السلام عليكم
صباح النور
انا عندي مشاكل مثل اي متزوجه
لكن في مشكله متعبتني
مشكلتي مع زوجي
سلبي معي جدا وكل يوم عن يوم يتغير للاسوأ .. كنت متحمسه بداية الزواج واحل وابحث اما الان يأست لاني كشفت زوجي على شخصيته الحقيقه صعب الوصل له صعب التغيير مستحيل يتناقش ياما مشاكل بيننا حليناها بالصمت والاستفزازات والانتقامات من تحت لتحت هذا طبعه حاولت بكل الطرق اغيره صعب صعب صعب
حتى صمته كتوم وكل يوم يزيد خصوصا معي انا بالذات ...

الان مشكلتي الاساسيه زوجي دايما متوجس مني حذر ويفهم خطأ
طبعا امه للاسف هي السبب
بتقولون كيف عرفتي
طبعا الان نعيش هدوء وصمت في علاقتي مع زوجي واهله اما قبل هالفتره عشت براكين
وزلازل وصحت اي معدن ام زوجي الله يهديها
زوجي لو اقرب منه يبعد عكس الناس
لو ادلعه يكرهني
لو امدحه يناظرني بشك ويفرح شوي ويقلب يعصب ويصارخ
ويقول ايه على بالك يمشي علي مدحك عشان تركبين راسي !!!

لو ادلعه يقول ليش كل هذا؟؟ وشتبين خلصينا طبعا بمزح واحي واضح انه وده يفرح مقل اي زوج وطالعه الفرحه من عيونه لكن يتراجع باخر لحظه يقول اكيد وراك شي الحربم مايدلعون الا وراهم شي
اطلب شي منه لازم تحقيق ليش وكيف وشلون
ومع كل هالاسئله اكتشف انه يفتش من وراي ويسأل ولايكتفي بكلامي ولايثق بي
لو اتعرف على زميله يمووت لما يتعرف على زوجها ويتحقق من كل كلامي وتحركاتي
يعني بالعربي شكاك بنواياي واني ابي امشيه بالكذب والمدح
طبعا كل هذا بسبب امه كانت بداية الزواج تقولها قدامي صريحه
لو مدحته تقول بمزح قدام زوجي والله يافلانه انك ذكيه تمدحينه عشان يصدق ويسويلك دايماا هالشي!!!
طيب فرضا هذي نيتي فيها شي لو اخذ من زوجي اللي ابي بالسياسيه والكلمه الحلوه؟
لو امدح عشا او شي بعزيمه لناس وهو معنا بالجلسه يسمع
تسكت وتتبسم تقول لا مو لهدرجه ولا عشانهم مدحوك راضيه عليهم وتتضحك!!!
وهم فعلا مدحوني لكن ابدا ماكان هذا تفكيري
وبرضو دايما اي شي اعاني منه مع زوجي مثلا عصبي ويبي كل شي بسرعه تروح تتكلم عن اخته تقول مسكينه اختك زوجها بارد وبليد ومهمل
واذا شافتني بشتري شي ومصممه عليه تروح تقول عند دوجي الشي الفلاني حلو؟؟يقول مدري بس اتوقع حلو
تقول ايه سالت فلانه عنه وتسببه حتى فلانه شرته تقول الي يبيه ياخذه بدون فلوس وانا لو زين شريته بس مشكله تجميع الاغراض بلبيت مايصلح لو كل شي ابيه جبته كان بيتي مستودع وتضحك على اساس تضحك السالفه !!

