سوف افضفض كل مابداخلي لكم لاني وجدت الراحه هنا وسأقول لكم مشكلتي لاني اجدها مشكله عويصه مررررررررررررره وجا لي اكتئاب مرررررررررره وقلق وضيقه شديدة جدا









انا كما ذكرت لكم سابقا اني ملكت وعمري الان22 سنه خطيبي رجل طيب وحنون وملتزم وملكتي لها شهرين
في وقت الشوفه عندما قابلته لم اكن اشعر باي شعور تجاهه وصليت الاستخاره ولم اشعر باي شعور داخلي وفي الفتره الذي بين الشوفه والملكه حدثت بعض النقاشات بين اهلي واهله البسيطه الذي ربما تحدث بين العوائل فلم التفت لها ولم اعطها ذيك الاهميه رغم اني كنت بداخلي متاثرة بس كنت اقول لنفسي انها امور تحدث كثيرا المهم عندما كان يوم كتب الكتاب كنت مبسوطه مره وفرحانه واصبحت اتكلم معه بالتلفون من غير زياره وكنت مبسوطه المهم كل مايقرب وقت الملكه احس بضيقه خانقتني مررره وجا يوم الملكه الي كنت شايه همو وماكنت فرحانه زي كل البنات فجا وقت التصوير وقابلته فيها لاول مره بعد الشوفه اول ماشفته اتضايقت او خفت والله مادري حتى لما كان يتصور بجنبي كنت مره متضايقه وساعات اقول يمكن خايفه بعد ماخلصت الملكه جلست انا وهو لوحدي وحاسه نفسي مرعوبه مره ومتضايقه وبالذات يوم جلس يحضني ويبوسني رجعت البيت ابكي ومتضايقه وبعدها كلمته على انو هذي الحركه ضايقتني لاني لسه اول زياره له وجلس يتأسف مني وقال ماكنت دراي لاني كنت مره فرحان وجا زارني بعد الملكه وماسوى شئ معاي وانبسط يومها وبعد كذا لما صار يزورني كنت احس بضيقه مره وحاسه انو صدري راح يتكسر من كثر الضيقه وزارني تقريبا 6زيارات وكلها احس فيها بضيقه وتزدات الضيقه لما يقرب بجنبي ويبوسني ويحضني او يمسك يدي او ياكلني ولما نجيب العشا نفسي تنسد مره واكره الاكل واجلس ماكل طول اليوم واحس بغثيان واتقرف منه مره رغم انو يكون معطر وريحه العطر طالعه بس مادري ليه وصرت ادقق في كل شئ فيه مثلا ليه فمه كذا بس طبعا ماقول له ولا اقول لاهلي هذا شئ بيني وبين نفسه ولما يتكلم تطلع ريحه من فمه بس والله الريحه ماحسها انها معفنه مره مادري احسها قريبه من ريحه العطر الي راشها بس انا اشمها انها ريحه تجيب لي الغثيان مره والله حتى لما يجيب لي هديه مافرح فيها مره ولما يرسل لي رساله مالي نفس ارسل له ساعات اطنش وساعات ارسل من غير نفس وساعات اكلمه من غير نفس لاتقولو لي متكبره والله انه هذا شئ مو بيدي انا مره متعذبه وساعات مايجي لي النوم من كثر مافكر بهالسالفه وماعلمت اهلي خايفه من انهم يتضايقو حتى لما افتح شريط الفيديو حق الملكه اتضايق يوم تجي زفتي وكلهم قالو لي شكلك مره كنتي خايفه وانتي تنزفي طبعا انا انزفيت لوحدي لانه هو ملتزم طبعا اخر مره جا زارني فيها حسيت بضيقه اخس من كل مره وماقدرت استحمل من اول اهلي يسالوني وش فيكي اقول لهم ولا شئ واخر مره سالتني امي قالت لي ليه متضايقه من يوم ماخرجتي من عندو وكانت امي تحسب اني متضايقه عشان ماجاب لي هديه لانه خلال السته الزيارات ماجاب لي الا هديتن
قلت لامي ماني متضايقه من كذا لانو كثير ناس مايجيبو هدايا وبعدين ماقدرت اصبر وانهرت بالبكا امي مررره انفجعت وفضفت كل الي عندي وقامت قالت لي امي خلاص اذا مانتي مرتاحه له عادي نتصل عليهم ونكلمهم ونقول لهم البنت ماهي مرتاحه وقامت تهديني وتقول لي انتي مانتي اول وحده تنفصل بس قالت قبل مانتصرف راح اوديكي عند شيخ يقرأ عليكي يمكن في عين انا مابغى انفصل لانه مره طيب وحنون وهو راح ينصدم مره لو عرف شعوري وفي نفس الوقت ماقدر اكمل معاه وانا بهذي النفسيه لاني حاسه نفسي اني راح انجن وماني متقبله شكله مررررررره واهلي يقولو لي انو شكله فوالله ماني عارفه هل انا في عين او خايفه منو وساعات احس انو بخيل وبالذات لما يقول لي حرام تشتري فستان ب1000 في فساتين ب600 حلوه المهم بس ساعات يجلس يتكلم معاي بالساعات رغم انو جوالو بطاقه فانا مستغربه الحين رجال وعنده بطاقه المفروض يركب له جوال مفوتر
المهم حبيت افضفض لكم كل الي عندي لاني مره متضايقه ادعو لي وحبيت اسمع نصايحكم

