السلام عليكم يا اخوان ويا اخوات

مشكلتي ما اعتبرها مشكلة بالنسبة للمشاكل اللي اشوفها هنا , والله يعين الجميع

مشكلتي مع السناب شات ومشاهير السناب شات ,

اولا انا متزوج من 6 شهور , عمري 28 وزوجتي عمرها 19

هي من المتابعين للسناب شات وخاصة هؤلاء الشباب المشاهير , انا صراحة اغار وبشدة لما تتفرج عليهم وتتابعهم , لكن اكتمها في نفسي لعدة اسباب :

اولا : زوجتي ما زالت صغيرة , واغلب من هم في سنها يتابعون السناب , وما ودي اضغط عليها واحسسها اني مضيق عليها

ثانيا : ما اعتقد انها تتابع لأجل انها معجبة بهم , بحكم انها " بحسن نية " تجيني وتقلي شوف تابع هذا الحساب يصور حاجات جميلة , او يصور يومياته وهكذا .

انا من الناس اللي ما اتابع السخافات هذه , ولا اعترف بشهرتهم ابدا , خصوصا اللي ما عنده محتوى وكل تصويره مجرد يوميات عادية وحاجات سخيفة مالها داعي .

بالرغم اني لمحت لزوجتي اني اتضايق اشوفها تتابع الشباب هذولا , وقلت لها ايش موقفك اذا انا تابعت بنات على السناب ؟ سكتت وما جاوبت , فهمتها انه انا ما ارتاح لما اشوفك تتابعيهم وفي نفس الوقت ما ابي اضيق عليك , حاولي تخففين من متابعتهم عشاني .


سؤالي هنا: هل يحق لي امنعها تتفرج عليهم ؟ هل يحق لي اغضب وازعل واسوي مشكلة عشان الشي هذا؟ انا داخليا مقتنع انه ضروري البنت اذا تزوجت المفروض تحترم زوجها ومشاعره وتبطل تتفرج عليهم , ولكن كما اسلفت ما ودي اضيق عليها .

ما استغني عن ارائكم

يحق لك ولأي رجل يغار على اهله وخاصه من سنابجات التعيس ، وتويتر واقلهن ضرر انستغرام ، والله ابتلينا بالبرامج والاجهزه الحديثه صارت سبب من اسباب الطلاق ، اذكر احد المقبلين على الزواج من شروطه ان لايكون لديها حسابات ببرامج التواصل الاجتماعي مثل سنابجات وغيره ، لابد تصارحها ليس من المرؤه متابعة المترديه والنطيحه ، والي يتميلحون ويتغنج كأنه ،،،،،! هذا من خوارم المرؤه والله المستعان ......!

__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي

اغلبهم ماعندهم موضوع وسنابات دون محتوى او فكره او فائده
تصوير يوميات روتينيه وتصنع لابعد الحدود ..
خلها تصرف نظرها لمتابعة اشيا مفيده .. وان لا تكرس جل وقتها خلف مواقع التواصل الاجتمااعي وان تكرس اغلب وقتها لك وللبيت ..

اخي الكريم.. بتفرق كثير اذا الحساب فيه يوميات وبس.. واذا كانو يحطون صورهم ويستعرضون فيها..

عموما انا ماعندي سنابجات.. بس عندي حساب بالفيس ولا اصادق شباب ابدا.. مشاء الله فيه كثسر بنات نتابعهم وصفحات مفيدة ليش الشباب يعني؟ وصدقني زوجتك بتفهم هاي النقطة..


كما قلت شوف بالاول اذا مجرد تصوير شغلات.. او انه استعراض لاجسامهم واشكالهم..

هي تتابع شباب وبنات , اغلبهم تصوير يوميات عادية , يعني فلان سافر فلان راح مطعم فلان قاعد يتكلم في فلان , فلان ينكت , فلان يستهبل , فيه بعض الحسابات كويسة ومفيدة , بس الغالبية مع الاسف ما عندهم سالفة , وهذا حال الاغلب مع الاسف , واغلب البنات الان يتابعوهم وهم عارفيه ما عندهم سالفة ,


انا الى الان ما امرتها تبطل تتفرج عليهم ,, مجرد تلميح فقط

بس سؤالي : هل اذا منعتها تماما عن متابعتهم , تشوفو فيها تضييق ؟ هل تشوفو انه تشدد بزيادة ؟ هل اعطيها وقتها وتعقل مع الوقت ؟ خصوصا انها صغيرة في السن

وليه اخوي تمنعها
هي ماشافت شي حرام
ولا اطلعت على مفاتن الرجال
وانت بنفسك تقول نيتها سليمة
وكل جيل هالوقت يتابعون مشاهير!

