طلبت من زوجي نسافر يومين نغير الجو
حتى نكسر الروتين والفتور
قال خليني اشوف ظروفي.. بعدين وافق
وليته ما وافق

على اساس بنسافر بالسياره (برغبة منه)
وبنترك بنتي عند اهلي
ونحجز بفندق 5 نجوم


المهم
سافرنا
واول ماوصلنا بدأت المشاكل
لانه مايدل بالمدينه اللي رحنا لها
وهو بطبعه يعصب جدا وقت السواقه
وجلسنا نلف وندور وهو يسب ويلعن
ويدعي على المكان وعلى نفسه
وانا مسكني صداع عنيف منه.. لحد ماوصلنا


الفندق كان راقي جدا
اخذت دش.. طلبنا غداء وتغدينا
وهو نام شوي بحدود الساعة
وانا كنت رايقه لاني مصره انبسط هاليومين
بعدين قال لي بعد الغداء: وين تبين نروح؟
قلت له في المكان الفلاني حلو
ونصحته يسأل الريسيشن عن موقعه


وطلعت معه.. ونفس الحكايه
رجع يسب ويلعن ويصرخ وهو يسوق
ويدعي على نفسه لو رجع لهالمكان مره ثانيه
ويقول عن نفسه: انا وين والسفر وين
الخ الخ
وانا ساكته وماسكه جوالي ومطنشنه
او اذا قال: تنقص رجلي ولا اجي هنا
ابتسم واقول: اسم الله على رجلك
وبس


المهم خلصنا مشاويرنا
ورجعنا الفندق قبل العشاء
وجلس هو يشوف التلفزيون
وانا كنت اقرأ
بعدين سولفنا مع بعض شوي
وانا كنت امازحه وادلعه


لما جاء وقت النوم
انا لبست قميص جديد
وضبطت شعري وتعطرت
وضميته.. هو هنا دفني
انا ابتسمت وقلت ايش فيك
قام عصب وقال: انتي ماتحسين!
انا بشر مو ماكينه! من الصبح اسوق وتبين هالشي يصير الحين!!


انا سكت.. وغطيت راسي ونمت
ولما صحينا الصبح قلت له ابي اطلب فطور
قال: خلينا ننزل البوفيه احسن
قلت اوكي
نزلنا.. وليتنا مانزلنا
كان مبوز ووجهه متلخبط

وانا اخذ الخبز كان واقف وراي
مشيت وناداني.. يقول: ليه ماحطيتي لي خبز!
قلت له: ماشفتك ولاسمعتك
وحطيت له الخبز
وقلت بحزم: اطلب مني اللي تبي بوضوح وصوت مسموع

ورحت للطاوله اكل
وهو جاء
وانا للامانه ماقدرت اكل
ودمعت عيني
قال لي: ايش فيك؟
قلت: متضايقه.. لو سمحت تعامل معي بلطف
قال؛ وانتي لوسمحتي تعاملي معي بانسانيه
انا بشر وتصرفك امس بالليل مافي تقدير
قلت: انا ندمت جدا اني قربت منك امس.، حقك علي
وطلبت منه يترك النكد لاني انضغطت جدا منه


لما خلصنا رحنا نتسوق
شرينا كم غرض
بعدين جلسنا نتغدى بمطعم
وهو طول الوقت ينتقد الناس
اللي لابس كذا واللي عامله بشعرها كذا الخ
سواليفه جدا سخيفه.. او يقلب بجواله
انا هنا علقت على شايب وعجوز ماسكين بعض
وهو ضحك بعدين قال: ترى مالي بالرومانسيات
قلت له وانا اضحك: يؤ نسينا اول سنه،، كنت ابو الرومانسيه
بعدين قلت: حبيبي الصمت بحد ذاته وومانسيه.. بدل الكلام البذيء

والصدمه لما قال لي: انا اصلا جاي عشانك
قلت له: لنا احنا الاثنين.. حتى ننبسط انا وانت
قال: لا والله انا ما انبسط الا بديرتي.. انتي شوفي وين تبين الحين حتى اخذك ونخلص


طبعا السفره كلها كانت نكد
وانا مسكني صداع مزمن منه.. يومين زي السم
وما ارتحت الا لما وصلت بيت اهلي
لاني نزلت عندهم حتى انام مع بنتي وارجع بيتي بعد الظهر


انا حاسه باحباط وتعب ويأس
زوجي نكدي او بالاحرى يتعمد يكون نكدي
وانا هاينه علي نفسي
والمصيبه هو معتبر نفسه ماقصر لمجرد انه سمع كلامي وسافرنا


كانت سفره سوداء قسما بالله
ولا هي اول مره ينكد علي كذا
واذا عصب وصارت بينا مشكله قال: ماعمري سافرت معك وانبسطت


مع انه هو اللي يعمل امور تقهرني جداااا
هو اللي ينكد ويتعمد يستفزني
وانا استغرب اني مسكت نفسي هاليومين
يمكن لاني كنت استغفر كل شوي


