السلام عليكم ورحمة الله وبركاته

في البداية ارحب بكم وبأول مشاركة لي في المنتديات في حياتي

بحكي لكم وش صار بالضبط ،، ووش ردة فعلي ،، ووش القرار الي اتخذته مبدأياً .

لاحظت في الفترة الاخيره تغيّر من زوجتي في مهامها وواجباتها في البيت والابن وفيني انا الزوج

كلمتها مرارً وتكراراً وحذرتها كنت طيب منها لابعد حد بشهادتها
المهم كانت تمسك جوالها فترة طويلة وانا اجلس معها نتقهوى او في السيارة او حتى على الفراش قبل النوم

طبعاً صار لي اكثر من 5 سنين متزوج كنت احب زوجتي وماقصرت معها بشي ، وكنت احس انها تبادلني نفس الشعور ،
ماعمرها مسكت جوالي وفتشت وش فيه وانا نفس الشي ماعمري مسكت جوالها وفتشته مع ان الاجهزة كان برقم سري محد يعرفه من الثاني من باب ثقة من الجميع
الي حصل بعد ماصحيت من النوم لقيت جوالها عندي وهي لازالت نايمه وفتحت جوالها وليتني مافتحته لقيت بلاوي لاتغتفر انصدمت منها وكرهتها ووقتها كنت ابي انحرها بس يوم شفت ولدي نايم في امان مسكت نفسي ىتعوذت من الشيطان
وبعدها طلعت من البيت وهي نايمه قعدت افكر وش اسوي
رجعت لها بعد 3 ساعات
صحيتها من النوم وقلت لها البسي وخذي اغراضك بوديك لاهلك وبصراحة كنت هادي وقتها لاني طلعت من البيت بعد ما اكتشفت الموضوع يعني لو كلمتها وصار النقاش وقت الصدمة كان صار حادث مؤسف
المهم مالكم بالطويلة سحبت جوالها منها واعطيتها جوال كشاف وقلت لها ان دخلتي سناب او واتس او انستجرام لا تلومين الا نفسك وهي طول اليوم تبكي

بعد السالفة بيوم اتصلت فيني وقالت بجيك اتناقش معك قلت حياك بس جيتك هذي ماراح تغير شي من قناعتي فيك مهما تبكين

جت عندي وحاولت تكسر جوالها وكانت تترجاني اعطيها فرصة جثت على رجولي تبوسها بس لازلت مصدوم منها
طبعاً اعترفت بخطأها وقالت انا مو راعية هالأمور ابداً ولا اعرفها من قريب ولا من بعيد ومابي اخسرك ومستعدة اسوي اللي تبيه ، بقطع علاقتي مع صديقات السوء وووو من هالكلام .
قلت لها كل شي ممكن يغتفر الا مسألة الشرف
المهم صار بيننا نقاش طويل
في النهاية رجعتها لبيت اهلها وطلبت منها ما تكلمني ولا تتصل فيني لين ربي يلين قلبي مع اني ما اتوقع.
وبس.

أبي المشورة من الرجال الموجودين في المنتدى في اللي فعلته معها ، وماذا افعل في قادم الايام .

وأبي رأي النساء الموجودات مشكورات .
والسلام عليكم ورحمة الله وبركاته ،،

هل وصلت الخيانة للشرف؟

__________________

نعم
الموضوع للاسف فيه صور وفيديو وكذا ولا اعلم ان كانت قابلته او لا

مكانه الانسب

__________________
الحمد لله بلا سبب ولا طلب..
الحمد لله في حياتي وبعد مماتي..
الحمد لله دائمآ وأبدا..

كيف تأكدت انها وصلت للشرف ؟
وهي تحلف بأنها ماتعرف لتلك الأمور لا من قريب او بعيد
ممكن مرسله لصديقاتها خاصه انها تعدك بإنهاء صحِبتها معهم
صف وضعيه التصوير ؟

__________________

الله يربط على قلبك ويرزقك الصبر والحكمة ويهدي زوجتك ويرجعها لطريق الصواب والحق

__________________
تَلَوْا باطِلاً، وجلَوْا صارِماً، وقالوا: صدَقنا! فقلتم: نعَم!

شفت بعيني صور لها مرسلته للشخص المقصود
اقسم بالله ماني ظالمها
اتكلم بحرقه مما أنا فيه الآن
الحمد لله على ما قضى وقدر

اذا انت متأكد من التصوير واعترفت لك زوجتك
اتخذ الحل المناسب لك ويريحك
هل لو استمريت معها بتظل تشك فيها فهذا متعب لك
واذا بتنسى وتفتح صفحه جديده شيء طيب
المهم مواضيع الخيانه لاتنتظر حل
كلٍ بيعطيك الشيء اللي بيتخذه لنفسه
يا تكمل معها ياتنفصل لاخيار ثالث
الا اذا كنت حابب تعالج مشكلة زوجتك وهذا موضوع ثاني ولا أظنك تريد هذا
كان الله في عونك

__________________

هل اعترفت لك بالخيانه؟ وهل عندكم أبناء ؟

يعني اخي الكريم
لم يصل الامر للقاء؟إرسال الصور لا يعني انها التقته
اعرف حجم خطأها و عاقبها بما هو مناسب

__________________