للأزواج: هل تفضل زوجتك أن تكون موظفة؟


لماذا تفضلها موظفة ؟ ولماذا لا تفضلها موظفة؟

سؤالي نابع من تجربة أمر بها حالياً

قبل زواجي كنت موظفة في القطاع الخاص ، وتركته عشان الزواج وبعد مقر العمل عن منزل الزوجية وكذلك طول الدوام (يعني ما يسوى احتفظ بالوظيفة)

بعد الزواج جالسة في البيت، ومرتاحة ما عندي مشكلة ولا فكرت في الوظيفة ولا شي، بعد سنة من زواجي حملت وحصل اجهاض ، بعدها بفترة تعبت نفسيتي ، لأنه دايما يلح علي بالحمل، فلان حرمته حملت ،، وكلام كثير سبق وان طرحته في المنتدى

كان دايما يقول لي حتى قبل الحمل هذا ما شاء الله فلان زوجته موظفة راتبها على راتبه ، كم سنه ويأمنون بيت ، فلان زوجته مدرسة يا حظه ،، ياليتني متزوج مدرسة احسن لي

بعدين لما دخلنا في مسألة تأخر الحمل ، قالي ليش ما تتوظفين توسعين صدرك وتغيرين ،، وصار يحط شروط كثيرة ، ، اختلاط ما ابغى ،، وظيفة بمستشفى ما ابغى ( وظيفتي السابقة كانت بمركز صحي، وتخصصي ادارة مستشفيات)
قلت طيب ما عندي مشكلة ،، دورنا في المدارس الأهلية والجميعات،، وما كنت متحمسة مرة للوظيفة ، لأن لرواتب قليلةو مايسوى تعبها.

خلاص نسيت الموضوع ،، مرت مدة من الوقت وقالت لي اختي ديوان الخدمة طارحين وظايف لا يفوتك، ما اهتميت ،، لأني حاسة انها صعبة اني اتوظف وانا متزوجة ،،مع اني قبل الزواج اتمنى اتوظف وظيفة حكومية

بس بعد ما تزوجت صرفت نظر ،، المهم قلت لزوجي، قال يالله، رحت لقيت الوظايف نفس تخصصي بالضبط وقدمت اوراقي مع اني متأكدة مية بالمية انه بيرفض لانها بمستشفى ،، بس قلت يالله مادام اني جيت

وفعلا رفض وعصب ،قلت اصلا ما فيه امل ،، المتقدمين كثار ومستحيل يدقون علي ، بس سبحان الله مشيئةربي فوق كل شي ، اتصلوا فيني بعد شهر ، وصرت اراجع في معاملتي وانا اقوله ما فيه امل ديوان الخدمة بصعوبة يوظفون ،،، لين طلع قراري من وزارة الصحة وتعينت

طبعا في البداية تحمس شوي لا ن الراتب عالي،، ولف ادارة المستشفى عشان يحطوني في قسم نسائي بحت وقالي ترى مؤقت الين تحملين بعدين خلاص ورافض ان احد يدري بالوظيفة، لانه في نظره فشلة ان الناس يقولون زوجته تشتغل في مستشفى ويخاف من العين،، وعمل لي مشكلة يوم عرفوا الناس، لاني قلت لاهلي وهم قالوا لاقاربي،، من الفرحة لاني كنت اتمنى الوظيفة الحكومية من زمان واهلي نفس الشي لان ظروفهم شوي صعبة والوظيفة بتساعدهم كثير بس مع الاسف ما جت الا بعد الزواج ( لكني اساعدهم)

طبعا الحمل طول، لي سنة اللحين من توظفت

المشاكل بدت من بعد الوظيفة ،،، يعصب على اتفه الاسباب،،، واي شي يصير يقول كله من الوظيفة
انتي متزوجة الوظيفة \
واذا بغيت شي يقول اشتريه من راتبك ما لي دخل،، ومشوار الدوام ، لازم تهزيء الصبح وتهزيء الظهر

