السلام عليكم ورحمه الله وبركاته


سجلت بالمنتدى عشان اطرح مشكلتي هنا لان اغلب الاعضاء ماشاء الله عليهم ينصحون ويردون بعقلانيه ويساعدون البعض بحل مشكالهم وان شاء الله اجد حل لمشكلتي مع زوجي لانى حاليا افكر بالطلاق

تزوجت من اربع سنوات بالبدايه واجهت مشاكل من اهل زوجي وخصوصا من حمواتي لانهم واجد كانوا اللي مو متزوجين ومعاي بالبيت 8 في اكبر مني وكبري واصغر ما اهتميت للمشاكل لانى كنت مهيأه نفسي انه بتعرض للمشاكل فالوضع عادي اعطيكم فكره بسيط عن اهل زوجي
1_ خالتي المسيطره على البيت وكلمتها ماشيه على زوجها وعيالها
2- بخيله ما ترضى احد ياكل الا عيالها وحريم حمويني ياكلون مع عيالهم انا اتم يومين عادي من غير اكل واذا كلمت زوجي وكلمها تعطيني جملتها الشهيره والله حريم اول يموتون من الجوع ليما تجيب جاهل وتاكل معاه ياربي يعني اموت من الجوع الثلاجه مقفله وتطلع وما تعطي المفتاح واشدعوا اذا انفتحت فيها شي كل الاكل بغرفتها وبناتها عندهم ثلاجه بغرفهم ولا محتاجين شي من المطبخ
3- عشت على المطاعم ماعجبها حطت قفل على الباب ووزعت نسخ على كل الموجودين وانا لا عشان لا اطلب مطعم ناقشت زوجي وقالي خلاص اتعشى معاج الحمدالله تكرم علي صرت اكل وجبه وحده باليوم
4-يتدخلون بكل شي بحياتي لازم ما اروح سوق ولا اشتري الا بمزاجهم اذا صارت مناسبه لازم ما اكشخ
شريت راحت بالي اخذ فلوسي من زوجي واروح مع اهلي واشتري اللي ابيه ودايم عندي لبس جاهز لاي مناسبه فجاءه ما ادري عنها عشان ما اتوهق
4- زوجي كان يسمع كلام خواته بكل شي اول الايام صبرت وبالتفاهم معاه قدرت اغير طبعه لصالحي وما يهتم لكلامهم مثال بسيط عيد ميلادي كان بشهر العسل بدوله اوروبيه ما رضوا انه يشتري لي هديه بحجه اني عروس وعندى اغراضي جديده وشرالهم اهم هدايا وبعد جم يوم عيد ميلاد حماتي دق على سكرتيرته طرشت كيكه وكان يستأذنهم بالطلعه ووقتي كان كله بالفندق ويطلع اهو بروحه تحملت هالشي واذا سافر لاي مكان ما يكلمني يكلم بس خواته واذا يبي شي يقول لاخته واهي تقولي قدرت اغير هالطبع فيه فتره بس اذا بعدت عنه رد لعادته القديمه

5- زوجي واهله كلهم جذابين عااادي يجذب ويحلف وهالشي ما عرفته الا الحين
6- كذا مره اطيح على زوجي يكلم بنات بس يجذبني ويقولي تتوهمين ووحده من اللي كان له علاقه فيها كلمتني وقالت لي وايد كلام كله صج بس كل مره اسامح لانى احبه والحين طحت عليه يكلم وحده وعلاقته فيها قويه صار له اكثر من سنتين معاها خصوصا اني لقيت له اوراق يدفع مكالماتها ويمسك المصحف ويحلف انه ما يعرفها استغفر الله شسوي اجذب عيوني والسجل والاوراق واصدقه لهدرجه يحلف جذب الله العالم
وواااايد مواقف تجرح بقصد او من غير قصد من زوجي واهله وللحين ببالي مو قادره انسى مع انه اكثر من مره يقولي بعوضج بس زوجي كلام فقط
مشكلتي الاساسيه تنقسم قسمين ومتداخلين مع بعض الاولى زواج حماتي بسميها
(نون) من ولد خالي وعلاقت اهلي ببيت خالي رسميه بسبب خلاف قديم مرت خالي وبناتها قشر ويسون مشاكل
الحين حماتي تزوجت اي شي يصير لها يطبقونه علي طبعا بس بالشين لها وايد شغلات احسن منى بس ما يسون لي الا المشاكل
اذا طردوها طردوني زفوها زفوني حرشوا زوجها عليها نفس الشي يصير لي
سافرت حماتي مع زوجها ومرت خالي للعمره بعد ما طلعت من عدتها بوفاة خالي الله يرحمه
عصبت خالتي وكان لي سفره مع زوجي العمره كنسلوني وسافرت اهي مع زوجي
وانا تميت قاعده بالبيت

