مرحباً ..

انا جديدة في هذا المنتدى لكن متابعة قديمة الى حد ما ..

بدخل في مشكلتي على طول وان شاءالله اجد عندكم إجابات شافية

عشان تتضح الصورة.. انا عمري 21 سنة متزوجة من ثلاث سنوات تقريبا زوجي اكبر مني ب16 سنة

وكان مطلق قبلي ..

حنون جداً جداً جداً .. محترم ويخاف الله ولله الحمد .. حساس لأبعد درجة .. ومن الناس اللي ابسط شي يخليهم يشيلون هم .. زعله سريع جداً اي كلمة بقصد او بدون قصد تزعله .. عنصري لأفكاره لحد كبير ..
عنيد جداً جداً جداً .. ان صار بيننا نقاش وكنت الطرف الأقوى فيعزل لمدة أيام حتى لو اعتذرت له فيبقى يذكرني اني جرحته

ومتى ماكنت مطيعة لطيفة فهو ألطف وأكثر طاعة ..

اما انا فحساسة جداً لا احب العتب ولا المحاسبة على كل كلمة افضل ان امشي الأمور واتساهل
لكني أراكم في قلبي الكثير .. عصبية جداً واكتم الكثير من عصبيتي
رزقت ولله الحمد بجمال نسبي واضح .. احب بيتي واهتم به .. نظيفة جداً .. دائماً مااجتهد لأحسن من نفسي عيوبي غير العصبية اني متسرعة شوي في الكلام والرد ..

علاقتي به جداً ممتازة ولله الحمد احبه جداً جداً جداً .. وهو يحبني أيضاً ..

حياتنا مستقرة لحد كبير لاينقصنا سوى الاطفال

اغلب المشاكل بيننا صغيرة وبسرعة ننهيها وغالبا انا انهيها..

أسبابها في الغالب اما تسرعي في الكلام دون تفكير او حساسية زوجي الزائدة..

الى الان مادخلت في صلب المشكلة بس حبيت أعطيكم صورة مبدئيا عننا ..

انماطنا في البوصلة ..انا جنوبية غربية .. وهو جنوبي شرقي..

المشكلة:

زوجي دايما يمزح بموضوع الزواج أعطيكم أمثلة ..

ممكن تمر قدامنا فتاة طويلة فيقول انه هذي طويلة اجاوب عادي أقول مثلا ايه مرا فيقول يبغالنا نجرب الطويلة!!!!!

طبعا مدري وش دخل ذا في ذا مرات اسكت مرات اخذ الموضوع بمزح مرات أعلق انه وش ذا الكلام

وكل مرا موقف والغالب يكون بمزح يقولها مو يأخذ جد لكن لما يشوفني اتهرب او اطنش يقول ليش لو تزوجت بتتركيني طيب ايش فيها ؟

وانا اطنش اخر شي يقلب الموضوع جد ويقول حسك عينك تتحكمي فيا انا ماابغى أتزوج لكن لو جا في بالي ماتقدري تمنعيني

مرا صار ذا الكلام قلت له ياابن الناس محد بيمنعك أكن انت ماتفكر تتزوج ليه تاذيني بالكلام ووضحت له فكرتي عن الزواج قلت له هذا شي اباحه الله وما اقدر اتكلم في حكم الله ابدا
وانا احبك واغليك لكن انا مااحب كثرة الكلام في هذا الموضوع كل مامزحت معايا

جبت سيرة الزواج وقت اللي من جد تبغى تتزوج تعال قول اما الهرج على الطالع والنازل لا رجاء

قال اصلا لو فكرت أتزوج مستحيل أقول لك بروح اخذها من دولة ثانية ولا مسيار عشان يكون تشكيلة حلوة

طبعا الكلام جداً وقح وانا اعرف انه الرجال عادي عندهم هذا الكلام إنما مع حرمة هذا استهتار ولعب بالمشاعر وقلة أدب

ومرا صار كلام معين وتزاعلنا فيه صار انه يطلق او يتزوج التزمت الصمت وجرحني لما اعتذر وصار يتكلم بعاطفة وبادلته الكلام قال مستحيل أتخلى عنك ابدا انتي كل شي عندي وهو يبكي قلت حتى وانت تعتذر ماابغى تقول ولا افكر في غيرك !! قام سكت عناد طبعا

وجرحني اكثر انه حتى في اعتذاره عنيد .. وماهمه اي شعور عندي طبعا سكت وفضلت الصلح وبقيت متضايقة ويبان علي الضيق وهو حاس طبعا

فصار يعتذر لو زعلني وانه مايدري ليه زعلانه وانه يحبني وقال أبغاك توعديني قلت بايش

قال اول اوعديني قلت وعد قال أبغاك تثقي فيا وتعرفي اني متعلق في ابتسامة منك

واني مستحيل ااذيك او العب عليك قلت اوعدك

قال وانا اوعدك عمري ماابعد عنك

وطبعا وقت الروقان يقول غيرك ماابغى لكن لاتتغيري عليا اخلف يوم تغيري

المهم اللي صار صرت اتضاااايق من هذا الموضوع وبدون مبالغة صار يشغلني صرت احسه حقيقة

مع انه أوقات الجد معايا ومع اخواته ماهو من هواة التعدد ويفضل الاستقرار اكثر ..

