايه يا كلامه يمشي او يمشي كلامي علشان خاطري
ولا اطلبه اي شي وانا عارفه مو بمقدرته يلبيه اكتمها ولا احرجه ولا احطه بموقف صعب
وانتضر لما تتوفر الفرصه واهو عارف هالشي
يشهد الله علي ما ابالغ لكن هذي من الصفات الي تعلمتها من امي ومن حياتي قبل الزواج
مرت سنه وكم شهر واهو يمكن اتعود على هالشي وصار يماطل ويتهاون بالاثاث والقرض
يعني الحين اكثر من سنه وتوفرت الفرصه انه ياخذ القرض الا انه مو راضي ياخذه ونأثث البيت
انا حاسه ان براسه موال , وما يبي يحطه بالبيت يبيه لحاجه لابوه واهله بس يبيني انسى السلفه
او ياخذه وانا ما ادري
صارت خرجاتنا قليل رغم اني ما اكلف عليه فيها ابد ولا هو مشغول ولا تعبان من دوام او شي زي كذا
يعني بالعيد الي الناس تفرح فيه انا قضيته بالبيت وعذره انه ماعنده فلوس يطلعني
رغم انه لو اهله طلبوا منه يتسلف علشانهم ومتى ما دبرها يسدد هالدين
كان نفسي نسافر لو بمنطقه قريبه مثل ينبع نتمشى على البحر يومين ونرجع > عمرنا ما سافرنا حتى لو شهر عسل
قلت اصبر عليه ونسافر سفره محرزه شوي ولا حصلتها > اوقات ودي اكبي من القهر الكل يسافر ويغير جو لو شهر عسل بس وانا لا
طيب مكه ناخذ عمره صد رد ولا نبات ولا شي > صارله واعدني فيها اكثر من مره ولا عمرنا اعتمرنا
او الملاهي , مره وحده الي رحت الملاهي معاه اهو واهله ولا خلاني العب كان خايف اني اكون حامل
وضليت ادور الملاهي معاه اهو واخته وكل ما قالت ابي هالعبه قالها قدام
عذرته علشان خوفه اني اكون حامل ولا زعلت منه ولا شي ( ووقتها طلعت لا حامل ولا شي )
وباخر حملي خاطري اروح الملاهي بس صعب وضليت اقوله علشان يحس يمكن بعد ما اولد يحن علي ونروح
لكن لاحياة لمن تنادي
طلبته بالعيد نروح رفض وجلس يجيب اعذار
وانا زودت الزن شوي مو مثل العاده لان هذا ثاني عيد لي معاه وانحبس بالبيت ولا اروح مكان
وطفش اهو , وسكت علشان ما اطفشه مني وانا ما احب الشي الي يجي من الشخص بدون رضاه او بطيب خاطر منه
مليت من حياتي كذا حبسه والبيت ناقص كثيييير من الاثاث لدرجة لما بيزورني احد اطلب من اهلي بعض الاثاث
كلامه قليل واغلب الوقت ساكتين ويتاثر بكلام اهله
يعني اول كان يساعدني بولدي و ياخذه عني ساعات علشان انام
و من فتره ما يساعدني فيه ويقولي انتي مهمله وانتي فيك وفيك
قلتله انت عارف قبل الحمل قلتلك ما اعرف للاطفال ولا اعرف اتعامل معاهم ووعدتني تساعدني
وبالصدفه اعرف انه من كلام يقطونه اهله واهو يتاثر فيه
والمصيبه انو ولدي ما كمل 5 شهور وجايبته بقيصريه وجالس يزن على راسي يبي الولد الثاني واهو عارف ضروفنا الماديه كيف
وطبعا هالكلام من اهله و تشجيع من اخواته واخوانه
والحين انا ما عدت لمحه الاولى الي سعيده من قلب صرت عبوسه شوي
ما عدت احب الخير للناس مثل ما احبه لنفسي يعني خواته اهله لو سالني عنهم بشي لو صارلهم بشي مو مره كويس
عادي عندي ما ازعل لكن مو لدرجت افرح ولا احرضه عليهم لكن ما عدت احبهم واوقات احقد عليهم من بعض التصرفات
ولا احط لهم اعذار ولا شي
ماعدت مؤمنه بقضاء الله وقدره ولو ما صار الي ابيه ازعل واتنكد واحقد شوي
ما عاد حسن ضني بالله قوي مثل اول
مليت من الصبر ومن الانتضار ومن الامل وبالنهايه ما يصير معي شي

