دايماً اقرا عن مواضيعكم عن طريقة استقبال الزوج او الزوجه
وكنت اقول ماشاء الله يسوون هالحركات لازواجهم وانا عمري ماسويتها لزوجي وقت جيته من السفر!!
يعني ممكن في يوم عادي والعيال برى اطلع انا وياه ونسوي حركات ووناسه بس انه يكون مسافر
وانا افاجئه بحركات غريبه وحلوه ماصارت معاي ابدا !!!
فتاثرت بكلامكم وحسيت اني مقصره وحبيت اني اسويها لزوجي وكتبت موضوع مره عن اقتراحات
وافكار ابي اسويها لزوجي لمن يوصل من السفر !!
وفي العاده كنت متعوده اني انا والعيال نستقبله واكون مستعده له ومتزينه بس مافي حركات غريبه
يعني بس ترتيب في البيت وتغيير لمكان الاثاث وتغيير فرش السرير ومثل هالامور اللي تعودت اسويها او
افاجئه فيها بس كلامكم عن المفاجئات خلاني افكر اسوي حركه حلوه لزوجي ومفاجأه جميله له حتى يظل
يتذكرها ......... بس للاسف صار العكس !!!!!!!!!!!!
استعديت لهاليوم وقلت هالمره عيالي بطلعهم من البيت بوديهم للألعاب ومعاهم الخدم حتى يفضا لي البيت
واخذ راحتي مع زوجي واسوي نفس الحركات اللي تقولون عليها !!!
رتبت لهالشي واخترت لهم المكان المناسب واتصلت للكوافيره تجيني البيت واخترت الفستان اللي بلبسه
وقلت بتعدل كاني عروس ............ وكل شي مشى اوكي للحين بس طلع لي على الخط ولدي البكر!!!
عمره 14 سنه !!! رفض يروح مع اخوانه !!
قلت له طيب بوديك أي مكان تبيه بس اطلع من البيت ......... ورفض !!!
قلت له وين تبي تروح بوديك ؟؟ قالي ابي اقعد في البيت !!!!
قهرني باللين وبالشده كلمته واقنعته وهو رافض يبي يقعد في البيت لما يأست قلت له وانا معصبه:
شرايك ارميك في الزباله !!! كنت واصله حدي !!! ورد علي وقال : عااااادي
يعني اللحين اخوانه اللي بعده سهل اقناعهم والصغار احط لهم قناة سبيس تون والا ارتيز للاطفال وخلاص مالهم حس
والخدامات اقولهم يروحون غرفهم وماشوفهم يبقى هو !!!!!!
المشكله الاحراج منه هو الكبير الفاهم الباقي امرهم هين !!!
ومع هذي الكل يطلع من البيت الا هو يرفض يطلع وقاعد عندي !!
ومع انه في مرحلة مراهقه يعني أي كلمه مني تجرحه يزعل الا انه هالمره عاااااااااااادي عنده مطنش ولا مهتم
ومايزعل مني وكلامي على قلبه مثل العسل !!!!!!!!!!!!!
لدرجة اني شكيت انه عارف اني ابي اسوي حركات لزوجي والله انا هالولد احسه يدري عني وعن اسمي
في المنتدى ويدري اني اخذت افكار منه ويبي يشوف وش بسوي !!!
المهم قلت يالله امري لله يقعد في البيت !!!
وانا قررت اني ماطبخ شي بس قلت بشتري عشاء لزوجي من المطعم اللي يحبه وبجيبله الاكله اللي يحبها حتى
مانشغل بالعشاء خاصه واني انا بروحي والخدم طلعوا
ورتبت كل شي وبعد ماراحت الكوافيره اخترت الفستان اللي بلبسه وافاجا فيه زوجي وبديت اسوي اللمسات الاخيره
فدخل علي ولدي ويقولي: بل بل شهالحركات !!! كل هذا لابوي !!! ليش يعني !!!
قلت له: اطلع برى !!!
قالي: تخيلي ابوي سافر يتزوج عليك !!!
