السلام عليكم ورحمة الله وبركاته

مشكلتي اني اشعر بأني جافة جداً مع زوجي

انا ملكت من فترة طويلة وزواجي ماباقي عليه الا كم شهر فتره بسيطة جداً والى هذا اليوم وانا مااقوله حبيبي وعمري و....
واهو يقولي حياتي , وحبيبتي و ... ويقولي كلام حلو .
بس انا!! .. لاحياة لمن تنادي .. كل مرة يكلمني فيها اقول في نفسي الحين بقوله كلمة حلوة وبس اتكلم واقول ( الو) انسى كل اللي كنت بقوله ...
وزوجي سافر اسبوعين ورجع, وكل مرة كان يكلمني فيها اكون بموووووووت من الشوق واللهفه عليه ولما يكلمني اقول في نفسي الحين بقوله " احبك" او اي كلمة حلوة تحسسه بحبي له ولكن !!! لما اسمع صوته انسى كل الكلام اللي بقوله لا والقهر انه احيانا اصير باردة جــــــــداً يعني حتى اهو يجي على باله اني مشغوله او عندي شي عشان كذا مااكلمه مثل الناس مع اني اكون مشتاقه له موت ولكن مشكلتي جافه بالتعبير او بمعنى اصح مايطلع الكلام اللي بقلبي لما اكلمه واتضااااااايق لانه احس انه مشاعري مكبوته وانا احبه موت وودي اوضح له هالشي بس صعبببب .....
شسوي هذا حالي من 10 شهور تقريبا معقوله ؟ 10 شهور وللحين مااقدر اقوله احبك؟؟؟
10 شهور وزواجي خلاص قرب وانا مااقدر اقوله عن مشاعري !!
عطوني حل
كل مرة يكلمني فيها يقولي ماودك تقولي لي شي ؟
ومرات يقولي يعني اسكر وانا ماسمعت منك شي !!
وانا اقوله ايه صح تصبح على خير ..----< على بالي خفيفه دم والله اموت قهر
مرات اقول في نفسي لو انا مكانه انتحرت,,
بس شسوي انا تعودت على كذا ,, ودي يكون لساني سهل بالكلمات الحلوة لانه احس انه ابتدأ كلامه الحلو شوي أقل مش مثل اول لانه ماصار يشوف ردة فعل مني مدري يمكن هو مرات يتعمد لانه وده يسمع مني كلام حلو


شسوي!!
عطوني حل الله يوفقكم!!

__________________

لاتظن القلب يا عمــــــــــري
نسيك
والذي سواك ما لحظة نساك
لا تقول الوقت قساني عليـــــك
كل ليلة تمر يكبر بي غـــــــلاك
ياغـــرام عاش مع روحي
شريــــــــك
في عروقــــــــي نبض سميته
هـــــــواك
..

حاولي .... ابدأي بأبسط الكلمااااات وتدرجي بعدها ...... حتى لو كان بالتلميح

مثلا :

اذا كانت صعبه عليج انج تقولين ..... اشتقتلك ...... قولي اشتقنالكم ...(بالجمع) ..... او .... قولي في ناس مشتاقين لكم .

او ممكن تقولين في ناس يحبونكم كثير .... بيسأل من .... قولي انا .

طبعا هذي بتكون اخف من انك تقولين احبك .... حاولي وبالتدريج .... لكن لا تزودينها

شكرا أختي على الرد ..
بس اريد اسأل هل يفضل اني اقوله هالكلام الحلو الحين ولا افضل بعد الزواج؟
يعني من وجهة نظركم انه من المفترض اني اكون مثل ماانا واخلي الكلام الحلو الى الزواج
او احاول اقوله هالكلمات " أحبك , حياتي , عمري ..." ؟؟؟

ممكن اسمع وجهة نظركم لاني في حيرة مرات احس انه ودي اقوله هالكلام ولكن احس بثقل في لساني لما اجي اقوله هالكلمات ولا اقوله اي شي منها ؟
ومحتارة مدري ايش الافضل وايش المفترض انه اعمله ؟؟
لانه اخاف اني مااقوله هالكلام وبعد كذا يخاف اني جافه ويمكن اهو بعد يتغير معي ويتعود على انه مايقولي كلام حلو لانه ماشاف ردة فعل مني!
واخاف انه اقوله هالكلام ويكون على باله اني بموت عليه ابغى اكون ثقيله بعد مدري ايش الحل !!

