السلام عليكم ورحمه الله وبركاته
اتمنى لكم جميعا انكم بصحه وعافيه
بنات محتاجه فزعتكم بجد الجد تكفون من لها خبره لاتقصر معاي
انا راح اظطر اولد في بيتي واثاثي للاسف زفت وشين وقدامي وقت قصير ع بال مااخلص لاني بنص الشهر السابع
نظام بيتي نسائي بحت دور ارضي وكله ضيافه حريم فقط لان مجالس الرجال في بيت زوجي الثاني جنبنا يعني اقدر اخذ راحتي بالالوان
انا حاليا الميزانيه يادوب تساعد اصلح اللي ظاهر للناس ومظطره اصلح الصاله ومجلس الحريم المطبخ رايح فيها بس مااقدر اصلحه لان ماعندي ماده ولا احد بيدخله
ابي انشغل باللي راح استقبل فيه
صالتي للاسف كبيره وكل شي يطل عليها المداخل كلها تفتح عليها وجايه نظام جهتين
حاليا جهه حاطه فيها كنب لونه بني واورنج وزيتي قديم ومتعب موديله لان نظامه الظهر مخدات وتطلع وكل شوي عيالي يلعبون فيها لان جلستنا دايم بالصاله
الجهه الثانيه فيها الشاشه وجلسه ارضيه موكيت ومساند ظهر بدون كنب ولاشي
ديكور صالتي السقف جداا فخم وراقي بس الثريات عندي قديمه والاضاءه كلها اصفر وصايره الصاله ظلام وكتمه
طبعا اثاثها ماله خمس سنين بس لان وقتها زوجي غصبني اخذ من الخليج وكل اقمشتهم زفت وطبعا كان فارض علي الاسعار مااتعداها وهذا السبب خلاني اختار اي شي حلو وعادي بس مو ذاك الزود وبسرعه بان عليه قيمته
الحين ابي اغير بويه الصاله لونها سكري والديكور فوق نحاسي وذهبي وبني وبويتي فلفت بس تدمرت كتبو عيالي ع الجدار وغسلت وصار كله بقع
بشاوركم انا لازم اصبغ او احط ورق جدران
ابي اعرف هل فيه فرق بالسعر كثير وثاني شي لو بصبغ بويه افكر احط لون واحد ويكون سكري ساده بدون خرابيط او احط بويه وورق جدران بنفس الوقت محتاره مره في هالنقطه
واثاث الصاله الكني احنا مانقعد عليه جاي على جنب عرفتم يعني استخدمه كضيافه خفيفه هل اخذه من الغالي مره لانه بالوجه ولا اخذ حاجه مرتبه وعاديه
الجهه الثانيه بحط فيها جلسه ارضيه عند التلفزيون يعني كنب بس واطي لتحت شوي وبحط زوليه تحته
وبرضو محتاره بالالوان والموديل هل اخليه طقم هو والكنب الثاني ولا تكون الوانهم متقاربه او عادي اعتبر كل جلسه لحال واحط الوان كل وحده بعيده عن الثانيه
هذي الصاله
نجي لمجلس الحريم كنت حاطه كنب كلاسيكي وطبعا اذا جوني ضيوف مايشيل الكلاسيكي ياخذ مساحه الغرفه بالديكور وهو مايعطي مكان للضيوف افكر اخليه متصل عشان يشيل اكبر عدد ممكن من الحريم لانه هو المكان اللي راح استقبل فيه اذا ولدت
محتاره كيف الالوان طبعا بويته الجدار بيج بلحمي كذا وفيه اصفر خفيف ماافكر اغير البويه من باب التوفير اولا وثانيا لانها نظيفه وماصار لها شي
انا مامعاي الا هالجمعيه لي سنه اجمع فيها ومابي اطيرها في شي مو حلو المبلغ اللي معي عشرين الف
راح يكون فيه تزيين الصاله والمجلس بكامل اثاثهم كنب وبويه واضاءه واكسسوارات
اخذت لفه ع مخرج 11 اثاثهم روعه روعه بس اسعارهم موت المتر ب 850 بس حاجات فخمه حسبت عنده كنب يجنن للصاله قال لي ب 13 الف
تحطمت كيف اكمل باقي شغلي اذا كذا اسعارهم
اختي تقول من رايي فصلي بالخليج موديل حلو وشي عملي للصاله بحيث ماتكلفك بكل مافيها 10 بالكثير ومجلس الحريم حطي كل جهدك فيه لانه الصاله بتكون بس ممر
رحت للخليج فيه حاجات معقوله يعني الجلسه الارضيه قالو نحسبها لك ب 1000 ريال والكنب يطلع اغلى شي ب 5000 الاف بس يظل شغلهم عادي
بنات انتظركم ابي الوان وافكار بحاول انزل لكم صور صالتي عشان تتضح الصوره اكثر
الله يسعدكم