طبعاً كالعادة ماأسوي شيء إلا بقصة طويلة عريضة
....الله يعينكم
المهم يوم الجمعة بحمد الله رجع زوجي من رحلة قضاها مع أصدقائه للطائف لعدة أيام
وخطر في بالي أسوي له تورتة إستقبال ...علشان انزلها هنا ...يعني مو علشانه ...بس جات فرصة
جلست أفكر وأدور في النت عن فكرة حلوة للتورتة ...فلمعت في رأسي فكرة جهنمية وعجبتني واصريت عليها
مع إني خلال بحثي لقيت الموقع إللى نقلت لكم صور عمل التورتات منه ....وشكلها رائع...بس أصريت على فكرتي لإنها مناسبة جدا للحدث
أي حدث الله يهديكِ؟؟؟؟!!
الحدث هو إنه قبلها بيوم يعني يوم الخميس لعب نادي زوجي المحبوب الإتحاد مع نظيره الأهلي
وكالعادة زوجي لما أتصل يقول لي أدعي ربنا يفوز.
..فقلت له أبشر بإذن الله الإتحاد فائز ...ومن الأن أقول لك مبروك الفوز
وأصحابه يسألونها.....ها وش قالت الولية حقك بنفوز وإلا لا؟؟؟
إللى ماتعرفونه إن زوجي واصحابه دائماً ينتظرون قبل أي مبارة إحساسي هل بيفوزوا أم لا
لإني بفضل الله إذا قلت لهم حاسة إنه بيفوز ....يفوز....وإذا قلت لزوجي ...بصراحة ماأعتقد يفوز....يعصب ويقول لي أنتِ أدعي وبس.
...اقول له أنا بدعي بس حاسة إنه مابيفوز أحس الدعاء مايطلع من قلبي
ودائماً يطلع كلامي والحمد لله صح
حتى في مباراتهم الاخيرة على الكأس قلت لزوجي بيفوز بإذن الله الإتحاد
وزوجي من فرحته بالبشارة مارضي ينزل يشوف المباراة مع أصحابه في المجلس وأصر يجلس معاي علشان يفرحني مثل مافرحته مع إن أصحابه كلهم موجودين عندنا
ويومها لبسنا كلنا وحتى عيالنا فلاين الإتحاد... علشان اعطيه جو حماس لإنه جلس معانا
المهم طال الإنتظار والضربات تضيع ...وتضيع وقرب الشوط الثاني على الإنتهاء وقلبي قام يكش وأقول في نفسي الظاهر هذه المرة خابت معاكِ ياأم جمانة وبيحرم يجلس عندك أبو جمانة
وفي اللحظات الأخيرة من المبارة سجل الإتحاد هدفين وصار البيت كأنه عيد صراخ من فوق وصراخ من تحت من أصحاب زوجي وكنت يومها مجهزة تورتة جاهزة إشتريتها بدون مايدري زوجي علشان إذا فاز أقدمها له
ونزل زوجي يجري لأصحابه وأهازيج الإتحاد تمليء ارجاء عمارتنا كلها والجيران يدخلون للتهنئة ونزلت لهم التورتة والعصير ونصهم راحوا للنادي للمشاركة في الفرحة واليوم الثاني لما رجعوا اللاعبيين راحوا عيالي
حتى زوجة عم زوجي إتصلت فيّ بعد المبارة وقالت لي يقولون إنك إذا دعيتي تستجاب دعوتك (أولادها قالوا لها لإنهم أهلاويين وزوجي يقول لهم بنفوز مادام أم جمانة قالت)
والأن فاز الإتحاد.....علشان كذا أبغاكِ تدعي لعيالي......بصراحة إنحرجــــــــت وقلت لها هو مجرد إحساس فقط لاغير زالعلم عند الله وحده
المهم السموحة من اخواننا وأخواتنا الغير إتحاديين لإنني أثرت حفيظتهم بكلامي لاتزعلوا...يوم عليكم.....ويوم عليكم ..كمان.....خليها كلها لنا علشان زوجي يفرح
....خلي عندكم روح رياضية
المهم الحمد لله فاز الإتحاد مثل ماقلت لكم يوم الخميس ورجع زوجي يوم الجمعة وفاجأته بتورتة على شكل شعار الإتحاد
ولمن لايعرف ماهو شعار الإتحاد فهذا هو
هذه صورة كيكة الشوكلاتة بعد ماأستوت
بإمكانكم عملها من خليط بيتي كروكر بالشوكلاتة
أو عمل كيكة شوكلاتة بنفسك مثل هذه وأخذت طريقتها من نفس الأخت إللى منزلة صور التورتات وطلعت جداااا لذيذة ومثل بيتي كروكر تمام وببيضتين بس
ومقاديرها : 2كوب سكر +1 وثلاثة ارباع كوب دقيق + ملعقة باكن باودر + ملعقة باكن صودا+فانيليا+ ملعقة ملح + ثلاثة ارباع كوب شوكلاتة بودرة + كوب حليب سائل مخلوط معاه ملعقة خل + نص كوب زيت + كوب ماء دافيء مخلوط معاه 2 ملعقة نسكافية أو اي قهوة مثلها + بيض
تخلطي المقادير كلها مع بعض في الخلاط وتخبزيها ولكن في صينية أكبر من الصغيرة بقليل.