الان زوجي بعد هالسنين من الزواج
شبه مغسول مخه مايتقبل مني شي صار مايحب يسمع شي من كلامي ودايما يشك باي شي بمعنى الكلمه !!
لو اقوله خلصت الفواكه يسكت وادخل القاه يفتش بالثلاجه
حتى صار يعيد نفس كلام امه لو ارجع من مناسبه وامدح اي شي يقول شكلك راضيه عليهم اكيد مدحوك
انتم الحريم .....الخ!!!
يعني بالعربي ماخلت لي مدخل على زوجي دايما متحذر مني ومتخوف من قربي وتدليلي له يشك وراي شي
حتى عيالي ياعالم تحرش ولدها على عياله
الي تشوفه مؤدب ويطيعني تقول انه دلوع ومو اجتماعي ويحب كل سي على كيفه !!
والي يعارضني وعنيد ولسانه طويل علي قدام الناس تمدحه وتكبر راسه وتحبب زوجي فيه !!

طبعا الان انا بحالة يأس
ابتداء مني انا وانتهاء بولدي اللي احسه مكسور ومهمشينه وبس يتطنزون عليه ويحقرونه رغم انه بالادب والذكاء معهم مرررره هو الي الوحيد من احفادهم الي يحب راسس جدته وجده
مع ذلك مهمش لانه متعلق فيني ولو يبي الشب واقوله لا قال سمي ماشاءالله تبارك الله هو فيه حقه لكن مو قدام الناس يعني قدامهم مؤدب ماشافوا شي منه !!
وش الحل ياجماعه
الان زوجي بعييييييد عني هو شرق وانا غرب بنفس البيت لكن مااعرفله نهائي ولالقيت له مدخل ولا اقدر اتواصل معه
اي خطوه اقرب له يبعد ويشك ويتهزا يعني بالعربي كانه يقول تبين تلعبين علي؟!
عايش حياته مع اهله
وانا ابعدت عن اهله وتحاشيتهم بالمره بسبب مشاكل امه المستمره
وخصوصا عشان عيالي لاني بديت الاحظ تفرررقه ولدي الي يسمع كلامي محقور ولو سلم تهزوا عليه وضحكوا
واللي يعاندني وقليل ادب يرفعونه للسمااااا ويمدحونه
ولايوضحون هالشي الا بغياب زوجي
قدام زوجي تعاملهم معهم مثل بعض
وانا تحاشيتهم عشان عيالي بصراحه ولدي تاثرت نفسيته بشكل واضح
حتى ابوه قلبوه عليه وصار يكرهه بدون سبب يكلمه الولد مايرد عليه يتجاهله
والثاني ساكت وعلى ايباده ونفسه شينه والوه بس يسولف عليه ويضحكه !!!!
طبعا انا الاحظ وجه ولدي الصغير يتغير ويتضايق لكن مايوضح ابداااا
السؤال ؟!
هل طريقتي صح ؟!
خصوصا لاحظتي اني سيطرت على عيالي وارتاحت نفسية الصغيرر جدا جدا جدا
واساسا هو مايروح لجدته وجده وعمومته الا بشرط انتي تجين معي
الاول مايهمه اساسا ولايبي يروح
انا ارتاح مخي من المشاكل
لكن زوجي وانا بيننا حلقه مفقوده مازال يتوجس مني ولايصددقني باي شي
ولالقيتله مددخل ابداااا لابمدح لا بتطنيش لا بزود اهتمام لا بشر ولابخير
اللي عنده حل لايبخل علي
والي ماعنده تكفيني دعواته
والله يكفيني وياكم شر من فيه شر ..
ارحب بكل الاراء سواء موافقه او معارضه لي بدون تجريح
تراي وانا اختكم واصله معي للحلقوم يعني مستويه هههههه

__________________

اعتذر عن الاخطاء الاملائيه حاولت اعدل لكن انتهى وقت التعديل !

__________________

من قالك زوجك ماله مفتاح

واضح مليون بالميه إن مفتاحه أمه
هي مدخلك لزوجك .. ضروري تكسبينها
عشان تكسبين زوجك ..


عيالك خليهم خط أحمررر لا تسمحين لأحد يدمرهم نفسياً حتى لو كان أبوهم .

