أنا حاسة باللي تحس فيه لأني اشوف بنات يفرطون في استخدام الميك أب وأكثرهم في الحقيقة أجمل وأنعم بدونه أو إذا كان خفيف.
مشكلة البنت الخليجية انها تكثر من الميك أب وعلى بالها هالشي شياكة وذوق والعكس صحيح!
الحين الموضة الميك أب الناعم اللي يبين الواحدة Natural.. بس بناتنا أكثرهم مصرين على الميك أب الثقيل..!
وتلقى الوجه لونه أفتح بواجد عن العنق وباقي الجسم وهذا أكبر وأبشع خطأ تقع فيه البنت الخليجية في الميك أب ولاحظته يتكرر واجد.
البنت اذا بغت تعجب الناس وتظهر بشكل أنيق وجذاب لازم تفهم أن مستحضرات التجميل ابتكروها عشان تبرز مفاتن ومواطن الجمال في المرأة مو تغير الملامح أو تشين الوجه!
لذا، لازم على كل واحدة تبي تشتري كريم أساس انها تختار درجة لون قريبة جداً من لونها الطبيعي مو أفتح.. عشان ما تصير مثل المهرج أو كنها حاطة قناع!
كريم الأساس مهمته توحيد لون البشرة بإخفاء العيوب مو تفتيح البشرة أو تبييضها!
وبالنسبة للألوان الدارجة الحين فهي الفاتحة الطبيعية مثل ما ذكرت سابقاً.. فانصح خطيبتك انها تحط ميك أب خفيف كلش، واذا تبي تقنعها بهالشي جيب لها صورة ممثلة أجنبية لأن الغربيات هم اللي يبدعون بالميك أب اللي يعطي لوك طبيعي. واذا أثرت فيها الغيرة راح تلقى نتيجة فورية!
وبالنسبة للكحل.. إذا كانت عيونها وساع فاطلب منها ترسم الكحل من داخل العين.. هذي الطريقة تناسب العيون الوسيعة.. أما العيون الضيقة والصغيرة فيصلح لها رسم الكحل من الخارج واستعمال قلم الكحل الأبيض من الداخل عشان تبدو أكبر في الحجم.
أما شعرها فأعتقد أن الموضة الحين الشعر الطويل مو القصير.. القصير مو دارج مرة مثل عام 98 أو 2000!
الحين اللي الاحظه ان اكثر العارضات والممثلات شعورهم طويلة أو متوسطة الطول.
واذا هي حابة تغير ستايل شعرها فانصحها تموج شعرها أو تدرجه أو تسوي له فرد يوكو.. وهذا موضة الحين.
والصبغة بعد مهمة لتغيير اللوك، بس لازم تختار لون مناسب لبشرتها وشخصيتها.
أما الحواجب فالموضة الحين هي موضة الثمانينات بالحواجب العريضة.. يعني الحواجب الرفيعة الضعيفة راحت موضتها وصارت أولد فاشن!
بس اذا هي شكلها بالحواجب العريضة مو حلو، اطلب منها ترتب منها شوي.. يعني مو تشيل منها كثير عشان الموضة مثل ما ذكرت.
والتغيير البسيط يحدث فرق كبير أحياناً.. يعني مو ضروري تشيل كثير من حواجبها.
والتشقير أفضل من الحف لأن الحف بالخيط أو الملقط يتسبب بترهل الجفن مع كثرة عمل هالشي.إضافة لكونه حرام و"لعن الله النامصة والمتنمصة"... أما التشقير فصحيح يزيد من كثافة الحواجب لأنه يخلي الشعرة سميكة أكثر، بس ما له تأثير سيئ على الجلد المحيط بالحواجب ولا أعتقد انه حرام. وبعدين كل ما طلع الشعر تروح للصالون وتعيد التشقير.. يعني ما في أي مشكلة!
أنا أعرف بنات يشقرون وحواجبهم مرتبة كلش كأنهم حافينها.
الحين ما في أحد ما يعرف يكشخ ويطلع بشكل مرتب وجذاب.. الفضائيات موجودة والإنترنت مو مقصر.. والأسواق مليانة من الماركات وبكل شارع تلقى صالون تجميل.... كل شي متسهل للمرأة بس اللي عليك انك تقنعها بذكائك وتخليها تمشي على ستايلك اللي تتمناه عليها.
وصدقني اذا قدرت تقنعها وشافت انك مستانس على اللوك الجديد حقها بتستمر على نفس الستايل وبترضيك على طول. بس هي الحين شكلها مترددة وخايفة.
تمنياتي لكم بالتوفيق وان الله يسعدكم دنيا وآخرة.