السلام عليكم اخواني واخواتي.
بصراحه احب هالمنتدى وايد وعشان كذا لما كنت حاسه بحزن ما ترددت اني اطرح مشكلتي وكنت صريحه مو لشي بس لاني كنت اتمنى اسمع نصائح وما خاب من استشار وانا كنت حابه اغير امور كثيره بس للاسف صراحتي جابت نتيجه شويه عكسيه لاني لقيت انتقادات بدلاً من نصائح.
المهم انا ما زعلانه وايد لان الانتقادات تساعد الانسان انه يتغير للاحسن وهذا هو الهدف الاساسي. بس اللي حبيت ااكد عليه اني انا انسانه طيبه وقلبي كبير وعاطفيه لدرجة كبيره واللي يحبني مره احبه عشر مرات.
متزوجه صار لي عدة اشهر . حاولت اكون لزوجي كل شي يحبه. كنت اعامله مثل الطفل وابدا ما اطلب منه شي عشان اعرف الضغوط الماليه اللي عليه والحمدلله انا بعد اشتغل فابدا ما اتشرط عليه. بالعكس انا اللي اشتري له الهدايا دايما وما احب يطلع جدام الناس وهو مو اوكي. وساعات ابديه على نفسي واذا حاسه انه ما عنده مبلغ اعطيه باللي الله يقدرني عليه. واسوي كل هذا وانا سعيده بس كنت اتمنى بالمقابل انه يعاملني بالمثل لكن ....
بصراحه ما اعرف اذا كان جد يحبني او مجرد متزوج وحده تشتغل عشان تصرف عليه. انا بخبركم بعض سلوكياته وانتوا احكموا:
* دايما يذكرني بالديون اللي عليه على الرغم من اني ساعدته في مصاريف الزواج وانا بصراحه ما احب الانسان اللي يحسسني اني السبب في مشاكله.
* تونا عرسان صار لنا 6 شهور ابدا ما كلف نفسه يشتري لي حاجه بسيطه. زجاجة عطر ، ورد اي شي. مع اني دائما اشتري له.
قلت يمكن ما عنده فلوس بس سافرت مره لظرف عمل وما سالني ابدا اذا محتاجه شي او ناقصني شي مع انه في هذه الفترة كان عنده مبلغ محترم. عاد يوم وصلت للبلد الثاني جان يسألني حبيبتي تبي فلوس!!!!
* يوم رجعت ما كلف خاطره يحط شي في الثلاجه. فواكه، مشروبات. كانه ينتظرني انا اسوي هاالاشياء.
*اذا مزاجي مو اوكي اخبره عشان يقدر حالتي بس ابدا ما يفكر يسوي اي شي يطلعني من ها المزاج. ياخي عالاقل جيب لي ورده . قول حبيبتي والله زعلتج ما اقدر عليه. ما يفكر يتقرب لي طول اليوم الا واحنا على السرير!!
*اذا طلبت منه شي مثلاً يشيك على سيارتي يقول لي انا سيارتي ما اشيك عليها!!
* شويه ظروفنا الماديه صعبه هاليومين ونا اللي اتراكض ادور على شغل اضافي وهو جاعد لي في البيت يطالع التلفزيون. مع اني طلبت منه يدور بس الريال ما في الدنيا.
* عادي عنده اني انا اتسلف بالعكس لكن اذا هو تسلف بيسمعني الاسطوانه المشروخه لحد ما تنسد نفسي.
* عادي عنده اننا نبات من غير عشا. انا ما اطلب واذا ما قلت له اني جوعانه ما راح يكلف نفسه يجيب اغراض العشا.
والله زهقت . الوحده تتزوج عشان تحس ان المسؤليه تنشال عنها وانا احس العكس. ساعات احس اني انا الزوج مو هو.
انا ما احب اتشرط بس من حقي ان زوجي يترجم حبه لي الى واقع ملموس ترا الكلام الحلو ما يترس البطن.
سامحوني بس عن جد ما عدت احس انه صج يحبني. هاذي اشياء بسيطه بس صدقوني في ظل ها الحياه ترا الحب يطلع ....(فشنك)
اتمنى اني اسمع كلام يريحني لاني هذي الايام افكر جديا بالطلاق.