مع العلم اني اريد أن يبقى لسانه يستستهل ويتعود على ان يناديني دائما بـ( حبيبتي , الغاليه , حياتي )
ونحن في بدايه حياتنا فماهي اقتراحاتكم بالنسبة الى موضوعي ماذا عساي ان افعل حتى احصل على مااريد هل ابادله من الان بالكلام الحلو او انه اخليه الى بعدين !

ممكن تدلوني على الطريقه الصح والاسلوب الاصح معه ؟؟
لاني فعلا محتارة ولاأعلم الى من الجأ بالسؤال !

__________________

لاتظن القلب يا عمــــــــــري
نسيك
والذي سواك ما لحظة نساك
لا تقول الوقت قساني عليـــــك
كل ليلة تمر يكبر بي غـــــــلاك
ياغـــرام عاش مع روحي
شريــــــــك
في عروقــــــــي نبض سميته
هـــــــواك
..

السلام عليكم
اختى لا ماتكوني خفيفه اذا قلتى له كلام حلو
بالعكس الكلام الحلو المفروض يصدر من ا لمراه لانها ارق واحن من الرجل
بالعكس حاولي كثييييييييييير زي مايقولو تغرقيه بالكلام الحلو وكلام الدلع كمان
واذا منت قادره حطي صورته وكلميها يمكن ت حسي انو حل سخيف بس على فكره مجرب ونفع كثير مع اختي لانها كانت مثلك
دحين ماشاء الله ماتسكت
حطي صورته وكلميها على انك تكلميه وكمان اما يكلمك صح كوني مركزه معه بس ركزي اكثر انو دحين حتقولي له كلام حلو حتى لو قاطعتيه لانه مارح يفكر انك قاطعتيه بالعكس حيفرح كثير
وادعي ربي يساعدك
ربي يوفقك مع خطيبك وشدي حيلك وقول له كلام حلو
تحياتــــــــــــــــــي

"


"

ملاك عزيزتي الموضوع ابسط من الحجم الي عطيته

الحب شعور تلقائي لا تحطين له حواجز او تختارين اوقات تعبرين فيه عنه

خلك طبيعية وعفويه هو الحين زوجك خلك طبيعيه معاه

من كلامك فهمت انك تخافين تقولين له كلام حلو الحين لانك سألتي اقول الحين والا بعد الزواج. وابي اكون ثقيله.

يا عزيزتي الثقل شي وانك تدللي زوجك شي ثاني


هذا زوجك مابينك وبينه ثقل لو قلتي له انك تحبينه هالشي يقربكم اكثر وراح تكسبينه

لا تحرمينه من حبك

تعرفي انا زوجي قالي احبك من اول مكالمه وانا بعد شهر وكان ينتظرها موت

وقلت ياريتني قلتها من زمان لماشفت فرحته


توكلي على الله واطلقي العنان لسانك وراح تدعين لنا وتشوفين ان حياتك وطبيعه علاقتك معاه راح تصير مره احلى

اختك رهف

السلام عليكم ..
هلا عزيزتي ...
انا عندي الحل ..ارسليله الكلام الحلو اللي تبين في رسايل (في الجوال)..وصدقيني الطريقة مجربة ..وراح تطيح كل الخجل اللي عندك ..
ولاتنسي تدعيلي ..

عزيزتي ملاك..


مشكلتنا نحن بنات حواء أن هناك بعض المصطلحات التي نعتمد عليها في وضع إطار علاقاتنا بشركائنا .. ونعتقد أن أية علاقة لا تستقيم بدون تطبيق هذه المصطلحات.

مثل: الفتاة الثقيلة .. والرجل الصياد.

وهذه المصطلحات وإن كانت صحيحة بشكل عام .. بمعنى أنها خطاً عاماً يتعلق بطبيعة كل منهما بشكل أساسي .. إلا أننا أحياناً نتطرف و(نزودها حبتين) شعورياً أو لا شعورياً .. لأسباب نفسية أو اجتماعية .. معتقدين بذلك أننا نحقق قدراً أكبر من النجاح أو إثبات ذلك المصطلح أو ذاك .. انطلاقاً من مبدأ زيادة الخير خيرين!!


