أخواني وأخواتي
بما أنكم كنتم معي في موضوع زواج ابني
حبيت أخبركم بالمستجدات..

بعد أن طال الموضوع وطال التفكير
وكان لابد من الحسم ووضع النقاط على الحروف..

استخرت وتوكلت على رب العالمين..

أخذنا وزوجي إجازة من العمل ليوم واحد..
وفي ليلتها اتصلت بزوجة ابني أحمد وأخبرتها بأن تعد الإفطار صباحا لأننا سنفطر عندها..

أصبحنا وأصبح الملك لله..
بعد أذ ذهب الجميع إلى دواماتهم..
نزلنا إلى زوجة ابني ..
أفطرنا واحتسينا الشاي..

ثم بدأنا معها الحديث كالتالي:

طلبت منها أن تكون بقربنا وتحديدا
أخذتها بيننا أنا وزوجي..

بدأ زوجي بالحديث معها وقال لها ياندى
أنت بنتنا وأحمد ابننا ووالله أنا وخالتك
جايينك اليوم نتكلم معك بالموضوع
والرأي لك..

كلمتها عن الإبتلاء والصبر ووو.......الخ
فشهقت شهقة كبيرة ورفعت صوتها
وقالت يعني خلاص إنتو وافقتو؟؟
لو كنت بنتكم من لحمكم ودمكم ووو.....الخ بيكون لكم موقف ثاني..

طلبت منها الهدوء وأن تخفض صوتها.. لكنها استمرت..

فقال لها زوجي والله ثم والله ياندى اللي نقوله لك هو اللي نقوله لبنتنا لو كانت بمكانك..

هنا غضبت وخرجت عن طورها وقالت له أنت كذاب أنت رجل مثل ولدك أناني ولا همك غير مصلحة ابنك!!

زوجي انفعل جدا ووقف ليضربها ولما حاولت منعه ،،جات الضربة بظهرها وليس على وجهها.. والحمد لله..ربنا لطف وستر..

صرت أنا أصرخ بينهم وأقول يكفي خلاص..
وإنت ياندى استحي على وجهك هذا عمك حسبة أبوك اللي سويتيه عيب ماينسكت عليه ..

هنا هدأت وراجعت نفسها وقامت سلمت على راس زوجي واعتذرت ولكنه ماقبل اعتذارها فانحنت تقبل قدميه لكنه رفعها وماخلاها تقبل قدمه ،،حضنها وقبلها وقال لها إنت بنتنا سواءا صدقتي أو ماصدقتي..

المهم زوجي سامحها ورفض يجلس يكمل الحوار الضغط عنده ارتفع وصعد البيت ونام..

انفردنا لوحدنا وهي تبكي بصمت وأنين..

فتلوت عليها الآية الكريمة(ألا يعلم من خلق وهو اللطيف الخبير)

وقلت لها الله اللي خلقنا هو أعلم بما يصلح لنا ومالا يصلح لنا.. هو أعلم بمانطيقه ومالا نستطيع أن نطيقه ونتحمله،، والخالق هو من شرع التعدد.. هل يحق لنا أن نعارض الشرع؟ ولا نتضارب مع ربنا نقول له ليش شرعت التعدد؟؟

طبعا لا هذا يصير ياندى ولا ذاك..

ثم أردفت أمهات المؤمنين عدد زوجهن الحبيب المصطفى عليه الصلاة والسلام..

زوجاته قبلن مع أنهن أشرف وأطهر نساء الأرض ولم يعترضن..
هل نحن أفضل من زوجات الرسول لنعترض؟؟

التعدد لا يعني نقص في الزوجة الأولى.. إنما هي حاجة أو رغبة لدى الزوج...

ثم قلت لها أنا وعمك تكلمنا معك أنت قبل زوجك ألا يمثل لك شيء؟؟؟

فبكت بحرقة وقالت انتوا خلاص وافقتوا.. ولو ماوافقتوا مايتزوج أحمد..

قلت لها تأكدي وثقي تماما زواج أحمد مو متوقف على موافقتنا... وهذا حال أي رجل..ليس أحمد فحسب..

ولو عمك قرر يتزوج الثانية وش طالع بإيدي؟؟

قلت لها يابنتي ادعي والدعاء هو اللي يغير القدر..