واذا قلت خلاص بقدم استقاله قال لا اصبري نشوف وش حنا عليه،،يعني الحمل

ومرات يقول اذا حملت باخذلك اجازة استثنائية،، ما ادري احسه متناقض، وذا قلت له تراني ما ابغى اترك الوظيفة خسارة راتبها زين وحنا محتاجين لها ،، يقول انتي ما تهتمين انتي طمعانه في الوظيفة ومن هالكلام

ما ادري وش اسوي ،، ما ابغى اخسر الوظيفة وفي نفس الوقت احس اني ما اقدر اوفق بين البيت والوظيفة ،، واهلي يقولون انتبهي تتركينها ،، حافظي عليها ،، في الزمن هذا الوظيفة مهمة

وما ابغى اخسر زوجي لانه رغم عيوبه ،، حبوب وحنون ويعاملني زين

صايرة اخبي عليه كثير من الامور ولا اصارحه بشي ، ولا اقدر افاتحه بأي موضوع دايما يفهمني خطأ ، وانا توني في بداية الحياة 3سنوات ونص زواج وحامل في الشهور الاولى ، ابغى اسير حياة بخط واضح ومعروف ما ابغى يجي الولد وبينا مشاكل وعدم وضوح ومصارحة ، ياربي والله محتارة ،،

ادري ازعجتكم بمشاكلي بس ابغى افضفض ،،

مهوب لازم تردون ،، عادي ،، الناس كلهم عندهم مشاكل واكبر من كذا بكثير

بس كنت حابة اعرف وجهة نظر الرجال تجاه وظيفة الزوجة؟

__________________
لا اله الا انت سبحانك اني كنت من الظالمين

اختي الغالية

لكل شخص رأي في هذا الموضوع
وأنا رأيي



اذا كانت موظفة ولاتشوف حالها على زوجها لأن معها مصاري فهذا طيب لان كثير من البنات اذا صرفوا على انفسهم من رواتبهم تبدأ تمنن زوجها عند كل مشكلة واذا قال لها
لا في ايي موضوع
تقول منيح ماكنت ان عم تدفع المصاري وغيرها من العبارات

طبعا هذا قل الاولاد
اما عندما يأتوا الاولاد فلا والف لا من العمل للفتاة الا للضرورة القسوة

اسأل الله العظيم رب العرش الكريم ان يوفقك لفعل الخير ويرزقك الاواد الباريين الصالحين

الزوجه الموظفة مرهقة كثيرا للزوج.....اولا استيقاظ مبكر اهمال للابناء...لاتوفر شىء ...اهمال تتزوج ..عوده من العمل مرهقة بلاضافه ان الناحيه الماديه تجعلها فىحاله نفسية متغيره
ولامانع فى اخذ اجازة بدون راتب ربما تتبدل الاحوال
لكن على اى حال لاافضلها موظفه................... وشكرا

انا اقول ان الرجال ما منهم امان لو كان زووجج ..

وانا ريلي رافض فكره اني اشتغل .. والشغله فعصرنا مهمه ..

والله يسهل عليج وعليه وعلى الجميع يارب

__________________
اللهم احفظ لي زوجي و ارزقنا بالذرية الصالحة

اللهم لا تدع لنا ذنبا الا غفرته ولا هما الا فرجته ولا دينا الا قضيته ولا حاجتاً من حوائج الدنيا الا قضيتها يا ارحم الراحمين

اختي الزواج نعمه لا يشعر بها اللي لم يحصل عليها صدقيني
اللي ينصحونك الوظيف مهمه لا يفهمون الحرمان العاطفي والراحه النفسيه
بما تن في زوجك خصال جيده حافظي عليه
اشعر ان الوظيفه تعب للزوجه
الوظيفه ليست مهمه للمتزوجه عندها مسؤوليات يجب ان تحافظ عليها
الوظيفه هل ستشاطرك الوحده طبعا لا