ودائما يقول لي انتي لو بقيتي كدا تحبيني وتهتمي لرضاي مستحيل افكر بغيرك صدقيني ماراح افكر أتزوج ابدا الا لو انتي تغيرتي

ودائم يدعي لي بالهداية يقول ياسلام لو صرتي ملتزمة وبيتنا مايذكر فيه الا اسم الله وغيرتي ملابسك وكبرتي شوي وقصرتي لسانك أبيع نفسي عشانك

ولما يكون لساني معسول بزيادة ينجلط من الفرح

المهم الحمدلله سعيدة معاه لكن يوترني بمزحه البايخ وصار كم مرا ردة فعل مني كم مرا عصبت عليه

فقلب عليا وحلف إيمانا انه طريقتي دي تخليه يتزوج عناد لانه مو انا اللي أتحكم فيه

وصار مرات سكت وبان عليا الانكسار حضني وقال انه يحبني وانه مايفكر بغيري هو بس كدا لسانه

يحب يغيظني


لكن من كتير تكرار الكلام ماعاد صرت آصدق

صرت احس بخوف على طول وصار أشبه بالوسواس

الحين بيسافر عمل لأوروبا حول الأربع دول عاد دعيت له ربي يوفقه قال شكلك مو فرحانه

وقلبها زعل وجلس يدعي انه مايروح دام انه وجهي قلب وقال انا ارتاح نفسيا لما أشوفك مبتسمة احس قلبي يطير

من الفرح ولما تتضايقي انكبد وربي أكل مااقدر اكل <<وهذي حقيقة لكن مش معايا بس هو جداً حساس اي مشكلة من اي شخص يقلبها مناحة

المهم ابتسمت له ووضحت له رأيي في السفر وأني شايله هم بعده صح انه مو وقت طويل لكن عيني ماتغفى الا وهو عندي

هذا غير انه الدول اللي رايح لها معروف عنها انها الله المستعان وشي طبيعي يتضايق شوي

لكن ماني معترضة هذا عمله الله يكتب له الخير

المهم عاد تقلل الموضوع وهو منتظر الفيزا الحين تطلع طبعا مو كل يوم لكن كل يومين كدا مثلا أساله هاه ايش صار ع الفيزا

ألاحظه يزززعل ويقول قفلي الموضوع مايبغاني أساله يمكن يحسب بعمل مشكلة او ايش المهم

قبل يومين حلق شعره قلت الله الله ايش دي الحلاوة

قال ايوا نتزبط للاوروبيات طبعا ابتسامتي قلبت

يعني ايش هالبياخه خلاص لازم اي مزح فيه حرمة حريم زواج

احس قلبي صار يعورني

قبل فترة صارت مشكلة وفتح ذي السيرة وانا من كثر ماكتمت في قلبي طحت عليه

المهم اعتذر لمدة يومين😕

وأول امس تناقشنا واختلفنا في شي قال يابنت الحلال انتي عاقله لكن تتكلمي قبل ماتفكري

وصار نقاش على العيب دا قلت اول مرا احد ينبهني على هذي الصفة لكن ولايهمك اوعدك اني لمسك لساني وأفكر اول قال صعب يبغالك 15 سنة قلت واللي يثبت لك في شهر ؟

قام ابتسم وباس راسي قال والله كدا تقولي لي أتحدى أمك تفكر في غيري..

قلت يعني مابيخليك تفكر في غيري الا العقل قال طبعا

قلت والجمال !! <<لانه اربع وعشرين ساعة هذي بيضا هذي جسمها مدري ايش 😒

قال ليش افكر بالجمال انتي ايش بك ! انتي عندي .. انا لو فكرت بكون أدور على استقرار مالقيته

طبعا وقت الجد يقول وربي ماني حق زواج اهم شي اكون مستقر نفسيا وجنسيا وبس

وطبعا على الجمال انا الحمدلله عندي نصيبي من الجمال لكن يحب يغيظني بالذات بقصة البياض رغم ان اللي طلقها بيضا

وانا مو سمرا حنطيه فاتحه لكن هو يقول مافي زي البيااااض


صرت مرات احس بعدم ثقة والله من دا الكلام


أدري طولت بالكلام لكني مكبوتة يمكن مافي مشكلة واضحه إنما الجمل المتناثرة الصغيرة تشكلت عندي بعدم راحة في حياتي

حتى سفره صرت شايله همه من كثر ما عيونه فالته أقول ايش دراني يجي بايعني !!

ولا يشوف البياض او الطول مو عدم ثقة بنفسي لكن هو وصلني لذي المرحلة

شاف وحده في التلفزيون قال سبحان الله قطعة وحده انه لون واحد

مو زيكم <<دايما يمدح صفاء بشرتي لكن عندي غمقان بسيط في الركب او الاكواع غمقان طبيعي جداً



انقهرت جداً من كلامه لانه في الأصل عندي تراكمات وحتى هو صا. يحس اني بزيادة صرت أتحسس

اول لو يجيب سيرة حرمة عادي الان اي تعليق بسيط ماعاد أتحمل احس داخلي بركان


احتاج إجابات عقلانية بدون ماتراكمون على قلبي زيادة بالذات من معشر الرجال 😕

__________________

حبيبتي..

