السلام عليكم .......ارجو ان تفهموني اتمنى ان تكونو بخير وبصحه وعافيه وسعاده
علمتكم ان عندي ثلاث اطفال وانه مايقعد معي
وابشركم كشفت وش مرضه هو يكذب مافيه مرض ولاشي بس وسوس فيني واشغل فكري وعقلي وقلبي
طلع كل الموضوع جرثومة معده...واخذه كم اسبوع وترك العلاج..
مشاكلي كثيره معاه ...
كلها ع المصروف والقعده بالبيت وهذي من حقوقنا..
ياناس افهموني حسوفيني لو شوي..
انا ماعندي حتى اهل هنا ..ماعندي الا اهله...
ومايقعد معي ولايطلعني ولا شي ..
تدرون وش توصلت له بعد مراسلت استشاريين نفسيين
قالو اكتئاب يعني حتى النفسيه جابها لي واخذت سبراليكس عن طريق دكتور تواصلنا والنتيجه من اسبوع بينت تغيرت كثير هديت

والله مااخذت سبراليكس عشانه ..اخذته عشان عيالي ذبحتهم اضربهم واصارخ عليهم وكل يوم وش ذنبهم
المهم..
هديت وتغيرت وهدووووووءوبرود واتقبل المشاكل وكل شي عندي عادي من ناحيته لدرجة مرو شهرين وانهبل ماتهاوشنا ولاشي
قال انتي فيك شي وصار يهديلي احهزه للبيت. وعطر وكم جهاز جابه قعدت سنوات اطالبه ماجاب الا يوم هديت
المهم الطاامه والكارثه هي اني تبلدت وصرت اسولف مع عيال بتويتر وصور ومكالمات وانصدمت من كلامهم لهدرجه انا حلوه .............لهدرجه ولهدرجه وكل ماتعرفت ع واحد نفس الكلام ويدعون ع زوجي ليش كذا ويقولون خايف تشوفين نفسك عليه عشان كذا مايمدح
عمره مامدحني
وصلت لمرحلة ابث مباشر لمية شخص ورقص ..........وصلت مرحله ماتوقعت اني بيوم من الايام بوصلها
قعدت ابث اسبوع كامل يوميا ومادرى عني ياناس طول يومه برى

قعدت افكر في نفسي وايش اللي قاعده انا اسويه انا مو بوعيي ليش وليش وليش واعاتب نفسي وحذفت البرنامج وتركت كل شي
الا المكالمات باقي ماتركتها
وقلتلهم من ستر مسلما ستره الله بالدنيا والاخره

قلت انا ماتغيرت الابعد الحبوب عمري ماتوقعت نفسي بهالدناءه والانحطاط هو من وصلني لهلمرحله وضعف الوازع الديني اعترف
صلاه ولاقران ولاعباده

انا تعبت من حيااتي وكارهه كل شي
تركت الحبوب عشان مابي اسلك هالطريق القذر
وصرت عصبيه
انا لي ثلاث شهور اكل الحبوب وماتهاوشت مع زوجي ولامره بس تبلدت ياناس مايرجع الا اخر الليل وعادي عندي اضحك واسولف معه ومن تركتها تهاوشنا..
المشكله تافهه وكانت نهايتها يطردني من البيت

اول شي كشفته معه شريحه ثالثه وموراضي يعترف هذابالليل قبل اسبوعين بالضبط وابكي ولاهمه
والصباح ولدي يكب الفشار والليز بالارض قلت انا اصلا ماهو متربي
قال انتي وياه يبيلكم تربيه
قلت نعم قال ايه اربيك
قلت تخسي
قال اربيك قلت تخسي ومو انت اللي تربيني وماتزوجتك عشان تربيني
قال لمي عفشك مالك قعده بالبيت قلت طيب قال معاك ساعه بس
قلت مايمديني بساعه جا الليل قال مااوديك
ومن بكره يتهرب وكل يوم كذا
قلتله ترى مافرق تطلع زعلان زي تطلع وانت راضي
يعني حتى وانت راضي علي برى بسلامتك
كنت بكلم ابوي بس تحلمت حلم بنفس الليله اني لقيت لقيط وقلت لابوي وابوي رماه بكيس اسود بالزباله
فسرت الحلم قال الشيخ انتي بمشكله وبتعلمين ابوك بمشكله ماراح يفيدك بشي
هنا قررت ماراح اقول لاهلي
انا مو بس ع سالفة التربيه انا ع سااالفة انه دايم يقولي مالي دخل فيك دايم يقولي دوري من يطلعك دايم يقول مالي شغل فيك
واذا طلبته طلعه يقول دوري من يطلعك وانا بمدينه مااعرف بها احد اهله؟؟؟؟؟؟؟

