السلام عليكم ورحمة الله وبركاته
احب ان اطرح قصتي لكم لأرى ارأكم ونصائحكم بقصتي التي سوف اقوم بسردها وهي قريبه من مسلسلات الدراما
اولا انا شخص عملي جدا لأبعد الحدود اعشق الارقام و أمور التجاره بالعربي اعشق الفلوس عشق اتعامل مع الفلوس كأنهم عيالي اخاف عليهم واهتم فيهم اخوياي يسموني الحضرمي ( الحضارم لهم فن في التجارة و الاستثمار) , احب القرأه اقراء عن المجالات الي اهتم فيها .
طبعا كنت انبذ الحب واسميها خرابيط لانه عندي مبدأ في الدنيا سابقا ( كل شخص له مصلحه من الشخص الاخر , وليس المعنى ان المصلحه شي سيى ).
كنت اسمع قصص الحب و أهزء منها وأقول النهايه الفلوس كل شي (طبعا المنظور حاليا عندي كذا ههههه).
طبعا الي يقول انه يقدر يلغي المشاعر كذاب , من فتره طويله احلم انه متزوج وحده نفسي المواصفات الي اتمناها لدرجة انتجت لنفسي شخصيه وهميه في عقلي انها زوجتي وبنفس المواصفات الي اتمناها واحلم فيها وكنت عايش على كذا (مواصفاتي صعبه شوي صراحه من جهة التفكير والجمال و تكون عكس عاداتنا لانه احب الاشياء الجديده و اهم شي الشعر ادقق عليه مررره , مدري ليش ولله في خلقه شؤون هههه)
المهم قبل كم سنه قلت خلاص بتزوج وكلمت امي وانا الي اخترت البنت الي بخطبها وراحت وخطبتها وتمت الشوفه و الملكه والوضع ماشي تمام الي ان حصل معي شي غريب واتذكر اليوم نفسه وحتى هي كانت تقول انت في اليوم هذاك جاك شي غريب وكرهت البنت بطريقه غريبه جدا صرت مابي اتكلم معها و لا ازورها واذا رحت زرتها اطلع واكون جدا تعبان , المهم حاولت وسألت ودعيت الله وبحثت عن نفس حالتي و اهلي تخاصموا معي و امي زعلت وانا وقتها نفسيا دمران , المهم حاولت الين خلاص ماقدرت , وكنت ابكي بطريقه غريبه ومنهار ,ورحت للبنت وشرحت لها وضعي طبعا البنت زعلت ومن حقها , واقسم بالله انها كانت انسانه جدا طيبه وخلوقه ومحترمه لأبعد الحدود . بس الشكوى لله استخرت الله و تم الفسخ و تركت كل شي لها وهذا حقها واني والله العظيم ما انسى اللحظه الي تم الفسخ فيها , كأنه جبل ضخم كان على ظهري وراح وجتني راحه غريبه , وعلشان وقتها انسى السالفه واشغل نفسي كان عندي الناسور العصعصي و الافضل اسوي عمليه بس مب لازم رحت وسويت العمليه علشان اشغل نفسي .
وعدت كم سنه وانا ملغي فكرت الزواج من راسي بعد الشي الغريب الي صار لي ,جتني سفرت عمل للخارج وسافرت زي أي سفره لي وسكنت في الفندق احد الدول العربيه و الوضع عادي اروح اخلص الشغل واطلع اتمشى وارجع وهلم جر الين لحظة شفت بنت تشتغل في الفندق فيها جمال سبحان الله الي خلقها انصدمت صراحه بجمالها وانا انسان ما عمري كلمت بنت بحياتي وقت كنت صغير ( ما اعرف على قولتهم اغازل , متأسس على كذا ) وقتها جاني دافع غريب الا اروح اتكلم معها بأي طريقه بس لازم شي يخص عملها هي كانت بالاستقبال , قلت بروح اقول لها المفتاح ضاع مني, ابي اشوف اسلوبها وطريقة كلامها ورحت و كلمتها