السلام عليكم ورحمة الله وبركاته

أنا تم عقد قراني من فتره طويلة جداً وزواجي لم يبقى عليه الا القليل وعندي مشكلة كبيرة جداً خلتني افكر اني افسخ الخطبة ولكن مقهورة لانه لم يبقى على زواجي الا فتره ليست بالطويلة واحب زوجي كثيرا واهو بالمثل ومرتاحين من كل النواحي ولكن المشكلة فيني وهي ...
زوجي دكتور وتخصصه يكون مرضاه من الحريم اكثر من الرجال وانا طبعي غيور جداً مااقدر اشوف بنت امامي تقعد تدلع ولا تستعرض وزوجي معي ..
والمشكلة انه صاحبتي قالت لي اول ماتقدم لي زوجي بأنه انا غيورة جدا بحكم انها تعرفني وتعرف اطباعي
وكنت اقول (لا) لانه اعجبت في اخلاقه ومايعيبه ولا شي اخلاق وعيله وكل شي
بس الى الان متضايقه مااكون مرتاحة طول الوقت اللي يكون اهو بالدوام احس انه على اعصابي
اخاف انه وحده من بنات ابليس تقعد تلعب في مخه وتقعد تتدلع وتتميع ومدري ايش تسوي !!!

كيف اعالج التفكير هذا لانه ابتدأ يخليني اسرح طول الوقت اللي اكون معه فيه واهو يتضايق كل مرة يسألني فيكي شي ؟
وانا اقوله سلامتك !!
بس اهو يتضايق وكل مرة يسألني لانه يخاف انه ضايقني بدون مايشعر وبكذا احس بتأنيب الضمير لانه اضايقه واهو ماسوى فيني شي والمشكلة مو فيه وانما فيني وفي تفكيري السلبي اللي كرهت نفسي بسببه !!

ايش اسوي الله يخليكم ساعدوني
قبل لاتوصل المسألة الى شي كبير اندم عليه بعدين وانا ماودي افرط في زوجي لانه بصراحة ماضايقني بشي ابداً , ولكن المشكلة انه هالتفكير هذا يمكن يفتح لي باب للمشاكل اللي مالها اخر ومن ضمنها الشك وعد الثقة

معلومة : انا على فكرة كنت عايشه في وضع مليان بالشكوك والظن الخطأ بين الوالدين كان والدي ووالدتي دايما يفسروا تصرفات بعض بشكل سلبي وكانت دايما والدتي تشك في الوالد والعكس ولما كنت اسمع خناقاتهم تعقدت وللأسف ودي مااعيش هذا الشي في بيتي بالمستقبل فالله يخليكم حلوا لي مشكلتي مااريد اعيش وضع مثل وضع اهلي بالماضي اريد اثق في زوجي ومايجي التفكير هذا في بالي كييييييييف!!!!!!!!
وانا ليش متضايقه ؟؟ لانه احس بانه زوجي ووالدي نفس الوضع كلاهما من عيلة واخلاق ولو تسأل اي احد يقول لك ماعليهم كلام ماشالله وبالاضافه انه كنت اثق والدي ثقة عمياء ومع ذلك مرة كم مرة سمعته يكلم وحده ويقول لها كلام حلو( طبعا من هاللي معاه بالعمل بنات ابليس ) كنت صغيرة شوي ولكن هالشي اثر فيني بشكل كبير تعقدت , تضايقت , كرهت نفسي , جات فتره مااقدر اطالع بوجهه ولا اريد اشوفه ومع الوقت صرت مااثق في احد ,, اي واحد يكلم تلفون بصوت خفيف يجي على بالي انه يكلم وحده وومن هذا القبيل شسوي ؟؟؟؟؟؟؟؟؟؟؟؟؟
ساعدوا اختكم لاتخلوها محتارة خلوا زواجي يجي واهي واثقه من زوجها ومرتاحه البال تمام الراحه ...

يعني من رايكم اني اصارح زوجي واقوله انه انا بعض الاحيان افكر في امر وودي انك تسمعه يمكن انك تريحني بكلامك !
وبعدين اقوله انه انا بعض الاحيان اشعر بالغيره واخاف من بنات هالايام وانت عارف اش قد هم مثل ابليس ...
او من رايكم انه ماابين له موضوع الغيره افضل عشان ماافتح باب بهذا الشي خاصه وانا ماكلمته فيه ولا مرة ويمكن الرجال اذا كلمتهم عن شي يركزون عليه ويعتقدوا انه في اي لحظة اذا كانت الزوجة سرحانه او متضايقه انها تفكر بنفس الموضوع ويمكن يسبب مشاكل اكثر والافضل انها تسكت ومع الوقت يمكن تشعر بالثقه لوحدها بدون ماتبين لزوجها نقطه ضعفها؟؟؟
ايش الافضل انه اصارحه باللي في خاطري او الافضل انه اسكت عشان ماافتح باب لهذا الموضوع وافتح باب لنقاشات يمكن توصل الى الشك او ماشابهه ؟؟؟
اش رايكم
ساعدوني !!!
وخاصه الرجال هل تفضلوا انه الزوجه تناقشكم بموضوع مثل هذا ؟؟ هل عادي بالنسبة لكم او يضايقكم ؟؟
وهل تفضلوا انه الزوجة تكون صريحة بكل شي او في امور مثل هذا الامر الافضل السكوت عنه عشان يمكن يسبب مشاكل او ايــــــــش؟