زواجي الثاني .. وزوجه ثانية
السلام عليكم ... سأدخل اخوتي واخواتي في الموضوع مباشرة واتمنى منكم سعة البال وان تقرأوا مابين السطور وترشدوني لما ترونه ولا اراه لأني وصلت حدي .
تزوجت بابن خالتي وهو شاب ملتزم ويحبني .. ماكان عندي اي تحفظ عليه وبعد الزواج -في ليلة زواجنا يعني- وبمجرد ماحاول يتقربلي انقلب حالي قرفت منه وكرهته وماسمحتله يلمسني اطلاقا وهو كان انسان حساس وما حاول يستخدم العنف معاي ابدا , وبمرورالايام كان يزيد كرهي له بشكل كبيرولا يطاق وبدون سبب منه بالعكس كان يحاول يتقربلي بكل الطرق ولكن ..
تم الطلاق بعد سنه من التعب النفسي والروحه والجية من شيخ لشيخ لأنه طبيعي يشكون اهلي واهله اني محسوده او مسحوره او او ...
بعد طلاقي ماشفت خير في حياتي تمرمرت ومن خطبه فاشله للثانيه لحد ماصار عمري 28 سنه بديت انهار وكان عندي استعداد اقبل باي انسان بس اتزوج ..!! تقدملي رجل متزوج ولما عرفت انه متزوج بكيت على نفسي ماتوقعت يوصل فيني الحال آخذ متزوج مو لعيب في حاله بس انا ما اتحمل وجود شريكه لي بزوجي وخصوصا لما اكون الثانيه .
المهم في لحظة يأس وافقت لما عرفت ان زوجته كانت تعبانه وعنده عذره وبشرط مايكون بيني وبينها اي اختلاط هي في حالها وانا في حالي.. وافق وتم الزواج ومن وقتها وانا في عذااااااااااااااااب حسيت اني غريبة بينهم وجالسه اقول لنفسي وش جابني هنا وليييش اجبرني اختلط فيها واراعي مرضها للدرجه اللي اتنازل فيها عن حقوقي علشان رضاها وللدرجة اللي ما اكلم فيها زوجي قدامها عشان ما تزعل.. كان يداريها بشكل مو طبيعي على حسابي و كنت اقول انا الليي دخلت بينهم واستاهل اللي اشوفه وعمري والله ما اذيتها او تعمدت اثير غيرتها مو ضعفا مني لا والله بس لأنه عنذي قناعه انه مالي حق ازعل منها خصوصا انه معدنها طيب جدا ولكن غيرة المرأة على زوجها شئ طبيعي .... المشكلة مو فيها رغم غيرتهاالشديده اللي متعبتني المشكله في زوجي اللي مصمم يجمعنا وليته يجمع ويعدل لاااااااااااا يظل مهملني ويتعمد ما يكلمني قدامها مراعتا لها - كلام عادي مو غزل - طيب ليش جايبني عندها لما انت مراعي مشاعرها ..!! لما اطلبه نسافر يرفض بأدب - علشان مااظلمه - لأجل زوجته مع العلم انه مسفرها اكثر من مرة وقت ما اكون انا في بيت اهلي - في منطقه اخرى ... مايسمح انه يتقفل علي باب بيتي بحجت انه البيت واحد ويعلم الله انه اولاده في بيتي اكثر من بيت امهم وهم جدا خلوقين واحبهم لكن ما عاد لي اي خصوصية في بيتي وللأمانه كلهم محترمين جدا معاي واعاملهم والله بالمثل ... ولكن مشكلتي اني ابغى احس اني زووووووووووجة ..!!! انا احس ان زوجي وزوجته امي وابوي وعيالهم اخواني ... !!!! لا تضحكون هذا اللي صاير, مادامني عايشة معهم بهالطريقه يحطوني على العين والراس وان عشت كزوجه مرفوض..!! مثلا اذاخرجت انا وياه لوحدنا لما ارجع احس الادمية قالبه علي ومتضايقة .. ان قلت ابي اسافر لو مرة معاه لوحدنا تحجج .. ان كلمته قدامها تضايقت .. تعبت وقرفت وزهقت لو بأعيش مع اسرة اهلي اولى وابرك .. ابغى اعيش زوجه والله حتى غرفة نومي مالي خصوصية فيها ادري الغلط راكبني من راسي لساسي بس تعبت كذا مرة توصل مشاكلنا لطلاق للدرجة اللي صاروا فيها اهلي يتمنون طلاقي ووافقوني عليه بس ارجع اشوف تمسكه فيني اتراجع لأني وااثقه انه يحبني وواثقه كمان انه ما راح يلاقي وحده مثلي تداري ظروفه وظروف زوجته وتمشي على هواهم .. انا الان عند اهلي اجازة وهو مسافر ومو مبينتله اني تعبانه وافكر بجد باني انفصل عنه وارتاااااااااح
الموضوع صعب علي لأني لس احبه بس راااااااااااافضه نظامه وطريقة حياتي معاه اللي هي غير قابلة للنقاش عندة ياتعيشين على نظامنا او تروحين لبيت اهلك ..
رغم اني طولت عليكم لكني اختصرت امور كثيييييييييره تبرر معاناتي .. المطلوب منكم تقولولي هل انا محقه في طلبي الطلاق كوني اطلب ان اعيش كزوجه وان يفصل بيننا لتعيش كل منا مرتاحه وخصوصا اني اشترطت ووافقني على ذلك قبل الزواج .. ارجوكم افهموني ودلوني مشكورين
13-07-2007, 05:08 AM
ضوابط المشاركة
العرض العادي
