السلام عليكم ورحمة الله وبعد:
راح اقول اللي بقلبي موضوعي ملخبط شوي وان شاء الله تكونون وسيعين صدر معاي

انا عمري 18(على الأقل بعد اسبوع) سعودي ومشكلتي هي الخوف من مواجهة الاخرين

منذ ان كنت صغيرا وقد نشأت على الطيبة(الزائدة) والاحترام والبعد عن المشاكل

هذا الموضوع لأول مرة اطرحه على احد لأني تعبت بصراحة وما احب اقول مشاكلي لغيري,يمكن تكون مشكلتي سخيفة لكن بالنسبة لي كما يقال(بلغ السيل الزبى)
لا اعلم هل ما اعانيه هو ضعف بالشخصية او هو جبن او خوف غير مبرر
كثيرا ما اواجه بالمدرسة(انا صف ثالث ثانوي) مضايقات في الفصل من بعض الطلاب ولا ارد, اما لأن الذي امامي طفل لو رديت عليه راح يزيد.او لأنه من (المهايطية)اخاف ان اضرب او يأتي لي بشلته لأني وببساطة اصدقائي قليلون
في حياتي ما قذفت ام احد او سبيت سب(بذيء جدا) لاني صراحة استحي واعتبر سكوتي هذا ضعف حتى لو سببت من احد ما ارد عليه الا بسب(خفيف)
انا محتقر نفسي مرة وانعزالي مقصر في صلاتي مدمن على العادة (السيئة) اللي اتعبتني وحاولت اتركها لكن ما قدرت.
دايم على الاب توب (مفيد وغير مفيد) او اقرأ المهم اني ما احب اطلع ,اخر مرة طلعت لمجمع بدون مبالغة من ثلاث سنين,ولا احب اطلع مع اهلي , دايم انحرج بزيادة لو كنت قدام حرمة حتى لو من محارمي كثير ما ارفع صوتي على والديني مع اني والله اندم,ما ادري لو احد تحرش بخواتي هل ممكن اني اقدر ادافع عنهم او لا(ما صارت لكن انا دايما احط افتراضات) كنت حافظ القران والحين شبه نسيته بسبة رفقة السوء (وهذا احد الاسباب الي خلتني ما اسوي صداقات مع احد)
ابوي (وهذا سبب موضوعي كله) نفس شخصيتي تماما,وهذا اللي كرهني بنفسي ما ابي اصير مثل ابوي

لأن ابوي ما ياخذ حقه لو انظلم,متسامح جدا,دايما يكذب على امي لو سوى شيء غلط(عشان ما يطيح بالمشاكل) او يقولي لا تقول لأمك شيء,وايضا يعتمد على غيره في اموره ولا يتصرف ومقصر في صلاته وينام عنها ويطالع افلام(توصل للجنسية) وانا عارف وساكت وكم مرة واجهته,وفيه اللامبالاة يعني لو فتحنا التلفزيون وشفت المسلمين في فلسطين اوالمساكين في ليبيا او سوريا ,واقوله تخيل احنا مكانهم وما ودك لو تساعدهم ,يقول دام انك ماكل وشارب مالك دخل في غيرك
دايما يقولي لا تتهاوش مع احد حتى لو شفت خويك ينضرب مالك دخل(وهذا اللي خلاني اكره هالضعف وما ودي اصير مثله),ابغى الحق على حالي قبل ما تصير هذي شخصيتي طول حياتي

امي على النقيض من الوالد(شخصيتها قوية جدا جدا) محافظة على العبادة,ولكنها ودايم تحبطني برجولتي واني خواف وجبان وما اقدر اتصرف(طبعا نفس الحال مع ابوي)

انا ماراح اتعذر باخطائي وارميها على ابوي انا ابي بس احل مشكلتي

عموما امي واضعة امل كبير فيني واني اصير مهندس او دكتور(انا متفوق ويمكن الصفة الوحيدة الحلوة فيني) وانا والله احبها واتعب في دراستي عشانها واحقق لها اللي ما حققه ابوي لأنها صارت لها مشاكل كثيرة في حياتها غيرتها وخلتها عصبية لكن الله يهديها على اسلوبها(للعلم حالتنا المادية متوسطة)
وعندي قناعة اني ما راح اصير اللي تبيه امي الا لو غيرت شخصيتي الضعيفة
انا دايما اشارك برأيي واقول كلمة الحق,لكن اخاف اتواجه مع الشباب في المضارب(يمكن لاني قصير طولي 170 سم)