قلت له وانا معصبه اطلع برى بسرعه !!!
قالي: جد والله تخيلي يدش عليج وبيده حرمه ثانيه شبتسوين !!!
انا احترق قلبي من كلامه وغرت قلت ليكون سواها زوجي وولدي يدري ومايبي يقولي او قاعد اللحين يقولي بس يهيأني للموضوع !! وبديت اوسوس !!!
رد يتكلم ولدي وقال شبتسوين بتضربينه و بتقولين له اطلع برى ياخاين والا بتكسرين البيت ( وطبعا يسوي حركات يعني يمثل الحركات اللي بسويها انا ) وانا ساكته ووقفت كل شي واشوفه وقلبي يحترق !!!!
شوي جر كرسي وقعد عندي وقالي جد جد والله يايمه شبتسوين لو دش ابوي وعنده حرمه ثانيه وقالت لج انا زوجته و ..... ماقدرت اتحمل كلامه و صرخت عليه وطردته من عندي وقفلت باب الغرفه بالمفتاح !!!
حشى مو ولد هذا عدو !!!!!!!
وبالفعل اثر علي كلامه وتكدرت انا مادري شعنده يسويلي هالحركات مايسويها ابد !!!!
بس بجد حاسه انه يدري اني خذيت من هالمنتدى هالافكار بدليل انه كل ماشافني في النت يقولي
هاه يمه زوجي يقول كذا وزوجي فعل هكذا او يقول ساعدوني اريد الحل زوجي سيتزوج علي !!!
او يقول نفس عناوين المواضيع في المنتدى !!
المهم انا تاثرت من كلامه وقمت اقول اما لو زوجي يدش علي بحرمه ثانيه !!!!!! اعوذ بالله الله لايقول !!
المهم نزلت وطبعا تعليقات ولدي يقولي: كل هذا لابوي وماعندك سالفه و ... الخ !!! وانا ساكته عنه !!!
وقتها وصل العشاء وانا طلبت دبل لحضرة ولدي قلت له يالله تعشى مابي اشوفك عندي انا وابوك فاهم !!
وقتها سكت لانه شاف العشاء وفضل يسكت ويتعشى وارتحت منه شوي
قرب الوقت لقدوم زوجي ووصل زوجي ومن عادته انه يروح لاهله يسلم على امه وابوه واخواته ويقعد شوي بس ويجيني بس هذاك اليوم طووووووووول !!!!
وبديت افكر بكلام ولدي واشك !!!!!!!! وقلت لولدي يتصل لابوه ماكنت ابي اكلمه !!
فكلمه وقالي اللحين ابوي جاي
وقعد ولدي عندي اقوله اطلع غرفتك العب سوني سو أي شي بس ابدا مو راضي وراي وراي ويبي يشوف !!!!
ووصل زوجي وارتبكت ودار في راسي كلام ولدي وخفت حتى من زوجي مادري ليش !!!!
كنت في الصاله مسويه حركات فيها يعني شموع واضاءه خفيفه وطبعا غيرت كل شي بسبة حضرة ولدي !!
دش زوجي بس...................... بروحه !!!!
ماعنده واحده ثانيه !!!!!!!!!
بغيت اطير من الفرح وفرحتي بانه ماعنده ثانيه اكثر من فرحتي بجيته من السفر
ومع اني اتفقت مع ولدي انه اذا شاف ابوه يطلع ويخليني انا وياه بروحنا الا اني تفاجات وانا اسلم على ابوه
واضمه انه واقف ويطالعني !!! غمزته اشرت له يطلع بس ماااااااااااافي فايده !!!!
فقعد معانا وقعدنا احنا الاثنين بكل ادب واحترام !!!
سالني وين العيال ؟؟ قلت له طلعتهم برى مع الخدامات حتى نكون بروحنا !!
طالع ولدي الكبير وكانه يقول طلعتي الصغار وخليتي الكبير !!!
المهم قلته تعال تعشى كنت مسويه له العشاء على الطاوله وكلها شموع وورود روعه
وطبعا ولدي ورانا تعشى ابوه عشاء عادي ماقدر اقول شي وحضرته يراقبني !!!!

