السلام عليكم

صراحه ماكان ودي انزل موضوع ولاكن اشوف الحاجه هذي مهمه ومحتار فيها

انتم عارفين اني خاطب والحمدلله عديت نصف المشوار شافت كشرتي بالصوره واعجبتها ولسا ماشفتها شوفه شرعيه

طبعا ماادري عن ابوها بس ماساأل عني واكتفوا باانهم يسألون الوالده عني !!

من الاسئله

اهو يتتن ؟
يعني هل هو مدخن ؟

ومافيه احد كامل وكلن فيه عيوبه وصراحه مااشوف نفسي مدخن كبير يعني وسط 😢 واغلب مااتتن في الدوام مع ضغط العمل ولان كل اللي اشتغل معهم يتتنون
ويقولون انها موافقه وطلبها انه يكون مايدخن وانا صراحه احترم راأيها واختيارها
بس الوالده يوم قالت لي قلت لها شوفي انا ادخن وماقد شميتي فيني ريحه ولا شفتيني ادخن وماابي اكذب على بنت الناس والعب عليها من البدايه تنرفزت وقامت تلاغي فيني وتقول انا حالفه عليك وماادري شو طبعا هذا عقب ماقعدت نصف ساعه تعطيني محاضره عن التدخين

اني هوم
اختي تقول اتركه ونقول لهم كان يدخن وتركه وصراحه ماودي اتركه واصدم المسكينه بيوم ارجع له مثل واحد من الشباب وبعد كذا قامت تنصح وزعلت ولاعاد ردت
الوالده طبعا تقول ماراح اكذب على الناس وقلت لها اشاركك نفس الشعور قامت ودقت على ناس ثانين وراحت لهم وتقول بدور وحده شيفه تقبل فيك وفي تتنك يالتتان وبزوجكياها
قلت مره انت اللي توقعين في دفتر المأذون ماهوب انا وعطتني نظره وراحت

الوالد يقول لاتقول انك مدخن وخذ بنت الرجال وتراه طيب وناس ينشرون ونفس مستوانا وماادري ايش لانه طقها صداقه معه هذاك اليوم
انا مافرقت معاي اقولهم لاتكذبون وانكانها راضيه بااحطها بعيوني ولاراح ادخن في البيت ولاقدامها
ولا وهي جنبي ولو تعينني تركته عشان هذاك الشي اللي يسمونه حب 😍

صراحه ماودي اكذب ولا ودي اخدعها وتنصدم بعدين لان واحد من الشباب تركه وفجأه تطاق مع المدام ورجع لها ببكت

ايش رايكم اقول ولا مااقول ؟

والشاعره تقول يوم درت عن ابنها انه يدخن عشان يتباها بأنه رجال

ياشارب الدخان شاربك لاطال واللي طويلن شاربه يقصرونه

انتضر ردودكم ورجل الرجال ياليت مايبخل علينا برأيه وكل المستشارين

الله لا يلومها ..
الحين لو فيها التهاب بالثه خفيف ..

بتكتب فيذا موضوع طويل عريض ان ريحة فمها لاتطاق ..
وانت تجي تسولف وريحة فمك كلها قرف ..
وشلون تتخيل انك تقبلها وشلون بالله عليك ..


وبعدين لا يهونونها عليك ..تخيل انها هي بعد تتتن على خفيف ..بتوافق عليها ..؟؟؟؟؟؟
ترى كاثرين التتانات هاليومين ..


وسلملي على اميمتك وحب لي راسها ..مايقبل بك الا شيفة ..
ولعلمك اختي راح عمرها تردد ماتبي تتان ..

تقول اشتري صحتي ..انا ابخر من هنا ..وهو يجي بعفانه من هنا ..
يجيب لي ولعيالي المرض ..

__________________

اححح والله ردك مايساعدني كثر مايضيق صدري ويحكم علي

من ناحية ان كان فيها التهاب لثه عادي زوجتي الاولى فمها مخيس ولاقلت شي حتى اني لمحت لها شريت معطر للفم وحطيته عندها بس مافهمتها

وبعدين ماراح ادخن عندها وريحت الفم يبيعون شيء اسمه علك

وماودي اكذب واقول تركته وارجع له خصوصا ان العمل كله مدخنين
ولاتحكمين علي لان مافيه احد مافيه عيب 😊

لحظه ..وش حكمت عليك فيه ..فطنني ..
ورانا حساب وعذاب ..لااكون غلطت وانا اكتب ..
والحمد لله عائلتي وعائلة زوجي مافيها تتان واحد يالله لك الحمد .حتى سواويقنا مايتتنون ..يالله لك الحمد ..

