حبيبتي معليش ممكن أجاوبك بصراحة ويمكن شوي كلامي يكون قاسي ..
خالي ( الله يرحمه ) .. لاحظي ..
كان الله يرحمه انسان اكول وسمين شوي يعني بعافية ..
وكانوا الناس يحطون البال عليه ..
ويعلقون عليه تعليقات بمزح ..
وهو كان إنسان مزوح يعني يمكن حتى هو يعلق على حاله ..
جاه السرطان ببطنه .. الله يكفي الجميع الشر ويبعده عن المسلمين ..
وهو وأخوانه شكوا في واحد صديق له عينه حارة ..
باعترافه الشخصي إن عينه حارة ..
كلهم يدورون طريقة ياخذون من أثره من غير مايحرجونه ..
وانتظروا يجي البيت يزور خالي اللي كان في آخر أيامه ..
وقدموا له رطب عشان ياخذون النواة لكنه مابغى ياكل منه ..
وحاولوا يتحايلون ويدورون طريقة غير إنهم يقولون له بصراحة نبغي من ماء وضوئك ..
لكنهم ماقدروا ..
والنتيجة توفى خالي وخوالي ندمانين إنهم ماقالوا للشخص إنه يتوضا ..
الله يرحمه هذا قضاء ومكتوب له أجله في هذا اليوم ..
لكن الإنسان يزعل إنه مابذل جهده ..
بنت خالتي ..
بنتها الصغيرة كانت مع أبوها بالمستشفى زيارة لقريب لهم ..
وبالصدفة صديق أبوها شاف الأب شايل بنته ..
فشهق عليها وقال أشحلوها بنتك .. جميلة ..
راحوا البيت ..
وطاحت البنت مريضة ..
حرارتها فوق الأربعين ..
أخذوها المستشفى ..
وحمموها ..
وأبرة ..
وووووووو ..
لكن حرارتها مش راضية تنزل ..
بنت خالتي بكت عند زوجها ..
قالت له ألحين تروح لصاحبك وتطلب منه ماء وضوءه ..
وراح زوجها وطلب منه ..
تتوقعين زعل صاحبه ؟؟
أو قاطعه ..
بالعكس لما عرف بهالشي على طول راح توضأ وأعتذر من أبو البنت وأنحرج لأنه ماذكر ربه ..
بنت خالتي تحلف .. وهي ماشاء الله عليها إنسانة مؤمنة وملتزمة ولا تكذب حتى على أطفالها ..
تقول أخذت الماء ..
ووضعت بنتي في البانيو بعد أن خلعت ملابسها ..
وسكبت الماء بهدوء على ظهرها وأنا أذكر الله وأدعوه ..
تقول والله إنها شافت ظهر بنتها وجسمها تطلع منه حبوب حمرا وبعد شوي تختفي ..
لحد ما أختفت كلها وراحت حرارتها ..
وجففتها ولا كأن البنت كانت مريضة قبل دقائق معدودة ..
بنت خالتي الأخرى ..
كانت ترضع ولدها أمام الأهل من النساء ..
وهي تضع شال لكن أحيانا يبان جسمها مع حركة الابن ..
رجعت البيت وصدرها اللي كانت ترضع منه يألمها تقول كأن سكين مغروزة بداخله ..
في اليوم الثاني اجتمعوا الأهل ..
راحت لهم وقالت لهم بغيت من وضوئكم أسكبه على صدري لأنه يألمني ..
وكل وحدة كانت موجودة في اليوم السابق أعطتها من وضوئها بكل رضا ..
بل وكانوا يدعون لها بالشفاء ويقولون إذا العين منا الله يشافيها ..
اللي أحب أقوله إن العين حق ..
وإحنا أحيانا نسهو ننسى ومانذكر الله ..
ليس معناه إن إحنا قاصدين ..
إلا من غير قصد ..
فلا تزعلين ..
والله يوفقك ..
التعديل الأخير تم بواسطة مــريم ; 11-09-2007 الساعة 05:36 PM