انا بصراحة عايش مع زوجتي على مبداء الصراحة في كل شيء و مشكلتي اني مره معاها لين و اي شي تبيه اذا اقدر عليه اجيبه و مغرقها كلام حب ورمانسية لدرجت اني غلبتها في الحب و كلام الحب و الرمانسية حتى غرفة النوم انا مرات ازينها و اخليها ليله رمانسية يعني انا الى ابداء بكل شي فيه مصلحة لزيادة الحب لكن المشكلة انها مره قالت خفف من كلام الحب والرومانسية والحساسية والان مسافر عنها وهي عند اهلها تدرس و انا في مدينة بعيدة اعمل و السبوع الماضي كنت عندها واخر مره كلمتها كانت قبل اربع ايام وانا بصراحة ايام ماقدر اصبر لازم اسمع صوتها و اكلامها في الحب لكن هي ما تحب هذا وتقول الجوال مو وسيلة للتعبير وانا ما اعبر بالكلام اذا جيبت عندك اعبر لك عن حبي لك بصراحة ماني عارف ايش اسوي غير كذا البارحة بعد اربع ايام داقه علي تبي بطاقة سوا بس يعني ما دق الا اذا ودها شي او حابه تستأذن علشان فيه عزومه او غيرة اما ادق شوق و حب ما اذكر ابد دقت على شوق ومحبة بصراحة بدايت اترك كلام الحب و الرمانسيات هذي و اتغير اصير انسان عملي بس على فكره هي شخصياتها عقلانيه و من صفات الشخصية هذي ما تحب تطهر عواطفها بس انا بصراحة محتاج لان انا بعيد عنها و زواجنا ما كمل سنه لسه و ما جلسنا مع بعض شهر كامل بس في العطل الرسمية و الاسبوعية احيانا لانها مكلفه و مشقه لكن يا اخوان انا ما ني عارف ايش اسوي انا ابيها دق علي لو مره تقول انا مشتاقة لك انا حابه اسمع صوتك ........ بصراحة اقولكم هي والله و الله تحبني بس المشكلة في انها ما تعبر و لا تزيد من الاشياء الي تعمق المحبة و تزيد الموده بصراحة ما ني عارف ايش اسوي مرات اقول ودي اهجرها ولا راح ارسلها الا مصروفها الشهري لحد ما تغلص دراسة بعد شهور ولا راح تسمع مني اي كلمة حب و لا اي اهتمام ولابطاقات سوا ولا غيره بس مصروفها الشهري علشان تحس بالي انا احس فيه اذا طولت وما تصلت علي يعني بس انا الي اشتاق بس انا الي اتكلم حب بس انا الي ادق حتى كلام حب ما تعرف تتكلم تردد ربع كلامي و احيانا تخطي في الكلام (( تمقس )) سبحان الله اذا كلمتها في اي شي ما شاء الله تبارك الله معلومات و لسان على كيفك بس اول ما اقول انا احبك سبحان الله كانك صاب عليها موية و مسكر فمها تسكت و تنزل راسها بس في الجماع لا ينطلق السانها بعض الكلامات و المشكله هي من النوع العندي شوي يعين الي تبيه تحصله وانا طيب لكن والله داخلي اشياء انا ماسكها غصب خوف من الله ولا ودي ازعلها فا يا اخوان ارجوكم عطوني حل ايش اسوي معاها اكثر من مره صارحتها بكذا و برضوا ماتغير شي تقول انا ما اعرف اتكلم ما اعرف اقول حب مااعرف الا بالافعال و ياليت بعد احيانا اقولها ودي انك تتزينين اليوم لي يعني لازم انا اقولها اجي القها على جلستها و تقول تصدق كنت ابي اقوم الحين انا بصراحة مصدقها لان فيها شويت كسل و اضح عليها تحب تعيش حياتها عاديه لان مره صارحتني قالت الزواج ان الزوج ياخذ حاجته و يصرف على البيت و يشوف متطلبات البيت و الاهل و باقي وقته بره يعني متقمصه شخصيت امها وابوها اه حتى اذا جيت من سفر ما تستقبلين يا الله تسلم من بعيد وهذا و الله مو شي ثاني بس انها اتعودت على نظام بيتهم و شخصيت ابوها الكبير في العمر وامها و الحمد لله هي على خلق و دين هي امها و اخواتها و ابوها اخوانها بس ما ثره فيها حياته البداوه شوي ما ادري ايش اسوي قولوا لي ارجوكم .................. اخوكم mool999



الاشراف / عفوا تم تغير جزء من العنوان ليوضح مضمون المشكلة

معلش اخوي تحمل شوي لحد ما تخلص من دراستها و تعيشون مع بعض وتعرف طبايعك و احتياجاتك ..

انت جربت انك تخف عنها شوي و ما تتصل عليها كل وقت و الثاني ... واذا اتصلت عليها خليك رسمي معها لحد ما تحس

واذا سألتك وش فيك قل لها اتي انعديت من برودك يا شيخه .. يمكن تنتبه على حالها شوي ..

لا تشيل هم اخوي

بكره كل شي راح يصير تمام لما يضفكم بيت واحد ..

وربي يسعدك ..