__________________
سبحــــــان الله وبحمده ,,,, سبحــــــان الله العظيم

لا اله الا الله العظيم الحليم ربي اني لما انزلت اليي من خير فقير
دعائكم الصالح لي بالرجل الصالح

انا شخصيا ارفض الزواج من موظفة
لماذا الجواب هو
http://www.66n.com/forums/showthread.php?t=163896

وغير الدراسات الي تقول ان زوج الموظفة اكثر عرضة للاكتئاب وغير الدراسات التي تبين تاثير الوظيفة على الاطفال

الوظيفة لظرورة القصوى والاحتياج الشديد فقط

من نا حيتي اصوت بشدة لزوجة العاملة

يعني تكون موظفة

للتعاون في الحياة الاسرية

تحيتي لكِ

__________________





نبذة عن اطفال ذوي صعوبات التعلم

سأرد نيابة عن زوجي: (لا للموظفة)


عزيزتي..

عندما تزوجت كنت قد أمضيت حوالي أحد عشر عاماً في الوظيفة .. ومكثت فيها ما يقارب العامين ونصف بعد الزواج بسبب التزام قانوني .. وهذين العامين ونصف كانا فرصة لاختبار قدرتي على الجمع بين كوني موظفة ومتزوجة .... وبصراحة كنت أعاني صعوبة كبيرة .. خاصةً على المستوى النفسي.

وفور انتهاء ذلك الالتزام قدمت استقالتي (رغم اقتراب زيادة رواتب الموظفين الحكومين في ذلك الوقت ).



قبل الزواج أنتِ حرة .. غير مرتبطة بمسؤوليات كبيرة ومعقدة .. تعودين إلى بيت أهلكِ .. تتناولين الغداء .. تنامين .. تجالسين أهلكِ أو حتى تمكثين لوحدكِ في غرفتك .. تزورين صديقاتكِ أو تخرجن كلكن معاً .. أنتِ حرة.

بعد الزواج الأمر مختلف تماماً .. ولعلكِ تدركين ذلك.

ويصعب الأمر أكثر مع وجود أطفال .. خاصةً إن كنتِ مثلي ممن يرفضون فكرة المربية.




بالنسبة لزوجكِ .. فهو بالفعل متناقض .. ويبدو أنه لا يعرف بالضبط ما يريد .. أو أنه يريد كل شيء دون تقديم أية تنازلات .. وهذا صعب وغير منصف.

على كل حال .. ناقشي زوجكِ بهدوء واطلبي منه أن يخبرك بما يريده بالضبط .. هل يريدكِ موظفة أم لا .. فإن شجعكِ على الاحتفاظ بوظفيتكِ فاطلبي منه بحزم ان يتوقف عن التذمر .. فما دام قد وافق على خروجكِ للعمل فليس عليه أن يشتكي من ذلك.

وقبل كل شيء انظري إلى نفسكِ جيداً .. هل ترغبين حقاً في الاحتفاظ بالوظيفة حتى بعد قدوم الطفل الذي تنتظرينه؟؟؟؟

__________________


اللهم طِيبَ الأثر .. وحُسْنَ الرحيل.

ماأقول الا الله يكون بعونك..زوجك فعلا متناقض وزي ماقالت الاخت مهره أجلسي معه جلسه مصارحه..بالتوفيق..

__________________

من حقك سواء موظفة أو لا أن ينفق عليكِ بالمعروف و يحقق رغباته طالما يستطيع
أما أن يتحجج بالوظيفة و الراتب حتى يتهرب من الإنفاق فهذا خطأ
لي قريبة زوجها كان يفعل مثلك
استيقظ زوجها في الصباح ليجدها قدمت على استقالتها في اليوم السابق و أصبحت غير موظفة
ثار بالبداية وو انزعج يومين ثلاثة و عاشوا بعض بعض بعدها عادي 11 سنة

__________________