السلام عليكم ورحمة الله وبركاته
اريد أن أدخل بالموضوع مباشرة وأطمح لتجاوبكم معي هل ماحصل طبيعي وماهي ردة الفعل الطبيعية بحكم أن هذا المنتدى انما هو للنقاش الهادف فسأطرح موضوعي والردود عليكم .
سافرت يوم الاربعاء الصباح لجده وقلت دام بروح جده أخذ عمره وطلعت من البيت بلبس الاحرام واعتمرت ولله الحمد يوم الاربعاء ... وكانت العودة يوم الجمعه العصر المهم يوم الخميس قلت بما اننا في وقت مناسبات وفيه زواج ناس يقربوا لنا وكانت قبل اروح تقول ودي اروح السوق اشوف لي فستان من الجاهزات عشان الزواج قلت يله خلني اروح السوق وأشتري لها قماش وتوديه المشغل بيكون احسن من الجاهز رحت شريت قماش بـ 950 ريال ولا ابالغ ان قلت القماش روعه وعلى ان قيمته مو غاليه مره لكن يعتبر راقي جداً ومتأكد بأنه سوف يكون أفضل فستان بالزواج واشتريته قلت مايغلى عليها ورحت محل اكسسوار وشريت شنطه نفس اللون واكسسوارات ( خاتم واسواره وتعليقه للرقبه نفس اللون لون القماش يعني وقعدت اتخيلها فيه . واخذت هدايا للبنات من سواتش وغيره من المحلات وجا يوم الجمعه يوم العوده واتصل عليها من المطار على الجوال ماردت اتصلت على البت ورد الولد قلت انا جاي على المغرب ان شاء الله ووصلت البيت بالضبط على آذان العشا دخلت البيت عااااااااااادي فقط استقبال الأولاد وهي ما شفتها جلست بالصاله وطلعت الهدايا للأولاد وشافوا الكيس قالوا ايش هذا قلت لأمكم اخذوه ودخلوا الغرفه واسمعهم يكلموها وان بابا جابه لك وانا دخلت الغرفه قلت ابدل ملابسي واخذ شور الا وتقول هذا ليش جبته قلت جبته قالت بكم القماش قلت 950 قالت الحمد لله رب العالمين من قال لك انا كنت اقول لك ابغى اروح اشوف لي فستان جاهز وسعره مايعدى 400 ريال لكن علشان تفتك من روحتي معك للسوق شريته ولا هو من زينه بس عشان تاخذ راحتك تدوج بالأسواق رحت وشريته قلت يعني ماكنت اقدر ادوج بالسوق على قولتك بدون ما اقول لك وبدون ما اجيب لكم شي وبالحاله هذي ماتدرين اني دجت بالأسواق لكن لا شكلي مقدر ادخل السوق الا في حالة اني اطلع مشتري من عندهم لكن القماش زين والا لا قالت لا قلت اوكي خليه بكيسه وأنا أعرف من اعطيه قالت حلوه هذي والله ماتاخذه .... اخذت شور ورجعت للصاله انتظر شاي قهوه مافيه قلت يمكن تبي القهوه بعد الطبخة اللي مسويتها لي على العشا لأنها من العصر عارفه اني جاي ... جلست انتظر العشاء قلت مابدهاش وين العشاء قالت مافيه العيال حطيت لهم سندتشات تونه قبل لا تجي بشوي وانا مالي نفس بالعشاء وانت اطلب لك عشا والا اطلع تعش برا مع انه مفروض مريت على المطعم وتعشيت وانت جاي ..... وكان هذا هو استقبال زوجتي لي بعد سفرية لم تكمل 48 ساعه بين مكه وجده هذا باختصار غيض من فيض يومي .
آسف على الاطاله ولكن القهر اللي فيني له دور .
آآآآآآآآآآآآآآآآآآآآآآآآآآآآآآآه كم كنت أتمنى الرومانسيه ولكن ....

عفواً تم تعديل العنوان ليتضح المضمون
الإشراف

يمكنها زعلانة لانك ساافرت بدونها .. وانت استخدم معها اسلوب تخليها تخجل من اسلوبها مثلا يوم ماحصلت عشاء قلت لها مشكورة حبيبتي ع العشاء وكيذا ..