__________________
استغفر الله العظيم وأتوب إليه .. سبحان الله ..الحمد لله.. الله أكبر

طيب
علشان افهم بس
كيف اكسبها ؟ عشان ارد عليك من تجاربي او استفيد

__________________

ربي يعينك ويفرج همك ويبعد عنك الشر ويهدي زوجك وامه

توددي لها ..
جيبي لها هديه كل فتره وفتره
اطلبيها تعلمك مثلاً طبخة او شي

شوفيها وش تحب ودايم افتحي معاها سوالف عن الشي اللي تحبه
لا تجيبين طاري زوجك قدامها اذا جاب شي للبيت او وداكم مكان
حاولي مثلاً اذا بتطلعون تتمشون او تتسوقون تلحين ع زوجك انها تجي معكم
وكلميها انتي ..

احرصي ع زوجك يبرها قولي له إنك تبغين البركة والبركة ماتجي الا من بر الوالدين
تكلمي معه دايم عن الأم حسسيه انك مهما بدر من كبار السن اتجاهك ان لهم مكانه
بقلبك وتقدير خاص لهم ولسنهم ولطبعهم ولذبيعة الحياة الصعبه اللي عاشوها قبلنا ..

مدري وش بعد اقولك بس انتي وشطارتك
صدقيني ام الزوج سهله جداً ولو حبيتيها بصدق وتعاملتي
مع اساليبها برفق ولين بتكون هي مفتاح زوجك ..


ويمكن زوجك فيه طباع غريبه ومريبه .. اذا عرفتي نمط شخصيته
بتعرفين بالضبط كيف تتعاملين معه ..

مدحك له يمكن يكون بطريقة مصطنعه ما يكون فعلاً صادر من قلبك ..


باقولك انا مره كنت مع زوجي مسافرين آخر الليل والطريق موحش ومظلم ومافيه سيارات غير سيارتنا .. فجأه وحنا ماشين اطفئ النور حق السياره متعمد يخوفني والصدق انا ماخفت لأني حقيقة احس معه بالأمان مهما كان اللي حولنا مخيف ، الشاهد اني قلت له عادي ما اخاف ... اندهش واستغرب لانه يعرفني بزاية زواجنا اموووت ولا يطفي نور السياره بالليل ..
قال غرييييييبه بضحكه استهزاء ..
وانا تلقائياً قلت والله وانا معك ما اخااااف احس بالأمان
وثانياً سواقتك للسياره تعجبني انت الوحيد اللي اذا ركبت معه ما اشيل هم
الطريق وطريقتك في القياده بعكس اذا ركبت مع اخوي فلان والا اخوك فلان
اقعد متوتره طول الطريق اخاف من سياقتهم ..

والله انا قلت هالكلام بعفوووويه وصدق يعني عشان الموقف اللي صار لحظتها .
بس تعالي شوفي مفعول هالمدح

قسم بالله بدون مبالغه لليووووم مفعوله ...
وكل ما مشينا يحاول يفتح السيره عشان امدحه مره ثانيه

ليش اقولك هالكلام ؟ لازم انتي تركزين ع الشي الايجابي في زوجك
وتستغلين الفرصه المناسبه للثناء عليه ولا تبالغين بالمدح يعني يكون بطريقة التلميح
اذا سألك فسري واذا سكت خلاص خليه وهو بيحلل بنفسه ويستنتج الثناء..