دايم يقولي كل واحد حر يحياته وهو الحر وانا لا
دايم يبين لي انه يغازل دايم يسولفلي بالبنات وماراعى مشاعري دايم يقهرني يمدح فلانه وعلنتانه وانا ولاشي بعينه يانااااس



عمره مامدح لاشكلي ولاجسمي ولاروحي ولاشي فيني


وهوو شين وزود ع شينه لا اخلاق ولافلوس ولاطلعه ولاسفره ولايقعد معاي بالبيت ولاحتى جنس
حقوقي مقصر بكل شي


المهم مر اسبوع على مشكلتنا وجيته بالفراش قلت انت باقي زعلان واضحك له ..يلف عني ..قلت ياربي منك انت غلطت وانا كنت معصبه وغلطت عليك واسفه واعتذر لك اني غلطت وافتح بطانيته ويدفني قال انا اخسى ويبعدني عنه هنا كسر قلبي ..بكيت ونمت


ومر اسبوع ثااني واخر شي البارح يقول انتظر شهر اربعه بوديك لاهلك انا كاره كل شي في حياتي وانا اخسى وانا اعتبريني ماضي بحياتك وسوي اللي تبغينه وانا حر بحياتي وانتي حره بحياتك قلت يعني نفترق قال لا
قلت وشي بقي مابقي الا الطلاق قال لا
قال انا ماافكر بالطلاق قلت اجل
قال فيه حل قلت وشهوسكت قلت الطلاق
عادي ترى اذا صارت العشره صعبه الحل الطلاق ياما ناس تطلقو ولهم عشرين سنه ومعهم سبعه وثمانيه معي ثلاثه عادي ترى

وانا يارجال اللي مايبغاني ماابغاه
قال انتي كل تقكيرك بالطلاق مافكر فيه
قال يابنت الناس انا كاره نفسي ومنفس وكاره كل اللي حولي
وبوديك لاهلك لين انسى كلمتك لي تخسي وانتي ماتحترمين
قلت اعتذرت لك بس انت ماقبلت الاعتذار
قلت انا سبب نفسيتك قال لا
قال انتي سبب واحد من اسباب نفسيتي

قلت انت مريض تفسي وانا تعبت معاك وصعبه الحياه كذا معاك اكتئاب معك مرض روح تعالج مو تمرضني معك وتتعب قلبي وعقلي وفكري ونفسيتي انا تغيرت معاك كثير ومانفع معاك ابد
عادي روح تعالج نفسيا وخذني معاك محتاجه جلسات كثيره منك ...
اما نبقى كذا لا والف لا
وطلعت وخليته


وبالليل جاني وضمني وعبالي رضى عني وماصدقت على الله لقيت حضنه واليوم نفس الشي ومبسووطه ع الاخر
انه يبوس راسي وخشمي وعيوني ....
عبالي راضي

قبل شوي ارسلتله تعال بدري اذا ممكن قلت بنقعد شوي...
تخيلو يقول ماقدر اقعد معك ولاقدر اسولف معاك وانا باقي زعلان وقلبي باقي ماصفى..
يقول اكره البيت...
هنا صراحه انصدمت قلت خذ راحتك


يعني هدفه جنس وبس ولاول مره اكتشف ان الجنس ماله دخل بالحب


انا ابي دعواتكم قبل نصايحكم اللي جعلني ماافقد اخوه وخوات ماعرفتهم ابي نصيحه ودعوه من القلب...
ادري غلطت واستغفرت وندمت والله يغفر لي

لكن عندي زوج مهملني ..حياته من يصحى عند اهله لين ينامون امه وابوه..ويروح بعدها لاخوياه لاخر الليل
وانا من وقته ولاشي

عياله يبكون يبغونه يقعد وليه يابابا تروح ويقول ماابيكم ...
الحياه جميله لكن يبغالهاناس تسعدك ناس ترد روحك
مو انسان مايشوفك شي وانسان شايف نفسه على ولاشي




قلبي يحترق على حالي ومابيدي شي
الان اني ادعي الله يهديني ويردني الى الله ردا جميلا ويغفر لي ويصلح حالي وييسر احوالي ويسخر زوجي وعيالي💔
يمكن. احد يساعدني بدعوه او صيحه ويذكرني بشي انا غافله عنه ......