ترى ماعديتك الا اخو ..وهالكلام نفسه بقوله لو احد غالي علي يتتن ..اعوذ بالله ..

__________________

عاد تدري قبل فتره امي كانت تكلم اخوي ووضعه زيك
ماعمرنا شفناه يدخن بس برا احيان مع الضغط ..
عاد امي حالفه يمين انها ماتخطب له الا لاساب ه البلا
وبرائي اشوف انه يستاهل والكل مأيدها ..
انت في العمل تدخن بحجة ضغط العمل واصحابك
عاد في المستقبل مع ضغط البيت
والاسره والبزران ي خوفي تدخن في البيت
عمومآ ..
انااشوف انكم تعلموهم الصدق من البدايه عشان التوفيق
وخلكم واضحين عشان لا تتوهق مستقبلا لا عرفت ..
وبعدين وش دراك يمكن توافق عليك ..

الله يصلحك و يكتب لك الخير ويرزقك بما تتمناه ..

خلك صريح وواضح من البداية
واللي كاتبه الله بيصير
وانت حاول تتركه
وماهو عذر ان كل اللي عندك بالشغل يدخنون
انت عقلك في راسك وتعرف الصح من الغلط
موفق

انا مع رأي اختك اتركة وقلهم اني كنت ادخن وتركتة ..كذا تصير ماكذبت ولاخدعتهم
ترا فيه ناس مايبون مدخن بس يوافقون يتحسفون بالرجل
اذا ربي كاتبها من نصيبك مارح يرفضون عشان دخان

وانت اتركة عشان نفسك وصحتك ..توكل على الله وربي بيعينك على تركة
الله يوفقك ويسعدك ويكتب لك اللي فيه خير ..*

أكيد يالوف مايبيلها علم أهل البنت ولاتكنى عليهم لازم تكون على بينه من البدايه..

وأنا ماأيد أنك تتركه لذا السبب على ماأظن أن أذا واحد يبي يترك الدخان يبيله وقت وأصرار وعزيمه والأولى أنك تتركه لوجه الله موب لشي ثاني..أخاف لابس بكره ضمنت البنت ترجعله..

صراحه لي راي في شرط البنات ان الرجال مايتتن يعني ياليت مايتعسفون بذا النقطه ويتنازلون لأن نسبة الشباب المدخنين عندنا عاليه عاليه يعني ذولا مايتزوجون؟؟يعني صار شر لابد منه..

احس الدخان صار عادي مو مثل قبل مرفوض مثل الوظيفة
احسكم مكبرينها عادي اذا منت قادر تتركه رح و اشرح وضعك
قل عسى الله يهدين و اتركه .. اما تلف و تدور مو حركات رجال ذي
بعدين أعلمك طريقتي مع اخوي شلون ساعدته يترك التدخين في اسبوع
هذا ان طرالك تنظف رئتيك و ان ما طرالك عادي خذ لك شيفة
على قولة الوالدة

__________________

‏
الوعي هو الملاذ ..

أستغفر الله العظيم ؛
( الفردوس غايتي )

اقولك الحق.. ولا تزعل .. ريحة الدخان فعلا تجيب الغثيااان مهما اكلت علك
لكن الريحة تكون بالنفس نفسه الي طالع من الرئة
يمكن انت ما تحس بس الي جنبك يحس و خاااااصة الزوجة ...
فالها حق تشرط هالشرط
في ناس عادي يتحملوا ريحة الدخان و ناس (زيي )
موتي و سمي الدخان و كان شرطي الوحيييييييييييييد انه مايدخن

ومسالة الضغوط مو حجة ... اليوم ضغوط العمل .. بكرة ضغوط الحياة و البيت و توفير المصاريف
والعيال ..معناه ممكن تتحول من مدخن عادي الى مدمن تدخين
فاطلما انك لسه على العتبة (عتبة التدخين ومش مدمن عليه) يعني اسهل انك توقفه من الحين

و الي معاك بالشغل .. ماعتقد انهم يجبروك على التدخين .. و المفروض اصلا يكون في نظام
التدخين في الاماكن المغلقة ممنوع و الي حابب يدخن يطلع برا المكتب ..


النقطة الثانية ... تاكد انه حكاية هي تساعدني على توقيف الدخان .. ماتمشي
اذا ماجت الارادة منك . و ماجا التصميم منك .. ماحد ثاني بيقدر يساعدك


بالمختصر .. قولها انك مدخن و لكن مش بشراهه و اترك الامر لهم
والله يكتب لك الي فيه الخير

لكن نصيييييحة اخت اذا حابب تبطله بطله من الان قبل ما تتعمق فيه زيادة
ضغوطات الحياة ما راح تخلص عادها الا تزيد ...

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله