السلام عليكم ورحمه الله وبركاته ..

والله اني متضايقه وما اعرف كيف ابدا واشكيلكم همي ..

كنت اظن ان البنت يوم اتعرس اتكون سعيده بس ظني مب فمحله الزواج هم ونكد وحزن (بس مب عند كل الناس ) .. نطلع من مشكله ندخل فمشكله ثانيه .. مب مرتاحه فحياتي .. حزينه وحزني بسبب ام زوجي اللي بتخرب بيتي .. هي دائما السبب فكل مشاكلي مع زوجي .. صرت ادعي عليها بان الله ينتقم منها ويبليها فبناتها مثل ما اتسوي فيني ..

زوجي من النوع اللي ما يفكر اذا هالشي غالي ولا رخيص يشتري كل اللي فخاطره يحب انه يلبس احلى الملابس والماركات العالميه .. يعطيني الحمدلله مصروفي الشهري بس مشكلته انه كل شي بينا يقول لامه بس باقي يقول شو يستوي بينا فالجماع .. مره كان عندي عرس خالتي بغيت افصل فستان حلو لانها بتكون اول طله لي بعد العرس .. سرت عند مصممه والمصممين يوم بنفصل شي عندهم لازم يكون غالي اخترت فستان قالتلي على 6000 الاف درهم قلت وايد وعقب اتصلت فيه وقلتله اختر فستان بهالسعر افصله ولا لا ؟ قالي مب مشكله فصليه انا فرحت وفنفس الوقت استغربت .. كنت فبيت امي وعقب مر عليه عشان انرد البيت وفالسياره صرخ عليه وما تم كلمه ما قالها لي كان يصرخ عليه لدرجه اني كنت احط اصابعي فاذني .. والسبب اني يوم خبرته بفصل الفستان بالسعر هذا رد البيت وخبر امه وهي طبعا مادري شو قالتله ..

المره الثانيه كنا مسافرين علاج لامه واخته وكنت بدخل اتسبح وهي غسلت لبسها وحطته صوب الرشاش قلتلها عمتي انا بتسبح يمكن الصابون يي على ملابسج قالت لا عادي ودخلت اتسبح ويوم طلعت اشوفها اتصيح .. سالت زوجي ليش اتصيح قالي قومي عني وخليني انام .. انا طلعت برع الغرفه سحبني بالقوو لدرجه ان يديه عورتني وطيحني عل الارض وانا حامل حتى ان يديه ازرقت من قوه الدفعه سكت ما قلتله شي ..

من يومين هو راجع من السفر وعطاني بطاقه البنك عشان اسحب واشتريلي للعيد .. انا خلصت كل شغلي ب3600 اشترت لبعد الولاده اغراض لان محد يوديني غير اهلي السوق هو ما يفضى مول لي حتى الطلعه يمكن اطلع معاه بثلاث ساعات من السينما للبيت فقط مره فالاسبوع .. وصرت ما اعرف اشتري شي معاه اذا هو بحاجه لشي يوديني معاه والله اني ما اشتري لنفسي شي وطبعا انا ما اشوفه غير وقت الرقاد .. وبعد جهزت اغراض البيبي تقريبا خلصت نص الاغراض فانا سرت البيبي شوب واشترت اغراض ومن محلات ثانيه بعد لان امي قالتلي ما بتوديني.. والرمضان قرب وعقب مدارس فمحد بيفضالي .. واذا سرت معاه ما بعرف شو اشتري لان هذا اول طفل لي وما عندي اي خلفيه عن الاقمشه الزينه وهكذا .. فطلع كه تقريبا 8000 درهم او اقل .. (اغراضي واغراض البيبي)

هو مسغرب فكره اني انا كله صرفته لنفسي ما يعرف اني اشترت للطفل ويوم قلتله انا شو اشتريت ما قالي شي مول .. فجاه اليوم الثاني اشوف امه يتني اتقولي انتي صارفه 10000 الاف فاسبوع وأي وحده غيرج على طول ريلها بيطلقها اول شي نصحني وعقب يوم قلتلها انا وريلي بتفاهم قالت لي انتي بنت فقر وفبيت اهلج ما كنتي اتحصلين 1000 درهم ونعولج من سوق الفلاني (سوق الغوير بس انا اول مره اسمع عن هالسوق) واذا ما حافظتي على مال زوجج نحن ما نباج وان زهبتي ما تسوى 5000 الاف درهم انصعقت وانصدمت ما رديت عليها بشي بس قلتلها الحمدلله والشكر لله (هي من النوع البخيل جداا ) وطلعت من غرفتي ..

ادري اني صرفت ولازم احافظ على مال زوجي بس والله ان كل شي غالي وانا ما لعبت بالفلوس اشترت اشياا لي ولطفلي لان محد بيوديني .. والله اني اشوف نفسي الزوجه المثاليه .. تعاملي معاه بكل حب .. اتقبل كل كلامه واحترمه .. مع انه مقصر فحقي .. اذا قالي كلمه لا ما سرت وعاندت فيه .. اذا غلط عليه سكت عنه .. اتصل فيه اسويله العشا ولو اخر الليل لان يرد فوقت متاخر من الليل تقريبا قبل الاذان الصبح بساعه ومره وقفت ضد اهلي عشانه (في ايام الملكه) كل همي اشوفه مستانس ..

ماذا افعل ؟ حزينه .. ومستحيل اعامل امه مثل قبل بتجاهل وجودها لانها مست فكرامتي واهانتني ..

الله يفرج همي وهم كل متزوجه تعاني من زوجها ..

ليش الازواج قاسين نحن مب لعبه فاييديهم .. نحن لنا قلب يحس .. الشكوى لله

والسموحه على الاطاله

__________________
اللهم احفظ لي زوجي و ارزقنا بالذرية الصالحة

اللهم لا تدع لنا ذنبا الا غفرته ولا هما الا فرجته ولا دينا الا قضيته ولا حاجتاً من حوائج الدنيا الا قضيتها يا ارحم الراحمين

الله يعينك ويصبرك أختي!

__________________

أنـــــــــا مـــــــن تمــــــــــرد فكـــــــــــري عــلــــى قلـــــــمي
فـــخــط كـــاتبــــاً: ( قتــــــــــــــلتني المتمــــــــــــــــــــردة")

وعليكم السلام ورحمة الله وبركااته


اول شي يا حرم المرزوقي
انتي ساكنه مع هل ريلج ؟


ثاني شي
هل حاولتي تلمحين له من بعييييد عن وحده مثلناً مسكينه خسرت زوجها بسبب نقلها للحكي اللي يصير بينها وبين زوجها ، او العكس ،، عشان يفهم
بس ان كان يلقط وهي طايره لاااازم تضبطين الموضوع ، عشان ما يحس ان الكلام عليه وعقب يطيح الموضوع على راسج



اذا لمحتي له اكثر من مره وما فهم ، حاولي تصارحينه ،، وان شاء الله يفيدونج اصحاب الخبرااات


وانتي بعد دوري حوولج من هنا ولا من نااك شخص كبير وتثقين فيه


وترى احتمال عزيزتي انج بالغتي بالأسعار
مانبي نقلب بالقديم ، خليج باللي جااي ،، كل الامهات تبي تحافظ على فلوس عيالها
بس بنتها ، تبيها تسافر وتروح وتسوي كل شي بخاطرها ، بس ولدها لااااااااااا



هالشي طبيييعي جداً
بس وسعي صدرج الحين وان شاء الله لي عوده

__________________

الله يكون في عونك ويفرج همك

السلام عليكم

أختي الكريمة بصراحة أنا أشوفك مبذرة
أولا فستان سهرة 6000 في ليلة وحدة لو أنا مكانك وخصوصا أني حامل بشتري فستان حمل أسود ساتان بأقل من 200 وببان أنيقة وشيك
ثانيا أغراض العيد والولادة 8000 هذا راتب موظف في شهر كامل
لعلمك الأطفال بتكبر بسرعة وكثرة الملابس مش في مصلحتك
وليش لتشتري كل الأغراض من البيبي شوب في محلات ثانية ممكن تجيبي منها وبأسعار أرخص مثل ماكس

أختي الكريمة الحياة كل يوم أصعب وحتى لو عندي فلوس مش بالضرورة أصرفها كلها فكري بمستقبل أولادك وأيامهم الصعبة


ثالثا لو أنا مكانك وزوجي بيقول كل شيء لأمه أكسب رضاها مثلا لما رحتي تتسوقي للبيبي ليش ماأخذتيها معاك وكانت فرحت لأنك قدرتيها وبعد ما تكسبي ودها هي التي ستحاول منع زوجك من السهر برة لوقت متأخر
وكذلك تستطيعين الذهاب لزيارة أهل زوجك أو دعوتهم عندكم وبذلك تضمنين وجود زوجك في البيت أو على أقل تقدير وحتى لو كنتم تعيشون في نفس البيت اجلسي مع حماتك وتوددي لها وهي من سيلاحظ غياب زوجك
بعدين بالنسبة لموضوع ملابس حماتك والحمام المفروض ماتسأليها وتشيليها لأنها أكيد بتبل
أنا أول ماتزوجت كان زوجي يروح البر مع ربعه ويرد الساعة أرع الفجر قمت أقولة وأنت ساير عند ربعك خذني بيت أهلك وهنا الحل لأنه لو تأخر بيكون محرج من أمه وهو راد متأخر وبذلك قصيت ريله عن ربعه بدون مايحس

وأخيرا الواقعية شيء جميل وكويس الانسان يشعر بقيمة الأشياء وحماتك من هذا النوع وهي مش بخيلة ونصيحة حاولي تستفيدي من خبرتها لأنها البركة التي ستحيط بك لو كسبت رضاها
دعائي لك بالتوفيق

بصراحه انتي مسرفه شوي

انا تجهيزي لبنتي من ملابس للاغراض الثانيه من الصيدليات كلها مازاد عن 3000 ريال

انا ماشريت لنفسي شي

ملابسي ماليه الدولاب ليه اشتري اكثرر

المهم بالنسبه لام زوجك

لازم تفهمي زوجك ان هذي الاشيا تسبب طلاق

والله يهديه لك

الام شايفه ولدها موعارف مصلحته وين

وفعلا معاها حق بس طريقتها بالحوار جدآ غريبه


يمكن هي عصبيه !


الله يهديها بس ...


وانتي حاولي توفرين حبتين لكم ..

خصوصآ ..انك ببداية حياتكم ..


وتقومين بالسلامه ..

__________________

شنوووووا هالاسراف ..

فستان بـــ 6000 ريال ... لا لا مو معقول .. حتى لو عندكم خير ما يجوز تلعبين بالفلوس كذا

غيرك مو لاقي لقمة عيش تسد جوعه ..

أنا زوجتي تكاليف لبسها هي مع بنتي في زواج أختي قبل كم يوم بــ 1000
استأجرت فستنان بــ 200 ريال وفخم للغاية ..
وشرت لها شوية اكسسوارات ..
وشرت لبسة لبنتها ... وتزينت في الكوافير (( وكفى الله المؤمنين شر القتال ))

الأم أكيد بتغضب لما نشوف فلوس ولدها تطير من دون حسبان ..

حاولي تفكري زين ... واحتفظي بفلوسك لليوم الاسود لا سمح الله


الله يهدينا ويهديك

لادن لوف

انت غلطانة لان مشترواتك سعرها عالي والله فيه فستان للفرح بأقل من 1000 واناقة وجمال ومشتروات الطفل يكفي 1000 منسرير وملابس قليلة لان الطفل يكبر وكل شهر يحتاج ملابس جديدة والاقتصاد في المشتروات من حسن التدبير للمراة وليس بخل

وزوجك غلطان ببوح كل الاسرار الى امه

وام زوجك كبيرة وتغار ويجب مداراتها لتكسبي ودها و ود زوجك اعانك الله

__________________
اللَّهُمَّ إِنِّي أَسْأَلُكَ الثَّبَاتَ فِي الأَمْرِ وَأَسْأَلُكَ شُكْرَ نِعْمَتِكَ، وَحُسْنَ عِبَادَتِكَ، وَأَسْأَلُكَ قَلْباً سَلِيماً وَلِسَاناً صَادِقاً