قرفانه من نفسي ياجماعه
تعبانه ومتضايقه جدا

اختي انت مرة حساسه
زوجي فيه كثير من زوجك مثلا لما نسافر بالسيارة يتنرفز بس اطنش وخاصه اذا رحنا منطقه مايعرفها بس بعد جهاز القارمن سار اهدء شوي
و لما قالك انا ماجيت الا عشانك هذي كثير تكرر معاي بس مااخذها بحساسيه زيك بالعكس امدحه واشكره وينبسط
واذا فعلا ماجاء الا عشانك فهذا دليل انه يحبك ويبغاك تنبسطي

حتى لما كلم زوجي امه
جلس يسب بالمكان وزحمه الشوارع والسفر


انا تضايقت وانحرجت
وقلت له بعد ماقفل ليتك ماقلت كذا
لانها بتفكر انه مو مبسوط معي.. هالشي يحرجني

قال: لا ماعليك.. امي تعرف طبعي واني دايما اسب واشتم واكره الزحمه


المشكله يقولها بثقه وافتخار بنفسه
مبسوط ان لسانه زفر
ويقول: انا اسلوبي اسلوبي شيبان
يحسب الرجوله بالبذاءه واللعن

يا الله ايش كثر احتقرته في هاليومين

فضفضي بعد
حلو مسكتي نفسك
يمكن فعلا يكره السياره ويتنرفز وكان سوء تقدير منه هالقرار
اختي اذا المشاكل بس بالسفر بلاه هالسفر روحي بعد اذنه مع اهلك لاي مكان تبغي
لا تعاتبيه ولا تناقشي معاه موضوع عالسفره
تدرين لو مكانك اسوي شي غير متوقع
جيبي له هديه وقولي حبيبي هذا عشان سفرتني وانبسطنا فاجئيه وشغلي كيد النسا شوي

لا والله انا مو حساسه ولاشي
اقول لك دفني من السرير بعنف
وانا تعوذت من ابليس ونمت
وثاني يوم رفع صوته علي بالبوفيه
وانا برضو حاولت امسك اعصابي

الظاهر لو سفرتنا اسبوع كان شوي ويضربني
نكد علي جدا جدا وكان منفس لأبعد حد
خساره الوقت والفلوس اللي ضاعت
لو اني شاريه فيها شي او مغيره طقم السفره كان احسن لي

زوجي لما كنا في بريطانيا؛ اذا تمشينا كان اوك ممتاز

جينا هنا ..
كرهني باي سفريات

طولي بالك .. و هو كذا ..

الحل انك تقتنعي ( انه هو كذا )
عامليه كأنه ( طفل )

بترتاحي ^^

السب واللعن والشتم .. هذه أمور ينكرها كل قلب سليم

وإنتي لا تلامي أبدا لكرهك لهذه التصرفات

وعلى الزوج مراجعة نفسه على هذا الوضع

ولكن

كوني له كأمه من حيث الرحمة به

أرحمي حاله وأعلمي بأنه في طريق ممتليء بشوك

أرحميه

وذلك بنصيحة طيبة كل فترة على ذنب الشتم واللعن والتريقة على الخلق

وأستمري على النصيحة وأعلمي أن كثرة الأمر بالمعروف والنهي عن المنكر سوف تغير الحال .. ولكن أهم شيء بالحكمة والموعظة الحسنة

مثال:

عندما يكون رايق .. سلمي على خده وقولي له يا فلان اللعن والشتم أخاف يبعدك عن رحمة الله .. يا فلان إنت كامل وينقصك ترك مثل هذا الكلام .. يا فلان الجنة غالية فلا تبيعها بالمنكر من الكلام

حياتك يجب أن تكون لله حتى يكون للنصيحة أثر كبير في نفس الزوج

وسامحينا على كثرة الكلام

حبيبتي كنافة انت دائما في عقلي خاصة بعد ما تشاجرت مع زوجي لان طباعه مثل طباع زوجك
اعتقد والله اعلم زوجك يعاني ضعف جنسي وهذا لي مخليه معصب طول الوقت
ولا يريد ان يعترف امامك من اجل رجولته
فمجرد انه خرج معك حب ينكد عليك عشان ما تقتربي منه ابدا ولما اقتربت صدك
لو واحد طبيعي في فندق خمس نجوم وانت لابسة ماكان استعمل هذه الطريقة كان اعتذر بطريقة اخرى واجلها لوقت لاحق

اختي لو انك تجربي تتذمري من الاشياء والاماكن بطريقة لبقة قبله ممكن انه يحس بالشئ لي يعمله
ممكن ان امه كانت تضحك عندما يعمل هذه الحركات لهذا اتصل فيها لكي تفتخر به كالعادة
لو كانت امه تتذمر من تصرفاته وتنهاه عنها ما كان اتصل بها وخبرها لانه سوف يستقبل النقد منها

مع هذا الرد بارك الله فيك اختي ريتاج ردك مقنع
اخت كنافة زوجك يحبك ولا يرفض لك طلب ومنها طلبك للسفر لاكن احتمال يعاني من ضعف جنسي او حالة نفسية تجعله يتصرف هكذا ليغطي على نفسه اسال الله ان يسخر لك زوجك ويهديه ولا تيأسي من رحمة الله

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه