ياهلا بغلا والله ودي اتطمن عليك من زمان وتعرفين ما نقدر بسبب عدم وجود الرسايل الخاصة
الله يعينك زوجك عاد لسابق عهده !!!!!!!!
ما عليه اختي اصبري عليه
ولا تسألينه مرة ثانية وش فيك والا ليه متغير
سوي نفسك كأنه لا متغير ولا فيه شي
اقبلي عليه
اغمريه بحبك وعطفك وحنانك اخرجيه من سكوته
اطلعي وياه لمنتزه او مطاعم او كوفي شوب
او احجزي لك وله يوم او كم يوم في فندق ولا شاليه غيرو جو
والبسي له وتعطري وتزيني واغمريه حبا ودلعا وتغنجي قدامه
ادخلي السرور الى نفسه من خلال اي شيء تحسينه يسر فيه مثلا قولي له مواقف مضحكة والا نكت
غيري في جو البيت خلي البيت مصدر سعادة وابتسامة وتفاؤل وبشر
وستجدين في المنتديات الكثير من المواقف والأفكار المضحكة والمبهجة
غيري في لبسك صبغي شعرك وقصيه قصة جديدة
غيري غيري في الروتين وخلي مزاجكم عال العال
انتي لو مزاجك زين بينعكس على زوجك
علشان كذا لزم انتي ما تنظرين للمشاكل والمواقف السلبية التي تمر عليك تؤثر على حياتك ونفسيتك اتركيها خلفك تحملي واصبري لأنك في موقف غير عن الناس زوجك محتاج مسانده ودعم منك
او انه يمر بظروف وعليك انتي مساعدته بالخروج من أزمته اللي عايش فيها بسلام
بتصرفاتك الذكية وفهمك للحال الذي تمرون فيه وبتجدديك لكل شيء حوالينك والأهتمام فيه من ناحية العواطف وما ذكرت سابقا
صدقيني ممكن يتكلم معاك ويعترف لك من نفسه عن سبب ضيقة وتغيره
وربما يتغير للأفضل ويعود في نفسية احسن من الأول ان شاء الله
بس انتي لا تزيدين همومه وتثقلين عليه وتخلين هاليومين اللي تقعدينهم معاه يوم الشكوى والهموم
خليها ايام سعيدة ............ولا يمكن ان تتم السعادة اذا انتي لم تكوني راضية عن نفسك ولم تسعديها وتدخلين الأمل والتفاؤل الى نفسك
اسمحي لي يمكن كلامي مو مرتب لأني كتبت الجواب مباشرة بعد ما قريت ماكتبتي
الله يعينك ويساعدك ويوفقك ويصلح لكم شؤونكم كلها
ولك سلام من الله ورحمة وبركات .
التعديل الأخير تم بواسطة ***نووور*** ; 01-06-2007 الساعة 02:41 PM