انت ازين شي انك ذوقتها طعم الحب والكلام الرومنسي

عموماً انت بنفسك جبت الحل ،،، ،،،

وحتى بطاقة السوا لاتقطعها عنها ،، بالعربي اي طلب من متطلبات الحياه وفره لها لاتبخل عليها هذا من حقها ،،، إلا العواطف .

شكرا يا اميرات ويا خالد الذابح صدقتوا الحل انا قلته بس كان ودي اشاور الناس الطيبين امثالكم

و انتطر الردود من الاخوان لاني محتاج بصراحة لتشجيع لمثل هذا الحل او يمكن فيه حل غيره ....... ذبحني قليبي الطيب هو الي خربها علي .

اخوي الحرمه ما تحب الرومانسيه على طوول .. ترى يعجبها الرجال الحمش والثقيل مع قليل من الحنيه .. وشوية رومانسيه

يعني كوكتيل .. حتى ما يدخل الملل حياتكم ..

وربي يسعدك ..

اقتباس:

المشاركة الأصلية كتبت بواسطة أميرات اخوي الحرمه ما تحب الرومانسيه على طوول .. ترى يعجبها الرجال الحمش والثقيل مع قليل من الحنيه .. وشوية رومانسيه يعني كوكتيل .. حتى ما يدخل الملل حياتكم .. وربي يسعدك ..

عين العقل ..

يأخي مابالك .,.

أسال كل من تزوج ..

الحياه صعبه وهذه ليست بمشكله تعكر صفوك ..

اخي خفف من هذه الرومنسيه المفرطه وفرض شخصيتك ..

يأخي المفترض ان تكون المرأه اكثر و أرق من الرجل في المشاعر..

لذا أعطها الفرصه دعها تعبر عن حبها لك ..

الرومنسيه في كل شيء وتلبيه الرغبات على طول يعني بالعربي انت الخسران ..

سدد وقارب ..

ياخي الكريم فيه نسااء يحبن يسمعن كلمه لا من الرجال تدري ولا لا ؟؟

::


بعدين ليس كل الحياه حب ورومنسيه ؟؟

الحياه من صعوبتها تجد كل طرف احيان مشغول عن الاخر..

لكن ميزه المتزوجين انهم لا بد ان يشعروا ببعض ويحبوا بعض ويكسروا الروتين ..

اترك تزيين الغرفه لها ..

ياخي كن ذكيا ..

حتى لا تسيطر عليك زوجتك .....اعذرني على صراحتي

فالمبادره بكل شيء تجعل منك انسان مبادر ومعطاء بدون ان يحصل على رد ..

يعني بالعربي زوجتك عاجبها هالوضع ولا كان بادلتك نفس الشعور ..

اكسر الروتين هذا ..

وغير من شخصيتك ..

كن ثقيل ولكن بذكاء..

حريص ولكن بوفاء..

محب لكن بقلبك وركز على قلبك لا تكثر كثيرا فان التكثير من الشيء يبث الملل ..

::

اخي صارح زوجتك وعش حياتك فمشكلتك جدا عاديه ..لا تكبرها ارجوك ..

وايضا لا تمنعها من البطاقه وغيرها فهذه من حقك عليها ..

النفقه ياخي منك لها ..لذا لا تكن قاسيا مره ولا تكن لينا مره

ارجوا انك فهمتني والسلام عليكم

كلام أخوي المهند صح 100%

أخوي كلام المهند صح مليون بالمية

وبصراحة أنت قفلت أبواب العطاء من جهتها
كأنك تقول أرضي علي بس
لأنها تشوفك رغم تقصيرها ولا مبالاتها أنت طاير بها إذا مافيه تقصير
عطها مجال تبحث عن الحب في داخلك
خلها تفقد مشاعرك
ولاتنسى لذة الحب بالشي القليل
معليش تماسك وأضغط على نفسك أولا عشانك
وبعدين عشان يمكن تتغير
وإن شاء الله إذا أجتمعتوا في بيت مع بعض تبدأ هي بالتغير
وأكيد كل شخص يكون متأثر بشخصيات أسرته لكن هذا ما يمنع التقارب
بس إذا بغيتها تتغير هي لازم تتغير أنت
وبصراحة دائما الأزواج يكونون على النقيض بس الشاطر اللي يعرف يجذب الثاني للطريق الصحيح



تمنياتي لكم بالتوفيق

لو تتغير هي شوي وتصير هي اللي تتصل أنت راح تخف عنها,,
وراح تجي هي وتشكينا عنك..
هذي هي الحياة لازم يكون واحد منكم هو اللي يهتم أكثر بالثاني..

جزاكم الله خير يا (( اميرات و السيف المهند و سيدة بترقالة و maha1384 و احلاهم و اتحداكم )) ومشكورين على الردود هذي و مروركم الطيب .

كلامكم كله صدق هذا اللي انا حاس فيه مره قالت لي اول العرس يا اخي طنشني اذا زعلت لا تروح وراي و تراضيني .

يا اخوان ماني عارف ايش اسوي ادري ودي اغير بس داخلي خوف من التغيير هذا و لاني عارف ايش اغير بالضبط سامحوني انا حساس و ما احب احد يزعل علي لو اخذ حقي بس اهم شي لا يزعل ما احب احد يكرهني او يعاديني انا افرح و استانس اذا لقيت ردودكم .................... اااااااااااااااااااااااااااااااااه