__________________
وإني لأرجو الله حتى كأنني ... أرى بجميل الظن ما الله صانعُ .

اخي الكريم المخطأ و بكل امانه زوجتك والوضع غير طبيعي وانت ماشالله عليك ماقصرت ولكن هل هذا طبعها دائما ولا صار زعل بينكم قبل السفر؟؟

اشكر لكم تجاوبكم ...
هنااااوي ... انا قبل اسافر باسبوع أو اثنين قلت لها ايش رايك ودي أروح عمره واغير جو في جده يومين وأبيكي معي انتي وانا بس والعيال نخليهم بالبيت عندهم شغالتهم واجيب امي تقعد وياهم ... قالت يوه تعب وين انا والروحه ( مافهمت اش تقصد ) كانك بتروح تعتمر يمديك تروح وتجي بنفس اليوم ترا كلها بالطياره ومدري مين راح اعتمر سافر الصبح ورجع المغرب , قلت ودي نعتمر انا وانتي ونقضي اليومين بجده قالت يا الله لك الحمد تبينا ننقض عمرتنا نقعد بجده ... هنا حسيت الارض تلف تلف فيني قلت على قولتك انسي خلاص ... وبعدها قلت اروح بس خصوصاً اني مش من الناس راعين السفريات برا قناعتي كذا اني لو بسافر برا لازم زوجتي تكون معي والا بلاش وهي ماتشجع انه ينسافر فيها برا ... واللي خلاني افكر بروحة جده لأني سنتين ماطلعت من المنطقة .
عابرة سبيل طبعها للأسف هذا هو ومن زمان وحاولت بكل اللي أقدر عليه أعدل منها ماقدرت ... واما الزعل قبل السفر مافيه زعل نهائياً .
اشكر لكم تجاوبكم مرةً أخرى

بصراحه مادري وش اقول بصراحه صدمه ان يكون الرجل هو اللين الهين السلس الرومانسي ويحب السفر والهدايا والزوجه المرأه الانثى تكون عكس هذا تماما!!!!!!!!!!
دامك حاولت بكل اللي تقدر عليه اذا مافيه غير

الزوجه الثانيه...ولكن قول فقط وتهديد
وانت اختار الطريقة اللي تشوف انها ممكن تأثر فيها اكثر اما:
تقولها لها مباشرة انا افكر اتزوج لوماتغيرتي
او تكتب خاطره في ورقه او دفتر خاص فيك وحطه بمكان ممكن توصله اكتب انك تعاني وتعبت و صفات الزوجه التي تمنيتها والزوجه التي انصدمت فيها
او لو في احد من اخواتك قولها ابي امزح مع ام العيال قوليلها اخوي يطلبنا اندور له عروس وخلها بنهاية الكلام تقولها امزح معك.. لفاتحتك قول يوووووه انا وصيتها ماتقول ولقالت اجل جد؟ قولها ليش وش قالتلك ؟لقالت انها تمزح قول ايه نمزح. بس هي ماراح تنساها وتبدأتحاسب نفسها.
وشوف انت هذا مثال وانت لك الخيار انت ادرى بزوجتك بس صدقني الحرمه مايحرق قلبها غير طاري حرمه غيرها وهذي نقطة ضعفنا وهي باين عليها تغار عليك من سردك للقصه فانت مالك الا هنقطة تضغط عليها...والله اني مره حلمت بس مجرد حلم ان زوجي اعرس علي والله قمت ودموعي على خدودي وجلسة فترة طويله وانا جدا متأثرة!!!!!!!!!! وقوله اجل بتعرس ها وهو يضحك ويقولي صحيح انكم ناقصات عقل هذا حلم حلم........
الله يهدي زوجتك ويسخر لك قلبها