مدري اذا كلامي بيفيدك والا لأ بس ان شاء الله اكون افدتك

__________________
استغفر الله العظيم وأتوب إليه .. سبحان الله ..الحمد لله.. الله أكبر

جميل كلامك انكسار حلم
انا احب احاول وابحث واجدد لكن برد على كل اللي قلتيه
بالنسبه لام زوجي هي عندها خوف من سيطرتي على ولدها
لذلك هي تحاول بكل الطرق تسبب مشاكل حتى ماتخاف عليه وترتاح انه نعيش متمشكلين عشان هي بالمقابل تكسب ولدها
مااقول هالكلام تفسير من راسي لا هذي خطوات دايما تصير
يعني خوذي مثال اذا شافتنا راضين مع بعض زعلت بدون سبب وتتوجع وتتباكى ولدها فاهمها لذلك
يطنش انا اتفاعل معها واسألها وشفيك خاله سلامات ماترد وتزعل اكثر. يعني مابي منك السؤال والاهتمام ولاترضى لما زوجي يجي يراضيها
انا مره غيرت اثاث البيت عزمت اهل زوجي واتصلت على ام زوجي رفضت وكان زوجي جنبي
قالت لا مرتبطه قلت اليوم الي بعده قالت برضو مرتبطه
قلتلها طيب اختاري يوم يناسبك قالت خليها بعدين بعدها بيومين جاني زوجي منفعل يقول امي زعلانه تقول ماعزمتني !!
قلتلها الا فلانه عزمتك قالت لا ابدا ماعزمتني واني ترا واعدتهم بكره يجون؟!

وجت وتضحك وتسولف وعادي
الموقف الثاني
انا مره طالعين مكان من نفسي دقيت على ام زوجي قلتها ياخاله نبي نطلع المكان الفلاني وش رايك تجين معنا
قالت لاوالله ماقدر الحين وصرفتني
من بكره طلعنا لنفس المكان وقال بقول لامي فجاه طلعت وطول الطريق تنافخ على زوجي يعني كيف تخلي زوجتك هي الي تعزمني
يعني هي ماتبي مني اهتمام بالعكس تزيد غيرتها هي تبي ولدها يهتم فيها واحيانا تتمادى ودها زوجي يهمشني لخاطرها
الهدايا من عرفتها وانا اهديها ان كانك شفتي شي من الي اهديه لها تستخدمه فانا شفته
وعن الحلف شفت شي لكن للاسف مع خدامتهم !!

اذا عاملتها باهتمام تتمادى ،، هي ماتبي مني اهتمام بالعكس تتضايق تبي زوجي يطنشني ويهتم فيها
وانا من الاساس طريقتي انا وزوجي رسمييه معه مع انه هو عكسي عند اهله يحب يغمزلي ويسوي حركات ونظرات وانا ابددددا مااحب واطنش اسوي نفسي ماشفت عشان مابي اضايق الام والبنات برضو
دايما امدح طبخها واسالها واساسا انا وياها مابيننا مشاكل لو تشوفيننا جالسين نسولف تستانس علي اكثر من بناتها
لكن المشكله انها ماتبي زوجي يهتم فيني لاانا ولاعيالي
جربت كل شي تتخيلينه
وزوجي اعترف كذا مره بكذا موقف انك انتي ماسويتي شي
وماعليك منها سو الي عليك وتبي تصدق تصدق ماتبي كيفها !!
ويررجع يقلب علي
بالنسبه اني اوصيه على امه جربت واستغربت من رد فعله يحاول يغير الموضوع مايبيني ابدا امدح امه او اتكلم عنها بشي حلو
ويغير السالفه بكلام حلو او بوديك وبحطلك مدري وش وضعه هبل بي
بالنسبه للمدح
انا اجامله وامدحه من قلب. مع انه الامور الي يمدح عليها نادره هههه بس ندور
مع ذلك يفرح ويتشقق بس يتراجع على طول يحس اني العب عليه

__________________

بإذن الله يفيدوونك الأعضاء هنا
انتظري يصحون للحين الظاهر فيهم النايم وفيهم المداوم ..

بانصحك نصيحة أخت لأختها :
في كل سجود لك في فريضة أو سنن رواتب أو وتر
لا تنسي هذا الدعاء بعد قول سبحان ربي الأعلى

اللهم اجعل همي الآخرة ..
اللهم إني أسألك رضاك والجنة ..

.........،...........
وبتشوفين الفرق في حياتك ..

