السلام عليكم

اممم اللي عندي مو مصيبه ولا مشكله بس اذا تجاهلتها رح تصير مشاكل ..


اولا اعطيكم نبذه عني وعن شخصيتي ..

هادئه ، متعلقه بعائلتي ، علاقاتي الاجتماعيه محدوده "بنظري اذا اهلي عندي ماني بحاجه لاحد ثاني"
منظمه ، واضحه ، احب اسوي كل شغله لحالها واخطط لها تمام ، احب الروتين ، بطيئه بحركتي لكن منجزه ، اهتم بتعليمي ومتفوقه ، عقلانيه وغير عاطفيه ، حذره وما اصدق اي شي ، طيبه ، وفيه


خطيبي ..

اجتماعي جدا جدا اذا ما خرج من البيت ينخنق ، يحب عائلته وامه خصوصا ، يسوي اكثر من شغله بنفس الوقت ، طييييب ، فكاهي ، يحب يساعد غيره ويطق الصدر ويعرض خدماته "بعض الاحيان مايقدر ينفذ وعوده" ، يحب يتباهى بنفسه بشكل غير مباشر يعني يلفت النظر الى سعر الشي الفلاني او انه ما يروح الى لافضل الاماكن ، نوعا ما عاطفي او يتهيا لي "للان ماعرفت هل هو فعلا عاطفي او مجرد تمثيل "



لنا شهرين مملكين وخلال هالشهرين بالصدفه اكتشفت ان عنده حساب في احدى شبكات التواصل الاجتماعي .. شي طبيعي بس اللي قهرني انه يسولف ويرد على بنات عادي وكلام من ( يالغاليه ، ابشري ، لبيه ...) وبعضها مجرد سوالف و ضحك ، ماله علاقه مع وحده بذاتها بس مطيح الميانه مع الكل

طبعا سكت وماتكلمت قلت يمكن بعدين لما اسولف معاه ينسى ويبطل وقلت فرصه اراقبه واشوف ابش يقول و صرت ارسل له رسايل تحذير عن هالاشياء وفتحت له السالفه بشكل غير مباشر وقلت صديقتي زوجها سوا كذا وكذا قال قولي لها اللي يسوي زوجها مجرد استهبال و "طقطقه"

بعد كلامه ذا حسيته مستهين في الموضوع ومو شايفه شي كبير طبعا النتيجه اني طول هالفتره مقهوره
منه ومو قادره اقول له كلمه حلوه وكل ما اتصل احس مالي نفس اتفاعل معاه وفي بالي اقول هذا مستهتر فيني وبوجودي في حياته وفي يوم اتصل ولاحظ صوتي متغير وقال ليش متضايقه و واجهته بكل هدوء وقلت له عن كل شي حاول يبرر ويقسم قلت له لا تبرر ولاشي ابيك تحط حدود في تعاملك
وقال لا تزعلين قلت تبيني اكذب عليك واقول مو زعلانه الا زعلانه ارتبك واتوتر وقام يقول انه شاريني
ومن هالكلام ونهايه كلامه اسمع غصه بكى !
قال دمعه الرجال ما تنزل على اي شي بس احس اني مقهور وما ابي صورتي تتغير قدامك ،

انا تفاجأت يبكي ! رجعت قلت له انا اسفه مو قصدي اقهرك او ازعلك ولا افتعلت مشكله من لا شي ومازعلت الا عشان هالشي زعلني وبعدين صورتك مثل ماهي ماتغيرت "حاولت ارقع الموضوع"

وشوي رجعنا نسولف عادي ونسينا الموضوع بس من يومها وانا ما اصدق اي كلمه يقولها
حتى لما بكى قلت اكيد دموع تماسيح !! مدري انا طبعي شكاكه وبتصرفه ذاك واستهتاره فيني خلاه يفقد مصداقيته بنظري !


انا عادي عندي مايكون في عواطف في الزواج اذا الاحترام موجود يكفيني ابي زوج يكون اب لي
مو زوج انا انتبه له كانه طفل صغير ، لا اخفيكم انا نوعا ما اتكاليه بس اذا انحطيت بموقف اشيل كل شي واسويه بنفسي من و الى ، ولا حظت انه اتكالي مدري اسميها اتكاليه ولا كرم !!
بقول لكم الموقف ، قال لي انا بعطيك راتبي ودخلي وانتي تصرفي فيه بكيفك اعطيني مصروفي والباقي وزعيه ع البيت ولا اي شي << حسيته يبي يرمي المسؤوليه علي !

بدايه الملكه كان مندفع بالرسايل والكلام وانا كنت شوي اقل منه بالكلام لاني خجوله و ما اقدر اقول شي الا لما اكون مقتنعه فيه صعب اجامل ومع الوقت صرت اجامل وصار هو مو مندفع بالكلام مثل اول

ولما بحثت في انماط البوصله الشخصيه طلعت شخصيتي "شرقيه" وشخصيته "جنوبي غربي"
كيف اتعامل معاه ؟ بالقوه ولا اللين ؟ الكلام المعسول واقابله طول الوقت ولا الثقل ؟
اكون قويه وحاسمه ولا رقيقه وخجوله ؟

بما انك عرفتي البوصلة الشخصيه خلاص اقري عنه اكثر واكثر
وانتي حاولي تعطينه ثقه ولا تنبشين من وراه
الله يسخره لك ويبعده عن الحرام يارب
لا تنفرينه منك حاولي تعطينه فرصه
مافيه احد كامل بهالدنيا
*

قريت وللان مالقيت موضوع واضح اغلبها زوجات يتكلمون من منظورهم الخاص ابي كلام موثق
انا لما عرفت ما نبشت وراه بالصدفه طلعت لي هالاشياء
امين يارب انا ماكتبت هنا الا لاني ابي طرق تقربني منه اكثر افهمه اكثر ابي اسعد نفسي واسعده
لاني بعيش معاه عمر مو يوم ولا يومين
صح والبحث عن الكمال نقصان

ً



لاتبخلو علي بنصيحه ارجوكم ..

