السلام عليكم

هاأنا ذا أعود مجددا لصفحات وأعضاء المنتدى بعد غياب أكثر من عامين .. رزقني الله فيها بطفلين جميلين .. وحسبت أن الحياة سوف تبتسم لي مؤخرا .. لكن الدنيا بالنهاية لاتصفو لأحد

مشكلتي هذه المرة قد تكون مفروضة وليس لنا يد فيها .. لكن الذي يزعجني عدم مبالاة زوجي وتكاسله واعتماده علي

المشكلة كالتالي:
زوجي من ٧شهور شركتهم صار عليها مشاكل وماعطوهم رواتبهم..ومعتمد على راتبي في مصاريفنا أكلنا وشربنا وأغراض الاطفال ..طبعا مايقدر يشوف وظيفة ثانية لانه مسجل بالتأمينات..والشركة الى الان لاهي اللي نزلتهم من التأمينات وخلاص سرحتهم .. ولا هي اللي رجعت تعطيهم رواتبهم..حتى الايجار والكهرباء مادفعها من ٧شهور .. وكويس صاحب العمارة ابن حلال وخوي زوجي وساكت..بس هالموضوع مو عاجبني انه يجلس كذا وانا اللي اصرف..وقلت له انه مو عاجبني هالوضع .. وماني عارفة هل تصرفي صح ولا غلط واخاف يتعود على هالوضع ويجلس بدون شغل .. وإذا قلت له دور شغل قال طيب اجلسي مع الاطفال وبدور اي شغل ولا منتك علي .. وأنا أكثر من مرة وضحت له ماهو حكاية منه بس هالوضع مو حلو أبد ولمتى؟؟؟ .. طبعا هو يقول أجلس مع اطفالي لاني موظفة وهو رافض يوديهم حضانة .. حتى لما كان بوظيفته كان يجلس معهم لحد ماأجي من الدوام بعدين يروح دوامه

حاليا كل واحد منا بجهة .. مدري وش أسوي؟ وش تنصحوني فيه؟

اذا لك 7 شهور شايله البيت فكثر الله خيرك والله انك اصيله.. قولي لزوجك تخيل لو اني مو موظفة؟ اكيد بيلقى الف حل وحل..
ولو قال لك اتركي الوظيفة قولي وظيفتي هي اللي سترتنا السبع شهور الماضية.. الله يفرج عليكم

لا تخلقين مشكله من لاشي

ماالمانع انك تصرفين وتنفقين على بيتك ؟
طالما زوجك عنده عذر وشي خارج عن سيطرته

وليته فوق كذا محترم نفسه .. الا كل كلامه سب وشتم وشي يقهر

لنكن منصفين مافي امراة تحب الرجل العاطل وهي تصرف عليه
المراة تحب تاخذ من زوجها

لكن يا اختي لما تضطرنا الظروف وش نعمل لا تكوني انت والزمن عليه هو لم يختر هذا الوضع

اكا السب والشتم فاظنه من وضعه يحس بالنقص انك تصرفين على البيت فيعوضه بذلك كي يحس انه رجل☺

ان شاء الله يتحسن وضهه ويرجع لوظيفته
كوني فقط شهمة ويعتمد عليك عند الضيق
فاغلب النساء تعمل لتحسين ظروف العيش مع الغلاء الفاحش

والله يعين الجميع

أعتقد المشكلة بسبب إنك تعطي و تصرفي و تنتظري مقابل من زوجك !!!
شكر أو تقدير أو أي شيء
و أنا اقولك سوي خير و أجرك على الله
ولاتمني بشي سواء بطريق مباشر أو غير مباشر

برأي أن ما ذكره الأعضاء أعلاه ممتاز، وهذا هو الموقف السليم بين زوجين يقتسمان الحياة حلوها ومرها لا يقول أحدهما للآخر هذا لي وذاك لك، وحين يأذن الله بالفرَج لن ينسى لك موقفك هذا.
أقول هذا وأظن زوجك عاقلا معتدل الرأي والفهم.
والزوج الذي هذا وصفه، سيسعى جاهدا للخروج من هذا المضيق، ويبحث عن الكمال.
وبرأيي أنه يستطيع الخروج من شركته مع حفظ حقوقه، ولا علاقة للتأمينات بالموضوع، هذا إذا وجد مكانًا آخر مناسبًا له، لكن عليه استشارة أهل المعرفة والرأي والحقوق، وله الحق بالشكوى لدى الجهات المعنية كوزارة العمل أو المحاكم المختصة بذلك إن شاء.

وبعض الأزواج وهم قليل، ربما لا يصلح معهم هذا التعامل اللطيف ، فيتكل على زوجته ويؤثر الراحة والدعة، وفي هذه الحال، يجب أن تكون المرأة حازمة بعض الشيء وتتخذ خطوات إجرائية وخطوات حذرة.
فمثلا:
قد تحتاج إلى الاستعانة ببعض أقاربها أو أقاربه العقلاء.
وقد تحتاج إلى أن تنفق على البيت بقدر محدد، ولا تنفق كل ما في حسابها لسببين:
أولهما: أن يشعر الزوج أنه لا غنى عن مشاركته وراتبه.
ثانيهما: ليبقى في حسابها شيء لنوائب الدهر، فقد تحتاج لشراء شيء مهم من أثاث ونحوه، وقد تتصاعد الأمور مع زوجها لسبب أو لآخر، فيفترقان وتكتشف بعد حين أنه تركها وقد أفرغ حسابها.
^^^ هذا الكلام الأخير فيما إذا كان الزوج لا يحسن التصرف، ولا يؤمن جانبه، ولا يعمم.

__________________
كثير من المشاكل الأسرية والمعقدة لا تنتهي تماما، وإنما تبقى لها بقايا.
أي أنها قد يبقى منها 20% مثلا

مشاكلنا الأسرية المعقدة كثير منها لا ينتهي بصورة نهائية وإنما تبقى لها بذور يمكن أن تنمو في يوم ما، ما لم نتعاهدها بالحصاد.

مشاكلنا المعقدة لا يمكن حلها بضغطة زر، وإنما تحتاج إلى ممارسة ومجاهدة وضغط نفسي ومدة أطول مما نتوقع ليأخذ الحل مجراه.
المهم الصبر، فقد يكون بينك وبين الحل غشاء رقيق، فلا تتوقف.

للأسف مافي اهتمام بمشكلتي وأنا في أمس الحاجة لايجاد حلول

والاعضاء اللي ردوا عليك ماعجبتك رودوهم
!!!
والا لازم نعبي راسك على زوجك وبكذا نحل لك المشكله بنظرك

__________________