أولا الله يتمم ليك بالخير و يهدي بالك و يكتب ليكي اللي فيه الخير
و الله أنا ما أقدر أقول لك شيء ...لأنه انت حكيتي بس شعورك و أحاسيسك اللي ممكن يكون لها مبرر و يمكن تكون بدون مبرر...بس أريد أسألك سؤال هو كيف طبيعته؟ كيف دينه و اخلاقه ؟ و ليش قبلت فيه و ملكتو و انت من الاول مو مرتاحة ؟بعد ما تجاوبي إن شاء الله نحاول نساعدك
استعيني بالله و ادعيييييييييييي

أختي الضيقة التي تعانين منها الله أعلم إنها من علامات العين أو الحسد ،،

حلها بسيط جداً ، الله عز وجل خلق الداء وجعل له الدواء

إرقي نفسك بالأذكار والقرآن الكريم بكل يقين وثقة بالله عز وجل بأنه سيشفيك ،،

إنتبهي العلاج يحتاج إلى قوة الثقة بالله تعالى ،،

إدعي الله بإسمه الشافي ، تضرعي إليه ،،

لا أحد يستطيع أن يغير ما في قلبك تجاه زوجك غير الله سبحانه ،،

إلتجأي إليه وإدعيه وقوي الصلة بينكِ وبين الله تعالى ،،

سترين الفرق من أول مرة وكلي يقين بالله عز وجل بذلك ،،

دعواتي لكِ يا غاليــة وأتمنى أن تخبرينا قريباً عن النتائج

انتي كتبتي قبل فتره بسيطه موضوع تشتكي فيه من براطم العريس وقلتي انهم كبار واسنانه بارزه

والحين تكتبين تشتكي من رائحة فمه

طيب أنتي مو ملاحظه انك تركتي كل حسناته ومسكتي فقط بشكل فمه ؟

ياحبيبتي مافي عريس كامل في الدنيا

كل شئ لازم يكون فيه نقص وهذه حكمه من الله

والانسان لازم ينظر إلا الجزء المملوء من الكأس ويترك التفكير في الجزء الفارغ

وبعدين الله يرضى عليكي الرجل يتم تقييمه بقوة شخصيته ورجولته

بقدرته على تحمل المسؤلية وتوفير حياة كريمة لأسرته

مو بشكل شفايفه واسنانه

الشكل ماله اي أهمية جنب الشخصية

أختي الغالية عفراء ..