اكتبي البوصله الشخصيه لناعمة الهاشمي
انتي راح تتقربين منه اذا نسيتي هالشي
بس نصيحه لاتنبشين وراه وفي هالشب مو ع طول تصارحينه
الله يبعده عن الحرام يارب

ماادري بس احس ان زوجك عاطفي زياده ودموعه ماهي دموع تماسيح بالعكس شكلها صادقه واحس من كلامك انه من قوة عاطفته يبيك انت تكونين المسيطر يعني تبادل ادوار
يمكن العاطفه الزايده سببها قربه لامه واشوفه احسن رجل تقدر تتعامل معاه الانثى وتراه بيحبك وبيخلصلك ان شاء الله بس عطيه فرصته ومن ناحية انه يتكلم مع بنات في مواقع تواصل وكلامهم اشوفه عادي يعني ماتتطرق لغزل ولا ترقيم وتعارف
اشوفه عادي والمواقع هذي تواصل اجتماعي يعني من هب ودب ومو معقوله شاب اعزب يلقى وحده على النت ولايتكلم معاها يعني تخيلي كل ماحصلت وحده في النت ماارد عليها فكري بعقلك

الله يوفقك ويسعد قلبك ويهنيك فيه

هادئه ، متعلقه بعائلتي ، علاقاتي الاجتماعيه محدوده "بنظري اذا اهلي عندي ماني بحاجه لاحد ثاني".
انا عادي عندي مايكون في عواطف في الزواج اذا الاحترام موجود يكفيني ابي زوج يكون اب لي
مو زوج انا انتبه له كانه طفل صغير.

تصوري أختي أن خطيبك قرأ هذه الكلمات.
ماذا تكون ردة فعلك.

بما ان نمطي زي زوجك غربية جنوبية او جنوبية غربية مكس الاثنين
لاتراقبينة ، احترمية ، انتبهي تنتقدينة ، او توجهينة لشيء بالنسبة لي ينرفزني هالشي ماادري عن غيري صفاته والاشياء الي يحبها مو شرط انتي تحبينها وتعجبك
الغربي فوضوي ومبدع واجتماعي ومرح يدلع نفسة ويشتري غالي ويهتم بمظهرة كسووووول مايحب الروتين يحب السفر والطلعات
الجنوبي حساس حنون عاطفي ينجرح بسرعة غير منجز اتوقع او ياخذ كم شغلة ممكن ماينهي شغلة (هذي مرة مأزمتني )*

تغزلي فية واهتممي فية بصدق عززي لة دايم عطية دفعات معنوية يمكن كسول ويأجل كثير ويواعد ويخلف ترا مو قصدة من الزحممممة اللي براسة صدقيني ..
غريبة يقولك ابعطيك الراتب !! بالنسبة لي احب كل شي بيدي ومستحيل اعطي احد راتبي واقول دبرني اتوقع والله اعلم انه كرم ومن باب المحبة وكذا مو اتكال
الله يعينك اختلاف كلي انتي تحبين النظام والروتين ومو اجتماعية ماتحبيمن الطلعات والسفر هو العكس تماماً تقبيلية بكل اللي فية اغلب اللي اعرفهم ازواجهم عكس يمكن فيه صعوبة بالبداية بس بعدين بتمشي اموركم


*وبالنسبة البرامج الاجتماعية من فيه بالوقت الحالي مايدخل وشي طبيعي بيرد على بنات ترا ماطلع معهم ولاشافهم ولارح يوصلهم مجرد كلام واذا يخاف الله وعندة رادع ديني لاتخافين

موفقة يارب
*

امم أختي أنا أشوف ان في زوجك مواصفات جميله جدآ،،

لكن مشكلتك تبينه مثل مانتي تبغين وراسمه في بالك.. وهذا اشوفه غلط (تعاملي معه مثل ماهو ،،مو مثل ماأنتي تبينه)

وهنا يجي دور التعااايش،،واستخدام ذكائك بالتعامل معه فتعززين الشي الزين فيه والي مو عاجبك تقدرين تغيرنه بالحلم والصبر والحكمه بالتعامل(مافيه أحد كامل)

على فكره من اطلاعي على شخصية الجنوبي هو من أروع الشخصيات( كأزواج) أذا احسنت الزوجه فهمه وأحتوائه..

بخصوص موضوع الراتب أنا ماأشوف انها اتكاليه،، بقدر ماهو يبغى يبين لك أنه حريص انك تشاركينه ومايستلم زمام الأمور لحاله كنوع من الديمقراطيه..

الله يسعدك،،