السلام عليكم ورحمة الله وبركاته ..

ايش الحل مع الزوج المهمل ؟؟
يعني مادري هل كل الرجال كذا ؟؟ يجي من الدوام الملابس يرميها ع الارض ..اذا خرج برا ورجع الملابس تترمي على الارض ..
يفتح الدولاب عشان يدور ملابس يقوم يرميها على الارض كللها الين يلقى الي يعجبه ..؟؟

ايس الحل مع الزوج الي كذا ؟؟
لو تشوفو البيت كلو ملابس ع الارض كأني بمحل ملابس ..
الصاله وغرفة النوم و الحمام وغرفة الملابس كل شيييي هدا كلو عشان يطلع ملابس. حتى المدخل وصلته الملابس هههه مدري ضحك ولا ابكي . في الاخير ارجع اشيلها ما ادري ايش الي يحتاج غسيل وايش النظيف والي كان في الدولاب راح يحتاج كوي من جديد وااااا صراحه شي مرا متعب وينررررررفز .. واتعب ارجع اكويها كللللها من جديد سرت ارجع اعلقها مكرمشه قلت عشان يعرف انه بسببه ويقول ليش مو مكويه
ولما يجي ولده ويبغى يغيرله يرمي ملابسه في الارض ويجلس يطلعله من الدولاب كل الملابس عشان يختار .. احترت لازم العاده ذي تتغير مرا تعبت البيت كلو ملابس .. ومو حابه بعدين اولادي ياخذو العاده ذي من ابوهم راح اختفي بين الملابس ...

بقولكم الحلول الي جربتها .. والي عنده حل يقولي ..
كلمته بالموضوع وقلتله ترا صفه جدا سيئه ماحأقدر اتحملها لأخر العمر وانت كذا .. قالي راح تعجزي وتتعبي وماحتتغير ذي الصفه لازم تتأقلمي انا كدا وما اقدر اتغير ..
قلتله لا تقدر لو قلت بنفسك بتغير ذي الصفه بتغيرها ..

في سله للملابس حط ملابسك فيها .. وعندا غرفة ملابس ع الاقل ارمي اللابس فيها ليش تخرج الملابس وتوصل للصاله والمدخل وغرفة النوم

الحل الثاني سرنا لما بنخرج اقوله انا بطلعلك ملابس على ذوقي عشان اتجنب انه يرمي الملابس .. يقول طيب ولما اطلعله ويلبس يقول لا مو حلو ويرميها ع الارض ويجلس ساعه قدام الدولاب وبعد مايرمي كل الملابس يختار ويمشي ..

وولده حاولت انا اطلعله والبسه الولد يرفض يحب ابوه يلبسه ويختارله اذا ابوه موجود ..

امس خلاص تضايقت مرررا لما شفت الملابس كلها مرميه ع الارض ومافيا ارجع اكويها كلها من جديد وازعل واتضايق بعدين اهدأ واقول ما ابغى اسوي مشكله معاه عشان ملابس وننكد على بعض ..




ابغى حلوووووول بلييز قبل ارمي الملابس كلها واخليله واحد بس

__________________
لاتسعى لتصحيح ظن احد بك ££ خالقك ينظر لقلبك وهذا يكفيك

مشكلتك تفتح النفس😅
المهم بقولك تجربتي مع اطفالي
كنت مثلك اتعذب بس سويت مثل محلات الملابس
كل شيء كل شيء يتعلق بالدولاب تعليق
مثل محلات الملابس
الى البجايم أعلقها والبناطيل برضو كللل شيء ماعدا الأندروير..
فإذا جاء يختار الواحد منهم لبس يختار لبس بدون مايحوس لأن كل الملابس معلقة قدامه يشوفها بوضوح
وسلة الملابس الوسخة جنب الدولاب على طول
فكل مرة اذكرهم يرموا الملابس بالسلة مع كثرة النق تعلموا

سلة الملابس ماادري تمشي معك
بس التعليق متأكدة بتفرق معك مرررة

هههههه

المشكله كلها معلقه ملابسه وحاطه سله جنب الدولاب

__________________
لاتسعى لتصحيح ظن احد بك ££ خالقك ينظر لقلبك وهذا يكفيك

عن نفسي زوجي ما شاء الله منظم .. الملابس اللي يغيرها يحطها بزاوية
ومع انه منظم جدا و مرتب بس انه اطلع له ثيابه لاني اوردي اختار له اللي يلبسه
وعشاني مرتبة الكبت بطريقة معينة ما ابي يتغير ترتيبي


رتبي ملابسه حسب اللون و النوع
مثلا ثوب لونه اوف وايت حطيه مع اللي مثله
او قميص لونه ازرق حطيه جنب الاقمصة اللي لونهم ازرق وهكذا
وخلي مساحة صغيرة بين كل نوع ونوع .. بحيث تسهلين عليه الاختيار

آنه جذي مسويه بحيث اذا ما كنت بالبيت و يبي يغير ملابسه ما ينحاس المكان

__________________

حاجة الناس إليكم من نعم الله عليكم ، فـ لا تملوا النِعم ☁✨

لاتكوينها كلها غسليها وحطيها بالدولاب وقبل لايطلع يختار الملابس الي بيلبسها إكويها له ، بدل مايضيع وقتك على الكوي ويرجع يعفسها .