اذا هي يوميات
تراها زي يوميات قناه بدايه
وبرامج التلفزيون هالوقت
وياما ناس ملتزمين ودعاة وصالحين فيها
وهي ماعملت شي من وراك
يعني ماهي جالسه تغلط

والله ان بعض حسابات سنابشات
فيها فوايد عظيمه
دينيه ونفسيه واجتماعيه


اخوي انت كزوج لك حق الطاعه
لكن لا تتسلط على البنت
مشاعرك منجرفه لانكم لسى عرسان
بكرا امور كثيرة بتهدى بينكم
فأنت لا تدخل هالشكوك وسوء الظنون
خصوصا واضح ان زوجتك وحده عاقله

بعدين اذا هي جالسه بالبيت
ايش تبغاها تعمل بوقت الفراغ؟
ترى هالامور تسلي
خلها ترفه عن نفسها شوي

-----------------

ولهذا السبب بالضبط انا الى الان اعطيتها وقتها وحريتها , ما منعتها عن شي , لأنه هذا حال الاغلب الان , بس يا اخت كنافة , اذا زوجك تابع حسابات يوميات بنات , هل تتضايقي بصراحة ؟

قيسي ردك هذا على نفسك

في نظري أنها ميول للاهتمام بمثل هذه السنابات مثل بنات جيلها، عادة البنات الصغار يحبون ويلفت انتباههم مثل السنابات التي لامعنى لها عندك، والميل لتلك الاهتمام أخذته من بنات جيلها وزميلاتها.

صحيح أن كثير منها لافائدة منه، ولكن إذا تريد نصيحتي أجعلها تحمل تطبيق (موجز) جميع السنابات التي فيها هي مفيدة وتعليمية وثقافية، وأنصحكَ أنتَ وغيرك أيضاً بتحميله، فشخصياً استفدت منه ويطرح فيه مواضيع مهمة كثير، ولا أدري هل زوجتك سيعجبها ذلك أم لا، وتذكرت بالمناسبة كنا نهوى لعب الكورة أنا وابناء جيراننا أو أخواني، فيأتي أبي ويقول أتركوا الكورة وروحوا أقروا قرآن بالمسجد، ومع ذلك كان طلبه ثقيلٌ علينا، لأنه يجلعنا نترك هوايتنا وماتحبه نفوسنا إلى أن (ننطق) بالمسجد ونقرأ القرآن بالغصب وفكرنا كله بالكورة ، وأخشى أن يحدث ذلك مع زوجتك، لأن النفس غالباً تتوق لما يسليها وحتى لو لم يقتنع به الأخرين.

__________________
ياصبحِ لاتِقبل !!
عط الليل من وقتك..

ايه يتابع بنات
وانا عطيته حساب ثنتين من عندي
وحده مصممه ديكور تعرض تصاميمها
ووحده سيده اعمال تعطي نصايح
لاني كنت حابه اصرفه عن المغنيات والفيشانيستا

بالنهايه ماعندي مشكله
يتابع بعلمي احسن مايتابع من وراي

لكن اكون صادقه معك
اتضايق من شغله وحده
لما يمدح فلانه اللي يتابعها
او يقول موتتني ضحك دمها خفيف
او البس شي ويقول واو صرتي شبه فلانه

هالتعليقات البايخه ارد عليها بوقتها
بليز لا تقول كذا
وخلاص

اذا زوجتك مالها بهالاستفزازات
خلاص اتركها
مصيرها تمل
تراها هبات كل فتره يطيحون بشي

انا زوجي كانعني اتابع رجال في الانستقرام مازعلت لأنه بالمقابل مايتابع بنات .. ولأنه مابينقص من حياتي شي اذا ماتابعتهم،
اما السناب فأنا بنفسي حصرته للأهل والصديقات ولا اتابع غريب أبدا لأني احسه بياخذ من وقتي كثير..

ممكن تكلمها وتبين لها غيرتك وانك ودك لو ماتتابعهم .. لكن لا تفرض عليها لأن القوة والاجبار تسبب ردة فعل عكسية ..