السلام عليكم
ترددت كثير قبل ما اكتب الموضوع لاني خايفه من الهجوم بس تكفون افهموني لانه مو بيدي و ودي احد يساعدني ..
انا تزوجت من قريب لي من صغره يحبني كبرنا وتزوجنا طبعا اول سنه كل شي تمام وحب يمكن لاني كنت خجوله جدا جدا جدا حتى صوتي ماينسمع ما ابالغ بس جد كنت ما اطلب شي بالقوه اقوله ابغى السوق وانا خجلانه مدري ليش هذا الخجل المبالغ فيه طبعا كنا سنه مملكين ومع ذلك كنت خجوله
بعد سنه انا تغيرت وصرت طبيعيه بس الظاهر هو ماتقبل هذا الشي تعود ع البنت الهاديه الساكته ماتقول كلمة لا ولاتطلب ولا تزعل ولا تناقش ما اكذب عليكم انه استغل هالشي يعني مايعطيني فلوس يقول يمكن محتاجه ولايقول خليني انزلك السوق ولا يقول يالله نطلع او يفكر يخرجني
كان يتابع مسلسلات تركيه كنت اتضايق بس اسكت كل هذا ساكته .. مع اني ساعدته بالزواج يعني انا طلبت شغلات للفرح ورفض وقال كلها فشخره زايده تخيلوا خجوله وتطلب بصراحه ماتوقعت تمنيت الارض تنشق وتبلعني وتضايقت كثير اني طلبته زواجي جدا متواضع والذهب كان يلمح انه مايقدر يجيبه واستحيت منه وقلت خلاص لاتجيبه اعطيني اياه بعد الزواج من الفلوس اللي تطلع لك((عندنا الرجال يقطون للعريس وتوصل مية الف ))طبعا راح وسدد الديون كلها وانزنق واخذ الهدايا حقتي وباعها وراح يتجمل عند اهله هدايا وشغلات هذا كله ماهمني وكنت سعيده وذكرت هذا كله عشان تشوفون كيف هو ماحب التغيير طبعا انا تغيرت بعد ما انجبت وحياتنا كلها مشاكل ما تنتهي ولاحظت بعد فتره صار مايقرب مني ومره صحيت من النوم وحصلت ملابسه ع الارض وهو بالحمام ويتكلم كلام مو مفهوم ع الجوال ويطلع اصوات طبعا ما قدرت ادخل عليه لاني عارفه لو شفته مستحيل ارجع اتقبله طبعا انا حسسته اني صحيت جلست اقفل الابواب ابيه يسمع وخرج بعد كذا وهو مستحم سالته وش مصحيك من النوم ومخليك تستحم قال عشان بكره وانا رايح الدوام ما استحم كنت موطايقته ذيك اللحظه وقرفانه منه حيل
ابغى اوضح له اني شاكه ولافاد واحيانا مايكون عندي رصيد وفجاءه اقوله اعطيني جوالك بكلم يرفض بشده ويدخل لغرفة النوم خمس دقايق بعدين يقول خذي كلميهم هذي الحركه تكررت كثير وانا كنت المح باني شاكه طبعا ولافاد الين جاء ذاك اليوم لقيت جواله مفتوح لسى ما انقفل هو له رمز وشفت الرسايل كلها كنت بموت وقتها شعور فضيع جدا جدا جدا وناقشته وقلت له ارتبك وتغير وجهه وعصب ونافخ وقلت هات الجوال رفض وبعد كذا ماعد قدرت اتنفس وصرت اصرخ واصرخ ورجولي ويديني تشنجت بصراحه كنت احسب هو هذا الموت وهذي روحي بتطلع اعتذر وقال مو خيانه هذا صاحبي بيسوي فيني مقلب وانا جالس اسلك له وسويت اني غبيه وصدقت وبعدها تااب وماعد سواها بس كان دايم اذا عصب يقول اتزوج عليك وما راح اخبي عليك وانت اول من يعرف وبعد كذا يعتذر ويقول ما ابدلك باحد وهكذا حياتنا مشاكل ومره حياه حلوه بس انا عنيده وهو عنيد ويفهم كل شي اني بمشيه ع كيفي وابغاه مثل الخاتم يعني اذا اتصلت يقول طفشتيني انت الوحيده تتصلين اصحابي جوالاتهم ماتدق.. وانا اكره السهر برا البيت ودايم اقول حدك لين تسعه ((لانه طول اليوم دوام نوم بيت اهله طيب انا متى ))
