السلام عليكم ورحمة الله وبركاته

هذا أول موضوع من سلسلة موضوعات راح تكون لي في هذا المنتدى كلها تدور حول طلب النصح والمشورة بخصوص حياتي مع زوجي

ألهمني موضوع الأخت دلع الذي يتعلق بسهر زوجها ووضعه منوم لها في العصير وقلت لابد من مناقشة موضوع سهر الأزواج بشكل عام وسهر زوجي بشكل خاص

أنا ابتليت (نعم أقولها ابتليت) بزوج اجتماعي جدا جدا جدا.. من يشوف شخص إلا ويدخل فيه ويتعرف عليه وتتقوى العلاقة بينهم.. إضافة إلى أن زوجي ماشاء الله عليه خدوم جداااا ويحب يفزع لأي شخص لا وبعد يحب يحل مشاكل الناس (يعني يلعب دور الأخصائي الاجتماعي)

إلى هنا راح تقولون ممتاز صفاته حلوه لكن للأسف مثل مايقولون باب النجار مخلع.. حياته الزوجية معي كلها مشاكل وراح أبدء في أولها وهي حبه للخروج وقضاء الوقت مع أصحابه

زوجي من أول ماتزوجته وهو مايحب الجلوس في البيت وفي المقابل يموت في الجلسه والسواليف مع أصحابه.. طبعا أنا أتوقع السبب لأنه اجتماعي يحب يختلط بالناس ويحب يسولف وماعنده أي اهتمامات أو هوايات ممكن تشغله عن الطلعه.. مثلا مايحب القراءة ولاتستهويه مشاهدة التلفاز ولا تصفح الانترنت.. طول ماهو جالس في البيت يا يسولف معي يا يسولف ع التلفون

طبعا أنا في بداية زواجنا انصدمت بحبه للخروج خصوصا ان كنت توني عروس وساكنه في مدينة بعيد عن أهلي وأهله ولا أعرف أحد في هذه المدينة.. طبعا هو مشكلته مو بس في السهر لا.. هو نظامه يجي البيت وقت الأكل والنوم بس.. يعني يطلع من الدوام يجي البيت يلقى الغداء جاهز ثم ينام إذا صحي المغرب أحيانا نتقهوى وأحيانا يطلع على طول ويجلس برا البيت أقل شي 4 أو 5 ساعات يرجع طبعا يدوب أجهز العشاء إذا فيه وقت سولفنا شوي وإذا لا ننام على طول .. وهذا هو نظامنا يوميا وليس فقط في عطلة نهاية الأسبوع.. أحيانا يكسر الروتين يطلعني نتمشى أو نتسوق

طبعا في البداية حاولت أحببه في البيت صرت أهتم بنفسي بزيادة وبالبيت وأصلح له قهوة وحلى وشاي وأجلس أسولف معه لأن قلت يمكن فيه تقصير مني عشان كذا هو مايحب يجلس في البيت وللأسف كل هذا مانفع.. جربت أمثل اني خايفه أجلس لوحدي وأمثل بعد اني قلقانه عليه وهذا بعد ما نفع.. الين في يوم انفجرت وصرت أتكلم عليه انه مو راعي مسئولية واللي مثله المفروض مايتزوج ويبلش بنات الناس وقلت له دام انك كذا ليش تتزوج كان جلست عزوبي تسهر على كيفك وإن شاء الله بعد تنام برا البيت.. قالي: أنا مو مقصر معك في شي عمرك ماطلبتي شي وماجبته أو قلتي بنطلع وماطلعتك ف ليش الزعل وهي كلمة وحدة أنا هذا طبعي مستحيل يمر يوم بدون ما أطلع فيه وجلسة البيت للنسوان وأصلا ماتعودت عليها وحتى لو ماعندي أصحاب راح آخذ سيارتي وأجلس أفرفر فيها.. وقال يابنت الناس هذا طبعي وهذا نظامي رضيتي فيه كان بها مارضيتي فيه عاد كيفك

