السلام عليكم ورحمة الله وبركاته
كل عام وأنتم بخير وعيدكم مبارك، وجمعة مباركة

ندخل بالموضوع على طول، قابلت بهالعيد كثير من معارفي وأقاربي من بعيد وأغلبهم من زمان ما شفتهم، اللي توظف واللي يكمل دراسات عليا واللي اشتغل بالتجارة و..

الزبدة استغربت من بعضهم أنهم مسوين زواجاتهم قريب ووظائفهم عادية، يعني واحد عالمرتبة السابعة راتبه 8300 ريال وزواجه رابع العيد، الثاني عسكري فرد راتبه 6400 وأيضاً بيتزوج قريب، والثالث فني أشعة وراتبه حول الـ 9 الاف وواحد معلم وراتبه 10000 تقريباً ومملكين.

ولو نطالع رواتبهم ونجي نشوف تكاليف الزواج والمعيشة نلقى أنه من المستحيل أن الرجل يلبي حاجات أسرته بمبالغ زي كذا، الإيجار لحاله ياخذ 2000 ريال بأقل تقدير فما بالك بمصاريف الزواج والهدايا والأكل والتأثيث والأولاد والسفر والعزايم والسيارة وصيانتها و..
المشكلة أعرف ناس رواتبهم أعلى بكثير من كذا ومع ذلك يعانون بمصاريفهم << ما يتكلم عن نفسه ! أحس أن مداخيلهم ما تناسب مسؤولية الزواج أبداً، ما أدري هل الزوجة بتصبر وقت طويل على زوج دخله ضعيف؟! هل هي مسألة قناعات؟! والا هل هم متزوجين موظفات ويساعدونهم؟!

وحاب آخذ رأيكم عن أقل دخل ممكن يبدأ فيه الرجل حياته الزوجية..

في ناس اهلهم يساعدنةهم
والرواتب الي ذكرتها ابدل مو قليله فيه اقل وفاتحين بيةت

من وجهة النظري الشخصية أرى أن 8000 مبلغ جيد في بداية الحياة الزوجية و لا يعد من الرواتب القليلة

و إذا كان الشاب لديه شقة ملك في منزل أهله فهذا يخفف عليه ميزانية الإيجار حتى لو كان راتبه أقل من 8000يستطيع الزواج بها

وفق الله الجميع

الوضع الطبيعي ان يكون ايجار المنزل 25% من الراتب الشهري
وراتب 8000 يعتبر معقول ويستطيع ان يفتح بيت ويعيش حياة كريمه

للاسف يوجد اناس فقراء جدا لا يملكون سوى المال

اتوقع اللي راتبة من 13000 فاقل ويتزوج ويشتري سيارة ويدفع ايجار يعاني

__________________

قد تـــعود المياه الى مــجاريها احياناً
ولكنها لاتعود صالحه للــشرب دائـمـاً

وانت بصحه وسلامه

بصراحه اقرا وانا مستغرب من تفكيرك , ربطت الاثنين بواحد, تكاليف الزواج على المعيشه وهذا غلط ماله دخل بالدخل الشهري

تكاليف الزواج مع التأثيث مايخفى على احد تكلف من 100 الف وانت طالع وهذي تختلف حسبتها من شخص لاخر , والاغلب يجمع المهر فقط من 30 الى 40 الف والباقي يوقفو معاه اهله وقرايبه , تلقى بعضهم اخوانه عليهم القصر والبعض عليه الذبايح والبعض عليه الاجهزه الكهربائيه الخ

اما لاسمح الله بيتكفلها لوحده وهذي نادرا نادرا نادرا جدااااا لو كان راتبه 20 الف وفوق مايسويله شي بيدخل بقروض على ايجار على سياره بس محد فيه وانا اخوك اصلا يتكفل بتكاليف الزواج لوحده وثاني شي التكاليف مالها دخل بدخله الشهري لانها مبالغ رمزيه ماتجلس معاه عمره كله مثل الايجار وغيره متى ماتدبرت تكاليف الزواج دفع وانتهينا

وبعد الزواج تبدء الحسبه الصحيحه بدخله الشهري ولنفرض دخله 8000 , ايجار 2000 , وبقى 6000 كلن يتصرف على حسب هواه فيها , الي بيوفر بيجيب سياره ايجارها من 700 الى 1000,

يعني الشي الاساسي فقط الايجار , والباقي على حسب مصاريف الرجل نفسه في الي يضيع نص المصروف على سياره ايجارها 2000 ويبقى معه 4000 تكفيه عيشه كريمه وتغنيه عن الحاجه

حلوه جدا راتب 8000 ونص الشعب عالشركات براتب من 3000 الى 5000 وعايشين متزوجين متهنين

الله يسلمك انت ضارب بالاسعار فوووووق ....

