كيفكم يا أمهات
رجعتونا لكم سنة ورى وحقيقة كانت فترة من أمتع الفترات في حياتي ..
راح ادخل مباشرة وخلونا من المقدمات 
فترة ما بعد الولادة :
1- استمتعي عزيزتي الأم بطفلك وحركاته وابتعدي عن المبالغة في المشاعر والاهتمام (المنفر) والخوف المبالغ فيه , وتذكري ان طفلك كائن حي يقدر يعبر عن مشاعره ولو ما كان يتكلم , ومع الأيام راح تميزي بين بكاءه لما هو تعبان ولما يكون موجوع (لاسمح الله ) ولما يكون مرتاح , المهم انك تكوني أنت مرتاحة علشان تنعكس نفسيتك على طفلك ..
وصدقوني يا أمهات ما تتخيلون كيف الطفل يتأثر بأمه :
بالنسبة لي في فترة نفاسي كنت هادئة جدا , ولكن أصابني رعب شديد , يمكن سببه تخلي والد ابنتي عني في اشد حالات احتياجي لان الطلاق وقع قبل الولادة بأسبوعين , المهم بنتي اصابها نفس الرعب , لدرجة كنت اخاف أنام لحالي ( وانا طبيعتي مو خوافة الحمدلله ) كانت بنتي تتنفس تنفس الخائف , أول ما أدخل غرفة أمي أسكن وأهدأ أنا فتسكن هي مباشرة وتنام نوم عميق ولماأنام بغرفتي ترجع لها حالة الخوف لاني انا نفسي اكون خايفة ,,
فابتعدوا يا أمهات عن النرفزة والعصبية والخوف قد ما تقدرون , وخلوها فترة راحة من قلب , ولما تحسين بشي مريب في الطفل اسألي مباشرة أهل الخبرة من أم أو أخت أو جارة عزيزة ..
عن نفسي شفت بعض قريباتي قضوا فترة النفاس خوف على اولادهم بشكل مبالغ فيه وما يسمحون لاحد يلمسه ووو الخ وكلها نكد بنكد , وسبحان الله أولادهم نكديين وبكائين بشكل ينفر الكبار منهم ..
2- بالنسبة لطريقة الاستحمام فأنا طريقتي كانت كالآتي علمتني اياها أختي جزاها الله خير ..
أول شي يا حبيباتي مري على بيبي شوب أو أي محل أطفال واشتري هذا السرير الحلو
حطي فيه كل مستلزمات البيبي من شامبو البودرة الطبية اللي تنحط ( لسرة الطفل ) والبامبروز وووو الخ , طبعا هذا السرير ينحط في الحمام , وكنت أولا أخلي بنتي بملابسها وما أعريها تماما , أجيب الشامبو وأغسل راسها أولا بنفس هذه الطريقة :
وانتبهي بشدة لاذن الطفل يا غاليتي انج تسدينها وما تخلين الماي يدخل فيها , والافضل يكون معك أحد يساعدك في الحمام , اول ما انتهي من الرأس على طول انشفه واغطيه بالقبعة الخاصة ..
وبعد هذا اعري جسمها وأغسلها بشوية صابون وأنقلها مباشرة على السرير اللي في الحمام والبسها ملابسها كاملة ضمن درجة حرارة الحمام , طبعا الماي يكون دافي مو حار ولا بارد ..
أنا ولدت في الشتاء فكنت اراعي اني اشغل الدفاية في الغرفة شوي واول ما اطلع اطفيها , طبعا اول ما اطلع تكون جاعت فتجهزي مباشرة للرضاعة لانك بتسمعي بكاء عالي مجلجل 
(بكاء الجوع 
)
طبعا احرصوا يا امهات كثير على توقيت الولادة ..
انا ولدت في عز الشتاء وكان برررررررررد فكنت احرص كثير على تدفئة بنتي بعد الحمام وفي اوقات ثانية, ومع الاسف اهملت نفسي شوي وتضررت من هالناحية , راح اتكلم بعدين عن هالنقاط ..
3 - بالنسبة للصابون أنصحك مو كل يوم تهري ابنك صابون وكريمات وووو الخ , لاتنسي بالنهاية ان هذه أشياء تركيبتها كيميائية , غير ان الطفل أصلا نظيف ( حبايب قلبي ) وأحيانا ما يبيلهم الا شي بسيط ويسير , أنا حقيقة لليوم بنتي مو كل ما حممتها حطيت لها شامبو ..
أفضل نوعية طبية وغالية mustela
ارتحت عليه كثير ونصحني به الصيدلي ..
3- سرة الطفل : لا تعبثي فيها كثير , ويفضل بعد الولادة تسألي الممرضة كيف تعتني فيها , ولكن عن نفسي كنت احرص على تنشيفها بالفوطة واحيانا قطن اذان , واشتريت بودرة خاصة لسرة الطفل ( اسالي الصيدلي ) اول ما احمم البنت انشفها ثم ارشها بالبودر والحمدلله طاحت سرتها من نفسها , واذا لاحظتي شي على سرة الطفل اسألي الامهات الخبيرات , لان في بعض الحالات تحتاج تدخل طبيب , فاهتمي من هالناحية ..
انا عن نفسي كنت اثق باختي وكانت تقولي اذا في الشي اللي اسال عنه مشكلة ولا لا , لانها من النوع اللي تهتم بالطفل , المقصد اني ما كنت اركض بالبنت على المستشفى الا وانا متاكدة ان فعلا الموضوع يحتاج طبيب ...
4- بالنسبة للتغيير اليومي للبامبرز, انا عن نفسي كنت افضل اغسل بنتي بالماء فقط , في امهات يفضلون فوطة وماء ولكن عني ما احب الا اغسلها تحت المغسلة , طبعا ما أعريها بس اشيل البامبرز وملابسها من الأسفل ..
وانتبهوا ثم انتبهوا ثم انتبهوا تعتمدوا على الكلينكس المعطر الجاهز في الاسواق , اما بالماء فو فوطة وماء فقط ..
وهذا خلوه للاوقات الحرجة فقط ..
اممممممممم لما اتذكر شي برجع لكم ان شاء الله
وأتمنى الامهات يتبادلون الاسئلة لان الاسئلة تحفز الذاكرة
28-03-2013, 03:56 PM
نصيحة منك لام اول مرة
ضوابط المشاركة
العرض العادي