وكان يقول الشباب يسهرون وانت عبالك بخليك تركبين ع ظهري وهكذا اعتذار ورضى ومشاكل
الين اخر مره قبل سنه تقريبا خطب وحده بدون علمي واهله كلهم يدرون وابوه كلهم عصبوا وزعلوا وقالوا بتطلقها في الاخير لانك تحب زوجتك وتموت فيها قال لا واللي صدمني ابوه يروح ويخطب لولده بدون حتى مايسال وش السبب او يحاول يصلح الوضع.. الوقت اللي خطب فيه ماكان فيه مشكله بيننا ولاحظت نفوره مني ومايتكلم ولايجلس معايه ولاينام وبعد كذا صارحته وقالي خطبت سكتت وقلت الله يوفقك انا طلقني قال ولو كنسلت قلت ليش رفضتك قال لا بس بعتذر قلت حتى لو اعتذرت طلقني كل هذا ومانزلت دمعه احس اني بحلم مو معقوله اللي يصير ورحت لاهلي وصرخت صراخ وبكيت لين حسيت قلبي بيطلع من ضلوعي تعبت حيل حيل ومن ثالث يوم يحاول بالصلح وراح يعدد ويقول فيها وفيها وبعضها تاليف يبغى يبرر لهم موقفه الكل غلطه وقال انت تتكلم في اشياء خاصه بينكم وعرف غلطه وصار زي المجنون رجعوها تكفون تكفون بسوي اللي تبيه اخته كلمتني وقالت هو بس يبكي ولا ينام ولاياكل وصار يترجاني ويبكي وكان يقول والله ما اطلقك انت لي لحالي واذا اصريتي والله لانتحر واسوي حادث وبعد كذا رجعت بشروطي و وافق عليها كلها وفوقها رضوة ثلاثين الف رجعنا وتغير تماما حب وحنان وكل شي وانا بعد تغيرت بس المشكله اني مو قادره انسى خطبته ابدا افكر بالانتقام كثير بس ما اعرف وش الطريقه نفسيتي زفت انعزلت عن الناس ومالي وجه اقابل احد بعد ماطاح وجهي وانكسر قلبي عشت في عزله ماعد احضر ولا اختلط باحد احيانا ودي انه يموت واخذ غيره ومره اقول ودي اذبحه ومر افكر باني اجلس معاه لين القى وظيفه ومرات احس اني ما اقدر اعيش بدونه واحبه ومره ما اطيقه ومره نفسي احسسه باني اخونه يعني اطلع رقم واجلس واعطيه اختي واخليها تتواصل معي ع اساس انها رجال انا تدمرت من الداخل وكرهت نفسي والحياه ماعد اشوف للحياة طعم ابدا تعبت وانا اوضح للكل ان الوضع تمام زوجي كل ما كلمته يكون لطيف معايه ويعتذر ويقول بنسيك وبخلي الكل يتكلم عن حبي لك صار يصرح بحبي ويتكلم في المجالس ادا جابوا طاري التعدد ويقول ام فلان ماحد يجي مكانها ودي افهم ليش انا متناقضه ليش احبه واكرهه ليش مرات سعيده ومرات لا ابي ارجع نفسي قبل لاهم ولاحزن ولاجرح ابغى ارجع البنت المرحه السعيده اللي تشوف الحياه حلوه واضحك من قلبي زوجي الحين مو مقصر بشي بس الخطبه دمرتني وتعبتني حيل ماني مصدقه كل الحب اللي بيننا ويروح يخطب بس عشان عناد فيه وعشان يقهرني
انا وش احتاج وجهوني وانصحوني ..اللي بيجرح لا يعلق رجاءً
اسفه ع الاخطاء الاملائيه اكتب من جوالي .
04-06-2015, 11:36 PM
ضوابط المشاركة
العرض العادي