بعدها قلت والله لا أشغله بالطلبات والمشاوير.. وفعلا نفذت الخطة لكن ماقدرت أستمر لأني أساسا ما أحب الخروج الكثير ولأن عندي مسئوليات بيت ووظيفة ودراسة

المهم قررت اني اتركه يعيش حياته مثل ما يبي وأنا أعيش حياتي مثل ما أبي.. ممكن تفكرون الحين أن المشكلة انحلت.. للأسف أنا الآن وقعت في مشكلة أخرى

صرت أحب أجلس في البيت لوحدي أسوي شغلي في هدوء وأمارس هواياتي من قراءة الروايات وكتابة الشعر ومشاهدة التلفاز وتصفح الانترنت حتى القهوة صرت أستمتع في شربها لوحدي.. صار وجود زوجي في البيت يضايقني وأحس كأنه قاعد على قلبي ما أصدق انه يطلع من البيت.. طبعا مشكلة زوجي إذا كان في البيت بس يبيني أجلس معه ما يبيني أسوي أي شغله ثانيه.. عشان كذا صرت أتضايق من وجوده لأنه يمنعني عن ممارسة الأشياء اللي أحبها

صرت أحس انه يلاحظ اني أرتاح إذا شفته خارج من البيت.. أحيانا أفكر اني أصارحه بسبب انزعاجي من وجوده في البيت وارتياحي لخروجه منه وأقول له هذا ما جنته يداك..

ما رأيكم؟ أصارحه أم لا؟ هل الوضع بيننا طبيعي؟ للمعلومية لنا 3 سنوات متزوجين

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا

حبيبتي لان صار لكم 3 سنوات تحسي هالاحساس ،، انا بعد حصل لي مثلك لان خلاص تعودنه على الروتين مع ان زوي غيابه فقط للعمل فلما جلست بالبيت تعودت على عدم جلوسه وقت الدوام واتضايق اذا قال بتاخر عن دوامي اليوم اوو بكمل نومتي او مريض ههههههه تشوفين عفاريتي تتناطط ! لان بنتي تكون مزعجة بوجود ابوها وبنفس الوقت اشغالي راح تتاجل كلها بسبب انه يبفي الجلسة او طلب معين او او او .... لا تصارحي زوجك بهالشي وكانك تحسسيه بعدم رغبتك فيه وبالعكس طنشي ياحبيبتي وقت اللي يتواجد اغتنمي الفرصة لفرض رغباتك عليه وغيري روتينك ووقت عدم وجوده اعملي روتينك المعتاد ...

اتذكر احد اخوتي مثل حالة زوجك وفعلا مو مقصر مع زوجته باي شي ولكنه يقول مثل زوجك انا مو حرمة عشان اقعد بالبيت ! صارت له مشاكل مع زوجته الى ان تعودت على روتين معين يعني يلبي طلباتها مع اولادهم ويكون متواجد على الوجبات وهدأت امورهم شوي والنقطه اللي ساعدت هي تواجدهم بقرب بيت الوالد .... اما اخ اخر فزوجته تشتكي من وجوده الداائم بالبيت هههههههه يعني العكس! فصارت هي اللي بين يوم يومين تطلع من البيت لترتاح من المشاكل على كلامها ...

بالنسبة لي التوازن والاعتدال مطلوب ،، يسهر صح ويروح المكان اللي يبغيه ولكن يكون بيوم او يومين من الاسبوع فقط ! زوجي بالبداية كان بنفس الحال ولكن جلست معاه بهدوء وفهمته حبه حبه وجيته من باب الراحة العقلية والنفسية والجسدية له بالدرجة الاولى ولاولادنه بالدرجة الثانية ولي بالدرجة الثالثة وانه بحكم المتزوج الان وليس الاعزب مع وجود مريوم والانشغال بها شوي شوي هو لوحده قل سهره الى ان خلاص صار مثلي هههههههه ( الصاحب ساحب) ...