__________________
الحمدلله حمدا جزيلا ...

طليقي كان عنده هالمشكلة بحكم انه مددل جدا عند أمه كان الكل(أمه واخواته والشغالة) يرتب وراه..

ولعلمك ماتغير ابد فما اعرف افيدك.. مادام انتي مرتبة كل شي ومعلقتهم فانتي مسهلة عليه الشغلة بس هو كذا فيه طبع اكيد متعود ببيتهم كذا..

__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم

ما أعرف، بس أتوقع أن الواحد لازم يعود نفسه على أنه مايرمي كل شي بالأرض، ويتعود أنه يكون مرتب ومنظم خصوصاً بمثل هذه الأمور البسيطة اللي ماتكلف لا وقت ولا غيره.
مشكلة بعض الرجال لاشاف وراه وحدة تضف كل شي يرميه يتهاون
والمشكلة الأخرى أنه لاتعود على نمط معين لااااااايقبل أن زوجته تطلب منه يعدل سلوكه.
شخصياً مرتب في وضع الملابس بمكانها، وأذكر مرة كنت مستعجل جداً فوضعت ملابسي بالمكان الغير مخصص لها، رغم أنها في الدولاب، لما رجعت استغربت طليقتي أنه ماحطيتها في مكانها، وصراحة استحيت على نفسي رغم أني كنت شبه معذور وقتها كوني مستعجل.

__________________
ياصبحِ لاتِقبل !!
عط الليل من وقتك..

شوفي الذكور غالباً فوضوين يعني لا تتوقعي إنه أولادك مستقبلاً رح يكونو مثلك

اولادي بلاحظ وهم صغار يسمعو كلامي وياخذو الملابس من مكانها بدون حوسه لكن كل ماكبرو تغيرو المهم بسرعه ألحق ألعب بسرعه ألحق أتفرج وعشان ماأخصامهم اذا رموها في الارض يدفعوها في الدولاب اذا فتحتيه طاحت نصها

كلامي عشان اوضح لك انه مو بس ولد زوجك

بعطيك طريقه ريحتني معاهم شوي
اولاً اي لبس مكوي ع العلاقه ع طول ماأطويه في الدولاب
ومحطيه بوكسات :
ملابس النوم لها بوكس
الملابس الداخليه لها بوكس
الشراريب لها بوكس صغير
لانه لو احتاست الملابس تحتاس داخل البوكس وبكذا الدولاب مرتبه وغالباً الي يحوس الدولاب القطع الصغيره فالبوكس افضل حل لها

وباقي الملابس الي مااكويها لانه عندي مجفف مثل الجينز والقطنيات وبعض البلايز أرتبها بدون مااحطها في بوكس

وترتيبي غريب شوي وعجب شغالتي لإنه مايعفس بقية الملابس
أمسك طرف اللبس من الاكتاف اذا بلوزه وأطويهم طيه وحده بالطول وبعدين من فوق أطويها مثل ماتطوي السجاد او السينابون هههه
وبس احطهم بجنب بعض او فوق بعض
اذا سحبتي لبس ماتخرب بقية الملابس
وبرضه سهل عليك إنك تلاقي الي تبغيه

وفي نقطه ذكرتي انه زوجك يحوس عشان يطلع لبسه
شوفي الملابس الي يكرر لبسها هي الي خليها فوق او في رف لوحدها وبقية الملابس في رف تاني
انا زوجي مشكلته مع الملابس الداخليه يحوسها عشان يطلع الجديده منها
ارتبها ماانتبه اني احط القديمه فوق والجديده تحت فلما انتبهت غيرت طريقة الترتيب

ان شاء الله استفدتي وبعدين زوجك اذا مررره فوضوي برأيي تتركي دولابه فتره بدون ترتيب واذا سألك وضحي له انك تعتبي
أما ولد زوجك اذا عمره اقل من 7 سنوات سهل تعوديه جيب له حركات حلوه في دولابه
ولدي عمره 5 سنوات جبت له علبتين بلاستك ع شكل دبودب وحده لشراريبه ووحده لعطوراته ومشطه واي شي هو يحب يحطهم فيه وبوكسات الملابس بلون طفولي

أخيراً لاترهقي نفسك كثير في الكي والترتيب لا يكلف الله نفساً الا وسعها لانه يأثر ع نفسيتك اذا تعبتي ومع خرابهم يحسسوك ولا كأنك سويتي شيئ
بيتي كله أولاد وتشبعت من الفوضى حتى شغالتي ماارهقها بالترتيب وراهم كل يوم

لا اتعبي حالك .. ما راح يتغير ..
يمكن يقلل .. بس انه يصير منظم ومرتب نفس الحريم هذه شبه مستحيله ..

ياليتك قلتي البعض
انا مرتب وعلى سنقة عشرة

__________________
سبحان الله وبحمده سبحان الله العظيم