خوفي هو من المجهول ومين اللي بتقبل فيني مستقبلا وانا بهذي الحالة وكيف راح اربي عيالي واخليهم رجال ما يخافون الا ربهم,

ابي حل لانعزاليتي والخجل الزائد وتقصيري في صلاتي والقدرة على مواجهة الاخرين واخذ حقي لو انظلمت لأن عندي قناعة انه في هذا الزمن ما تنفع الطيبة

وابيكم تسامحوني على طول الموضوع

طيب خوي ماشاء الله عليك
يكفي ان عندك رغبه تكون رجل صالح طيب قوي غير متخاذل
وهذه اهم نقطة
اول شئ ابدا مع ربك
حافظ ع الصلاة وجاهد نفسك
وراح تصلح امورك كلها ربي بيكون معك وبتكتسب قوة وهيبه داخليه بسبب ايمانك
القوة مو في المضاربه القوة بقوة الرجل من داخل
بالعكس تلاقي رجل يضارب كل واحد يشوفه بطريقه
وهذا بنظرك قوي لكن للاسف لما تقرب منه تلاقيه رجل ضعيف متخاذل لايملك اقل مقومات الرجوله
حديث الرسول صلى الله عليه وسلم يبين القوة في الصبر وكتم الغيظ وليس في المضاربه
(ليس الشديد يالصرعة انما الشديد الذي يملك نفسه عند الغضب)والمقصود بالشديد في الحديث اي القوي
وصراحة في خاطري كلام كثير
لكني ع عجله من امري
ان شاء الله الاعضاء مايقصرون
ولي عودة

__________________
صحيح ’’أنثى’’ ولكنـي وقفت بـ قلب متـحدي !!

استغرب منك بس بإعجاب شديد كل اللي يكتبون ويقولون من الأعضاء نشتكي من نفسيه محبطه بقول كيف ولديك مهاره التحدث والكتابه يعني انت مو عاجز
بعدين انت بالعكس والله مو مجامله اكثر من رائع بالله قلي أحد في سنك يكتب مشكلته بمنتدى وشاب هذا يعني انه عقلاني بغض النظر على السلوكيات اللي ذكرتها الخاطئه بالنسبه للنت انت مو خجول انت تربيت على مباديء ماأقول غير الله يكثر من أمثالك أعجبني كلامك لمن قلت ولامره شتمت ام احد تدري لماأمشي بالشارع وأسمع سبهم أقول فين أهاليهم عنهم انت تملك اساسيات ويبغالك فقط اشياء بسيطه لاكن غيرك أصلآ ماعنده أساس قول الحمدلله وانت عاقل مو خواف وتحسب لكلامك حساب الله يوفقك بس أبدأ فتطوير نفسك بالي فيه خير
إنت لبق محترم مؤدب ماتحب تجرح أحد أنظر لهذي الأشياء مناطق قوه فيك مو ضعف

اخي الكريم , اجب على اسألتي لو سمحت
1) هل تشعر انكَ مُحتقر ؟ , هل تشعر انكَ اقل من الناس ؟ وان الناس لا تقبلك؟

2) هل تشعر بخفقان عند مواجهة البشر ؟ تعرق ؟ تشعر انكَ ستتلعثم عند محاولة بدأ محادثه بينك وبين احدهم ؟
هل تشعر انك خارج " الجمعات " شخص طبيعي ولاتعاني من اي مشكلة ؟