من سمعت صوتها وطريقة كلامها انجنيت ورحت الغرفه وجلست بس افكر فيها ومانمت زين , مددت مدة اقامتي وجلست ابي اعرف اوقات دوامها الين عرفت انه عملها شفتات ويتغير بالاسبوع وصرت انزل اللوبي واقعد اراقبها كنت ساكن في منتجع اسمه اكوا ميراج منتج ما يحتاج تخرج منه فيه كل شي , المهم بديت ابي اتقرب منها واحاول بس ما عرفت و جلست اضبط عاملات النظافه كانوا كبيرات بالعمر الين وقتها كان في وحده اسمها ام ايمان الله يذكرها بالخير صراحه خرط لها السالفه بكبره يا تضبطني او خلاص , قالت لي اذا قصدك شريف وكذا يعني زواج انا اروح اكلمها لك ولجيب لك رقمها وانت وحظك قلت لها تكفين جربي وراحت وكلمتها و انه هذا اعجب فيك ويبي يخطبك من اهلك وكذا , البنت وافقت و اجابت لي رقمها وتواصلت مع البنت بأدب وكذا وسواليف عن عملها و دراستها والشي هذي (طبعا في البلد هذا عادي ) و قبل اسافر خلاص تأخرت عزمتها على العشاء في مطعم تشيليز وتعشينا و طلعنا الكوفي في نفس المبنى وسواليف . وقلت لها ابي اخطبك من اهلك علشان أهلك يصير عندهم خبر ونقدر نتكلم و كل واحد يشوف تفكير الثاني وكذا قالت يصير خير انت ارجع وانا متواصله معك وكل شي بوقته حلو , رجعت وصرت اتكلم معها طول اليوم مسجات مكالمات وقبل انام واي فرصه نكون فاضين نتكلم , البنت طلعت الي احلم فيها اقسم بالله العلي العظيم نفس المواصفات الي اتمناها وتفكيرها نفس تفكير (نفس الشخصيه الي كنت اتخيلها سبحان الله ) و بدت العلاقه تكبر وتكبر وصرنا نحب بعض بجنون و طلبت اجازه من العمل وسافرت لها وجلست 20 يوم نطلع ونروح ومانفترق الا وقت النوم وعشت اجمل ايام حياتي , تغيرت حياتي صرت اهتم بصحتي وتغيرت حتى اهلي حسو علي التغير بدرجه كبيره. المهم عدت الايام و الحب الي كنت ما اهتم فيه يكبر ويكبر اضعاف مضاعفه , وقتها تكلمت معها بطريقه جديه قلت لها ابي اخطبك وكل الامور الثاني انا بجهزها من موافقه الحكومه والاجراءات الاخرى . ما اقدر اعيش من دونها صراحه ,جت الصدمه قالت انا خايفه وما اقدر ابعد عن اهلي قلت لها لك كل الضمانات الي تبينها لدرجة اول كم سنه استأجر في بلدك واصير اجي و انتي تجين عندي فتره الين تتأقلمين وكذا الامور حبه حبه وراح تتعودي وكذا بس البنت خايفه ورفضت . انا هنا انصدمت لدرجة دخلت المستشفى (عندي مرض بالاعصاب ممنوع اتوتر و اعصب , السبب كان وفاة الوالد الله يرحمه , كل شي من الله نعمه ) .
الحين انا تعبان ومب قادر انساها وحتى هي حاولت اقطع التواصل معها بالتفاهم وكذا وهي ترفض , مسحت رقمها وبلكتها وسويت كل شي عدت يومين ماقدرت رجعت اكلمها وصراحه انهرت عليها بالبكاء وانا اتكلم معها . وقلت لها خلينا كذا وهذاني عايش مدري وش السوات , صار وما اتخيل اعيش مع احد غيرها احبها بجنون الحمدلله على كل حال , ندمان اني قابلتها و اني عرفتها ونفسيتي الفتره ذي رايحه فيها .
وش تنصحوني فيه ابي أراكم ونصايحكم .
جزاكم الله خير