المشكله الثانيه انه زوجي عنده مشاكل مستحيل يصير حمل طبيعي الا حقن مجهري وما سوينا هالشي الا بعد سنتين من الزواج ومحد يدري بهالشي عشان مانبي احد يعاير فينا
سويت العمليه ومن اول محاوله الله رزقني بالحمل قررت خالتي انى اروح لاهلي لانه حماتي نون ما حملت وتغار
3 شهور وانا عند اهلي قطع المصروف ما يجيني ولا يكلمني ولا يرد علي ويسأل عن مواعيد انا حمل حقن مجهري لي ادويه خاصه ولا كأن زوجته حمال 3 شهور قضاها سفرااات من القهر اجهضت رجع يترجاني ويبجي واللي تامرين فيه حاضر عطاني مبلغ زين وسفرني سياحه وطبعا السفره محد يدري فيها من اهله وانا مايهمني اهم شي استانس وصج عوضني فيها عن كل شي سواه معاي بشهر العسل وكان رومنسي وطيب
بعدها رجعت بيت زوجي تميت 10 ايام والا مره جاني زوجي مثل المجنون يطق فيني من المغرب للساعه 12 يجي يطقني ويرجع لربعه بالديوانيه ويرد يكمل شغله بالطق يومها فصل علي كسر تلفوني عشان لا اتصل على اخواني وقفل على الغرفه وشنو السبب والله اخته قالت له انها سامعه ن حريم اني انا مسويه ريلي خروف
جا الفجر بدل ملابسه وطلع وقالي مو تنسين انزلي اطبخي والا اموتج نزلت لقيت خالتي وبناتها متجمعين ناطريني صار بينا شد بالكلام اخذت تلفون البيت واتصلت على اهلي ورحت والله يسامحها خالتي وبناتها ما خلت كلمه وسخه عني ما قالتها وانها تبي طلاقي بس بعد اسبوع جا زوجي يترجاني ارجع وافقوا اخواني بشرط يكون لي بيت بروحي او شقه منفصله عن اهله وافق زوجي وقال بس اصبروا علي على ما ابني اما صج بعد شهرين بنا زوجي تميت عند اهلي 4 شهور ورجعت علاقتي صارت رسميه انزل اتقهوى مع عمي وخالتي ربع ساعه واطلع شقتي بعدت عنهم نهائي المهم قررنا نبلش علاج وافقت شرط اذا حملت ما اقعد عند اهلي نهائي اتم بشقتي وافق زوجي سويت العمليه شهر 12 اللي طاف والحمدالله ربي رزقني بالحمل قال بيسافر جم يوم ويبني اروح لاهلي واذا رجع بياخذني رجع ورافض ياخذني بحجه اني اجهضت قبل ويبي راحتى صبرت شهر شهرين زهقت ماخذ راحته كل يوم يسوي لي مشكله والله اختى نون قالت انج انتي مسويه كذا وكذا بصراحه مليت من اسلوبه وطريقته بالتعامل معاي صرت اغلط عليه واهينه عادي عندي ما احترمه لاني اشوفه مو قد كلمته اذا تراضينا واتفقت معاه ارجع يقولي امي تقول ما ترجعين الا تسوين ربط قلت اوكي نروح للدكتوره سألها قالت له ما تحتاج واجهاضها الاول ما نزل بروحه وقف النبض واسبوع نطرنا ينزل وما نزل الا بحبوب فزوجتك ما تحتاج ربط اقتنع اتفقنا انى ارد نهايه الاسبوع شوي دق والله امي تقول اقعدي للشهر السادس انا بصراحه عصبت قلت له لو ماخذه امك احسن لي على الاقل ما تغير رايه كل شي والا انت زوج بالاسم فقط
وعلى فكره زوجي من شهر 11 ما جامعني بحجه انه يبي الحمل ومستحيل يصير طبيعي وبعد الحمل خايف اجهض ولا اشوف انه مشتاق او محتاج بالعكس احس انه مرتاح ويبي قعدتي عند اهلي اكثر
على فكره مره صار موقف بيني وبين حماتي نون انها تعايرني بان ولد خالي تزوجها اهي ولا تزوجني رديت عليها يومها قلت لها استحي انامرت اخوج واخذته قبل لا تتزوجين انتي وبعدين انا صغيره وولد خالي مطلق 3 مرات وانتى واصله 30 يعني انتو لايقين لى بعض وولد خالي مثل اخوي
الحين زوجي كل يوم يطلع لي بهوشه ويعايرني اخر مره يقولي انتي بنت ليل انتى مشتهيه نسيبي ما تستحين لما تهاوشت معاه واني ببلغ اخواني رد يجذني ويقول انا ما قلت هالكلام

بعد كل هذا زوجي طاااح من عيني ولا اعتبره ريال اكرهه وابي الطلاق بس اهو رااافض نهائي محتاره حيل اخاف اقول سوالف لاخاني تصير مصيبه واخاف اسكت يتمادون احترت
اليوم الظهر قدت ابجي عند امي وقلت كل اللي بخاطري انتي شنو تبين بس امري وكل شي يتنفذ بس تذكري انج حاامل