طلعت انا وزوجي الغرفه عجبته الغرفه وترتيبها وشوي مالقيت ولدي معقوله !!!!!!!!!!
معقوله خلاني وابوه بروحنا !!!!!!!!

دقيقه بس الا وهو جاي عندنا ويقولنا يبه ربعك اتصلوا وقالولي ابوك وصل قلت لهم ايه من زمااااااااان
وقالوا اللحين بيجون !!!!!!!!
بغيت اجن يجون اللحين !!! وانا ماخذيت راحتي مع زوجي !!!
قلت له مو وقته مايستحون توك واصل من السفر وتوك تعبان !! قالي ماعليه ضيوف مايصير !!

ووصلوا الضيوف !! وبسرعه !!!
وكانهم داقين من باب البيت !!!
وقالي زوجي يالله جيبي لنا شاي وقهوه وفواله !!!
انا ...!!!!
انا اللحين متعدله ولا عروس واخرتها ادخل المطبخ !!!
تخيلوا دخلت المطبخ اسوي شاي وقهوه وانا لابسه كعب وفستان ذيل ومتشيكه !!!
والله فيني الصيحه !!! مايصير هذا يوم لي ولزوجي وانا متعدله وفستان وكعب وكشخه واخرتها في المطبخ !!!
والمشكله لاني متعوده على الخدم يعني اطبخ بس اقولهم عطوني مثلا الملح البهارات السكر الخ بس ماعارف وين مكانها اطلبها منهم واخذها واللحين الخدم مو موجودين وانا بروحي ومادري وين حاطين السكر والشاي يعني يضيع الوقت الين القى اللي ابيه ويالله خلصت الشاي
وبديت اسوي القهوه ويدش علي ولدي ويقولي ابوي قاعد مع الضيوف وانتي في المطبخ وقعد يضحك !!!!!!!!!
وشوي يعلق علي ويقولي السندريلا الخادمه !!!
انا ماعمري حسيت بقهر وطنازه مثل هذاك اليوم ومن من ؟؟ من ولدي !!!
المهم خلصت بالعافيه الشاي والقهوه والفواله
وقلت يالله بنتظر شوي بيروحون الا يطلع ولدي ويقولي ابوي يقول سوي عشاء !!!!!!!!!!!!
هنا قلت لا عاد حدك انت وابوك !! مصختوها !!!
اللحين زوجي اللي هو زوجي ماطبخت له اقوم اطبخ لاصدقائه !!!
واقوم اتصل للخدامات واقولهم يردون بسرعه هم والعيال علشان يسوون العشاء انا ماني فاضيه !!!
ورحت غرفتي وبدلت اصلا ماتركب لابسه فستان وكعب ومتشيكه وقاعده بروحي !!! ليش استخفيت !!!
وقعدت انتظر يروحون ضيوفه بس مافي ماراحوا نيمت عيالي وتعشوا وهم قاعدين !!!
وماطلعوا من البيت الا الساعه 3 ونص الفجر وزوجي دش البيت عندي الساعه 9 ونص !!!
وطول هالوقت وهم قاعدين عنده !!!
المهم ان هاليوم كان زفت ونحيس وانا كرهت افكر اسوي مفاجأه لزوجي !!
كل مره استقبله انا والعيال ويكون اكثر من رائع واللحين ابي اسوي مثلكم اعتفست واخترب كل شي !!!!

وبدال ماتكون مفاجأه طلعت فاجعه !!!

واتمنى ماتتكرر ابدا!!

والايام عندي كثيره افاجئه فيها غير يوم جيته من السفر وبدون وجود العيال وبدون ربعه !!!