عزيزتي .. الثقل حلو .. والرجل نفسه ـ في الغالب ـ لا يحب الفتاة الخفيفة .. لأن طبيعة تكوين الرجل تجعله يحب أن (يتعب) قليلاً في سبيل محبوبته .. ولكننا نحن بنات حواء يفترض أن نتصرف بطبيعتنا الحقيقية دون تكلف.. بمعنى أن يكون ثقلنا من النوع الخفيف الحلو ذو التأثير الإيجابي الذي يزيد شوق شريكنا ويزيد حماسه نحونا وإقباله علينا .. لا أن يكون من النوع الغليظ الذي يثقل الظهر ويكسر القلب ويبعث على الملل والنفور.


وبصراحة فأنا أعتقد أن عشرة شهور هي فترة طويلة جداً يمكن بالفعل أن تثقل ظهر زوجك وتكسر قلبه .. فحتى الصياد لا يستطيع احتمال عشرة شهور صبراً .. طبعاً هناك استثناءات ولكننا لا نستطيع القياس عليها بعيداً عن الفئة الغالبة.



ثم أنتِ تتساءلين: هل يفضل اني اقوله هالكلام الحلو الحين ولا افضل بعد الزواج؟

واسمحي لي بأن أسألك: ما هي التسمية التي يفترض أن تطلق على علاقتكما الآن أصلاً؟؟؟؟

أنتما يا عزيزتي زوجان شرعاً .. بحكم العقد الذي يربطكما .. وعلى ذلك فإن ما تتحدثين عنه هو أمر حلال ولا شيء فيه.


كما تقولين: واخاف انه اقوله هالكلام ويكون على باله اني بموت عليه.

طيب .. وما هي المشكلة في أن يشعر (زوجكِ) أنك تموتين فيه؟!!

أصلاً فيمن ستموتين إذا لم يكن زوجكِ!!!

وما المشكلة في أن تُقبِلي على زوجكِ عاطفياً ما دام هو لا يبخل عليكِ بنفس الإقبال.




عموماً .. فكرة الأخت جوري جيدة كبداية ..... وتذكري كبداية فقط


وتذكري كذلك أن الحياة الزوجية عطاءٌ متبادّل .... وليس من العدل أن يكون أحد الطرفين هو الذي يأخذ دائماً دون أن يعطي.






مع تحياتي

__________________


اللهم طِيبَ الأثر .. وحُسْنَ الرحيل.

يبة وسعي صدرك ترى الموضوع عادي
انتي كلك خجل ماتعوتي على هالكلام
فزي ماقالت احد الاخوات ارسلي اللي بخاطرك برسالة جوال
وبكذا يطيح الحطب
وصدقيني عقب الزواج تبين تقولين هالكلام لين تشبعين
لاوبتغلطين مع امك بتقولين لها هلا حبيبي من كثر من مترددين هالكلام
واتمنى لك حياة سعيدة

عادي يا اختى و الله عادي لما تزوجت استحيت ان اقول حق زوجي احبك لمدة مايقارب شهرين من زواجنا لكن عدت على خير صبري اشوي اشوي وراح تشوفين النتيجه مو بس تقولين احبك بتقولين اموت فيك

مشكوووورين على الردود الله يعطيكم العافية وانشالله راح احاول اني استسهل الكلام الحلو على لساني
والحين بروح اتكلم مع صورته على الله ينفع ...
وراح آخذ بكلامكم لانه فعلا اتحسف على الوقت اللي يمضي وانا ماسكة نفسي مااقوله الكلام اللي في خاطري اقوله, فعلا اتعب كثير لانه احس اني اكبت مشاعري فترة طويله والقهر انه يتضايق مني في كل مكالمه لانه قبل لايسكر كل مرة يقولي يعني ماراح اسمع منك شي ؟ وانا مالت علي اقوله لااااا وبكل ثقة
مدري احس اني مالي داعي من جد ...

الله يوفقكم والله ماتقصرون ...

أختكم . . ملاك الورد . .

__________________

لاتظن القلب يا عمــــــــــري
نسيك
والذي سواك ما لحظة نساك
لا تقول الوقت قساني عليـــــك
كل ليلة تمر يكبر بي غـــــــلاك
ياغـــرام عاش مع روحي
شريــــــــك
في عروقــــــــي نبض سميته
هـــــــواك
..