انهرت والله انهرت من زوجي خلاص فقدت الامل فيه كل يوم له راي لو اتعب عليه سنه عشان اغير طبع خالتي ترده لطبعه الخايس بكلمه ولا كاني سويت شي
والله ما بي شي ابي بس زوجي يحس فيني اكون يمه يساندني بحمالي ليمتى بتم بهالوضع


اسفه اخواني طولت عليكم بس وربي من حر مافيني ارجوكم مابي احد يتطنز على او يجرحنى برد ارجوكم
ويمكن كلامي ملخبط او ما وصلت فكرتي عدل على الاقل احصل دعوه طيبه

نصيحتي لا تطلبين الطلاق اطلبي فقط سكن مستقل بس تدرين ما شاء الله فيه بنات صابرات زوجتي تطلب مني الطلاق مع اني مسكنها بفيلا ملك وحدها مع طفلين والخادمة بس الدلع الزايد غلط والشدة الزايدة غلط

حرام تطلبين الطلاق

بس اهل ريلج واضح انهم موب سهلين وحقودين

حسبي الله ونعم الوكيل

__________________

حياة لا تحتمل ... ما شا الله قدرتك ع الصبر خرافية
تهون مشاكل اغلبنا امام هالنوعية من المشاكل الي تسبب امرااااااض
انا لو محلك قد لا احتمل
لكن انت اعلم بوضعك وتلمين بكل جوانب القصة
الله يكون بعونك

__________________


اللهم اعنا على ذكرك وشكرك وحسن عبادتك

حبيبتي هوني عليك أهم شيء البيبي اللي ببطنك

لأنه واضح بعوارك الأول أنك تتأثرين بشده

أختصار المشكله ...

أهل زوجك هم السبب إذا بعدتي عنهم راح ترتاحين

زوجك يحبك لكنه يتأثر بكلام أهله واااجد

وأحس عندك قدره على الأقناع حاولي فيه

لاتيأسي مع الدعاء ....

أزعلي لو إن شاء الله سنه لين مايتغير

أنسي مشاكلك أرتاحي عند أمك

أهتمي بصحتك وبصحة البيبي

والله إذا حسيتي بالأمومه راااح تحسين

أنك أقوى فيه ومو محتاجه أحد

الله يعينك أكثري من الأستغفار

والدعاء

الله يفرج همك


وبرزقك من حيث لاتحتسبين


ويكفيك ماهمك

قرار الطلاق انتي اللي تحددينه

وواقف على اشياء كثيره
انتي كم عمرك

كم عمر زوجك

مدة زواجكم

تعليمك تعليمه

هل انتي مستقله ماديا

يعني لو تطلقتي هل تقدرين توظفين

وهل فيك مميزات لو تطلقتي ممكن تتزوجين اذا انتي مفكره بالزواج

هل عندك مشكله بالزواج من متزوج مستقبلا لو تقدم لك وكان مهيا للتعدد

هل زوجك سئ بحيث ماتقدرين تستمرين معه

هل بيت اهلك مريح ويحنظنون المطلقه


انا بصراحه اشوف انسب حل

انك تطلبين سكن مستقل تماما مع مطبخه ولا تحتكين بحمولتك كثير

وخادمه تعينك

وحددي مصروف شهري من زوجك

واكثري من الدعاء والاستغفار

وبالنسبه لمشاكل زوجك حاولي تحثينه على الصلاة بالمسجد

وقربيه للدين ساعتها هو بنفسه رح يترك المنكرات اللي يسويها



اعانك الله

__________________
وقل حسبي الله عليه توكلت وهو رب العرش العظيم
اللهم عليك بمن سحرنا اللهم رد سحرهم عليهم وسلط جنهم عليهم وارنا فيهم عجائب قدرتك

اعانك الله اختي وفرج همك عاجلا غير اجل واتم الله حملك على الف خير وعافية وسلامة

وابعد عنك كيد اهل زوجك وجعله الله في نحورهم

بصراحة لا استطيع ان اقول لك حل لاني ولله الحمد اهل زوجي بمدينة ثانية ولا اعرف كيفية التعامل مع هذا النوع .

__________________

اوقفي لزوجك وقفة حازمة يا انك تصير رجال ولك كلمتك وتبعد عن الكذب واذكري له ايات واحاديث عن عقوبة الحلف بالكذب وخاصة عالقران عشان يخاف وتدريجيا يبطل,,,
يا اما انت بطريق وانا بطريق انت خليك عايش لامك وخواتك ,,,

وانتي اختي اكثري من الدعاء والاستغفار ورددي(اللهم سخر لي زوجي واجعله سكنا لي ,, وسخرني له واجعلني سكنا له ,, واجعل بيننا مودة ورحمة)