عين الرضا عن كل عيب كليلة *** وعين السخط تبدي المساويا

هي لو مرتاحة له كانت تقبلت شكله ولكن لأنها غير مرتاحة للموضوع فهي لم تعجب بشكله ..

أختي الكريمة

انا أرى مثل ما ترى أمك , أن ترقي نفسك ثم تحددي اذا استمر الأمر معك بعد الرقية ولم تتغيري من ناحيته فأرى أن تنفصلي عنه ...

ولكن لو كان فعلا ملتزم ظاهرا وباطنا فستندمين أشد الندم ...

صدقيني لم أشا أن أنصحك هذه النصيحة ولكنك غير مقتنعة به البتة ولم يدخل قلبك بتاتا حتى بتي تدققين في كل شي فيه ولديك اعتراضات على كل شيء فيه حتى فاتورة جوالة مدخلة فيها وعندك اعتراضات عليها ,
وهذا سيؤذيك ويؤذيه في المستقبل

أعانك الله

ادعو لي جميعا لاني في حاله يرثى لها وسوف اذهب للشيخ قريب جدا فادعو لي وكيف ارقي نفسي لانو بداخلي شعور لاعرف ماهو الا الله سبحانه وتعالى اعلم بذلك انا خائفه ان اتخذ قرار اندم عليه طيله حياتي فادعو الله ان كان في عين ان يبعده عني وان كان الزواج ليس فيه خير ان يبعده عني ويرضني بما كتبه لي دعواتكم

طبيعته مثل اي رجل دينه تمام هذا الذي يظهر امامي كما ذكرت لكم انه ملتزم واخلاقه ايضا تمام من النوع الي مايزعل بسرعه والله ماني عارفه ليه قبلت فيه بس زي ماتقولي قسمه ونصيب ولاني زي اي بنت حبيت يكون عندي اسرة واحب الاطفال مرررررررره يمكن عشان كذا ماهتميت على الراحه نفسي الايام ترجع لورى عشان اتاكد من مشاعري بس المشكله ايام الخطبه مابان لي هذا الشعور واضح في هذه الفتره

بعدهم كلهم ..

انتي استخيري ..

واستغفري ككثير ..


انتي ما تتقبلينه اطلاقااا ...!!


يعني ماتحبين تفكرين فيه ابدددد ..
ولو فكرتي يكون تفكير سئ ..!

تكرهينه ..!


ماتتحملينه ابددد ..


لو فقدتيه اسبوع عادي عندك ..!


انا المشكله اني تقريبا نفسك بس الاختلاف اني ما بيننا لا اتصال ولا رسايل ولا مقابله ولا شي
بس كذا نفس الموضوع يتعبني ولا احب افكر فيه ابداا ..


بس اذكر اخذت راي وحده كبيره قلت لها اني اول ماشفت صورته ماقدرت اتححمل واحس اني اكرررهه
قالت حاولي تشوفين الصوره مرتين وثلاث واربع لين عشر مرات
اذا ما حسيتي ان عواطفك تحركت ولا تقبلتيه اطلاقا
لا توافقين لان خلاص ماراح تقدرين تتقبلينه ابد
ولا جاملتي هذي حيااة مافيها مجامله مستمره ..


انتي استخييري واستغفري وادعي كككثير ..
وجربي تبعدين عنه اسبوع شوفي انتي تفقدينه او لا ..
تحنين له او لا ..


والله يكتب لك اللي فيه الخير ..


واذا قررتي الانفصال لا تخطين هالخطوه بسسهوله اصصبري لان الرجل الاخلاق والملتزم نادر جدا في هالوقت ..
شوفي الموضوع من جميع الجهات واذا جمعتي الموضوع ودعيتي ربك خوذي القرار اللي تشوفينه ايجابي لك ..

والله انا كل يوم اشوف صورته وساعات ماحب انكد على نفسي واشوفها لاني اكون متضايقه ساعات ارتاح وساعات العكس لانو كل قبل ماشوف صورته اكون في قلبي متضايقه عشان كذا ماني قادره احكم