عابرة سبيل اشكر لكي ردك ودعوتك ... اما موضوع الزوجه الثانيه انا ادري ان مافيه حل الا هو اما اني اكلم خواتي ومدري ايش هذي بتصير مشكله وانتي تعرفي حساسية الزوجه والخوات ...
على فكره صار الزواج وبعد ما انبهروا بشياكتها قالت الله يعطيك العافيه عندك ذوق ولو يسألك أحد عن القيمه تراي قلت شريته ب 400 ريال قلت محد سائلني لكن قولتك الله يعطيني العافيه مو متأخره شوي بس شهرين تأخرت قالت اصلاً انا كنت زعلانه وش مزعلك قالت وش عندك تروح وبعدين ماشاورتني تشتري لي والا لا قلت عموماً انا الشي اللي اسويه ما انتظر شكر عليه اذا كنت احس انه صح وطبعاً الكلام هذا بعد ماجينا من الزواج وكنت ذاك اليوم موديها الكوافير تسريحه ومكياج وكنت ناوي نكمل السهره بالبيت وجلسنا بالصاله سواليف كلنا وساعه تقريباً قلت للاولاد ننام المهم دخلنا الغرفه وانا كان احساسي يقول انها بتشيل كل شي بس قلت لا وقلت ماني قايل لها بشوف وش بتسوي عشان لا أظلمها ولا ودي اقول لها وانا ما ادري وش عندها وعشان اعرف وش بتسوي وش اللي بتشوفه صح دخلنا الغرفه وعلى طول لدورة المياه وطلعت علي بفوطتها تمسح وجهها ورابطه شعرها انقهرت وعلى طول طلعت من البيت وشافتني البس ملابسي وقالت لي ليش ماتنام بعد هالتعب الواحد بس يبي الأرض قلت مافيني نوم سكتت حطت راسها ونامت !!!

السلام عليكم
اخي انت صارحتها؟.. احس انك من نفس نوعيتي نحط في بالنا شي و بعدين ننصدم ان العكس ما حصل.. كثير من الاحيان اتصور موقف اتمناه من زوجي ويخذلني ليس بقصد منه بس هو مو داري
يعني خلك مباشر اتوقع زوجتك من هذه النوعية .. انا صرت استخدم هذا الاسلوب مثل الاطفال اذا زوجي قالشيء او عمل شيء يجرحني اصارحه في وقتها و بالغالب يكون الموقف من غير قصد

الله يهديكم و يسعدكم

اخي لا تستغرب كلامي لكن اعتقد انة زوجتك تغار عليك

بدليل تقول لك دخلت السوق

اخي حاول تركز على ان تعطيها الثقة وانها هي كل حياتك

ومهما شفت من النساء ستظل هي كل شيء

حسسها بالاحساس هذا وصدقني راح تتغير معاملتها لك

هي الظاهر كانت ما تبيك تسافر عشان كده ما استقبلتك كويس

ربما تسمع من النساء قصص عن ازوجاهم وطلعاتهم وقصص السوق

عيب اغلب النساء تتأثر بما تسمعه

مافي احلى من المصارحة اختر وقت مناسب وحاول تجلس معها وبتعرف منها ليه تصرفت كذا

المرأة ان اعطيتها اهتمام وغرست فيها الثقة بحبك لها راح تعطيك اضعافه

وانت اخي ما قصرت بشيء من خلال كلامك ربما هناك سوء فهم بينكما ويحتاج لمصارحه لا اكثر

الله يسعدكما ويهدي سركم

المشكلة مشكلتك وليست مشكلتها

المثل يقول (الخيل بخيالها والمرأة برجالها)

مشكلتك انك ماتظهر لها عيوبها وتنبهها على الشيء المزعجك في لحظتها علشان تغير أسلوبها وتتعلم

فيه حريم كذا من طيبتها تتصرف بطبيعتها وماتنتبه لأن تصرفاتها ممكن تزعل غيرها

علشان كذا المفروض أول ماجبت لها الهدية وكان هذا أسلوبها وردها تأخذ منها الهدية وماتعطيها لها

والعشاء المفروض تعصب عليها وتقول لها الحرمة السنعة اللي تستاهل الهدايا المفروض تكون مستقبلة زوجها وهو راجع من السفر بالأحضان وبروائح البخور وبالإبتسامة وبالعشاء الزين........مو مثلك





ويوم رجعت من الزواج وغسلت وجهها المفروض تقول لها مباشرة وتبين زعلك وتقول لها أنا أخسر وأشتري لك أحلى لبس وأوديك للكوافيرة علشان الناس بس وما تجلسي لي بزينتك لنهاية سهرتنا؟؟

وتخرج من البيت وأنت زعلان بعد مابينت لها السبب علشان تراجع نفسها


مو أنت كذا خرجت زعلان وهي ماتدري أنك زعلان وتظنك رايح تسهر علشان كذا نامت مرتاحة وأنت منكد على نفسك



في الختام :


لابد ان تعلم أن اهم نقطة في الزواج بعد الإحترام هي المصارحة


وإذا بعد المصارحة معها ماغيرت أسلوبها عندها لكل حدث حديث مالك إلا التلويح بالجديدة وفقط تلويح بان تقول لها سأبحث عن زوجة تهتم بي أكثر منك وتسعدني وعندها ستتغير غصبببببببب

__________________