طالما انت رافض الصفات دى متعملهاش واعمل عكسها

- انت شجاع بس مشكلتك (((ضعف الثقه بالنفس)))
اذا زدت بثقتك بنفسك زانت امورك (وبعلمك كيف بالاخير)
- مشكله المدرسه انت الحين بصف ثالث ولا تخلي التصرفات اللي يسوونها الطلاب تأثر عليك بدراستك ركز في هدفك وما عليك منهم وهانت ما بقى الا فتره بسيطه وتنتقل للجامعه وان شاء الله بتكون اضفت لشخصيتك المميزه الفتره الجايه نقاط قوه بأذن الله
- بالنسبه للسب والقذف ما اعتقد ان هذي اخلاقك.. انت اخلاقك اعلى من الكلام التافه وماهو معنى ان الواحد يسب انه قوي شخصيه
- تفكيرك السلبي( ماله أي اساس) اللي خلاك تفكر انك ما تطلع وتغير جو وما تطلع مع اهلك (عزلت نفسك) وانك ما راح تقدر تدافع عن اهلك لو تعرضوا لمشكله .. اضافه الا انك تحمل نفسك ذنوب انك نسيت القرآن وتمارس العاده السريه وتحمل نفسك فوق طاقتها وتجلس تجلد في نفسك.
- خوفك انك تصير مثل ابوك
شف يالغالي انت رجال عن ميه رجال وهذي ماهي مجامله انت عندك اخلاق عاليه بس اشياء بسيطه وتمشي الامور معك تمام التمام
اولا: ارفع ثقتك بنفسك بتقولي كيف؟
1- خل لك مقياس من واحد الين عشره تقيس به ثقتك في نفسك ولا تستعجل بالنتائج يعني لو زدت بالشهر نقطه وحده اعتبره انجاز
2- لا تلتفت للانتقادات والتحطيم اللي يجيك
3- ثق في قراراتك اللي انت قاعد تسويها ولا تتردد
4- اعتبر ان ثقتك في نفسك عاليه
5- لا تخاااااف خل قلبك حديد
6- انتبه من تفكيرك السلبي لا تسمح له يأثر عليك
7- تذكر دائما ان لك انجازات عظيمه وممكن تراجعها مع نفسك
ثانياً: ابتعد عن الانعزاليه واللي سببه الخجل الزائد وهذي ممكن تحلها بعده خطوات
1- سولف مع اقاربك (عم خال ابناء عم ) في البدايه راح يحصل منك ارتباك بس لا تفكر ولا يهمك وواصل بشجاعه (بتصير بعدين تصلي بعشر صفوف ولا يهمك ههههه )
2- اذا احد منهم طلب منك شي وما تبي تسويه ومالك رغبه قله (((لا))) الا والديك طبعا
3- حاول تشارك في النقاشات (( لو اخطيت لا تلقي بال واااصل ))

ثالثا: وهي اهم شي بالموضوع وبدونها اسمح لي ما راح تقدر تسوي شي.. صلاتك وانا اخوك اهتم فيه ولا تطاوع الشيطان وتطاوع نفسك ترا الواحد لو طاع نفسه ما سوى شي وبر الوالدين تراه خير وانا اخوك عظيم انا ما صرت على اللي انا عليه الحين الا والله برضى الوالدين والله ان الواحد لا صلاه صلاته وجاء وحب يد امه وابو ورجليهم بعد(لو يسمحون) ورضو عنه يحس ان الدنيا كلها طوع له (رغم اننا احيان بداخلنا نختلف معهم بس لرضاهم نقول ابشرو) وتراها شجاعه ماهي ضعف.

وبالنسبه لشخصيه الوالد الله يطول بعمره شف انت لك شخصيه وابوك شخصيه وكل انسان بالدنيا له شخصيه حتى الاخوان تلقى كل واحد منهم له شخصيه غير الثانيه لا تخلي شخصيه الوالد تأثر عليك

شف وانا اخوك مثل ماقلت لك انا تقريبا كنت مثلك وكانت عندي ظروف والين فتره قريبه كنت ابكي بكى لحالي الله عليم بحالتي ووصلت لمرحله وقلت بس هنا وخلاص وكان لي صديق الله يجزاه الجنه عطاني كلمتين اوجعتني وبديت بعدها افكر بنفسي وقررت اغير وضعي .. الحين انا شخصيه ثانيه بفضل من الله سبحانه وتعالي بس صبرت وقاومت احباطات كثيره ولا تتوقع ان الناس كلهم ثقتهم بأنفسهم عاليه لا بالعكس الانسان تحصل له مواقف تضعف ثقته بنفسه وبعدها ترجع بس الحين وانا اخوك اشور على كبار بالسن واتصرف من راسي وسويت اشياء ما يسويها اشجع شخص وما يهمني أي احد ما اخاف الا من الله.
اتمنى اني قدرت اساعدك بشي بسيط وان شاء الله نسمع الاخبار الزينه.. واي شي تحتاجه لا تستحي ما عندك الا اخوك ومتى ما احتجتني راسلني على الخاص

المشكلة يا اختي انك مثقفة وواعية وعشان كذا تشوفين انها تصرفات صحيحة وهذا من طيب اخلاقك اللي تربيتي عليها,لكن ايش تقولين عن الهمج اللي يفسرون الطيبة (بالضعف)
شاكر لك الدفعة المعنوية لي

تسلم اخوي وراح اخبرك بالنتيجة

السؤال الاخير ما فهمته صراحة

مشكورة ,والله يعيني على اداء الصلاة لاني فعلا مقصر كثير فيها