يارجال من قال ان راتب 8000 الاف يعتبر عادي بالعكس الا قوي جدا وقليل مننا راتبه يوصل 8 الاف

انا متزوج براتب 4000 ريال ولافيه احد ساعدني غير ربي سبحانه وساكن بالرياض بشقه اجار 18 الف والمهر 40 الف وتاثيث الشقه من ....الى كلفني 30 الف ريال هذا الكلام قبل 4 سنوات

يارجال اذا راتبك 6000 الاف يعتبر ممتاز جدا توكل على الله ..

أشكر كل شاركنا،
أنا متفهم أن 8000 يقدر يعيش لكن خلونا نكون واقعيين كم بيبقى له ولزوجته؟!
يعني بيكون مديون ويدفع أقساط أقل شيء 1500 "هذا اللي مساعدينه أهله بقوة" وإيجار 2000 وفواتير جوال وكهرب ومياه وانترنت 1200 تقريباً مصاريف السيارة 500 مقاضي للبيت اقل شيء 800 شهرياً
يبقى 2000 لو بيقتسمها مع زوجته ما يبقى لهم الا 1000 لكل واحد، مع العلم أني ما حسبت تكاليف العلاج ومتابعة الحمل (لو كانوا يعالجون بالخاص)، انا عارف أنه بيقدر يعيش بـ 1000 ريال لكن لو نجي للواقع صعبة يعيش الواحد بمكافأة جامعة

أهلهم يساعدونهم بكم؟! أقل شيء تكاليف الزواج مع التأثيث وشهر العسل بـ 200 الف، كم بيعطونهم يعني اهلهم؟! خل نقول أنه ساعدوه بـ 100 الف بيبقى مبلغ كبير الغالب أنه بيدفع جزء كبير منه أقساط، غير تكاليف السيارة طبعاً ما حسبناها


قليل نشوف احد عنده شقه ملك حتى لو ببيت أهله، بالنهاية الأهل مهب بانين شقق ملك لكل عيالهم،
ومع تقسيمة الأموال اللي فوق يتبين لنا انه بيصفى قليل للمصروف الشهري للأثنين


طيب الإيجار شيء ، والفواتير والأقصاد والصيانة ومصاريف السيارة وأغراض البيت أشياء!
يعني مثل ما حسبتها فوق صعب جداً يبقى لهم فوق الألفين يقسمونها بينهم


صدقت والله، المعيشة غالية هالايام وتكاليف الزواج المحلي كل مالها تزيد مع الاسف


هي مثل ما قلت حسب مساعدة الأهل، لكن مساعدة الاهل مو دائماً تكون عالية وتكاليف الزواج كل مالها تزود
يعني مثل ما حسبتها فوق بيصفى شيء قليل جداً ويالله يكفي للملابس،

طيب ومن وين تكاليف الذهب والهدايا والشبكة وشهر العسل وكيف دبرت لك سيارة بهالراتب؟!
وكيف تصلحها وكيف وكيف..
ياخي الجوال الحين بـ 2800!

صح ونسيت بعد مانحسب العفش كل سنه يتغير ولاتنسى خرابات الثلاجه والمكيف والفرن

وكفرات السياره تغييرها ب 1200 وذبيحة اذا جاك ضيف

الله يهديك بس جالس تحسب مصاريف الدنيا كلها بوقت واحد وتطلع مصروف ورا مصروف ومعقدها عالاخر!!!

مصروف البيت من الى 3000+ 2000 ايجار شقه

والباقي هدايا تمشيات , بتجمع جمع

تكفى لاتفصلي مصروف البيت وتقولي ماتكفي 3000 , عاد انت قسمها بطريقتك

وترا ماحسبت بعد كل مناسبه تفصيل فستان زواج اخواتها اذا كانو 3 يطلعلك 6000 اقل شي غير بنات خالاتها وعماتها