دام زوجك والنعم فيه وماعمل لك حركات مريبة مثل ما حصل للاخت اذن اصبري مع وجود الاولاد شوي شوي راح ينشغل فيكم ان شاء الله وحياتك راح يحصل لها روتين مختلف تماما عن الان ،،،،

ونصيحتي ابد لا تخبرينه بانزعاجك من وجووده ،،،، هذا مجرد احساس مؤقت يختلف مع الوقت ....

وضعكم الان طبيعي..
كل واحد عايش طبيعته
مو صحيح انه ﻻزم تتقابلون 24ساعة
بس لو حصل جلسة وقتها عيشوا كشريكين..

زوجي مثل زوجك بالضبط
وانا مثل طبعك بيتوتية
الان بعد11سنة زواج لقيت راحتي لما وصلت لحقيقة ان الزواج مايعني اندماج وﻻ انصهار
هو فقط شراكة..خليته يعيش طبيعته وانا استمتع بطبيعتي..
ارتحت وريحت وحتى نفسيتي تحسنت الحمدلله..

اهم شي مايقصر بواجباته والباقي سهالات

ليته يعطي زوجي شوي
من البيت للدوام ومن الدوام للبيت
في وجهي24 ساعة
وملقوف في كل شي
ولا يبني اتعرف على جيران ولا استقبل صديقات ولا حتى اهلي
يحبسون حريته
احيانا انا اللي اطلع من البيت بدون حاجه عشان افتك من وجوده بوجهي

كانك تتكلمين عن زوجي ...بس الاختلاف انه يرفض مشاويري بحجة طلعاته

مانصحك تسوين مشكله بسبب هالشئ طالما فيه ايجابيه يقوم بمشاويرك وحاجاتك

أشكرك ام مريمي على الرد.. الله يسعدك ويخلي لك مريوم

أنا معك في أ ن الاعتدال مطلوب.. لو زوجي سهراته في الويكند بس أو يوميا لكن في حدود الساعة أو الساعتين بس كان ماعندي مشكلة أبدا.. هو الله يهديه يطلع برا البيت يوميا و كمان يجلس بالساعات

بيني وبينك ودي أعلمه باحساسي عشان أقهره و أوصل له رسالة ان ترا وجودك صار ماعاد يفرق عندي بس خايفه يعاند ويزيد في سهره برا البيت وبكذا يكون زدت النار حطب

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا

مشكورة اختي نبض الدان على الرد

الحمدلله طمنتيني أن وضعنا طبيعي لأن بصراحه كنت ما أشوف هالوضع طبيعي بين الأزواج وكنت خايفه وش ممكن يصير بيننا بعد مرور السنين

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا

ههههههههه الله يسعدك يا شوك

وضعك صعب والله.. المفروض لا إفراط ولا تفريط

أنا بعد ما أتحمل زوجي جالس بالبيت 24 ساعة بس حلو انه يوازن بين الخروج وبين جلسة البيت

أما سالفة ان زوجك ما يبيك تستقبلين أحد في البيت فهذي بحد ذاتها مشكلة الله يعينك.. بس حلو انه في المقابل يسمح لك تطلعين من البيت

أسعدني مرورك والله يا شوك

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا

هلا والله ريماس.. مشكورة على الرد

والله زوجي صحيح انه يقول ماقد قصرت معك في مشاوير أو طلبات بس كلام ترا.. أحيانا يعتذر بحجة انه مواعد أحد من أصحابه لكن للأمانة ما يطنشني يوعدني أخلص مشواري أو آخذ غرضي اللي أبيه في يوم ثاني

__________________
اللهم لا تجعل الدنيا أكبر همنا ولا مبلغ علمنا ولا إلى النار مصيرنا واجعل الجنة هي دارنا وقرارنا

نفس زوجي

مو مضايقني الخروج

مضايقني ضياع العمر ضياع الهدف و ضياع مستقبلي و اوﻵدي معاه !!!

بس مو سآكته انا الحمدلله بجتهد ان شاء الله و الله يعطيني الصبر و يفرج همي

احس الدنيا ما تكمل 👎 بس عساها خيره يآرب 😯

__________________
[img]http://im78.***********/FRd0Bi.jpeg[/img]