__________________
اللهم أني أسألك أن تدبرني وذريتي بأحسن التدابير اللهم لا نضام وأنت حسبنا ولانفتقر وانت ربنا فأصلح لنا شأننا كله ولاتكلنا إلى أنفسنا ً

لا حول و لا قوة الا بالله
خيانتك غير مبررة ابدا

ممكن احدهم سجل الفيديو تبعك و ثم يبثه و تصبح فضيحة لاهلك بسببك

اسأل الله ان يسخرك لك زوجك و يصلح حالكما

صراحه مدري اش اقلك غير ادعيلك الله يفرج همك ويسخر زوجك
بس انتبهي من طريق الحرام مهما كان اهمال زوجك ماهو مبرر للي سويتيه
هذا شي بينك وبين ربك

بدل هالطريق فرغي اللي جواتك لربك
بالصلاه والدعاء والاستغفار والتسبيح والصلاة على الرسول عليه السلام
صدقيني راح امورك كلها باذن الله تنفرج
الطريق السيء عمره ماكان حل للخروج من مشكله ولا راح توصلين لقلب زوجك
الا بحب الله ورضاه عنك
جربيها وراح تشوفي الفرق بحياتك باذن الله
اشغلي نفسك بشي مفيد هوايات
وانتي ببيتك

اتمنى لكي التوفيق واسأل الله ان يبهدي قلبك ويسخر لك زوجك ويصلح اموركم

__________________

السلام عليكم و رحمة الله و بركاته
أخيتي أحسب أن فيك بذرة طيبة و الله حسيبك
بدليل نفسك اللوامة و ندمك و نفورك من الحرام
فتعهدي تلك البذرة و نمها و اسقها تتحول إلى جنة غناء و تجدي سعادتك في نفسك و جنتك في قلبك
ولا تهمليها فتجف و تموت و تذبل فيقسو القلب و يصبح صحراء قاحلة و تعتاد النفس على المعصية فلا تعود تنكرها
اقطعي كل طريق للحرام بدأت بحذف البرامج و هذا ممتاز فلا تترددي في قطع المكالمات والقطع مع كل الماضي بمعاصيه
و أقبلي على الله على الرّحمن الرّحيم بتوبة صادقة و حب و خوف و رجاء و ستجدين أنسك بقربه و سعادتك في طرق بابه وحده الرب جل جلاله يا غاليتي من إذا خفناه أنسنا به و قربنا إليه على خلاف المخلوقين الذين إذا خفناهم استوحشنا منهم و هربنا ففري إلى الله و خافيه في سرك وعلانيتك يكفيك ما أخافك و أهمّك و أحزنك
فإنه إن رضي عنك أرضى عنك خلقه و أغناك بفضله عمن سواه
و تذكري يا أختي أن القلوب بين إصبعين من أصابع الرحمن يقلبها كيف يشاء و لا يعجزه قلب زوجك أن يأتيك به و يسخره لك فاطرقي بابه بالدعاء بيقين تأتيك الإستجابة و تدهشك والله فإن الكريم إذا أعطى أدهش لا تيأسي و لا تقنطي من رحمة الله
هو قريب يعلم سرك و يسمع نجواك و يفرح بتوبتك و عودتك و إنابته إليك
تخيلي الرحمن يفرح بتوبتك وهو في غنى عنها سبحانه فهل استشعرت كم هو رحيم بعباده
فلا تجعليه أهون الناظرين إليك و تخيلي إذا راودتك نفسك على المعصية أنك تعصينه في أرضه و تحت سمائه و هو مطلع عليك و يراك فماذا لو قبض روحك و أنت على تلك الحالة
لو علمت أن اباك أو أخاك أو أحد محارمك يرقبك و أنت على حال من المعصية و الفجور لجمد الدم في عروقك فماذا لو كان الجبار هو رقيبك فلا تجعليه أهون الناظرين إليك
و اعلمي أنك غالية عزيزة أغلى و أعز و أرفع و أجل قدرا من أن تكوني لذة في حرام لكل عابث و لا تصدّقي معسول كلامهم و نسيج أوهامهم فإنهم متى ما قضوا الوطر من فريستهم رموها رمي الكلاب و بحثوا عن غيرها
و الله يا حبيبة لا سعادة في معصية الله بل الشقاء كل الشقاء و الله تبارك و تعالى يقول (و من أعرض عن ذكري فإن له معيشة ضنكا)
و تلك الطريق نسأل الله لنا و لك السلامة و الهدى و التقى و العفاف مستنقع عفن من علقت قدماه فيه فلن يجني سوى خزيا في الدنيا و الآخرة إلّا من تاب فيتوب الله عليه
ولا شيء في هذه الدنيا يستحق منك أن تخسري دنياك و آخرتك من أجله بفضيحة و خزي و عار في الدنيا و شقاء و نار و العياذ بالله في الآخرة فصوني نفسك و احفظيها عن ذلك الطريق و أرضي ربك يسعد قلبك
أسأل الله أن يلبسك ثوب العفاف الذي يرضى به عنك و أن يسخر لك قلب زوجك و أن يلقي محبتك في قلبه و أن يزينك في نظره و أن يبسط لك القبول عنده و أن يقر عينه بك و أن يجعله لك سكنا و أن يألف بينكما و يجمعكما على خير و أن يرزقكما عيشة هنية و ميتة سوية و مردا غير مخز ولا فاضح و أن يجنبكما الفواحش و الفتن ما ظهر منها و ما بطن
أكثري من الاستغفاريا حبيبة و حافظي على صلاتك فإنها تنهى عن الفحشاء و المنكر و اشغلي وقتك بما ينفعك من ذكر و قراءة قرآن و هوايات مباحة تسليك حتى يقلّ إحساسك بالفراغ