__________________
استغفر الله العظيم وأتوب إليه .. سبحان الله ..الحمد لله.. الله أكبر

شكرا على النصيحه
وباذن الله راح ادعي بها يوميا وراح اضيف عليها دعوه حلوه لك ماقصرتي

__________________

عليكم السلام ورحمة الله وبركاته

أختي الكريمة

العلاقات الاجتماعية فيها خيوط مترابطة ببعضها البعض وكل خيط له تأثير بالآخر

أوضح بمثال : البنات اذا تقدم لهن شاب يسألون هل هو بار لوالديه ؟ لماذا هذا السؤال ؟ لان هناك خيوط مترابطة وهي أن فكرة من يحسن لوالديه سيحسن لزوجته فربطوا خيط الاحسان للوالدين بخيط الاحسان للزوجة (طبعاً أنا ليس في صدد الكلام عن صحة فكرة الاحسان هذه لها ربط بتلك أو لا)

في بعض الاحيان نحن من يشوه صورة أنفسنا بأيدينا ونرسم للآخرين طابع معين عن أنفسنا ، فمثلاً لو إمرأة تغتاب الناس (تحشهم حش) فسيتكون عندكِ وعندي وعند كل عاقل أن هذه المرأة في يومٍ ما ستغتابكِ وتغتابني لان عندها طبع عدم التورع عن (الحش في الناس) وأنا وأنتِ واحد من الناس فكما حشت فيهم ستحش فيني وفيكِ.
فهذه خيوط نربطها ببعضها فالخيط الاول (الحش في الناس) نربطه بالخيط الثاني (الحش فيني وفيكِ) .

أعطيكِ مثال أخير على تشويه صورة أنفسنا وسيكون كلامي واضح وستصل الفكرة لكِ بدقة .

تصوري يأتي موظف لزملائه في العمل ويقول لهم أنا استطيع أجعل الموظفين مثل الخدم عندي وأحصل كل ما أريده منهم بالتحايل عليهم والمدح فيهم كذباً ونفاقاً لأجعلهم خدام لدي .
تخيلي معي كيف ستكون ردة فعل الموظفين الذي يعملون معه وهو يقول لهم هذا الكلام ، هل تتوقعي أحد سوف يساعده وهو بهذه الطريقة من التفكير الاستغلالي بالكذب والنفاق والتحايل ؟
بلا شك لن يثق فيه أحد وكلما اراد يمدح أحد سيقولون له نحن نعرف أن هذا المدح ليس لله وفي الله وليس صادق من القلب وانما تريد مصلحة ونحن لا نريد منك مدح ونكره المدح الذي فيه نفاق وكذب ومصالح .

أختي أظن أن زوجكِ حصل عنده طابع انك لا تمتدحيه إلا في وقت المنافع والمصالح ، وأن هذا المدح ليس صادق وليس حقيقة ، فبتالي تصبح عند زوجكِ كره لاي مدح تمتدحينه ولا يريد يتقبل منكِ المدح الذي غرضه المصلحة ، فالرجل يحب من زوجته المدح الذي ينتج من الحب والاعجاب والارتياح وليس المدح المزيف المصلحي.

راجعي نفسكِ يا أختي فلا تدرين لعلكِ أخطأتي في تكوين طابع مغلوط عند زوجكِ فقبل أن تلقين السبب على أمه فربما أنتِ صدرت منكِ أشياء من غير قصد . فسبحان من لا يسهو ولا يخطأ .

وهناك نقاط ثانية لا يكفي الوقت للحديث عنها ولكن لم توضحي لنا ، هل تزوجتما عن حب ؟ أو زواج تقليدي
وكم أعماركما ؟ وما هي اهتمامات زوجكِ وثقافته وهواياته ، فإن كان مثقف ويحب قراءة الكتب سنرشدكِ لبعض الكتب.

أرجو الاجابة أختي