انا احاول بنفسي اتغير من الداخل وارجع مثل اول لكن اذا المسببات لساتها موجوده وتردني كيف اتصرف ؟
علموني شلون اطلب طلب من زوجي واخليه يوافق برضاه وطيب خاطر منه ولا انكد عليه ولا على نفسي ولا اسوي مشاكل ؟!!
وكيف اقنعه بتاجيل الحمل مع العلم انو يقتنع فتره ومن كلام اهله يرجع يزن مره ثانيه
ابي طريقه تخليه يقتنع اقتناع تام ولا يتاثر بكلام احد
معليش طولت عليكم بالهرج لكن ما صدقت لقيت مكان احكي فيه الي بداخلي وارتاح
> بودها تفضفض اكثر

لاتدارين زوجك اكثر من اللازم

لاتمنعينه يصرف على اهله لكن بالمقابل اطلبي منه احتياجاتك

اذا وعدك بشي ظلي وراه لين ينفذ وعده

حلو الزوجة تحترم زوجها لكن مطلوب اشويه شقاوة وعفويه ومرح

علشان يحب الجلسه معك يحب يطلع معك

شيلي من راسك فكرة اهله يمشون كلامهم

تناقشي معه بسالفه الحمل وكيف ان الماده ماتساعد

اذا اقتنع وبعدين رجع بكلامه عيدي له كلامك مو مشكله

حبيبتي تسلمين على الرد
بس انا مو متنازله عن حقوقي
يعني ضليت اراعيه من ناحيت المصرف لما شفته طال الموضوع
طالبت بمصروف خاص وباقي الراتب يتصرف فيه مثل ما يبي
عادي انا محترمته لكن ما يمنع انو فيه ميانه ومزح بيننا لكن انا ذكرت الاحترام وطريقته لانها عجبته
وما هي موجوده بعائلته ولفتت انتباهه
ولا مزح وشقاوه موجودين
لكن سوالفه قليله معي ولا لما نكون مع ناس غيرنا مايسكر فمه وطول الوقت اهو الي يهرج
وخصوصا عند اهله وهالشي يخليني اغار منهم بالنسبه لهالموضوع
مثلا لما نجلس على القهوه اسئله كيف شغلك اليوم > يعني افتح موضوع يسولف فيه
يقول كويس مثل كل يوم عادي _ وبس نجلس مع اهله ما يترك دقيقه ما يحكيلهم وش صار فيها
ولا يتذكر من سوالف زمان
مو عارفه ليه معي ما يهرج ويحط انو فيه اسرار لازم ما تنقال عند الزوجه
سالفت انه وعدني بشي واضل وراه
انا ارجع اطلبه واكلمه بالموضوع لكن ما احب اطول بالطلب والزن و كاني جالسه اشحذ منه
وعلشان ما يطفش من البيت
ياناس بموت بودي نسافر ونغير جو وهو ولا على باله
ابي طريقه لما اطلبه ما يردني يعني اتدلع عليه ولا ازعل عليه ولا شلون
مالقيت طريقه تنفع معه بدون لا اقلب حياتنا مشاكل
وبالنسبه للحمل عادي اقنعته مره وثنين وثلاث وعشر ويرجع للموضوع مليت انا
غير كذا مسويه عمليه ما يصير احمل بسرعه
واهله مو سالفت يمشون كلامهم لا حبيبتي
لكن اهو يتاثر بالكلام يعني يقولوا ها بشر المره ما حملت
ياخي مو كانكم طولتوا ولا يلا نبي البنت ونسمي كذا > على اسم امهم
وتعرفين كلام الرجال بين بعضهم والدق بالكلام
ويرجع اهو للسالفه

بعض الرجال يحبون جلسه البيت

فانتي كبدايه اتفقي معاه يوم في الاسبوع تطلعون تغيرون جو

وحددي هاليوم الخميس مثلا وقبل يوم الخميس بكم يوم حددي وين تبين تروحين

وكل يوم يجي ذكريه احنا الخميس بنطلع هالمكان تكلمي باشتياق للطلعه هذي

لين يصير هاليوم اعتيادي تطلعون فيه
ممكن يجي اسبوع يتهرب قولي مومشكله بس لازم تحدد متى

اذا طلعتو خليه يوم مميز

يحب السوالف سولفي يحب الهدوء لاتسولفين اكتفي بحركات لطيفه

اذا قال يلا نرجع لاتناقشين بيني انك انبسطتي وعبري عن شكرك وسعادتك

فترة وراح تعدي
ما فيه شي يدوم غير رب العالمين
عليك بالصبر والدعاء والاستغفار خليه على لسانك

__________________
انا لله وانا اليه راجعون

انا ابختصر عليك جانب معين
زوجك بيتوتي ايجابي وليس سلبي
ميزته انه بيدك ويحتاج لاستماله من طرفك
هذا الزوج حبوب وفي العادة لايخون ويقدر معروفك معاه ..