أستودعك الله

__________________

ياعمري انتي
مدري احس تعاطفت معك جدا
لازم تشوفين حل جذري
دام وصلت الامور للعرض بالكام
اما الانفصال و جلوسك ب عفافك و سترك
مرتاحة نفسيتك فبيت اهلك
او ان زوجك يبادر بالتغيير معك

كان الله عونك
بس انتبهي ترجعين لطريق الشباب و الكام
هذا مو مبرر
صح تعاطفت معك
بس بكرة بتتحاسبين لوحدك امام الله عز و جل
"بل الانسان على نفسه بصيرة"
لا تخلين مشاكلك تبعدك عن ذاتك النقية النظيفة

اول خطوة للعلاج
حافظي على صلاتك باول وقتها
و باذن الله تفرج

لاحول ولا قوة إلا بالله أختي العزيزه إسألي نفسك وجاوبي بصدق أيهما أهون عند الله طلبك للطلاق وهو أبغض الحلال أم التفريط بنفسك ودخولك في علاقات محرمه؟!!!! تأكدي إنك محاسبه عما إقترفتي الله ميزنا بالعقل حتى كل إنسان يختار الطريق اللي يمشي فيه ونهاية كل طريق يا جنه يا نار زوجك أهملك فيه كثير زيك للأسف ماتتحملين هذا الوضع إنفصلي وإبدأي حياه جديده لاتحملين نفسك آثام وأمور كبيره بسبب زوجك

عزيزتي مهما صار لاتستلمين لخطوات الشيطان صدقني بيزيدك فوق همك هم
ّّاستعيني بالله وتوكلي عليه واستغفري كثثثير
والدعاء الدعاء الدعاء بان يصلح حالك وحال زوجك ويفرج همك

الله يسخرلك لك زوجك ويفتح على قلبكم

الله يفرج همك ويصلح زوجك
اختي عليك بالرقيه الشرعيه زوجك موطايق البيت وموقادر يجلس فيه ويتكلم معك اكيحسد او سحر
وعليك بترك الحرام والاستغفار والتوبه

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

وعليكم السلام ورحمة الله وبركاته

عزيزتي ارجعي لدواكِ .. الدوا مهديء وما هو حبوب هلوسه حتى تكون سبب لأفعال رغم ارادتك .

ضعف الوازع الديني وضعف ارادتك هو السبب بالغلطة اللي غلطتيها .

كملي توبتك واقطعي كل التواصل الخاطيء نهائيا من أجل كرامتك أنتِ ..

أنتِ بسلوكك هذا الطريق انما تعاقبي نفسك بأنك تهينيها وتنزليها لمستوى لا يليق بكِ .

واستعيني على ترك هذا الطريق بكثرة الصلاة والقرءان والصيام .. الصيام جميل جدا ومفيد بهذه الحالات .

رجوعك للدواء راح يساعدك تسترجعي زوجك ... بما انه أصبح أفضل خلال تناولك لها فهذا يعني بأنه تصرفات تبدر منك بسبب عصبيتك هي اللي تجعله يبعد عنك ويعاندك ويحرمك .
طبعا تراكمات سنين تحتاج شهور كثيرة حتى توصلي للنتيجة المرجوة فلا تستعجلي . انما لاحظي هل هناك تحسن ؟ التحسن بحد ذاته دليل على صواب ما تفعلينه والصبر يوصلك للنتيجة النهائية .

معك 4 شهور ممكن زوجك خلالها يرجع عن قرارة بسفرك .. وبعدها تحتاجي مدة الله أعلم بها الى ان تسترجعي ثقته ومحبته لك .
يمكن كلمتك تخسى تكون متقبله ومبلوعه بعض الشيء عند زوجة أخرى وبموقف اخر ... لكنها صعبة في حالة زوجة حبال الود بينها وبين زوجها مقطوعه .ويا دوب بديتي تنسجيها من جديد .

الله يوفقك ويسهل امرك ويغفر لنا ولك

__________________