وهنا بعد ماقطعتها على شكل الشعار
هذا الباقي لا ترموه خلوه بوريكم في النهاية وش تسوون فيه
وقلت ماأبغى أستخدم صبغة لون أصفر مع الكريمة علشان الصبغات خطيرة وأحتاج لكمية كبيرة
ففكرت بفكرة اختي أجنحة الأمل إني أستخدمت الكسترد لإنه أصفر وفعلاً الكسترد أعطاها طعم لذيذ جداااااااااااا(((شكراً ياأجنحة الأمل))
وسويت الكسترد وصبيته فوقها
وقلت الأن كيف أستخدم لون أسود للجوانب؟؟؟
ففكرت إني أحط بسكويت أوريو الأسود وأخلطه مع الكاسترد......وطلع الطعم رهيب رهيب جداااااا بس اللون ماعجبني صاير كأنه إسمنت مو أسود
فدهنتها بجوانب الكيكة علشان طعمها لذيذ
وجهزت كريمة دريم ويب مع شوكلاتة وغطيت بها الكسترد مع الأوريو علشان مايظهر
وسويتها على شكل زينة
وأكملت بالكريمة رسم شعار الإتحاد وكتابة التهنئة
وهذه شكلها النهائي
طبعاً واحد من عيالي غطى عيون أبوه لإنها مفاجأة والثاني دخل بالتورتة وأنا شغلت من النت أهزوجة الإتحاد(ون ...ون...ون....الإتي نمبر ون)
وفرح زوجي فرحة عااااااارمة
حتى لما طلبنا منه يقطع التورتة وأعطيناه سكين أصفر....قال مايهون عليّ أقطع شعار الإتحاد....
الأن أنا تعبانة ومسوية التورتة ومنتظرين ناكلها ...وهو من حبه للإتحاد مايهون عليه يقطعها ...
........والله إني ماأحب الكورة ولاسيرتها بس شنسوي علشان عين تكرم مدينة مضطرة أسوي نفسي أحبها واشاركه ......بس للإتحاد فقط
ومباريات السعودية أحبها فعلاً علشان بلادي أفرح لها بالذات إذا كانت مع فريق أجنبي وإذا كانت مباريات نهائية
المهم طبعاً خليناه غصب عنه يقطعها وأكلناها
ولله الحمد
الأن بخبركم كيف إستخدمت بقية الكيك
قمت بتفتيته
وبعدها حطيت في كل كأس تقديم شوي من الكيك وضغطت عليه علشان يتماسك
وحطيت طبقة من كريمة الدريم ويب مع نسكافيه وضروري نسكافيه وليست شوكلاته لإن النسكافيه يعطي طعم لذيذ وخفيف
وطبقة ثانية من الكيك ...,هكذا حتى أخر الكأس يكون طبقة كيك
وبعدها نزينها على حسب الرغبة هكذا
وهذه شكلها الجانبي
وبإمكانكم عملها في صينية ذات قاع يتفك ثم بعد أن تبرد وتتماسك تفتحوها وتقدموها كما هي كاملة
لكن عن نفسي أفضلها كذا
ها شخبار روسكم من قرقرتي الظاهر خلص البندول من عندكم
أبشركم مجهزة تورتة السويسرول عندي وكنت ناوية أنزلها مع بعض هنا
بس والله تعبت من التحميل والقرقرة
خلوها مرة ثانية
ولا تنسوا تشتروا علبة بندول جديدة......وإلا مايحتاج كيكة السويسرول مالها حكاية مسكينة
أم جوجو
28-10-2007, 09:06 AM
ضوابط المشاركة
العرض العادي