لا أنا ولا أنت ولا عمك طالع بإيدنا شي..

المهم إني حاولت ما استطعت أهديها وأمتص غضبها وأعطيها جرعات ثقة بنفسها .

نجي للشق الآخر ابننا أحمد المصون..

ناديته وتكلمت معه..
قلت له يا أحمد هل أنت مازلت على رغبتك في الزواج الثاني؟
فأجاب إن رضيتي.

قلت له ليش إنت إلى الآن مصر تتغابى وتمثل دور إنك مو فاهم رأيي ولا موقفي من الموضوع؟
صمت ولم يرد.

قلت له ليش هالبنت بالذات..؟؟
حلف وأقسم بأنه ماكان الزواج في خاطره أساسا والبنت أصلا مو فاكرها ولا خطرت بباله.. ولا عمره فكر فيها ..قال يوم شفتها بالصدفة دخلت قلبي.. قلت بيني وبين نفسي عيلة طيبة وبنت طيبة والتعدد جايز ليش لا ماأتوكل على الله..

وقال الزواج الثاني أصلا مو ببالي .. اصراري عليها لسبب واحد ناس مضمونين في الطيبة..
من وين لي أضمن ناس طيبة وبنت طيبة وزينة..

قلت له فكرت زين وهذا قرارك؟؟
قال نعم

قلت له توكلنا على الله..

بخيرك بين خيارين إذا تحب رأيي..
قال أكيد يهمني رايك.

الخيار الأول تأجل الخطبة والزواج لين تنتهي من الدكتوراة (سنة تقريبا)

وإذا إنت مستعجل مرة لك الخيار الثاني تخطبها الحين..لكن الملكة والزواج بعد الدكتوراة..

وأنا رغبتي الخيار الأول..
وإنت فكر رتب أمورك وخبرني برأيك.
أي قرار تتخذه تأكد تماما من قرارك قبل تبلغني به.

نزل ابني من عندي.. وقامت حرب طاحنة بينه وبين زوجته لأن الحرمة حاطة أغراضها بشنط وتبي تترك البيت تروح لأهلها..

لأول مرة ترتفع الأصوات ويطول اللسان ويقل الإحترام في بيتنا..

بكاء ونحيب وصراخ وعويل والفلم أكيد إنتو متخيلينه...

نزلنا أنا وزوجي على الأصوات.. حاولنا تهدئة الأوضاع لكن ندى كانت خارج التغطية تماما.. وتتكلم وتتصرف كالمجنونة..

جاب ابني زمزم وأجلسها بحضنه بالدرج وصار يغسل وجهها بماء زمزم ويقرأ عليها قرآن حتى هدأت واستكانت..

بعد أن هدأت وارتاحت قلت لها ياحبيبة ياغالية تتركين البيت تروحين لأهلك الخيار لك ووالله ماحد منا يمنعك روحي ارتاحي يومين ثلاثة أسبوع... لكن لا تطولين ..

وإذا تبين رأيي اجلسي بملحق الضيوف إذا ماتبين بيتك.. الصغار من يوديهم المدرسة عند أهلك مانبي نحملهم مسؤوليتهم وطلباتهم..

اختارت تذهب لأهلها.. ولكن طلبتنا ألا يعلم أهلها بشيء حاليا..

بعد هذا الفلم قلت لأحمد أبشر بالخير أول الغيث قطرة.. طبعا هو فهم المقصود..

آمل من الإخوة والأخوات مايضطروا المشرفة لغلق الموضوع

ليه وافقتي واعطيتيه الموافقه...
لو صممتي ع موقفك بعد فتره ينساها دام هو قالك ماراح اتزوج الا برضاك ..
اخوي كان مصمم يتزوج الثانيه لدرجة جلس يدور بين الخطابات وماكان عندنا خبر
الوالد وقف بوجهه وقاله لو تزوجت 2 انا متبري منك لان الوالد كان همه الاول عيال اخوي لايضيعون في حال زواجه الثاني زوجته تتركه وهو بيروح مع الثانيه واللي بيضيع الاولاد المهم والمختصر الحمدلله بطل من حكاية الزوجه الثانيه واللحين لهم قرابة السنه وحياتهم صارت احسن من اول
عادي كثير شافوا حريم من نظره وتعلقوا فيهم ومع الايام هالشي يتنسى...
الله يعين زوجة ولدك
انا معها انو لو انها بنتكم ماوافقتو لاتزعلي من كلامي🙈

__________________
(سيدة الموقف)
لم ننساك ونسأل الله ان تكوني أنتي وأولادك بخير

الله يصبرها و لا تتم الزواجة
و ترزق البنت بزوج صالح. عشان لا يقولوا قطعنا رزقها
😁.......................