واللحين من اقرا موضوع عن واحده تطلب حركات لزوجها اللي بيجي من السفر اقول ( على غيري )
و انا ماتنفع معاي وافكر اقرا بس ما طبق الا في يوم غير السفر !!!!

واستحاله تلقوني يوم اسال عن طريقه مبتكره لاستقبال زوجي من سفره !!!

او تلقوني اتأثر من كلامكم عن طريقة استقبال الزوج من سفره !!! ابداً ابداً !!!


اختكم صريحه جداً ............

__________________

ههههههههههه والله وماعجبني في الموضوع الا ولدك وخفة دمه ...
بس مو في وقتها للاسف..
صراحه سالفتك سالفه.. وولدك دامه نشبه وفاهم كان خليتيه يشتغل معك..
ويزين البيت لما يدووووووخ وينام ..هههههه
مافي امل اللي عندها عيال كبار انها تسوي شي لزوجها...<<==الله يستر مع اني ماجربت
بس باتعظ من سالفتك... مشكوووووره يا صريحه وخيرها بغيرها....

ولدج مب صغير.........ليش العناد
لو
أنا مكانج جان ذبحته

اختي الفاضلة .. مشكورة وما قصرت مع زوجك ..
انت عملتي اللي عليك .. وما راح يضيع ..وهو مكتوب في صحيفة حسناتك .. وفي صفحات
وفائك لزوجك ان شاء الله ..

خيرها بغيرها ...

أعتقد أن ولدك .. لو كلمتيه بهدوء .. وأقنعتيه بأهمية هذا اليوم عندك

صدقيني .. كان اقتنع .. لأن في هذا السن الأولاد يعاندون

وبالحب والهدوء والإقناع .. يمشي الحال معهم ..


ولدك ذكي جداً .. ما شاء الله

اهتمي بتنمية ذكائه ..

تحياتي لك

__________________

وش اللزقه الله يعينا اذاكبروا عيالنا مافيه حفلات ولاشي مادامهم فاهمين كل شي ويعرفون مالهم تصريفه


بس صراحه ضحكتيني اضحك الله سنك اسلوبك عسل ياصريحه

احيانا مافيه احسن من البساطه لوانك زي العاده كان سندريلا مادخلت المطبخ ههههههههههههههههههههههههههههههههههه

الحمد لله على سلامة زوجك , وبالعكس لا تيأسي وكل ما رد من السفر سوي له حركات أجدد ..
أما ولدك الله يعينك عليه ..

احسدك



على طولة بالك


ماشاء الله تارك الرحمن

لو انا مكانك

كان حاولت معاه باللين


مانفع معاه

بالعصا


بجد وانا اقرا قهرني ولدك الشيطون


وارتفع ضغطي من اصحابه


بجد كان بكيت وبللت الفرش بدموعي

قهررررررررررررررررررررررررررر


ثاني مرة

صرفي عبقور الله يحفظه

والباقيين خليهم

الله يسعدك يارب


تقبلي تحيااااااااااااااااااتي .............

الله يعينك على التعب واخرتها المطبخ
ولكن خيرها في غيرها
ولكن ولدك لا يستحي أو انتي عودتيه على كذا منذ الصغر

الله يسعدك

مره رجعت من السفر جلست على الباب أكثر من نصف ساعه انتظر فتح الباب زوجتي الله يهديها راحت عند اهلها وتأخرت في الرجعه علما اني اخبرتها برجعتي

__________________
جاء في الأثر أيضا خير الناس أنفعهم للناس .


ما أروع الانجاز والعمل المخلص اذا كان خالصا لوجه الله تعالى,, وكم من مؤمن وقاه الله شر صروف الدهر وأتراح الحياة فبارك الله له في عمره وماله وأولاده ووفقه الى كل خير وحبب عباده فيه، بسبب ما يقدمه في حياته[/SIZE][/B]

حشى مو ولد هذا عدو !!!!!!! خخخخخخخخخخخخخخخخخ


صراحه مقلب من قلب

__________________
FF3300اصدق في وعدك يوم حسسني انك وفي