من ناحية الحقوق فطالبي بحقك وادي واجباتك.. ولكن بتروي وعقل
ولا تتنازلي له عن حق من حقوقك وخليك حريصة على علاقته الطيبه مع اهله( يحبك اكثر)

انصحك كثير باستمالته نحوك.. اعرفي ميوله واقرأي عنه وناقشيه وحاوريه في ميوله لكي تستقطبيه..
فهميه ان خروجكم مع بعض يزيد الفتكم مع بعض.. تري سيطرة اهله تجعله اسيرهم حتى وهو عندك فيصمت..
وحينما لا تستميلينه يبقى في دائرتهم واول ما يلتقي فيهم يمارس ضحكاته وسولفه لانه لقى جوه المعتاد.. فعليك ان تكوني جوه القادم كي يكون بيدك..
انا واثق انك لو قدرتي على نقطة حقوقك واستمالته نحوك ستنحل باقي العقد.. فلا تيأسي وحاولي فالحياة جهاد

__________________
ان انت اكرمت الكريم ملكته.. وان انت اكرمت اللئيم تمردَ!!

ربي يسعدك ويشرح صدرك
هذا هو الكلام الي احتاجه , واللهي كانك جالس توصف حياتي وتوصف زوجي


طيب اذا الشي الي يهمه انا ما اعرف له ولا افهم فيه مثل الشعر والمحاورات والقوافي وهيك
احاول ادخل معاه ونشوف قنوات للشعر لكن ما اخفي عليك بعد فتره يعني ساعتين وحولها امل
واذا سوالفه مع اهله وضحكه كله حش بخلق الله وتقطيع فيهم وانا مو حابه هالشي ولا حابه اشارك فيه
لدرجت انه قدرت اغيره عندي وما عاد مثل اول يتكلم فالناس لكن عند اهله عادي
غير كذا ما عنده سوالف احاول ادخله بالسالف لكنه يكون مستمع او يعطيني رد كلمه او ثنتين
واذا قال سالفه تعرف الحريم كيف تخش عرض وتسال كيف وليه ومين وكذا واهو ما يحب رغم انو اشياء عاديه
ولا اذا تناقشنا بموضوع عنده النقاش يقول كل الي عنده ثم انا اقول كل الي عندي وخلاص
طيب وين النقاش ؟
بليز قولي كيف استميله اكثر مع العلم انه يحبني لكن ابيه يرتاح اكثر معاي
وكيف اخذ حقوقي اذا تكلمنا بالموضوع اكثر من مره وحاولت اكثر من مره ولا فيه فايده
ما ابي اقلب الموضوع لهواش وزعل بيننا لان مابي المشاكل تدخل حياتي
وانا ما احب اطول اطلبه ولا احب الشي يجيني بدون نفس وبدون رضاه
مع انو طلباتي حقوق عليه مثل الاثاث

زوجك طفل كبير ..
طفلك لو ما احسنتي استمالته لك سيبقى بعيد عنك
ادخلي اهتماماته وحاولي من بعيد تعرفينها من خواته من كلامه وابدي رتبي افكارك بحيث تدخلين معه بالتدرج .. واول مايبدا يستجيب معك امدحيه .. يعني لو قال بيت شعر امدحيه وخليه يكرره بالذات اذا كان غزل.. اذا هو راعي كورة اعرفي موده وسايريه .. حاولي تلعبين معه .. خليه يفوز عليك مرة وخليه يطلب منك اللي يبيه.. هذا النوع لابد ان تغيرين سلوكه عندك صدقيني رح يحبك اكثر.. هو الان بحاجة جو اخر يخرج به من دائرة اهله.. مدحه عند اهله ايجابي بالنسبة له.. واحمدي ربك تري امرك سهل وبالمسايسة يجي معك ويكون تحت نظرك ويدك.. بس خليه يولفك اكثر واكثر
بالنسبة لظروفه قدريها واطلبي حقوقك حسب استطاعته.. انتي لو تمكنتي من توليفه لك انتي رح يعطيك اللي يعطي اهله وزيادة.. هو يفزع لهم لانه بدائرتهم ومايشوف الاهم..
اصبري ولاتيأسي واعلمي انك مهما عملتي فانتي الرابح الاكبر

__________________
ان انت اكرمت الكريم ملكته.. وان انت اكرمت اللئيم تمردَ!!