لا أدري هل ستكون إجابتي عقلانية أم لا.

ولكن رأيي ألا تكثري من التفكير في مقصده والهدف من تعليقاته ومزحه البايخ.

في النهاية إن قرر أن يتزوج فسيفعل بغض النظر عنكِ ..بمعنى أن السبب في الغالب لن يكون منكِ ولا لشيء يفتقده عندكِ.

لذلك كل ما أستطيع قوله لكِ: لا تسمحي أن نسيطر عليكِ فكرة التقصير أو أن تفقدي ثقتكِ في نفسكِ .. وهيأي نفسكِ لكل الاحتمالات .. وقرري ما رد الفعل الذي ستتخذينه لكل احتمال.

__________________


اللهم طِيبَ الأثر .. وحُسْنَ الرحيل.

عزيزتي لابد أن تعززي ثقتك بنفسك أكثر مما أنتِ عليه ولاتدعي مزاحه ينال منك
وعطيه جوه خليه يمزح هو شايفك بسهولة تستفزي فيشتغل على هالموضوع ويتسلى فيه
وعلى فكرة الرجال مايتزوج بحث عن البياض والجمال يتزوج بحثاً عن المزيد من المتعة
ولو تلاحظي غالباً يأخذ وحدة أقل جمال من الأولى لأن غرضه المتعة المؤقته فما يدقق في المواصفات
أهم شيء يحقق حلمه بالتعد ويصير طرزان للأسف
لذلك بمجرد انتهاء الغرض ينسحب للبيت الأول

فلذلك لاتشغلي بالك بحكاية أنه راح يتزوج عليك لنقص فيك
ملكات الجمال اتزوجو عليهم رجالهم يعني مسألة فراغة عين

__________________

^
ويا كثر اللي انسحبوا للبيت الثاني لانهم لقوا فيه استقرارهم وما كانت متعة مؤقته
ويا كثر اللي استقروا في البيتين وعدلوا

حبيبتي صاحبة الموضوع
زوجك من خلال كلامك مو راعي تعدد
اطمنييييي هو بنفسه قالك هذا الكلام بس صدقيني
لاحظ استفزازك السهل قام يتسلى كل ما طفش خذيها مزح وقفلي الموضوع بذكاء واسحبيه لموضوع ثاني
من غير ما يحس انك تغيرين الموضوع

__________________
( والذاكرين الله كثيرا والذاكرات )
ادعوا الله ان يجعلكم من الذاكرين له..

كنك تتكلمين عن زوجي وهذا شي يجرح ويفقد الثقه فيه وفي ثقتك بنفسك ويمرضك ويتعب نفسيا وانا مجربه هذا الشي وتزوج لكن انا ماوفقت على زواجه الا لما صار يدور ويخطب واستسلمت لقدري والحمدلله سكرفمه وانا ارتحت من زنه ومن مزحه على الفاضي والمليان عليك بالدعاء انه يسخره لك ولا يشوف غيرك ويقذف حبك في قلبه ويجعله حبا جما يارب

جزاك الله خير يااختي والله يبعد دي الفكرة عن حياتنا 😕

__________________

مشكورة يااختي انا احاول اتناسى هذي الفكرة ويارب اقدر ويعينني ربي

__________________

والله حياتنا سعيدة وجدا مستقرة يارب لك الحمد ❤️ لولا هذا الموضوع اللي رافع ضغطي وواجع قلبي

هو انا فعلا أستفز حتى لما يجيب سيرة الموضوع وأسكت يبان متضايقة يقوم يضحك يقول ليش تزعلي ياخي ويزيد يستفزني ويجيب مواصفات من راسه

__________________

ربي يعينك ويلهمك الصبر تصدقي ردك وجع لي قلبي وخلاني ازيد شكي انه ممكن يعملها يعني لو يمزح كدا بكرا بعده يروح يخطب من جد

انا اللي يزيد يخليني مااصدقه انه كان متزوج قبلي وبشهادة الجميع الحرمة جميلة جداً وبشهادته انها جداً محترمة وطيبة

لكن ما ارتاح معاها وطلقها سألته مافكرتني تتزوج عليها؟

قال الا لكن البنت صغيرة حرام اظلمها واجيب على رأسها ضره وهيا ممكن يجيها واحد تكون بالنسبة له كل شي + اني مالي ولوجع الراس

مع انه البنت اكبر مني بكتير 😕

__________________

ما شاء الله .. أمر طيب أنه يحفظ حق العشرة ولم يذكرها بسوء.


على كل حال .. وما دام الأمر كذلك فليس لكِ يا عزيزتي إلا الظاهر من كلامه وقت الجد .. أما المزح والمواقف الهزلية فلا تعلقي عليها كثيراً .. ولا تنفعلي بسببها وتعملي مشكلة.

تجاهلي أو سايري.

__________________


اللهم طِيبَ الأثر .. وحُسْنَ الرحيل.