__________________

موقف صعب
وحسيت بالم زوجه ابنك
ماكان بودي تتدخلوا ابدا
ولا نزلتو لها وكلمتوها
واكتفيتي بان قلتي لها هذا امر بينك وبين زوجك
واحنا ماودنا لكن ان اصر ما بيد الحيله يا بنتي
لكن هي حست انهم اتفقتوا وطبختوها سوى
خليه يعيش الصراع الان ويعيش الوضع كامل
وانتي لا تتدخلي
الي اذا حل هو كافه اموره
الله يعينكم ويعين زوجه ابنك
بس عندي سؤال
هل انتي متاكده انه اذا خطب بيوافقون عليه

أختي أم نونا
ابني وأعرفه عنيييييد لدرجة فظيعة
لو أستخدمت أسلوب القوة معه بيصر أكثر
عشان كدة أنا لينة معه أحاول أسايسه
والله يكنب الخير للجميع

والله يامبتعثة الموقف صععععب
لو ماتدخلنا اليوم بنضطر نتدخل بكرة
والبنت لجأتلي وما كلمت أمها فكيف أخذلها وأتركها

مو لازم تستخدمي أسلوب العنف
و القوة.
اسكتي عن الأمر. و ما تعطي الموضوع الموافقة باردة مبردة بكل بساطة
قتلتوا قلب الحرمة بصراحة

ليش كذا

طيب لما لم تكلمي ابنك عن الابتلاء و الصبر
و لما يقول. من وين احصل بنت طيبة
ليش اللي عنده مو طيبة و تكفي

الله يهديكم.

__________________

استغربت شي ،، ليش ماتركتي المجال لابنك هو اللي يخبرها وتخليه يتحمل مسؤلية قراره؟ عشان تكونو انتوا الطرف
المحايد بالتالي افضل لكم مستقبلا ؟ وعشان يتأكد ابنك من ثقته بقراره اللي اتخذه ويثبت جديته من عدمها ...

بالنسبة لي اخذك لخطوة انتي وزوجك كانت من المفترض تكون من زوجها خصوصا بعد توصياتك ونصحك لها بعده امور من ناحية الزوجية واخبارك لها بان تجتهد في رضا زوجها لثنيه عن هالامر كان خاطئ ! وردة فعلها وكلامها لكم طبيعية جدا ! لانك بالبداية ابديتي لها رغبتك بالمساعدة والمساندة وبعدها خلفتي بالامر ،،،،

عموما ،، كما قلتي اول الغيث قطرة والله يعينكم جميعا ... اهم ما بالامر عدم تاثر الاطفال ويكونوا ضحايا من اصرار الاب والام كلن على رايه ...

اتركوها براحتها ببيت اهلها تهدأ شوي ولايتركها زوجها بل يبين لها غلاتها عنده وتمسكه فيها هالشي بيهون عليها هالامر ...

معليش ام دان
ترا كثير عندنا امهات مايتدخلوا بزواجات ابنائهم الثانيه والبعض حتى مايحضر معاه للخطبه ولا للزواج
خالتي ام ابو عيالي ماحضرت ولا وافقت ع زواجات ولدها هو راح خطب بنفسه وتزوج بنفسه...
عندنا قاعده اللي ماارضاه لنفسي ماارضاه ع غيري ..
ليتك خرجتي منها دام زوجة ولدك مو مقصره وحابته وحابتكم وماشفتو منها لا انتو ولا ولدكم الا كل خير...

__________________
(سيدة الموقف)
لم ننساك ونسأل الله ان تكوني أنتي وأولادك بخير