قال الله تعالى

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً {10}
يُرْسِلِ السَّمَاء عَلَيْكُم مِّدْرَاراً {11} وَيُمْدِدْكُمْ بِأَمْوَالٍ
وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَاراً {12}

" انصدمت صراحه بجمالها "
صدمك جمالها وكان شكلها هو أساس إعجابك بها,
وطبعا انطلاقتك معها على أساس هذا الإعجاب أنستك باقي التفاصيل في أخلاقها,
وصرت ترى كلّ صفة فيها تطابق ما كنت تتمنّاه,

ثمّ على أي أساس هي قبلت بك مع علمها وإصرارها أنها لا يمكنها الإبتعاد عن أهلها,
فربّما هي لما أيقنت من وقوعك في حبّها تضغط عليك لتنتقل إلى حيث يقيم أهلها,
أو ربّما هي أخذت الأمر كتسلية ولا يهمّها غير هذا,,
أتمنى لو أنّك تقرأ موضوعك هذا بحيادية كأنّ أحدا آخر كتبه..

إن كنت في مجالس الناس فاحفظ لسانك,
وإن كنت في بيوت الناس فاحفظ بصرك.
ممتنّة لله وحده

اللهم امين جزاكم الله خير
من ناحية موضوع الزواج انا سألتها قلت لها ليه كملتي معي اذا ماتبيني وكنت رفضتي من البداية وما سويتي فيني كذا ردت قالت انا مب رافضتك لشخصك بس انا خايفه وكانت تسأل وتستشير ومنهم الي خوفها وهم الاغلبيه ومنهم لا , فقالت اه ماتبي تتخذ خطوه وتجيها مشاكل بكره وهي الي اختارت .
من ناحية الاستنزاف المالي اكون صريح انه في بداية علاقتي معها كنت حاط هذا اول عقبه لي بمعنى انه اذا طلبت مني فلوس انتهينا الموضوع فلوس وانا جدا حساس بموضوع الفلوس ما احب احد يستغفلني , لذلك في بداية العلاقه و الى الان مجموع الهدايه ما تساوي شي وانا الي جبت مب هي طلبت بمعنى انها لمدة فترة علاقتنا لو هدفها الفلوس كانت سحبت علي من زمان.
من ناحية اهلها ابوها متوفى الله يرحمه ولديها اخت واخ وهم عائلة من الطبقة ما تحت المتوسطه وليست فقيره وهم من قبيلة ريفيه لديهم مزرعه مشتركه من جهة القبيله بأكملها . والديها متدينين وملتزمين بالتقاليد الاسلاميه , البنت ليست عائشه مع اهلها في نفس المدينه بل هي في مدينة اخرى بسبب العمل .(هي ذكرت لي تفصيل عائلتها , وانا جبت بعض المعلومات عنهم وفيه تطابق كبير بين كلامها و المعلومات الي وصلتني ).
ليست محجبه وطبيعة البلد كذا من جهة الامور الدينيه لديها خلفية كبيره في الامور الدينيه وهذي تعود لنقطة التربيه من جهة العائلة , ولديها تأنيب للضمير لنفسها بسبب امور الحجاب و (طبعا بناءا على كلامها ) و الامور الاساسية بالدين ملتزمه بها مع وجود تقصير منها .
من جهة اهلي ما اتوقع راح يقبلون بس هذي حياتي الشخصية وانا الي راح اعيشها , هم اهلي وكل شي بحياتي , بس انا بشري لي مشاعر ابي اعيش وانبسط بالحلال , ابي اعيش بختياري انا مب بخيارات غيري .
مشكلتي الحين اني احبها مب قادر اشوف احد غيرها ومافي امل اقدم على فكرة زواج وهي بعقلي لو نصف بالمئة ,مافي امل اظلم بنت اعيش معها وعقلي مع غيرها حرام وهذا ظلم لها ولنفسي . علشان كذا مدري وش اسوي حاليا عايش بس امشي دنيتي والايام تعدي وانا في حلقه مفرغه خايف من نهايتها اقسم بالله .

طبعا الحمدلله على كل حال من الاحوال , بس انا حاليا ندمان اشد الندم اني عرفتها وبنفس الوقت احبها ومب قادر اتخيل اني اعيش بدونها .

جزاكم الله الف خير

قال الله تعالى

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً {10}
يُرْسِلِ السَّمَاء عَلَيْكُم مِّدْرَاراً {11} وَيُمْدِدْكُمْ بِأَمْوَالٍ
وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَاراً {12}